ಮಂಗಳೂರು: ವಿಶ್ವದ ಅತ್ಯಂತ ಹಳೆಯ ದೀರ್ಘಾವಧಿಯ ರಸಪ್ರಶ್ನೆ ಸ್ಪರ್ಧೆ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿರುವ 'ರಾಮನಾರಾಯಣ್ ಚೆಲ್ಲಾರಾಮ್ ರೋಟೋಕ್ವಿಜ್' ನ 67ನೇ ಆವೃತ್ತಿಯ ಮಂಗಳೂರು ವಲಯದ ಸ್ಪರ್ಧೆಯು ಭಾನುವಾರ, 20 ಸೆಪ್ಟೆಂಬರ್ 2026 ರಂದು ಕೊಡಿಯಾಲ್‌ಬೈಲ್‌ನ ಶಾರದಾ ವಿದ್ಯಾಲಯದಲ್ಲಿ ಯಶಸ್ವಿಯಾಗಿ ಜರುಗಿತು. ಈ ಸ್ಪರ್ಧೆಯನ್ನು ಬೆಂಗಳೂರು ರೋಟರಿ ಕ್ಲಬ್ ನಡೆಸಿಕೊಡುತ್ತಿದ್ದು, ಮಂಗಳೂರು ವಲಯದ ಆವೃತ್ತಿಯನ್ನು 'ಐಡಿಯಲ್ ಐಸ್ಕ್ರೀಮ್' ಪ್ರಾಯೋಜಕತ್ವದಲ್ಲಿ ಮಂಗಳೂರು ರೋಟರಿ ಕ್ಲಬ್ ಮತ್ತು ಎಸ್‌ಡಿಎಂ ಎಂ.ಬಿ.ಎ ರೋಟರ್ಯಾಕ್ಟ್ ಕ್ಲಬ್ ಜಂಟಿಯಾಗಿ ಆಯೋಜಿಸಿದ್ದವು.
180 ವಿದ್ಯಾರ್ಥಿಗಳ ಭಾಗಿ:
ದಕ್ಷಿಣ ಕನ್ನಡ ಹಾಗೂ ಉಡುಪಿ ಜಿಲ್ಲೆಗಳ 11ನೇ ತರಗತಿಯಿಂದ ಹಿಡಿದು ಸ್ನಾತಕೋತ್ತರ ವಿಭಾಗದವರೆಗೆ ಒಟ್ಟು 90 ತಂಡಗಳ 180 ವಿದ್ಯಾರ್ಥಿಗಳು ಸ್ಪರ್ಧೆಯಲ್ಲಿ ಉತ್ಸಾಹದಿಂದ ಪಾಲ್ಗೊಂಡಿದ್ದರು. ರವಿವಾರ ಬೆಳಿಗ್ಗೆ 8:30ಕ್ಕೆ ನೋಂದಣಿ ಪ್ರಕ್ರಿಯೆ ಆರಂಭಗೊಂಡ ಬಳಿಕ, ಕ್ವಿಜ್ ಮಾಸ್ಟರ್ ರೋಟೇರಿಯನ್ ಎಸ್‌ವಿಎಲ್ ನಾರಾಯಣ್ ಅವರು ಸ್ಪರ್ಧೆಯ ನಿಯಮಗಳನ್ನು ವಿವರಿಸಿದರು. ಬೆಳಿಗ್ಗೆ 10 ಗಂಟೆಗೆ 30 ನಿಮಿಷಗಳ ಲಿಖಿತ ಪೂರ್ವಭಾವಿ ಪರೀಕ್ಷೆ ನಡೆಯಿತು. ಲಿಖಿತ ಪರೀಕ್ಷೆಯಲ್ಲಿ ಗರಿಷ್ಠ ಅಂಕ ಗಳಿಸಿದ 4 ಅತ್ಯುತ್ತಮ ತಂಡಗಳು ವೇದಿಕೆಯ ಮುಖ್ಯ ಸ್ಪರ್ಧೆಗೆ ಆಯ್ಕೆಯಾದವು. ಆಡಿಯೋ, ವೀಡಿಯೋ, ರ‍್ಯಾಪಿಡ್ ಫೈರ್ ಹಾಗೂ ಬಜರ್ ರೌಂಡ್‌ಗಳನ್ನೊಳಗೊಂಡ ಈ ಹಂತದಲ್ಲಿ ಪ್ರಖರ ಪೈಪೋಟಿ ನಡೆಯಿತು.
ವಿಜೇತರ ವಿವರ:
ಪ್ರಥಮ ಸ್ಥಾನ: ಹಿಮಾಂಶು ಮತ್ತು ರಿಯಾ ಶರ್ಮಾ (ಎನ್‌ಐಟಿ ಕೆ, ಸುರತ್ಕಲ್) – ರೂ. 15,000 ನಗದು ಬಹುಮಾನ ಹಾಗೂ ರೂ. 15,000 ಮೌಲ್ಯದ ಆನ್‌ಲೈನ್ ಕೋರ್ಸ್ ಚಂದಾದಾರಿಕೆ.
ದ್ವಿತೀಯ ಸ್ಥಾನ: ವಿದ್ಯುತ್ ಅಜಿತ್ ಸೋಮನ್ ಮತ್ತು ನಿರಂಜನ್ ಎಸ್. (ಎಂಐಟಿ, ಮಣಿಪಾಲ) – ರೂ. 10,000 ನಗದು ಬಹುಮಾನ.
ತೃತೀಯ ಸ್ಥಾನ: ಎಲ್ವಿಸ್ ಫ್ರಾಂಕ್ಲಿನ್ ಲೋಬೊ ಮತ್ತು ಚಿರಾಗ್ ಎಸ್. ಸುನಿಲ್ (ಸೆಂಟ್ ಅಲೋಶಿಯಸ್ ಕಾಲೇಜು, ಬಿಎ, ಮಂಗಳೂರು) – ರೂ. 6,000 ನಗದು ಬಹುಮಾನ.
ಚತುರ್ಥ ಸ್ಥಾನ: ಆಲ್ಬಿನ್ ಪ್ರಿನ್ಸ್ ಮತ್ತು ಅರುಣ್ ವಿಜಯನ್ (ಯೇನಪೋಯ ಡೆಂಟಲ್ ಕಾಲೇಜು, ಮಂಗಳೂರು) – ರೂ. 4,000 ನಗದು ಬಹುಮಾನ.
ಬಹುಮಾನ ವಿತರಣೆ ಮತ್ತು ಸಮಾರಂಭ:
ಕಾರ್ಯಕ್ರಮದಲ್ಲಿ ಮಂಗಳೂರು ರೋಟರಿ ಕ್ಲಬ್ ಅಧ್ಯಕ್ಷ ರೋಟೇರಿಯನ್ ದೈಡನ್ ಡಿ'ಸಿಲ್ವಾ ಅವರು ಸ್ವಾಗತಿಸಿ, ಆಯೋಜನೆಗೆ ಸಹಕರಿಸಿದ ಬೆಂಗಳೂರು ರೋಟರಿ ಕ್ಲಬ್ ಹಾಗೂ ಪ್ರಾಯೋಜಕರಾದ ಐಡಿಯಲ್ ಐಸ್ಕ್ರೀಮ್ ಸಂಸ್ಥೆಗೆ ಧನ್ಯವಾದ ತಿಳಿಸಿದರು.
ಮುಖ್ಯ ಅತಿಥಿಯಾಗಿ ಪಾಲ್ಗೊಂಡಿದ್ದ ಐಡಿಯಲ್ ಐಸ್ಕ್ರೀಮ್ ಸಂಸ್ಥೆಯ ವ್ಯವಸ್ಥಾಪಕ ನಿರ್ದೇಶಕ ಶ್ರೀ ಮುಕುಂದ್ ಕಾಮತ್ ಅವರು ವಿಜೇತರಿಗೆ ಟ್ರೋಫಿ, ಪ್ರಮಾಣಪತ್ರ ಹಾಗೂ ನಗದು ಬಹುಮಾನ ವಿತರಿಸಿ ಮಾತನಾಡಿ, "ಯುವಕರು ತಮ್ಮ ಕೌಶಲ್ಯ ಹಾಗೂ ಆಸಕ್ತಿಗೆ ತಕ್ಕಂತೆ ವೃತ್ತಿಜೀವನವನ್ನು ಆಯ್ಕೆ ಮಾಡಿಕೊಂಡು ತಮ್ಮದೇ ಆದ ಹಾದಿಯಲ್ಲಿ ಸಾಗಬೇಕು" ಎಂದು ಸಲಹೆ ನೀಡಿದರು. ಬೆಂಗಳೂರು ರೋಟರಿ ಕ್ಲಬ್ ಅಧ್ಯಕ್ಷೆ ರೋಟೇರಿಯನ್ ವಿನೀತಾ ಚಿನ್ನಪ್ಪ ಅವರು ರೋಟೋಕ್ವಿಜ್‌ನ ಸುದೀರ್ಘ ಪ್ರಯಾಣ ಹಾಗೂ ಮಂಗಳೂರು ರೋಟರಿ ಕ್ಲಬ್‌ನೊಂದಿಗಿನ ಒಡನಾಟವನ್ನು ಸ್ಮರಿಸಿದರು.
ಸಮಾರಂಭದಲ್ಲಿ ಬೆಂಗಳೂರು ರೋಟರಿ ಕ್ಲಬ್ ಕಾರ್ಯದರ್ಶಿ ರೋ. ವಿಜಯ್ ಪಿ. ರಾವ್, ಮಂಗಳೂರು ರೋಟರಿ ಕ್ಲಬ್ ಕಾರ್ಯದರ್ಶಿ ರೋ. ಪ್ರಸಾದ್ ನಾಯಕ್, ಎಸ್‌ಡಿಎಂ ಪಿಜಿ ಸೆಂಟರ್ ರೋಟರ್ಯಾಕ್ಟ್ ಸಂಯೋಜಕಿ ಡಾ. ಸವಿತಾ ಪಿರೇರಾ, ರೋಟರ್ಯಾಕ್ಟ್ ಅಧ್ಯಕ್ಷೆ ರಿತಿಕಾ ರಾಜ್ ಸುವರ್ಣ ಉಪಸ್ಥಿತರಿದ್ದರು. ರೋ. ದೀಪಾಲಿ ನಾಯಕ್ ಕಾರ್ಯಕ್ರಮ ನಿರೂಪಿಸಿದರು. ಯುವಜನ ಸೇವೆಯ ನಿರ್ದೇಶಕರಾದ ರೋ. ಸಿಎ ಪ್ರಸನ್ನ ಶೆಣೈ ಮತ್ತು ರೋ. ಡಾ. ಸಿದ್ಧಾರ್ಥ್ ಶೆಟ್ಟಿ ಈ ಕಾರ್ಯಕ್ರಮದ ಸಂಚಾಲಕರಾಗಿದ್ದರು. ಮಂಗಳೂರು ರೋಟರಿ ಕ್ಲಬ್ ಕಾರ್ಯದರ್ಶಿ ರೋ. ಪ್ರಸಾದ್ ನಾಯಕ್ ಸುಜೀರ್ ವಂದಿಸಿದರು.
ಬೆಂಗಳೂರಿನಲ್ಲಿ ಫೈನಲ್ ಸ್ಪರ್ಧೆ:
ಮಂಗಳೂರು ವಲಯದ ಆವೃತ್ತಿಯಲ್ಲಿ ವಿಜೇತರಾದ ತಂಡಗಳು ಸೆಪ್ಟೆಂಬರ್ 28, 2026 ರಂದು ಬೆಂಗಳೂರಿನಲ್ಲಿ ನಡೆಯಲಿರುವ 'ರಾಮನಾರಾಯಣ್ ಚೆಲ್ಲಾರಾಮ್ ರೋಟೋಕ್ವಿಜ್' ನ ಮಹಾ ಫೈನಲ್ಸ್‌ನಲ್ಲಿ ಭಾಗವಹಿಸಲು ಅರ್ಹತೆ ಪಡೆದಿವೆ.
