1. ಯಾನ.!
ಚಂದ್ರಯಾನ ಮೂರು
ಕನಸುಗಳು ನೂರಾರು
ಸಾವಿರದ ಸಾವಿರಾರು
ಸದ್ಭಾವನೆಗಳ ತವರು
ನೂರುಕೋಟಿ ಉಸಿರು
ಪ್ರಾರ್ಥನೆಗಳ ತೇರು.!
********
2. ಪ್ರಾರ್ಥನೆ.!
ಓ.. ಮುದ್ದು ಚಂದಮಾಮ
ನೀ ನಮ್ಮೆಲ್ಲರ ಅಮ್ಮನ ತಮ್ಮ
ನಮ್ಮ ಕನಸಿನಕೂಸು ವಿಕ್ರಮ
ಬರುತಿಹನು ನಿನ್ನಲ್ಲಿಗೆ ಮಾಮ
ಇಳಿಸಿಕೋ ಮುದ್ದಿನಲಿ ಅವನ
ನೀಡೆಮಗೆ ಯಶಸ್ಸಿನ ಸಂಭ್ರಮ.!
*********
3. ಆಶಯ.!
ಸುವರ್ಣಾಕ್ಷರದಿ ದಾಖಲಾಗಲಿ
ಈ ದಿನವದು ಯುಗಯುಗದಲಿ
ಯಶಸ್ವಿಯಾಗಲಿ ಚಂದ್ರಯಾನ
ಮೊಳಗಲಿ ದೇಶದಿ ಹರ್ಷಗಾನ
ಸುಗ್ಗಿ ಸಂತಸಗಳ ಸಂಕೀರ್ತನ.!
********
4. ನಿರೀಕ್ಷೆ.!
ನೂರಾರು ವಿಜ್ಞಾನಿ ತಂತ್ರಜ್ಞಾನಿಗಳ
ವರ್ಷಗಳ ಅಹರ್ನಿಶಿ ಪರಿಶ್ರಮ ತಪಸ್ಸು
ಭವ್ಯ ಭಾರತದ ತಂತ್ರಜ್ಞಾನ ವರ್ಚಸ್ಸು
ಚಂದ್ರನಂಗಳದಿ ಆಗಲಿದೆಯಿಂದು ಯಶಸ್ಸು
ಕಾತುರದಿ ಕಾದಿವೆ ಕೋಟಿ ಕೋಟಿ ಮನಸ್ಸು.!
********
5. ಬಾಗಿನ.!
ಚಂದಿರನೂರಿಗೆ ಭಾರತಿಯ ಬಾಗಿನ
ಹೊತ್ತುಯ್ಯುತಿಹನು ನಭದಿ ವಿಕ್ರಮ
ನಗುನಗುತ ಸ್ವಾಗತಿಸಿಹನು ಚಂದ್ರಮ
ಕೋಟಿಕಂಗಳಲಿ ಆನಂದಭಾಷ್ಪದುಗಮ
ಬುವಿ ಬಾನು ಸಮ್ಮಿಲನದ ಸಂಭ್ರಮ.!
********
6. ಆಕಾಶವಾಣಿ.!
ಇಳಿಯುತಿಹನಿಂದು ವಿಕ್ರಮ
ಹೊತ್ತು ಭಾರತಿಯ ಸಂದೇಶ
ಕಾದು ನಿಂತಿಹನು ಚಂದ್ರಮ
ಅಂತರಿಕ್ಷದಲ್ಲೊಂದು ನವಭಾಷ್ಯ
ಹರ್ಷದಿ ಹರಸುತಿವೆ ದಿಗ್ದಿಗಂತ
"ವಿಜಯಶಾಲಿಯಾಗು ಭಾರತ"
- ಎ.ಎನ್.ರಮೇಶ್. ಗುಬ್ಬಿ.
ನಿರಂತರ ಅಪ್‌ಡೇಟ್‌ಗಳಿಗಾಗಿ ಉಪಯುಕ್ತ ನ್ಯೂಸ್‌ ಟೆಲಿಗ್ರಾಂ ಚಾನೆಲ್‌ಗೆ ಜಾಯಿನ್‌ ಆಗಿ
ಉಪಯುಕ್ತ ನ್ಯೂಸ್‌’ ಫೇಸ್‌ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್‌ ವಾಟ್ಸಪ್‌ ಗ್ರೂಪಿಗೆ ಸೇರಲು ಈ ಲಿಂಕ್ ಕ್ಲಿಕ್ ಮಾಡಿ
