"ಕೃಷ್ಣಂ ವಂದೇ ಜಗದ್ಗುರುಂ" — ಪ್ರತಿಯೊಬ್ಬರ ಭಾವನೆಗಳಿಗೆ ತಕ್ಕಂತೆ ಬಂದು ಹೃದಯ ಮಂದಿರದಲ್ಲಿ ನೆಲೆಸುವ ಅನನ್ಯ ಸಖ ಶ್ರೀಕೃಷ್ಣ. ಆನೆ (ಗಜೇಂದ್ರ) ಮೊರೆಯಿಟ್ಟಾಗ ಲಕ್ಷ್ಮೀದೇವಿಗೂ ತಿಳಿಸದೆ ಧಾವಿಸಿ ಬಂದವನು, ನಂಬಿದ ಭಕ್ತರ ಆಪತ್ತಿಗೆ ಓಡೋಡಿ ಬರುವ ಅನಾಥಬಂಧು. ಶ್ರೀಕೃಷ್ಣ ಜನ್ಮಾಷ್ಟಮಿಯ ಈ ಶುಭ ಸಂದರ್ಭದಲ್ಲಿ, ಆತನ ಲೀಲೆಗಳ ಹಿಂದಿರುವ ಜೀವನಮೌಲ್ಯಗಳನ್ನು ಸ್ಮರಿಸುವುದು ಅತ್ಯಂತ ಪ್ರಸ್ತುತ.
ಭಕ್ತಿಗೆ ಒಲಿಯುವ ಭಗವಂತ:
ಕೃಷ್ಣನ ತುಲಾಭಾರದ ಪ್ರಸಂಗವು ಜಗತ್ತಿಗೆ ಅತ್ಯಂತ ಸರಳ ಹಾಗೂ ಆಳವಾದ ಸತ್ಯವೊಂದನ್ನು ತಿಳಿಸಿಕೊಡುತ್ತದೆ. ಸತ್ಯಭಾಮೆಯು ಕೃಷ್ಣನಿಗಿಂತ ಹೆಚ್ಚು ತೂಕದ ಧನಕನಕಗಳನ್ನು ತಕ್ಕಡಿಯಲ್ಲಿಟ್ಟರೂ, ಕೃಷ್ಣ ಕುಳಿತಿದ್ದ ತಕ್ಕಡಿ ಮೇಲೇಳಲೇ ಇಲ್ಲ. ಆದರೆ ರುಕ್ಮಿಣಿಯು ಸಂಪೂರ್ಣ ಭಕ್ತಿಯಿಂದ ಇಟ್ಟ ಒಂದು ತುಳಸೀದಳಕ್ಕೆ ಆ ತಕ್ಕಡಿ ಸಮತೋಲನಕ್ಕೆ ಬಂತು. ಭಗವಂತ ಧನ, ಕನಕ ಅಥವಾ ಆಡಂಬರಕ್ಕೆ ಒಲಿಯುವುದಿಲ್ಲ; ಆತ ಒಲಿಯುವುದು ಕೇವಲ ನಿಷ್ಕಲ್ಮಶ ಭಕ್ತಿಗೆ ಎಂಬುದನ್ನು ಈ ಘಟನೆ ನಿರೂಪಿಸುತ್ತದೆ.
ನಿರಂತರ ಸಾನ್ನಿಧ್ಯದ ನಿರೀಕ್ಷೆ:
ಜೀವನದಲ್ಲಿ ಕಷ್ಟ-ಸುಖ, ನೋವು-ನಲಿವು, ಏಳು-ಬೀಳುಗಳು ಸಹಜ. ಹಲವೊಮ್ಮೆ ಅನಾಥಪ್ರಜ್ಞೆ ಕಾಡುವುದುಂಟು. ಆದರೆ ಸರ್ವಶಕ್ತನಾದ ಜಗನ್ನಾಥನಿರುವಾಗ ನಾವು ಅನಾಥರಾಗಲು ಹೇಗೆ ಸಾಧ್ಯ? ಲೌಕಿಕ ಬಂಧನಗಳಲ್ಲಿ ನಾವು ಪ್ರೀತಿಪಾತ್ರರನ್ನು, ಬಂಧು-ಮಿತ್ರರನ್ನು ಎಷ್ಟೇ ಹತ್ತಿರದಿಂದ ಬಯಸಿದರೂ ಕಾಲ ಅಥವಾ ಪರಿಸ್ಥಿತಿ ನಮ್ಮನ್ನು ದೂರಮಾಡುತ್ತದೆ. ಆದರೆ ನಮ್ಮನ್ನು ಎಂದಿಗೂ ತೊರೆಯದವನು, ತೊರೆಯಲು ಸಾಧ್ಯವಿಲ್ಲದವನು ಆ ಭಗವಂತ ಒಬ್ಬನೇ.
ಪ್ರತಿದಿನ ಲೌಕಿಕ ಆಸೆ-ಆಕಾಂಕ್ಷೆಗಳಿಗೆ, ಸುಖ-ಭೋಗಗಳಿಗೆ ಸಮಯ ನೀಡುವ ನಾವು, ಈ ದೇಹವನ್ನು ನೀಡಿ ಸಲಹುತ್ತಿರುವ ಭಗವಂತನ ಸ್ಮರಣೆಗೆ ಆಲಸ್ಯ ತೋರುತ್ತೇವೆ. ನಮ್ಮ ಶರೀರದಲ್ಲಿ ಪ್ರತೀಕ್ಷಣವೂ ಉಸಿರಾಟದ ಮೂಲಕ 'ಹಂಸ ಮಂತ್ರ'ವನ್ನು ಜಪಿಸುತ್ತಿರುವ ಆ ಭಗವಂತನ ಕೃಪೆ ಅರೆಕ್ಷಣ ತಪ್ಪಿದರೂ ಜೀವನದ ಗತಿಯೇ ಬದಲಾಗುತ್ತದೆ. ಅನಾರೋಗ್ಯದ ಸಮಯದಲ್ಲಿ ನೆಂಟರು-ಬಂಧುಗಳು ದೂರವಾಗಬಹುದು, ಆದರೆ ಪ್ರತಿಯೊಂದು ಕ್ಷಣದಲ್ಲೂ ನಮ್ಮ ಜೊತೆಗಿದ್ದು ಸಲಹುವವನು ಭಗವಂತ ಮಾತ್ರ. ಆದ್ದರಿಂದ ಈ ಜನ್ಮವನ್ನು ಸತ್ಕರ್ಮಗಳು, ದಾನ-ಧರ್ಮ ಹಾಗೂ ಅಸಹಾಯಕರಿಗೆ ಸಹಾಯ ಮಾಡುವ ಮೂಲಕ ಸಾರ್ಥಕಗೊಳಿಸಬೇಕಿದೆ.
ಜೀವನಕ್ಕೆ ಹಾದಿದೀಪ: ಭಾಗವತ ಹಾಗೂ ಲೀಲೆಗಳು
ಸಾಕ್ಷಾತ್ ವಿಷ್ಣುವಿನ ಅವತಾರರಾದ ವೇದವ್ಯಾಸರ 'ಭಾಗವತ' ಹಾಗೂ 'ಮಹಾಭಾರತ' ಗ್ರಂಥಗಳು ಮಾನವ ಜೀವನಕ್ಕೆ ಅಗತ್ಯವಾದ ನಿಷ್ಠೆ, ಭಕ್ತಿ, ಧೈರ್ಯ ಮತ್ತು ಸ್ಥೈರ್ಯವನ್ನು ತುಂಬುವ ಮಾರ್ಗದರ್ಶಿಗಳಾಗಿವೆ.
ಕುಂತಿಯ ಅನನ್ಯ ಭಕ್ತಿ: ಪ್ರತಿದಿನ ಕಷ್ಟಗಳನ್ನೇ ಎದುರಿಸಿದ ಕುಂತೀದೇವಿ ಕೃಷ್ಣನಲ್ಲಿ ಮತ್ತೆ ಕಷ್ಟಗಳನ್ನೇ ಬೇಡುತ್ತಾಳೆ. ಏಕೆಂದರೆ ಕಷ್ಟದ ಸಮಯದಲ್ಲಿ ಭಗವಂತ ಸದಾ ಜೊತೆಗಿರುತ್ತಾನೆಂಬುದು ಆಕೆಯ ನಂಬಿಕೆ. ಸ್ವಲ್ಪ ಕಷ್ಟ ಬಂದರೂ ದೇವರನ್ನು ನಿಂದಿಸುವ ಪ್ರವೇಶದ ನಡುವೆ, ಕುಂತಿಯ ಭಕ್ತಿ ನಮಗೆ ಮಾದರಿ.
ನಿಷ್ಕಲ್ಮಶ ಸ್ನೇಹ ಹಾಗೂ ಸತ್ಕಾರ: ಸುಧಾಮನ ಸುಮ್ಮನೆ ತಂದ ಮುಷ್ಟಿ ಅವಲಕ್ಕಿಯನ್ನು ಪ್ರೀತಿಯಿಂದ ಸ್ವೀಕರಿಸಿದ ಕೃಷ್ಣ, ಸ್ನೇಹದ ಪವಿತ್ರತೆಯನ್ನು ಮೆರೆದನು. ರಾಜಸೂಯ ಯಾಗದಲ್ಲಿ ಬಂದ ಅತಿಥಿ ಹಾಗೂ ಬ್ರಾಹ್ಮಣರ ಎಂಜಲೆಲೆ ತೆಗೆದು, ಸೇವೆಯ ಸರಳತೆಯನ್ನು ತೋರಿಸಿಕೊಟ್ಟನು.
ಕೃಷ್ಣತತ್ವ ಹಾಗೂ ಗೋಪಿಕೆಯರ ಭಕ್ತಿ: ಗೋಪಿಕೆಯರ ವೇಣುನಾದದ ಮೋಹ, ಲೌಕಿಕ ಬಂಧನಗಳನ್ನು ಮೀರಿದ ಪರಮ ಭಕ್ತಿಯ ಸಂಕೇತ. ಕೃಷ್ಣನು ತನ್ನ ಸ್ವರೂಪದಿಂದ ಭಕ್ತರ ತಾಪವನ್ನು ತಣಿಸಿ, ಪರಬ್ರಹ್ಮದ ಆನಂದವನ್ನು ಉಣ್ಣಿಸಿದನು.
ಧರ್ಮಸಂಸ್ಥಾಪಕ ಶ್ರೀಕೃಷ್ಣ:
ಶ್ರೀರಾಮನು 'ಮರ್ಯಾದಾ ಪುರುಷೋತ್ತಮನಾಗಿ' ಧರ್ಮದ ಚೌಕಟ್ಟಿನಲ್ಲಿ ರಾಜ್ಯವಾಳಿದರೆ, ಶ್ರೀಕೃಷ್ಣನು ಹುಟ್ಟಿನಿಂದಲೇ ತನ್ನ ಲೀಲೆಗಳನ್ನು ತೋರುತ್ತಾ, ಧರ್ಮವನ್ನು ರಕ್ಷಿಸಲು ಸೂತ್ರಧಾರಿಯಾದನು. ದುಷ್ಟತನವನ್ನು ಸದೆಬಡಿಯಲು ಕೃಷ್ಣ ಅನುಸರಿಸಿದ ತಂತ್ರಗಳು ಆತನನ್ನು ಧರ್ಮ ಪಕ್ಷಪಾತಿಯನ್ನಾಗಿ ತೋರಿಸುತ್ತವೆ. ಮೋಹಿನಿ ರೂಪ ತಾಳಿ ಅಮೃತ ಹಂಚುವಾಗಲೂ, ಒಳ್ಳೆಯ ವಸ್ತು ದುರ್ಜನರ ಪಾಲಾಗಬಾರದು ಎಂಬ ಸಂದೇಶ ನೀಡಿದನು.
ಕುರುಕ್ಷೇತ್ರ ಯುದ್ಧದಲ್ಲಿ ಅರ್ಜುನನು ಮಮಕಾರ ಹಾಗೂ ಮೋಹಕ್ಕೆ ಒಳಗಾಗಿ ಕುಸಿದು ಕುಳಿತಾಗ, ಶ್ರೀಕೃಷ್ಣನು ಮಾಡಿದ 'ಭಗವದ್ಗೀತೆ'ಯ ಉಪದೇಶವು ಇಂದು ಇಡೀ ಮನುಕುಲಕ್ಕೆ ಜೀವನದ ಕರ್ತವ್ಯ ಮಾರ್ಗವನ್ನು ತೋರಿಸುವ ಮಹಾಗುರುವಾಗಿದೆ.
ದೇವಕಿಯ ಗರ್ಭದಲ್ಲಿ ಜನ್ಮತಾಳಿದ ತಕ್ಷಣವೇ ವಸುದೇವ-ದೇವಕಿಯರ ಬಂಧನಗಳು ಕಳಚಿದವು. ಅಂದರೆ, ನಾವು ಸತ್ಯ, ನಿಷ್ಠೆ ಹಾಗೂ ಭಕ್ತಿಯಿಂದ ಭಗವಂತನನ್ನು ಉಪಾಸನೆ ಮಾಡಿದಾಗ, ನಮ್ಮ ಭವಬಂಧನಗಳೆಲ್ಲವೂ ಕಳಚುತ್ತವೆ. ಶ್ರೀಕೃಷ್ಣ ಜನ್ಮಾಷ್ಟಮಿಯ ಈ ಪರ್ವಕಾಲದಲ್ಲಿ ಭಗವಂತನ ಗುಣಗಾನ ಮಾಡುತ್ತಾ, ಆತನ ಕೃಪೆಗೆ ಪಾತ್ರರಾಗೋಣ.
– ಡಾ. ವಿದ್ಯಾಶ್ರೀ ಗೋವಿಂದ ರಾವ್ ಕುಲಕರ್ಣಿ, ಮಾನವಿ
ನಿರಂತರ ಅಪ್ಡೇಟ್ಗಳಿಗಾಗಿ ಉಪಯುಕ್ತ ನ್ಯೂಸ್ ಟೆಲಿಗ್ರಾಂ ಚಾನೆಲ್ಗೆ ಜಾಯಿನ್ ಆಗಿ
ಉಪಯುಕ್ತ ನ್ಯೂಸ್’ ಫೇಸ್ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್ ವಾಟ್ಸಪ್ ಗ್ರೂಪ್ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ
