ಸಾಮಾಜಿಕ ಸಾಮರಸ್ಯಕ್ಕೆ ಒತ್ತು ನೀಡುವ ಹಾಗೂ ಅಭಿವೃದ್ಧಿಗೆ ಪ್ರೋತ್ಸಾಹ ನೀಡುವ ಜಾತ್ರೆಗಳು ಸಾವಿರಾರು ಸವಿನೆನಪುಗಳ ಸಾಗರ. ಈ ಸಾಗರದ ಒಂದು ಅಮೂಲ್ಯ ಮುತ್ತು ಹಾಗೂ ಪ್ರತಿಯೊಬ್ಬ ಮಗುವಿನ ಬಾಲ್ಯದ ಅವಿಭಾಜ್ಯ ಅಂಗವೆಂದರೆ ಅದು 'ಬಾರ್ಬಿ ಮ್ಯೂಸಿಕಲ್ ಸೆಲ್ ಫೋನ್'. ಗುಲಾಬಿ ಬಣ್ಣದ, ಬಾರ್ಬಿ ಗೊಂಬೆಯ ಚಿತ್ರವಿರುವ ಈ ಆಟಿಕೆಯ ಫೋನ್ ಎಂದರೆ ಮಕ್ಕಳಿಗೆ ಎಲ್ಲಿಲ್ಲದ ಪ್ರೀತಿ. ಊರಿನ ಜಾತ್ರೆಗೋ ಅಥವಾ ಪರವೂರ ಸಂತೆಗೋ ಹೋದಾಗ, ಅಪ್ಪ-ಅಮ್ಮನಲ್ಲಿ ಹಟ ಮಾಡಿ, ಅತ್ತು ಕರೆದು ಇದನ್ನು ಕೊಡಿಸಿಕೊಂಡ ನೆನಪು ಎಂದಿಗೂ ಹಚ್ಚಹಸಿರು.
ಇದು ಅತ್ಯಂತ ಕಡಿಮೆ ಬೆಲೆಯದ್ದಾಗಿದ್ದು (ಬಜೆಟ್ ಫ್ರೆಂಡ್ಲಿ), ಕೇವಲ 30 ರಿಂದ 100 ರೂಪಾಯಿಗಳ ಒಳಗೆ ದೊರೆಯುವುದರಿಂದ ಪೋಷಕರು ಕೂಡ ಹೆಚ್ಚು ಯೋಚಿಸದೆ ಇದನ್ನು ಕೊಡಿಸುತ್ತಾರೆ. ಇದರ ಬಟನ್ ಒತ್ತಿದ ತಕ್ಷಣ ಮೇಲಿರುವ ಸಣ್ಣ ಬಲ್ಬ್ ಮಿನುಗುತ್ತಾ, ವಿವಿಧ ಹಾಡುಗಳ ಮೂಲಕ ಸದ್ದು ಮಾಡುತ್ತಾ ಮಕ್ಕಳ ಮನಸೂರೆಗೊಳ್ಳುತ್ತದೆ. ಈ ಸೆಲ್ ಫೋನ್ ವಿಶೇಷವಾಗಿ ಹೆಣ್ಣು ಮಕ್ಕಳ ನೆಚ್ಚಿನ ಗೆಳೆಯ.
ಈ ಮೊಬೈಲ್ ಕೈಗೆ ಬಂದ ನಂತರ ಮಗುವಿಗೆ ಪ್ರತಿಕ್ಷಣವೂ ಒಂದು ಹಬ್ಬವೇ. ಮನೆಯವರು ಮೊಬೈಲ್ನಲ್ಲಿ ಮಾತನಾಡುವುದನ್ನು ನೋಡಿ, ಅದೇ ರೀತಿ ತಾನೂ ಫೋನನ್ನು ಕಿವಿಗೆ ಹಿಡಿದು ನಟಿಸುವುದು ದಿನಪೂರ್ತಿ ನಡೆಯುತ್ತದೆ. ಇದು ಕೇವಲ ಆಟಿಕೆಯ ವಸ್ತು ಮಾತ್ರವಲ್ಲ, ಮಗುವಿನ ಬೆಳವಣಿಗೆಯ ಭಾಗವೂ ಹೌದು. ನಿರ್ದಿಷ್ಟ ಬಟನ್ ಒತ್ತಿದಾಗ ಬರುವ ಹಾಡುಗಳು ಮಗುವಿನ ಕ್ರಿಯಾಶೀಲತೆ ಮತ್ತು ಏಕಾಗ್ರತೆಯನ್ನು ಹೆಚ್ಚಿಸುತ್ತವೆ. ಫೋನಿನ ದಾರವನ್ನು ಕೊರಳಿಗೆ ನೇತಾಡಿಸಿಕೊಂಡು ದೊಡ್ಡವರಂತೆ ಮಾತನಾಡಲು ಪ್ರಯತ್ನಿಸುವುದರಿಂದ ಮಕ್ಕಳ ಸಂವಹನ ಕಲೆಯೂ ಉತ್ತಮಗೊಳ್ಳುತ್ತದೆ.
ಒಟ್ಟಾರೆಯಾಗಿ, ಜಾತ್ರೆಗಳು ನೀಡುವ ಸಾವಿರಾರು ನೆನಪುಗಳ ಸಂತೆಯಲ್ಲಿ, ಹೆಣ್ಣು ಮಕ್ಕಳ ಮನಗೆದ್ದ ಈ 'ಬಾರ್ಬಿ ಮ್ಯೂಸಿಕಲ್ ಸೆಲ್ ಫೋನ್' ತನ್ನದೇ ಆದ ವಿಶಿಷ್ಟ ಸ್ಥಾನವನ್ನು ಪಡೆದಿದೆ.
- ಪ್ರಿಯಾ ಶ್ರೀವಿಧಿ
ದ್ವಿತೀಯ ಪತ್ರಿಕೋದ್ಯಮ ವಿಭಾಗ,
ವಿವೇಕಾನಂದ ಮಹಾವಿದ್ಯಾಲಯ ಪುತ್ತೂರು
ಉಪಯುಕ್ತ ನ್ಯೂಸ್ ಈಗ ಸ್ವದೇಶಿ ಸಾಮಾಜಿಕ ಜಾಲತಾಣ Arattai ನಲ್ಲಿ... ನಮ್ಮ ಚಾನೆಲ್ಗೆ ನೀವೂ ಜಾಯಿನ್ ಆಗಿ.
ನಿರಂತರ ಅಪ್ಡೇಟ್ಗಳಿಗಾಗಿ ಉಪಯುಕ್ತ ನ್ಯೂಸ್ ಟೆಲಿಗ್ರಾಂ ಚಾನೆಲ್ಗೆ ಜಾಯಿನ್ ಆಗಿ
ಉಪಯುಕ್ತ ನ್ಯೂಸ್’ ಫೇಸ್ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್ ವಾಟ್ಸಪ್ ಗ್ರೂಪ್ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ
