ಒಂದು ಕಾಲದಲ್ಲಿ ಬೆಳಗಿನ ಸೂರ್ಯನ ಕಿರಣಗಳು ನಮ್ಮ ಕಣ್ಣುಗಳನ್ನು ತೆರೆಸುತ್ತಿದ್ದವು. ಹಕ್ಕಿಗಳ ಚಿಲಿಪಿಲಿ ನಮ್ಮ ದಿನವನ್ನು ಆರಂಭಿಸುತ್ತಿತ್ತು. ಆದರೆ ಇಂದು ಕಣ್ಣು ತೆರೆಯುವ ಮುನ್ನವೇ ಕೈ ಮೊಬೈಲ್ ಹುಡುಕುತ್ತದೆ. ಬೆಳಗಿನ ಮೊದಲ ನೋಟವೂ ಪರದೆಯ ಮೇಲೆ, ರಾತ್ರಿ ಕೊನೆಯ ನೋಟವೂ ಅದೇ ಪರದೆಯ ಮೇಲೆ. ನಮ್ಮ ದಿನದ ಆರಂಭಕ್ಕೂ ಅಂತ್ಯಕ್ಕೂ ನಡುವೆ, ಮೊಬೈಲ್ ಒಂದು ಮೌನ ಸಂಗಾತಿಯಂತೆ ನಮ್ಮ ಜೊತೆಯಲ್ಲೇ ಸಾಗುತ್ತಿದೆ.
ಮೊಬೈಲ್ ನಮ್ಮ ಅಂಗೈಯಲ್ಲಿ ಒಂದು ಪುಟ್ಟ ಜಗತ್ತನ್ನೇ ಇಟ್ಟಿದೆ. ದೂರದ ವ್ಯಕ್ತಿಯ ಧ್ವನಿಯನ್ನು ಕ್ಷಣದಲ್ಲೇ ಕೇಳಿಸಬಹುದು, ಸಾವಿರಾರು ಮಾಹಿತಿಗಳನ್ನು ಕ್ಷಣದಲ್ಲೇ ತೋರಿಸಬಹುದು. ಆದರೆ ವಿಚಿತ್ರವೆಂದರೆ, ಜಗತ್ತನ್ನು ನಮ್ಮ ಹತ್ತಿರ ತಂದ ಅದೇ ಮೊಬೈಲ್, ಕೆಲವೊಮ್ಮೆ ನಮ್ಮ ಪಕ್ಕದಲ್ಲಿರುವವರನ್ನೇ ನಮ್ಮಿಂದ ದೂರ ಮಾಡುತ್ತದೆ. ಒಂದೇ ಮನೆಯೊಳಗೆ ಕುಳಿತವರು ಬೇರೆ ಬೇರೆ ಪರದೆಗಳಲ್ಲಿ ಮುಳುಗಿರುತ್ತಾರೆ; ಮಾತುಗಳು ಕಡಿಮೆಯಾಗುತ್ತವೆ, ಸಂದೇಶಗಳು ಹೆಚ್ಚಾಗುತ್ತವೆ.
ಸಾಮಾಜಿಕ ಜಾಲತಾಣದ ಮತ್ತೊಂದು ಮುಖ ಇನ್ನಷ್ಟು ಸೂಕ್ಷ್ಮ. ಅಲ್ಲಿ ಪ್ರತಿಯೊಬ್ಬರ ಬದುಕೂ ಸುಂದರವಾಗಿ ಕಾಣುತ್ತದೆ. ಯಾರಿಗೋ ಯಶಸ್ಸು, ಯಾರಿಗೋ ಪ್ರವಾಸ, ಇನ್ನೊಬ್ಬರಿಗೆ ಸಂತೋಷದ ಕ್ಷಣಗಳು. ಅವುಗಳನ್ನು ನೋಡುತ್ತಾ ನಾವು ನಮ್ಮ ಬದುಕನ್ನು ಅವರ ಬದುಕಿನೊಂದಿಗೆ ಹೋಲಿಸಿಕೊಳ್ಳುತ್ತೇವೆ. ಆದರೆ ಪರದೆಯ ಮೇಲೆ ಕಾಣುವುದು ಒಂದು ಬದುಕಿನ ಸಂಪೂರ್ಣ ಕಥೆಯಲ್ಲ; ಅದು ಕೇವಲ ಆಯ್ದ ಕೆಲವು ಪುಟಗಳು. ಇತರರ ವಸಂತವನ್ನು ನೋಡಿ ನಮ್ಮ ಶರತ್ಕಾಲವನ್ನು ದೂಷಿಸುವ ಅಗತ್ಯವಿಲ್ಲ. ಪ್ರತಿಯೊಂದು ಹೂವು ತನ್ನದೇ ಋತುವಿನಲ್ಲಿ ಅರಳುತ್ತದೆ.
ಮೊಬೈಲ್ ನಮ್ಮ ಜ್ಞಾನವನ್ನು ಹೆಚ್ಚಿಸಬಹುದು, ನಮ್ಮ ಕನಸುಗಳಿಗೆ ದಾರಿ ತೋರಿಸಬಹುದು. ಆದರೆ ಅದೇ ಮೊಬೈಲ್ ನಮ್ಮ ಸಮಯವನ್ನು ನಿಧಾನವಾಗಿ ಕದಿಯಲು ಆರಂಭಿಸಿದಾಗ, ನಾವು ಎಚ್ಚರಗೊಳ್ಳಬೇಕು. ಓದಬೇಕಾದ ಪುಸ್ತಕ ಮೌನವಾಗಿ ಮೇಜಿನ ಮೇಲಿರುತ್ತದೆ; ಮಾತನಾಡಬೇಕಾದ ಮನೆಯವರು ನಮ್ಮ ಮುಂದೆ ಇರುತ್ತಾರೆ; ಹೊರಗೆ ಪ್ರಕೃತಿ ತನ್ನ ಸೌಂದರ್ಯವನ್ನು ಹಂಚಿಕೊಳ್ಳುತ್ತಿರುತ್ತದೆ. ಆದರೆ ನಮ್ಮ ಕಣ್ಣುಗಳು ಮಾತ್ರ ಒಂದು ಸಣ್ಣ ಪರದೆಯೊಳಗಿನ ಜಗತ್ತನ್ನು ನೋಡುತ್ತಿರುತ್ತವೆ.
ಆದ್ದರಿಂದ ತಂತ್ರಜ್ಞಾನವನ್ನು ತ್ಯಜಿಸುವ ಅಗತ್ಯವಿಲ್ಲ; ಅದರೊಂದಿಗೆ ಬದುಕುವ ಕಲೆಯನ್ನು ಕಲಿಯಬೇಕು. ಮೊಬೈಲ್ ನಮ್ಮ ಕೈಯಲ್ಲಿರಲಿ, ಆದರೆ ನಮ್ಮ ಬದುಕು ಅದರ ಕೈಯಲ್ಲಿರಬಾರದು. ಕೆಲವೊಮ್ಮೆ ಪರದೆಯನ್ನು ಕೆಳಗಿಟ್ಟು ಆಕಾಶವನ್ನು ನೋಡೋಣ. notificationಗಳನ್ನು ಮೌನಗೊಳಿಸಿ ನಮ್ಮವರ ಮಾತುಗಳನ್ನು ಕೇಳೋಣ. ಕ್ಯಾಮೆರಾವನ್ನು ಬದಿಗಿಟ್ಟು ಒಂದು ಕ್ಷಣವನ್ನು ಕೇವಲ ಮನಸ್ಸಿನಿಂದ ಅನುಭವಿಸೋಣ.
ಏಕೆಂದರೆ ಜೀವನವೆಂದರೆ screen ಮೇಲೆ ಉಳಿಯುವ ಚಿತ್ರಗಳಲ್ಲ; ಹೃದಯದಲ್ಲಿ ಉಳಿಯುವ ಕ್ಷಣಗಳು. ಮೊಬೈಲ್‌ನ ಬೆಳಕು ನಮ್ಮ ಕಣ್ಣುಗಳನ್ನು ಬೆಳಗಿಸಬಹುದು, ಆದರೆ ನಿಜವಾದ ಬದುಕಿನ ಬೆಳಕು ಮಾತ್ರ ನಮ್ಮ ಮನಸ್ಸನ್ನು ಬೆಳಗಿಸುತ್ತದೆ.
ಪರದೆಯನ್ನು ಸ್ವಲ್ಪ ಕೆಳಗಿಡೋಣ
ಬದುಕನ್ನು ಸ್ವಲ್ಪ ಹತ್ತಿರಕ್ಕೆ ತರೋಣ.
ಏಕೆಂದರೆ ಕಳೆದುಹೋದ ಕ್ಷಣವನ್ನು download ಮಾಡಲು
ಯಾವುದೇ app ಈ ಜಗತ್ತಿನಲ್ಲಿ ಇಲ್ಲ.
- ಮಾನ್ಯ
ಎಸ್ ಡಿ ಏಮ್ ಉಜಿರೆ
