ಗಣೇಶೋತ್ಸವದ ಸಂದರ್ಭದಲ್ಲಿ ಕೇವಲ ಮನೋರಂಜನೆಗೆ ಸೀಮಿತವಾಗದೆ, ಶಾಸ್ತ್ರೋಕ್ತವಾಗಿ ಧಾರ್ಮಿಕ ಕೃತಿಗಳನ್ನು ನೆರವೇರಿಸುವುದರಿಂದ ಶ್ರೀ ಗಣೇಶನಿಂದ ಹೆಚ್ಚಿನ ಆಧ್ಯಾತ್ಮಿಕ ಲಾಭ ಪಡೆಯಬಹುದು ಎಂದು ಸನಾತನ ಸಂಸ್ಥೆ ತಿಳಿಸಿದೆ.
ಶಾಸ್ತ್ರದ ಪ್ರಕಾರ ಭಾದ್ರಪದ ಶುಕ್ಲ ಚತುರ್ಥಿಯಂದು ಮಣ್ಣಿನಿಂದ ಮಾಡಿದ ಶ್ರೀ ಗಣೇಶ ಮೂರ್ತಿ ಯನ್ನು ಎಡಕೈಯಲ್ಲಿಟ್ಟು, ಸಿದ್ಧಿವಿನಾಯಕನ ಹೆಸರಿನಲ್ಲಿ ಪ್ರಾಣಪ್ರತಿಷ್ಠೆ ಹಾಗೂ ಪೂಜೆ ಮಾಡಿ ಕೂಡಲೇ ವಿಸರ್ಜನೆ ಮಾಡಬೇಕು. ಕುಲಾಚಾರದಂತೆ ಒಂದೂವರೆ, ಐದು, ಏಳು, ಹತ್ತು ಅಥವಾ ಹನ್ನೊಂದನೇ ದಿನಗಳಲ್ಲಿ ಮೂರ್ತಿಯನ್ನು ಪೂಜಿಸಿ, ಎರಡನೇ, ಐದನೇ, ಏಳನೇ ಅಥವಾ ಹತ್ತನೇ ದಿನ ಮೂರ್ತಿಯನ್ನು ವಿಸರ್ಜಿಸಲಾಗುತ್ತದೆ.
ಪೃಥ್ವಿ ಮತ್ತು ಆಪ ತತ್ತ್ವಗಳ ಇಚ್ಛಾ ಲಹರಿಗಳೊಂದಿಗೆ ಶ್ರೀ ಗಣೇಶನ ಸಂಬಂಧವಿರುವುದರಿಂದ, ಈ ಪೂಜೆಯು ಸ್ತ್ರೀ ಮತ್ತು ಪುರುಷರಿಬ್ಬರಿಗೂ ಲಾಭದಾಯಕವಾಗಿದೆ. ಶರೀರದಲ್ಲಿ ಸಾಧನೆಯ ವಿಚಾರ ಲಹರಿಗಳ ಸಂಚಾರವಾಗಲು ಮತ್ತು ಸತ್ತ್ವಗುಣ ವೃದ್ಧಿಯಾಗಲು ಈ ಪೂಜೆ ನೆರವಾಗುತ್ತದೆ. ಗಣೇಶೋತ್ಸವದ ಸಮಯದಲ್ಲಿ ಕುಟುಂಬದ ಸದಸ್ಯರೆಲ್ಲರೂ ಒಟ್ಟಾಗಿ ಕುಲಾಚಾರದಂತೆ ಪೂಜೆ ನೆರವೇರಿಸಬೇಕು.
ಧಾರ್ಮಿಕ ಕೃತಿಗಳ ಭಾಗವಾಗಿ ಪ್ರತಿದಿನ ಅಂಗಳದಲ್ಲಿ ಅಥವಾ ಮೂರ್ತಿಯ ಎದುರು ಸಾತ್ತ್ವಿಕ ರಂಗೋಲಿ ಹಾಕಿ, ಬೆಳಿಗ್ಗೆ ಮತ್ತು ಸಾಯಂಕಾಲ ಪೂಜೆ ಹಾಗೂ ಕುಟುಂಬದವರೊಂದಿಗೆ ಭಾವಪೂರ್ಣ ಆರತಿ ಮಾಡಬೇಕು. ಮಂಟಪದ ಅಲಂಕಾರಕ್ಕಾಗಿ ಥರ್ಮಾಕೋಲ್ ಬಳಸಬಾರದು. ಥರ್ಮಾಕೋಲ್ ವಿಘಟನೆಯಾಗುವುದಿಲ್ಲ ಹಾಗೂ ಪರಿಸರಕ್ಕೆ ಹಾನಿಕರವಾಗಿದೆ. ಅಲ್ಲದೆ ರಾಸಾಯನಿಕ ಪ್ರಕ್ರಿಯೆಯಿಂದ ತಯಾರಿಸಿದ ಥರ್ಮಾಕೋಲ್ ರಜ-ತಮ ಗುಣಗಳನ್ನು ಹೊಂದಿರುವುದರಿಂದ ಸಾತ್ತ್ವಿಕತೆಯನ್ನು ಗ್ರಹಿಸುವುದಿಲ್ಲ. ಅದರ ಬದಲು ಹೆಚ್ಚು ಸಾತ್ತ್ವಿಕವಾಗಿರುವ ಬಾಳೆಯ ದಿಂಡಿನ ಮಂಟಪವನ್ನು ಬಳಸಬೇಕು.
ಆರತಿಯನ್ನು ಮಧುರವಾಗಿ, ನಿಧಾನವಾಗಿ ಹಾಡಬೇಕು ಮತ್ತು ನಾದ ನಿರ್ಮಾಣಕ್ಕಾಗಿ ಮಂದಸ್ವರದಲ್ಲಿ ಚಪ್ಪಾಳೆ ಅಥವಾ ತಾಳ ಬಾರಿಸಬೇಕು. ಆರತಿ ಮಾಡುವಾಗ ಪರಸ್ಪರ ಮಾತನಾಡದೆ ಈಶ್ವರನ ಅನುಸಂಧಾನದಲ್ಲಿರಬೇಕು. ಅನೇಕ ಆರತಿಗಳನ್ನು ಹಾಡುವ ಬದಲು ಒಂದೆರಡು ಆರತಿಗಳನ್ನು ಭಾವಪೂರ್ಣವಾಗಿ ಹಾಡುವುದು ಸೂಕ್ತ. ಆರತಿಯ ನಂತರ ವಾಸ್ತುವಿನಲ್ಲಿ ಸಾತ್ತ್ವಿಕ ಸ್ಪಂದನ ಕಾಪಾಡಿಕೊಳ್ಳಲು ಸಾಮೂಹಿಕ ಪ್ರಾರ್ಥನೆ ಮತ್ತು ಸ್ವಲ್ಪ ಸಮಯ ನಾಮಜಪ ಮಾಡಬೇಕು. ಸಾಯಂಕಾಲ ಪುನಃ ಆರತಿ ಮಾಡಿ ಶ್ರೀ ಗಣೇಶಸ್ತೋತ್ರ ಪಠಣ ಹಾಗೂ 'ಓಂ ಗಂ ಗಣಪತಯೇ ನಮಃ' ನಾಮಜಪ ಮಾಡಬೇಕು.
ಉಚ್ಚ ದೇವತೆಗಳ ಲೋಕಗಳಲ್ಲಿ ಗಣೇಶಲೋಕವು ಭೂಲೋಕಕ್ಕೆ ಹತ್ತಿರವಿರುವುದರಿಂದ ಗಣೇಶ ಲಹರಿಗಳು ಭೂಮಿಯ ಮೇಲೆ ಹೆಚ್ಚು ಕಾರ್ಯನಿರತವಾಗಿರುತ್ತವೆ. ಗಣೇಶೋತ್ಸವದ ಸಮಯದಲ್ಲಿ ಶ್ರೀಗಣೇಶನ ಪೂಜೆಯಿಂದ ಶೇಕಡಾ ೨೦, ಶರೀರದಲ್ಲಿ ಗಣೇಶತತ್ತ್ವ ಆಕರ್ಷಿಸುವ ಆಚರಣೆಯಿಂದ ಶೇಕಡಾ ೨೦, ನಾಮಜಪದಿಂದ ಶೇಕಡಾ ೩೦ ಹಾಗೂ ಗಣೇಶನ ವಿಡಂಬನೆ ತಡೆಯುವುದರಿಂದ ಶೇಕಡಾ ೩೦ ರಷ್ಟು ಸೇರಿ ಒಟ್ಟು ಶೇಕಡಾ ೧೦೦ ರಷ್ಟು ಆಧ್ಯಾತ್ಮಿಕ ಲಾಭ ದೊರೆಯುತ್ತದೆ ಎಂದು ಸನಾತನ ಸಂಸ್ಥೆಯ ರಾಜ್ಯ ವಕ್ತಾರ ವಿನೋದ ಕಾಮತ್ ಪತ್ರಿಕಾ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
ಸನಾತನ ಸಂಸ್ಥೆಯನ್ನು ಸಂಪರ್ಕಿಸಲು ಮತ್ತು ಹೆಚ್ಚಿನ ವಿವರಗಳನ್ನು ಪಡೆಯಲು ಕೆಳಗಿನ ಮಾಹಿತಿಗಳನ್ನು ಬಳಸಬಹುದು:
ಸಂಪರ್ಕ ಸಂಖ್ಯೆ: 9342599299 (ಶ್ರೀ ವಿನೋದ ಕಾಮತ್, ರಾಜ್ಯ ವಕ್ತಾರರು, ಸನಾತನ ಸಂಸ್ಥೆ)
ಅಧಿಕೃತ ವೆಬ್ಸೈಟ್: [https://sanatan.org/kannada](https://sanatan.org/kannada)
