ಜೆಟ್ ಎಂಜಿನ್ ‘ಡಿಜಿಟಲ್ ಟ್ವಿನ್’ ತಂತ್ರಜ್ಞಾನಕ್ಕೆ ಪ್ರಥಮ ಸ್ಥಾನ
ಸುರತ್ಕಲ್: ರಾಷ್ಟ್ರೀಯ ತಾಂತ್ರಿಕ ಸಂಸ್ಥೆ ಕರ್ನಾಟಕ (ಎನ್ಐಟಿಕೆ) ಸುರತ್ಕಲ್ನ ವಿದ್ಯಾರ್ಥಿಗಳ ತಂಡವು ಐಐಟಿ ಇಂದೋರ್ ಮತ್ತು ಹಿಂದೂಸ್ತಾನ್ ಏರೋನಾಟಿಕ್ಸ್ ಲಿಮಿಟೆಡ್ (HAL) ಸಂಯುಕ್ತವಾಗಿ ಆಯೋಜಿಸಿದ್ದ ರಾಷ್ಟ್ರೀಯ ಮಟ್ಟದ 'ಏರೋಥಾನ್ 2026' ಹ್ಯಾಕಥಾನ್ನಲ್ಲಿ ಪ್ರಥಮ ಸ್ಥಾನ ಗಳಿಸಿ ಸಾಧನೆ ಮಾಡಿದೆ. ದೇಶದಾದ್ಯಂತ ಭಾಗವಹಿಸಿದ್ದ 640ಕ್ಕೂ ಹೆಚ್ಚು ತಂಡಗಳನ್ನು ಮೀರಿಸಿ ಎನ್ಐಟಿಕೆ ವಿದ್ಯಾರ್ಥಿಗಳು ಈ ಗೌರವಕ್ಕೆ ಭಾಜನರಾಗಿದ್ದಾರೆ.
ಆಗಸ್ಟ್ 7 ಮತ್ತು 8ರಂದು ಐಐಟಿ ಇಂದೋರ್ ಕ್ಯಾಂಪಸ್ನಲ್ಲಿ ನಡೆದ 24 ಗಂಟೆಗಳ ಅಂತಿಮ ಸುತ್ತಿನ ಸ್ಪರ್ಧೆಯಲ್ಲಿ, ಅಂತಿಮ ಹಂತಕ್ಕೆ ಆಯ್ಕೆಯಾಗಿದ್ದ 20 ಪ್ರಮುಖ ತಂಡಗಳನ್ನು ಹಿಂದಿಕ್ಕಿ ಎನ್ಐಟಿಕೆ ತಂಡವು ₹50,000 ನಗದು ಬಹುಮಾನ ಹಾಗೂ ವಿಜೇತ ಟ್ರೋಫಿಯನ್ನು ತನ್ನದಾಗಿಸಿಕೊಂಡಿದೆ. ಈ ಹ್ಯಾಕಥಾನ್ಗಾಗಿ ದೇಶಾದ್ಯಂತ 2,300ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ನೋಂದಾಯಿಸಿಕೊಂಡಿದ್ದರು.
ಈ ಸಾಧನೆ ಮಾಡಿದ ತಂಡದಲ್ಲಿ ಮೆಕ್ಯಾನಿಕಲ್ ಎಂಜಿನಿಯರಿಂಗ್ ವಿಭಾಗದ ಪ್ರಿ-ಫೈನಲ್ ಇಯರ್ ವಿದ್ಯಾರ್ಥಿಗಳಾದ ಓಂಕಾರ್ ಖರಡೆ ಹಾಗೂ ಶುಭಂ ಶಾ, ಎಲೆಕ್ಟ್ರಾನಿಕ್ಸ್ ಮತ್ತು ಕಮ್ಯುನಿಕೇಶನ್ ಎಂಜಿನಿಯರಿಂಗ್ ವಿಭಾಗದ ದಿಯಾ ತಲ್ರೆಜಾ ಮತ್ತು ಮೆಕ್ಯಾನಿಕಲ್ ಎಂಜಿನಿಯರಿಂಗ್ ದ್ವಿತೀಯ ವರ್ಷದ ವಿದ್ಯಾರ್ಥಿ ಮ್ಯಾಕ್ಸನ್ ಡೇವಿಡ್ ನಜರೇತ್ ಇದ್ದಾರೆ.
ವಿಜ್ಞಾನ ಮತ್ತು ತಂತ್ರಜ್ಞಾನ ಆಧಾರಿತ ನೈಜ ಏರೋಸ್ಪೇಸ್ ಸವಾಲುಗಳಿಗೆ ಪರಿಹಾರ ಕಂಡುಕೊಳ್ಳುವ ಈ ಸ್ಪರ್ಧೆಯಲ್ಲಿ ಎನ್ಐಟಿಕೆ ತಂಡವು "ಫಿಸಿಕ್ಸ್-ಇನ್ಫಾರ್ಮ್ಡ್ ಡಿಜಿಟಲ್ ಟ್ವಿನ್ ಫಾರ್ ರಿಯಲ್-ಟೈಮ್ ಫೋರ್-ಸ್ಟೇಜ್ ಟರ್ಬೋಜೆಟ್ ಹೆಲ್ತ್ ಮಾನಿಟರಿಂಗ್" ಎಂಬ ವಿಷಯದ ಮೇಲೆ ಕಾರ್ಯನಿರ್ವಹಿಸಿತು.
ಈ ಯೋಜನೆಯಲ್ಲಿ ರಿಯಲ್-ಟೈಮ್ ಸೆನ್ಸರ್ ಡೇಟಾ ಮತ್ತು ಯಂತ್ರ ಕಲಿಕೆ (Machine Learning) ವಿಧಾನಗಳನ್ನು ಬಳಸಿಕೊಂಡು ಟರ್ಬೋಜೆಟ್ ಎಂಜಿನ್ಗಳಲ್ಲಿ ಉಂಟಾಗಬಹುದಾದ ತಾಂತ್ರಿಕ ದೋಷ ಹಾಗೂ ವೈಫಲ್ಯಗಳನ್ನು ಮುಂಚಿತವಾಗಿಯೇ ಊಹಿಸುವ ವ್ಯವಸ್ಥೆಯನ್ನು ರೂಪಿಸಲಾಗಿದೆ. ಈ ತಂತ್ರಜ್ಞಾನವು ವಿಮಾನ ಯಾನ ಸುರಕ್ಷತೆಯನ್ನು ಹೆಚ್ಚಿಸುವುದಲ್ಲದೆ, ಎಂಜಿನ್ ತಯಾರಕರು, ನಿರ್ವಹಣಾ ಸಂಸ್ಥೆಗಳು (MRO) ಮತ್ತು ಏರ್ಲೈನ್ಸ್ಗಳ ಸಮಯ ಹಾಗೂ ವೆಚ್ಚವನ್ನು ಗಣನೀಯವಾಗಿ ಉಳಿಸಲು ನೆರವಾಗಲಿದೆ.
ತಮ್ಮ ಈ ಆವಿಷ್ಕಾರವನ್ನು ಕೇವಲ ಸ್ಪರ್ಧೆಗೆ ಸೀಮಿತಗೊಳಿಸದೆ, ಮುಂದಿನ ಹಂತದಲ್ಲಿ ವಾಣಿಜ್ಯೀಕರಣಗೊಳಿಸಲು (Commercialization) ವಿದ್ಯಾರ್ಥಿಗಳ ತಂಡ ನಿರ್ಧರಿಸಿದೆ. ಈ ನಿಟ್ಟಿನಲ್ಲಿ ಏರೋಸ್ಪೇಸ್ ಹಾಗೂ ಏವಿಯೇಷನ್ ಕ್ಷೇತ್ರದ ತಜ್ಞರು ಮತ್ತು ಹಳೆಯ ವಿದ್ಯಾರ್ಥಿಗಳಿಂದ ಸೂಕ್ತ ಮಾರ್ಗದರ್ಶನ ಹಾಗೂ ಬೆಂಬಲವನ್ನು ಕೋರಿದ್ದಾರೆ.
ಉಪಯುಕ್ತ ನ್ಯೂಸ್ ಈಗ ಸ್ವದೇಶಿ ಸಾಮಾಜಿಕ ಜಾಲತಾಣ Arattai ನಲ್ಲಿ... ನಮ್ಮ ಚಾನೆಲ್ಗೆ ನೀವೂ ಜಾಯಿನ್ ಆಗಿ.
ನಿರಂತರ ಅಪ್ಡೇಟ್ಗಳಿಗಾಗಿ ಉಪಯುಕ್ತ ನ್ಯೂಸ್ ಟೆಲಿಗ್ರಾಂ ಚಾನೆಲ್ಗೆ ಜಾಯಿನ್ ಆಗಿ
ಉಪಯುಕ್ತ ನ್ಯೂಸ್’ ಫೇಸ್ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್ ವಾಟ್ಸಪ್ ಗ್ರೂಪ್ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ
