ಪಿತೃಪಕ್ಷದಲ್ಲಿ 'ಶ್ರಾದ್ಧ-ಪಿಂಡದಾನ' ಮಾಡುವುದು ಪಿತೃಋಣವನ್ನು ತೀರಿಸುವ ಒಂದು ಮಾರ್ಗವಾಗಿದೆ. ತಂದೆ-ತಾಯಿ ಮತ್ತು ಇತರ ಹತ್ತಿರದ ಸಂಬಂಧಿಕರ ಮರಣಾನಂತರದ ಪ್ರಯಾಣ ಸುಖಮಯವಾಗಿ ಮತ್ತು ಕಷ್ಟರಹಿತವಾಗಿರಲಿ, ಅವರಿಗೆ ಸದ್ಗತಿ ದೊರೆಯಲಿ ಎಂಬ ಉದ್ದೇಶದಿಂದ ಈ ಶ್ರಾದ್ಧ ಕಾರ್ಯವನ್ನು ಮಾಡಲಾಗುತ್ತದೆ.

ಶ್ರಾದ್ಧದ ಮಂತ್ರಗಳಲ್ಲಿ ಪಿತೃಗಳಿಗೆ ಗತಿ ನೀಡುವ ಸೂಕ್ಷ್ಮ ಶಕ್ತಿ ಅಡಗಿದೆ. ಆದರೆ ಕೆಲವರು 'ಶ್ರಾದ್ಧ ಬ್ರಾಹ್ಮಣರ ಹೊಟ್ಟೆ ತುಂಬಿಸುವ ವ್ಯವಸ್ಥೆ, ಮರಣಾನಂತರ ಪಿತೃಗಳಿಗೆ ದಾನ ಮಾಡುವುದಕ್ಕಿಂತ ಬಡವರಿಗೆ ಅನ್ನದಾನ ಮಾಡಿ' ಎಂದು ಟೀಕಿಸುತ್ತಾರೆ. ಪೂರ್ವಜರ ಬಗ್ಗೆ ಕೃತಜ್ಞತೆ ವ್ಯಕ್ತಪಡಿಸುವ ಈ ಪರಿಕಲ್ಪನೆ ಕೇವಲ ಭಾರತದಲ್ಲಿ ಮಾತ್ರವಲ್ಲ, ವಿದೇಶಗಳಲ್ಲಿಯೂ ಕೂಡ ಪಿತೃಗಳ ಶಾಂತಿಗಾಗಿ ವಿವಿಧ ಪದ್ಧತಿಗಳನ್ನು ಆಚರಿಸಲಾಗುತ್ತದೆ.

ಅವುಗಳಲ್ಲಿ ಪಿತೃಗಳ ಮುಕ್ತಿಯ ಶಾಸ್ತ್ರೋಕ್ತ ಪರಿಕಲ್ಪನೆ ಇಲ್ಲದಿದ್ದರೂ, 'ಪೂರ್ವಜರ ಬಗ್ಗೆ ಕೃತಜ್ಞರಾಗಿರಬೇಕು' ಎಂಬ ಭಾವನೆ ಖಂಡಿತಾ ಇದೆ. ಅನೇಕ ಪಾಶ್ಚಾತ್ಯರು ತಮ್ಮ ಪೂರ್ವಜರ ಮುಕ್ತಿಗಾಗಿ ಭಾರತಕ್ಕೆ ಬಂದು ಪಿಂಡದಾನ ಮತ್ತು ತರ್ಪಣ ವಿಧಿಗಳನ್ನು ಮಾಡುತ್ತಾರೆ. ಈ ಕಾರಣಕ್ಕಾಗಿ ಶ್ರಾದ್ಧ ವಿಧಿಗಳನ್ನು ಟೀಕಿಸುವವರಿಗೆ ಉತ್ತರ ನೀಡುವ ಮಾಹಿತಿಯನ್ನು ಇಲ್ಲಿ ನೀಡಲಾಗಿದೆ.

1. ಇತರ ಪಂಥಗಳಲ್ಲಿ ಪೂರ್ವಜರ ಆತ್ಮದ ಶಾಂತಿಗಾಗಿ ಆಚರಿಸಲಾಗುವ ಪದ್ಧತಿಗಳು

ಪಾರ್ಸಿ ಪಂಥ

ಪಾರ್ಸಿ ಸಮುದಾಯದ ಪ್ರಮುಖ ಹಬ್ಬವಾದ 'ಪತೇತಿ'ಯ ನಿಮಿತ್ತ ವರ್ಷದ ಕೊನೆಯ 9 ದಿನಗಳನ್ನು ಪಿತೃಗಳ ಶಾಂತಿಯ ದಿನಗಳೆಂದು ಆಚರಿಸಲಾಗುತ್ತದೆ. ಹತ್ತನೇ ದಿನ 'ಪತೇತಿ' ಹಬ್ಬವನ್ನು ಆಚರಿಸಲಾಗುತ್ತದೆ, ಈ ದಿನದಿಂದಲೇ ಪಾರ್ಸಿ ಹೊಸ ವರ್ಷ ಪ್ರಾರಂಭವಾಗುತ್ತದೆ. ಹಿಂದೂ ಸಂಸ್ಕೃತಿಯಲ್ಲಿ ಆತ್ಮವನ್ನು 'ಅಮರ' ಎಂದು ಪರಿಗಣಿಸುವಂತೆ, ಪಾರ್ಸಿ ಸಮಾಜದಲ್ಲೂ ಇದೇ ನಂಬಿಕೆ ಇದೆ. 'ಅವೆಸ್ತಾ' (ಪಾರ್ಸಿಗಳ ಧರ್ಮಗ್ರಂಥ)ದಲ್ಲಿ ಪಿತೃಗಳನ್ನು 'ಫ್ರಾವಶಿ' ಎಂದು ಕರೆಯಲಾಗಿದೆ ಮತ್ತು 'ಬರಗಾಲದ ಸಮಯದಲ್ಲಿ ಅವರು ಸ್ವರ್ಗದ ಸರೋವರಗಳಿಂದ ತಮ್ಮ ವಂಶಸ್ಥರಿಗಾಗಿ ನೀರನ್ನು ತರುತ್ತಾರೆ' ಎಂದು ನಂಬಲಾಗಿದೆ.

ಕ್ಯಾಥೋಲಿಕ್ ಪಂಥ

ಅಮೆರಿಕಾ, ಲ್ಯಾಟಿನ್ ಅಮೆರಿಕಾ ಮತ್ತು ಯುರೋಪ್‌ನ ಅನೇಕ ದೇಶಗಳಲ್ಲಿ ನವೆಂಬರ್ ತಿಂಗಳಲ್ಲಿ ಪಿತೃಗಳನ್ನು ತೃಪ್ತಿಪಡಿಸುವ ಪದ್ಧತಿ ಇದೆ. ಇದು ಪೂರ್ವಜರ ಆತ್ಮಕ್ಕೆ ಸಂಬಂಧಿಸಿದ ದಿನವಾಗಿದ್ದರೂ, ಇದನ್ನು ಒಂದು ಹಬ್ಬದಂತೆ ಆಚರಿಸಲಾಗುತ್ತದೆ. ಅಕ್ಟೋಬರ್ 31ರ ಸಂಜೆಯಿಂದ ನವೆಂಬರ್ 2ರ ರಾತ್ರಿಯವರೆಗೆ ಈ ಉತ್ಸವ ನಡೆಯುತ್ತದೆ. ಅಕ್ಟೋಬರ್ 31ರ ಸಂಜೆ 'ಹ್ಯಾಲೋವೀನ್ ಯಾತ್ರೆ' (ಇಲ್ಲಿ 'ಹ್ಯಾಲೋ' ಎಂದರೆ 'ಹೋಲಿ' ಅಥವಾ ಪವಿತ್ರ ಎಂಬ ಪದದ ಅಪಭ್ರಂಶ) ನಡೆಸಲಾಗುತ್ತದೆ. ನವೆಂಬರ್ 1 ರಂದು 'ಆಲ್ ಸೇಂಟ್ಸ್ ಡೇ' (ಎಲ್ಲಾ ಸಂತರುಗಳ ದಿನ) ಮತ್ತು ನವೆಂಬರ್ 2ರಂದು 'ಆಲ್ ಸೋಲ್ಸ್ ಡೇ' (ಎಲ್ಲಾ ಆತ್ಮಗಳ ದಿನ) ಇರುತ್ತದೆ.

ಬೌದ್ಧ ಪಂಥ

ಚೀನಾದ ಬೌದ್ಧ ಮತ್ತು ಟಾವೊ ಸಂಪ್ರದಾಯದ ಪ್ರಕಾರ, ಚೀನೀ ಕ್ಯಾಲೆಂಡರ್‌ನ 7 ನೇ ತಿಂಗಳ 15ನೇ ದಿನದಂದು ಪೂರ್ವಜರಿಗೆ ಸಂಬಂಧಿಸಿದ 'ಘೋಸ್ಟ್ ಫೆಸ್ಟಿವಲ್' (ಭೂತಗಳ/ಮೃತರ ಹಬ್ಬ) ಅಥವಾ 'ಯುಲಾನ್ ಫೆಸ್ಟಿವಲ್' ಅನ್ನು ಆಚರಿಸಲಾಗುತ್ತದೆ. ಇದು ಆಗಸ್ಟ್‌ನಿಂದ ಸೆಪ್ಟೆಂಬರ್ ತಿಂಗಳ ಅವಧಿಯಲ್ಲಿ ಬರುತ್ತದೆ. ಈ 7ನೇ ತಿಂಗಳನ್ನು 'ಘೋಸ್ಟ್ ಮಾಸ್' (ಭೂತಗಳ/ಮೃತರ ತಿಂಗಳು) ಎಂದು ಕರೆಯಲಾಗುತ್ತದೆ. ಈ ಸಮಯದಲ್ಲಿ 'ಸ್ವರ್ಗ ಮತ್ತು ನರಕದಲ್ಲಿರುವ ಪೂರ್ವಜರ ಆತ್ಮಗಳು ಭೂಮಿಗೆ ಬರುತ್ತವೆ' ಎಂದು ಅಲ್ಲಿ ನಂಬಲಾಗಿದೆ.

ವಿವಿಧ ದೇಶಗಳಲ್ಲಿ ಪೂರ್ವಜರ ಆತ್ಮಕ್ಕಾಗಿ ಆಚರಿಸಲಾಗುವ ಸಾಂಪ್ರದಾಯಿಕ ಪದ್ಧತಿಗಳು ಯುರೋಪ್ ದೇಶಗಳಲ್ಲಿ ಪಿತೃಗಳ ಶಾಂತಿಗಾಗಿ ವಿವಿಧ ಆಚರಣೆಗಳು:

ಬೆಲ್ಜಿಯಂ : ನವೆಂಬರ್ 2ರಂದು 'ಆಲ್ ಸೋಲ್ಸ್ ಡೇ'ಗೆ ರಜೆ ಇರದ ಕಾರಣ, ಹಿಂದಿನ ದಿನ ಅಂದರೆ 'ಆಲ್ ಸೇಂಟ್ಸ್ ಡೇ'ಯಂದು ಸ್ಮಶಾನಕ್ಕೆ ಹೋಗಿ ಪ್ರಾರ್ಥನೆ ಮಾಡುತ್ತಾರೆ ಮತ್ತು ಮೃತದೇಹಗಳ ಸಮಾಧಿಗಳ ಮೇಲೆ ದೀಪವನ್ನು ಹಚ್ಚುತ್ತಾರೆ.

ಪೋರ್ಚುಗಲ್ : ನವೆಂಬರ್ 2ರಂದು ಇಡೀ ಕುಟುಂಬ ಸ್ಮಶಾನಕ್ಕೆ ಹೋಗಿ ಪ್ರಾರ್ಥನೆ ಮಾಡುತ್ತದೆ. ಸಂಜೆ ಮಕ್ಕಳು ಸೇರಿ ಪ್ರತಿ ಮನೆಯ ಪ್ರವೇಶದ್ವಾರದ ಬಳಿ ನಿಲ್ಲುತ್ತಾರೆ. ಅಲ್ಲಿ ಅವರಿಗೆ ಕೇಕ್ ಮತ್ತು ಇತರ ಸಿಹಿ ತಿಂಡಿಗಳನ್ನು ನೀಡಲಾಗುತ್ತದೆ.

ಜರ್ಮನಿ : ಜರ್ಮನಿಯಲ್ಲಿ ಸಮಾಧಿಗಳನ್ನು ಬಣ್ಣಗಳಿಂದ ಅಲಂಕರಿಸಲಾಗುತ್ತದೆ, ನೆಲದ ಮೇಲೆ ಇದ್ದಿಲು ಹರಡಿ ಅದರ ಮೇಲೆ ಕೆಂಪು ಹಣ್ಣುಗಳಿಂದ ಚಿತ್ರಗಳನ್ನು ಬರೆಯಲಾಗುತ್ತದೆ ಮತ್ತು ಸಮಾಧಿಗಳನ್ನು ಹೂವಿನ ಮಾಲೆಗಳಿಂದ ಅಲಂಕರಿಸಲಾಗುತ್ತದೆ. ಕೊನೆಯಲ್ಲಿ ಎಲ್ಲರೂ ಸೇರಿ ಪ್ರಾರ್ಥನೆ ಮಾಡುತ್ತಾರೆ.

ಫ್ರಾನ್ಸ್ : ಫ್ರಾನ್ಸ್‌ನಲ್ಲಿ ಚರ್ಚ್‌ನ ರಾತ್ರಿ ಪ್ರಾರ್ಥನೆಯ ಕೊನೆಯಲ್ಲಿ ಜನರು ತಮ್ಮ ಪಿತೃಗಳ ಬಗ್ಗೆ ಚರ್ಚಿಸುವುದು ಅಗತ್ಯವೆಂದು ಪರಿಗಣಿಸಲಾಗುತ್ತದೆ. ನಂತರ ಅವರು ತಮ್ಮ ಮನೆಯ ಭೋಜನಗೃಹದಲ್ಲಿ ಒಂದು ಹೊಸ ಬಿಳಿ ಬಟ್ಟೆಯನ್ನು ಹರಡಿ ಅದರ ಮೇಲೆ ಶರಬತ್ತು, ಮೊಸರು, ಸಿಹಿತಿಂಡಿಗಳು ಇತ್ಯಾದಿಗಳನ್ನು ಇಟ್ಟು ಅಲಂಕರಿಸುತ್ತಾರೆ. ಅಲ್ಲದೆ, ಹತ್ತಿರದಲ್ಲಿ ಒಂದು ಅಗ್ನಿಪಾತ್ರೆಯಲ್ಲಿ ದೊಡ್ಡ ಕಟ್ಟಿಗೆಯ ತುಂಡನ್ನು ಉರಿಯಲು ಇಡುತ್ತಾರೆ. ನಂತರ ಜನರು ಮಲಗಲು ಹೋಗುತ್ತಾರೆ. ಸ್ವಲ್ಪ ಸಮಯದ ನಂತರ ವೃತ್ತಿಪರ ವಾದಕರು ವಾದ್ಯಗಳನ್ನು ನುಡಿಸಿ ಅವರನ್ನು ನಿದ್ರೆಯಿಂದ ಎಬ್ಬಿಸಿ ಮೃತ ಆತ್ಮಗಳ ಪರವಾಗಿ ಅವರಿಗೆ ಆಶೀರ್ವಾದ ನೀಡುತ್ತಾರೆ.

ಲ್ಯಾಟಿನ್ ಅಮೆರಿಕಾದ ದೇಶಗಳಲ್ಲಿ ಆಚರಿಸಲಾಗುವ ಸಾಂಪ್ರದಾಯಿಕ ಪದ್ಧತಿಗಳು:

ಲ್ಯಾಟಿನ್ ಅಮೆರಿಕಾದ ಬ್ರೆಜಿಲ್, ಅರ್ಜೆಂಟೀನಾ, ಬೊಲಿವಿಯಾ, ಚಿಲಿ, ಇಕ್ವೆಡಾರ್, ಪೆರು, ಉರುಗ್ವೆ ಮುಂತಾದ ದೇಶಗಳಲ್ಲಿ ನವೆಂಬರ್ 2ರಂದು ಜನರು ಸ್ಮಶಾನಕ್ಕೆ ಹೋಗಿ ತಮ್ಮ ಪೂರ್ವಜರು ಮತ್ತು ಸಂಬಂಧಿಕರಿಗೆ ಹೂವುಗಳನ್ನು ಅರ್ಪಿಸುತ್ತಾರೆ.

ಮೆಕ್ಸಿಕೋ : ಈ ದೇಶದಲ್ಲಿ ಇದನ್ನು 'ಮೃತರ ದಿನ' ಎಂದು ಕರೆಯಲಾಗುತ್ತದೆ. ಇದನ್ನು ಸ್ಥಳೀಯ ಭಾಷೆಯಲ್ಲಿ 'ಅಲ್ ದೆಒ ದೆ ಲಾಸ್ ಮುರ್ತಾಸ್' ಎಂದು ಕರೆಯುತ್ತಾರೆ. ಈ ಮೂಲ ಹಬ್ಬವು ಕ್ರಿಸ್ತ ಪೂರ್ವ 3000 ವರ್ಷಗಳ ಹಿಂದಿನ 'ಅಜ್ಟೆಕ್' ಮೂರ್ತಿಪೂಜಕರದ್ದೆಂದು ನಂಬಲಾಗಿದೆ. ಸ್ಪೇನ್ ಆಕ್ರಮಣ ಮಾಡಿ ಈ ಸಂಸ್ಕೃತಿಯನ್ನು ನಾಶಮಾಡಿತು. ಈಗಿನ ಸಮಯದಲ್ಲಿ ಇದು ಮೂಲ ಮೆಕ್ಸಿಕನ್, ಯುರೋಪಿಯನ್ ಮತ್ತು ಸ್ಪಾನಿಷ್ ಸಂಸ್ಕೃತಿಗಳ ಮಿಶ್ರ ಸಂಪ್ರದಾಯದಿಂದ ಆಚರಿಸಲ್ಪಡುತ್ತದೆ. ಇದರಲ್ಲಿ ನವೆಂಬರ್ 1 ರಂದು ಬಾಲ್ಯದಲ್ಲಿ ಮೃತಪಟ್ಟವರಿಗಾಗಿ, ಮತ್ತು ನವೆಂಬರ್ 2 ರಂದು ವಯಸ್ಕ ಮೃತರಿಗಾಗಿ ಪ್ರಾರ್ಥನೆ ಮಾಡಲಾಗುತ್ತದೆ.

ಏಷ್ಯಾ ಖಂಡದ ದೇಶಗಳಲ್ಲಿಯೂ ಪಿತೃಪೂಜೆಯ ಪದ್ಧತಿ

ಏಷ್ಯಾ ಖಂಡದಲ್ಲಿ ಭಾರತವನ್ನು ಹೊರತುಪಡಿಸಿ ಇತರ ದೇಶಗಳಲ್ಲಿಯೂ ಪಿತೃಪೂಜೆಯ ಈ ಪದ್ಧತಿ ಒಂದಲ್ಲ ಒಂದು ರೂಪದಲ್ಲಿ ಪ್ರಚಲಿತದಲ್ಲಿದೆ. ಹೆಚ್ಚಿನ ಎಲ್ಲಾ ಸ್ಥಳಗಳಲ್ಲಿ ಪಿತೃಗಳನ್ನು ಆಹ್ವಾನಿಸುವಾಗ ವಿಶೇಷ ಆಚರಣೆಗಳನ್ನು ಮಾಡಲಾಗುತ್ತದೆ.

ಚೀನಾ : ಚೀನಾದ 'ಹಾನ್' ಸಂಪ್ರದಾಯದ ಪ್ರಕಾರ, ಕಳೆದ 2500 ವರ್ಷಗಳಿಂದ 'ಕ್ವಿಂಗ್ ಮಿಂಗ್' ಅಥವಾ 'ಚಿಂಗ್ ಮಿಂಗ್' ಉತ್ಸವವನ್ನು ಪೂರ್ವಜರ ಸ್ಮರಣಾರ್ಥವಾಗಿ ಆಚರಿಸಲಾಗುತ್ತದೆ. ಚೀನಾದ ಸೂರ್ಯ ಪಂಚಾಂಗದ ಪ್ರಕಾರ ಈ ಕಾಲವನ್ನು ನಿರ್ಧರಿಸಲಾಗುತ್ತದೆ. ಸಾಮಾನ್ಯವಾಗಿ ಏಪ್ರಿಲ್ 4 ರಿಂದ 6ರ ಅವಧಿಯಲ್ಲಿ ಈ ಉತ್ಸವ ನಡೆಯುತ್ತದೆ.

ಜಪಾನ್ : ಜಪಾನ್‌ನಲ್ಲಿ ಇದನ್ನು 'ಬಾನ್ ಫೆಸ್ಟಿವಲ್' ಎಂದು ಕರೆಯಲಾಗುತ್ತದೆ. 'ಬೌದ್ಧ-ಕನ್ಫ್ಯೂಷಿಯಸ್' ಸಂಪ್ರದಾಯದಲ್ಲಿ ಇದು ಪೂರ್ವಜರ ಗೌರವದ ಹಬ್ಬವಾಗಿ ಆಚರಿಸಲ್ಪಡುತ್ತದೆ. ಈ ಸಮಯದಲ್ಲಿ ಪೂರ್ವಜರ ಆತ್ಮಗಳು ಮೂಲ ಮನೆಯ ಪೂಜಾ ಸ್ಥಳಕ್ಕೆ ಬರುತ್ತವೆ ಎಂದು ನಂಬಲಾಗಿದೆ. ಆದ್ದರಿಂದ ಇಡೀ ಕುಟುಂಬವು ಮೂಲ ಮನೆಯಲ್ಲಿ ಸೇರಿ ಪೂರ್ವಜರ ಸಮಾಧಿಗಳನ್ನು ಸ್ವಚ್ಛಗೊಳಿಸಿ ಧೂಪಬತ್ತಿ ಹಚ್ಚುತ್ತಾರೆ. ಪ್ರತಿ ವರ್ಷ ಆಗಸ್ಟ್ 8 ರಿಂದ ಸೆಪ್ಟೆಂಬರ್ 7ರವರೆಗೆ ಈ ಹಬ್ಬವನ್ನು 3 ದಿನಗಳ ಕಾಲ ಆಚರಿಸಲಾಗುತ್ತದೆ.

ಕಾಂಬೋಡಿಯಾ: ಬೌದ್ಧ ಸಂಪ್ರದಾಯದ 'ಪಚೂಮ್ ಬೆನ್' (Pchum Ben) ಅನ್ನು 'ಪೂರ್ವಜರ ದಿನ' (ಅನ್ಸೆಸ್ಟರ್ಸ್ ಡೇ) ಎಂದೂ ಕರೆಯಲಾಗುತ್ತದೆ. ಖ್ಮೆರ್ ಸಂಪ್ರದಾಯದ ಕ್ಯಾಲೆಂಡರ್‌ನ 10ನೇ ತಿಂಗಳ 15ನೇ ದಿನದಂದು ಈ ವಿಧಿಯನ್ನು ಮಾಡಲಾಗುತ್ತದೆ (ಸೆಪ್ಟೆಂಬರ್ 23ರಿಂದ ಅಕ್ಟೋಬರ್ 12ರ ಅವಧಿಯಲ್ಲಿ ಈ ವಿಧಿ ನಡೆಯುತ್ತದೆ). ಈ ದಿನ ಸಾರ್ವಜನಿಕ ರಜೆ ಘೋಷಿಸಲಾಗುತ್ತದೆ.

ಧರ್ಮಶಾಸ್ತ್ರವನ್ನು ಅಧ್ಯಯನ ಮಾಡದೆ ಹಿಂದೂ ವಿರೋಧಿಗಳು ಶ್ರಾದ್ಧದಂತಹ ಪ್ರಮುಖ ವಿಧಿಗಳ ಮೇಲೆ ಆರೋಪ ಮಾಡುವುದು ಅಜ್ಞಾನದಿಂದ ಕೂಡಿದೆ!

ಹಿಂದೂ ವಿರೋಧಿಗಳು ಶ್ರಾದ್ಧದ ಬಗ್ಗೆ ಬ್ರಾಹ್ಮಣರನ್ನು ಗುರಿಯಾಗಿಸಿಕೊಂಡು ವಿವಿಧ ಆರೋಪಗಳನ್ನು ಮಾಡುತ್ತಾರೆ. ಶ್ರಾದ್ಧಾದಿ ವಿಧಿಗಳನ್ನು ಮಾಡಿಸಿಕೊಳ್ಳುವ ವಿಷಯದಲ್ಲಿ ಬ್ರಾಹ್ಮಣರ ಬಗ್ಗೆ ಉಲ್ಲೇಖವಿರುವುದನ್ನು ತಿಳಿದುಕೊಂಡರೆ ಈ ಆರೋಪಗಳ ಸುಳ್ಳುತನ ಬಯಲಾಗುತ್ತದೆ.