ಸಾಹಿತ್ಯವೆಂದರೆ ಸಂಭ್ರಮ, ಸಡಗರದ ಹಬ್ಬವಾಗಬೇಕು: ಪ್ರೊ. ಎಂ.ಡಿ. ಮಂಚಿ ಅಭಿಮತ

ಬಂಟ್ವಾಳ: ಸಾಹಿತ್ಯ ಎನ್ನುವುದು ನಮ್ಮ ಬದುಕಿನ ಜೀವಸೆಲೆ ಇದ್ದಂತೆ. ಸಾಹಿತ್ಯಿಕ ಕಾರ್ಯಕ್ರಮಗಳಲ್ಲಿ ತೊಡಗಿಸಿಕೊಳ್ಳುವುದು ಸಂಭ್ರಮ ಹಾಗೂ ಸಡಗರದ ಹಬ್ಬದಂತಾಗಬೇಕು. ವಿದ್ಯಾರ್ಥಿ ದೆಸೆಯಿಂದಲೇ ಇಂತಹ ಚಟುವಟಿಕೆಗಳಲ್ಲಿ ಆಸಕ್ತಿ ಬೆಳೆಸಿಕೊಂಡರೆ, ಅದು ನಮ್ಮ ಸಂತೋಷದ ಬದುಕಿಗೆ ದಾರಿಯಾಗುತ್ತದೆ ಎಂದು ಬಿ.ಸಿ. ರೋಡ್‌ನ ಶ್ರೀ ವೆಂಕಟರಮಣ ಸ್ವಾಮಿ (ಎಸ್.ವಿ.ಎಸ್) ಕಾಲೇಜಿನ ಪ್ರಾಂಶುಪಾಲರಾದ ಪ್ರೊ. ಎಂ.ಡಿ. ಮಂಚಿ ಹೇಳಿದರು.

ದಕ್ಷಿಣ ಕನ್ನಡ ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ತು ಹಾಗೂ ಎಸ್.ವಿ.ಎಸ್. ಮಹಾವಿದ್ಯಾಲಯದ ಜಂಟಿ ಆಶ್ರಯದಲ್ಲಿ ಕಾಲೇಜಿನಲ್ಲಿ ಆಯೋಜಿಸಲಾಗಿದ್ದ ಬಿ. ಕೊರಗಪ್ಪ ಗೌಡ ಹಾಗೂ ಏರ್ಯ ಚಂದ್ರಭಾಗಿ ರೈ ಅವರ ದತ್ತಿ ಉಪನ್ಯಾಸ ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡುತ್ತಿದ್ದರು.

ಯಕ್ಷಗಾನ ಕಲೆ ಗತ್ತು-ಗಾಂಭೀರ್ಯದ ಸಂಕೇತ:

ದಾಮೋದರ ಗೌಡ ಮತ್ತು ದಿ. ಶೇಖರಪ್ಪ ಗೌಡ ಅವರು ಸ್ಥಾಪಿಸಿದ ಬಿ. ಕೊರಗಪ್ಪ ಗೌಡ ದತ್ತಿ ಉಪನ್ಯಾಸದಡಿ "ಯಕ್ಷಗಾನ - ಜೀವನದಲ್ಲಿ ಶಿಸ್ತು, ಧರ್ಮಾಚರಣೆ" ವಿಷಯದ ಕುರಿತು ಸಾಹಿತಿ ಹಾಗೂ ನಿವೃತ್ತ ಪ್ರಾಂಶುಪಾಲರಾದ ವಿ. ಸು. ಭಟ್ ಬಂಟ್ವಾಳ ಉಪನ್ಯಾಸ ನೀಡಿದರು. "12ನೇ ಶತಮಾನದಲ್ಲಿ ಆರಂಭಗೊಂಡ ಯಕ್ಷಗಾನ ಕರಾವಳಿಯ ಅದ್ಭುತ ಕಲಾಪ್ರಕಾರ. 16ನೇ ಶತಮಾನದ ವೇಳೆಗೆ ಕೂಟಗಳ ರೂಪದಲ್ಲಿ ತನ್ನದೇ ಆದ ಗತ್ತು-ಗಾಂಭೀರ್ಯದೊಂದಿಗೆ ಬೆಳೆದುಬಂದ ಈ ಕಲೆ, ಇಂದು ಹೆಣ್ಣು-ಗಂಡು ಭೇದವಿಲ್ಲದೆ ಆಸ್ವಾದಿಸುವ ಶಿಷ್ಟ ಕಲೆಯಾಗಿ ಜಗತ್ಪ್ರಸಿದ್ಧಿಯಾಗಿದೆ. ಯಕ್ಷಗಾನ ಪೋಷಕರಾಗಿ, ಶಿಸ್ತು ಹಾಗೂ ಆದರ್ಶ ಜೀವನ ನಡೆಸಿದ ಬಿ. ಕೊರಗಪ್ಪ ಗೌಡರು ಎಲ್ಲರಿಗೂ ಮಾದರಿ" ಎಂದು ಅವರು ಬಣ್ಣಿಸಿದರು.

ಸಾಹಿತ್ಯ ಕ್ಷೇತ್ರದಲ್ಲಿ ಮಹಿಳೆಯರ ಕೊಡುಗೆ ಅನನ್ಯ:

ಏರ್ಯ ಚಂದ್ರಭಾಗಿ ರೈ ಮತ್ತು ಕೃಷ್ಣ ರೈ ಹೆಸರಿನ ದತ್ತಿ ಉಪನ್ಯಾಸದಲ್ಲಿ "ಸಾಹಿತ್ಯ ಮತ್ತು ಮಹಿಳೆ" ವಿಷಯವಾಗಿ ಮಾತನಾಡಿದ ಬಂಟ್ವಾಳ BRC ಯ ವಿಶೇಷ ಸಂಪನ್ಮೂಲ ವ್ಯಕ್ತಿ ಸುರೇಖಾ ಯಾಳವಾರ, "ಅಕ್ಕಮಹಾದೇವಿ, ಮುಕ್ತಾಯಕ್ಕ, ಅಯ್ದಕ್ಕಿ ಲಕ್ಕಮ್ಮ ಅವರ ವಚನಗಳಿಂದ ಹಿಡಿದು ತ್ರಿವೇಣಿಯವರಂತಹ ಲೇಖಕಿಯರ ಸೃಜನಶೀಲ ಬರವಣಿಗೆಯವರೆಗೆ ಮಹಿಳೆಯರು ಸಾಹಿತ್ಯ ಲೋಕವನ್ನು ಶ್ರೀಮಂತಗೊಳಿಸಿದ್ದಾರೆ. ಇಂದಿನ ವಿದ್ಯಾರ್ಥಿನಿಯರು ಹೆಚ್ಚಿನ ಸಂಖ್ಯೆಯಲ್ಲಿ ಬರವಣಿಗೆಯಲ್ಲಿ ತೊಡಗಿಸಿಕೊಂಡು ಸಾಹಿತಿಗಳಾಗಲು ಮುಂದೆ ಬರಬೇಕು" ಎಂದು ಕರೆ ನೀಡಿದರು.

ಕಸಾಪ ಚಟುವಟಿಕೆಗಳಿಗೆ ವಿದ್ಯಾರ್ಥಿಗಳು ಸ್ಪಂದಿಸಲಿ:

ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ದಕ್ಷಿಣ ಕನ್ನಡ ಜಿಲ್ಲಾ ಕಸಾಪ ಅಧ್ಯಕ್ಷ ಡಾ. ಎಂ. ಪಿ. ಶ್ರೀನಾಥ್ ಮಾತನಾಡಿ, "ಕನ್ನಡ ಸಾಹಿತ್ಯ ಪರಿಷತ್ತು ರಾಜ್ಯದ 31 ಜಿಲ್ಲೆಗಳು ಸೇರಿದಂತೆ ತಾಲೂಕು, ಹೋಬಳಿ ಹಾಗೂ ಗ್ರಾಮ ಮಟ್ಟದಲ್ಲೂ ಸಕ್ರಿಯವಾಗಿ ಕಾರ್ಯನಿರ್ವಹಿಸುತ್ತಿದೆ. ವಿದ್ಯಾರ್ಥಿಗಳನ್ನು ತಲುಪುವ ಉದ್ದೇಶದಿಂದಲೇ ಇಂತಹ ದತ್ತಿ ಉಪನ್ಯಾಸಗಳನ್ನು ನಿರಂತರವಾಗಿ ನಡೆಸಲಾಗುತ್ತಿದ್ದು, ವಿದ್ಯಾರ್ಥಿಗಳು ಇದರ ಸೌಲಭ್ಯ ಪಡೆದುಕೊಳ್ಳಬೇಕು" ಎಂದರು.

ವೇದಿಕೆಯಲ್ಲಿ ಬಂಟ್ವಾಳ ತಾಲೂಕು ಕಸಾಪ ಅಧ್ಯಕ್ಷ ವಿಶ್ವನಾಥ ಬಂಟ್ವಾಳ ಹಾಗೂ ಮಹೇಂದ್ರ ಹಡಗಲಿ ಉಪಸ್ಥಿತರಿದ್ದರು.

ಕಾಲೇಜಿನ ಕನ್ನಡ ವಿಭಾಗ ಮುಖ್ಯಸ್ಥ ಪ್ರೊ. ಶಿವಣ್ಣ ಪ್ರಭು ಸ್ವಾಗತಿಸಿದರು. ಯಕ್ಷಿತಾ ಮತ್ತು ಬಳಗದವರು ನಾಡಗೀತೆ ಹಾಡಿದರು. ವಿಜ್ಞಾನ ವಿಭಾಗದ ಮುಖ್ಯಸ್ಥ ಡಾ. ಸುಯೋಗವರ್ಧನ್ ವಂದಿಸಿ, ಸಂಸ್ಕೃತ ವಿಭಾಗದ ಮುಖ್ಯಸ್ಥ ಡಾ. ಕಾಶೀನಾಥ ಶಾಸ್ತ್ರಿ ಕಾರ್ಯಕ್ರಮ ನಿರೂಪಿಸಿದರು.