ಕೈಯಲ್ಲಿರುವ ಮೊಬೈಲ್ ನಮ್ಮನ್ನು ಜಗತ್ತಿಗೆ ಹತ್ತಿರ ಮಾಡಿತೇ... ಅಥವಾ ನಮ್ಮವರಿಂದ ದೂರ ಮಾಡಿತೇ? ಒಮ್ಮೆ ಯೋಚಿಸಿ ನೋಡಿ.
ಇಂದು ಬೆಳಿಗ್ಗೆ ಎದ್ದ ಕೂಡಲೇ ನೀವು ಮೊದಲು ಯಾರ ಮುಖ ನೋಡಿದಿರಿ? ಮನೆಯವರದ್ದೇ... ಅಥವಾ ಮೊಬೈಲ್ ಸ್ಕ್ರೀನ್ನದ್ದೇ?
ಈ ಪ್ರಶ್ನೆ ಕೇಳಿದಾಗ ಉತ್ತರ ಹುಡುಕಲು ನಮಗೆ ಹೆಚ್ಚು ಸಮಯ ಬೇಕಾಗುವುದಿಲ್ಲ. ಏಕೆಂದರೆ ಇಂದು ನಮ್ಮ ದಿನ ಪ್ರಾರಂಭವಾಗುವುದೇ ಮೊಬೈಲ್ನಿಂದ. ರಾತ್ರಿ ಮಲಗುವ ಮುನ್ನ ಕೊನೆಯದಾಗಿ ಕಣ್ಣು ಹಾಯಿಸುವುದೂ ಅದರ ಮೇಲೆಯೇ. ಮಾನವ ಇತಿಹಾಸದಲ್ಲೇ ಇಷ್ಟು ಕಡಿಮೆ ಅವಧಿಯಲ್ಲಿ ನಮ್ಮ ಬದುಕನ್ನು ಇಷ್ಟೊಂದು ಆಳವಾಗಿ ಬದಲಿಸಿದ ಮತ್ತೊಂದು ತಂತ್ರಜ್ಞಾನವಿಲ್ಲ.
ಸಂವಹನ ಕ್ರಾಂತಿಯ ಹೊಸ ಯುಗ:
ಮಾನವ ಸಮಾಜದ ಬೆಳವಣಿಗೆಯನ್ನು ಗಮನಿಸಿದರೆ, ಪ್ರತಿಯೊಂದು ಯುಗದಲ್ಲೂ ಹೊಸ ಸಂಪರ್ಕ ಮಾಧ್ಯಮಗಳು ಸಮಾಜದ ದಿಕ್ಕನ್ನೇ ಬದಲಿಸಿವೆ. ಮಾತಿನಿಂದ ಆರಂಭವಾದ ಸಂವಹನ ಲಿಪಿಯಾಗಿ ಬೆಳೆಯಿತು. ನಂತರ ಪುಸ್ತಕಗಳು, ಪತ್ರಿಕೆಗಳು ಬಂದವು. ರೇಡಿಯೋ ಮತ್ತು ದೂರದರ್ಶನ ಜನರ ಚಿಂತನೆಯ ಮೇಲೆ ಪ್ರಭಾವ ಬೀರಿದವು. ಆದರೆ ಇವೆಲ್ಲಕ್ಕಿಂತಲೂ ಅತ್ಯಂತ ವೇಗವಾಗಿ ಮಾನವನ ದಿನಚರಿಯನ್ನು ಬದಲಿಸಿದ್ದು ಸಾಮಾಜಿಕ ಜಾಲತಾಣಗಳು.
ಒಂದು ಕಾಲದಲ್ಲಿ ಒಂದು ಸುದ್ದಿಯು ಒಂದು ಊರಿನಿಂದ ಮತ್ತೊಂದು ಊರಿಗೆ ತಲುಪಲು ದಿನಗಳು ಬೇಕಾಗುತ್ತಿತ್ತು. ಇಂದು ಅದೇ ಸುದ್ದಿ ಕೆಲವು ಸೆಕೆಂಡುಗಳಲ್ಲಿ ಲಕ್ಷಾಂತರ ಜನರ ಮೊಬೈಲ್ ತಲುಪುತ್ತದೆ. ಮಾಹಿತಿಯ ವೇಗ ಹೆಚ್ಚಿದಂತೆ ಬದುಕಿನ ವೇಗವೂ ಹೆಚ್ಚಾಗಿದೆ. ಆದರೆ, ಈ ವೇಗದ ಓಟದಲ್ಲಿ ನಾವು ಏನನ್ನಾದರೂ ಕಳೆದುಕೊಳ್ಳುತ್ತಿದ್ದೇವೆಯೇ ಎಂಬ ಪ್ರಶ್ನೆಯೂ ನಮ್ಮನ್ನು ಕಾಡದೇ ಇರದು.
ಕರಗುತ್ತಿರುವ ಕೌಟುಂಬಿಕ ಒಡನಾಟ:
ಕೆಲವು ವರ್ಷಗಳ ಹಿಂದೆ ಸಂಜೆ ಸಮಯ ಎಂದರೆ ಮನೆಯ ಜಗುಲಿಯ ಮೇಲೆ ಕುಳಿತು ನೆರೆಹೊರೆಯವರ ಜೊತೆ ಮಾತುಕತೆ, ಅಜ್ಜ-ಅಜ್ಜಿಯರಿಂದ ಕಥೆ ಕೇಳುವುದು, ಸ್ನೇಹಿತರ ಜೊತೆ ಮೈದಾನದಲ್ಲಿ ಆಟ, ಕುಟುಂಬದವರೊಂದಿಗೆ ಊಟದ ವೇಳೆ ಹರಟೆ—ಇವೆಲ್ಲವೂ ಬದುಕಿನ ಅವಿಭಾಜ್ಯ ಭಾಗವಾಗಿದ್ದವು. ಇಂದು ಆ ಜಾಗವನ್ನೆಲ್ಲ ಮೊಬೈಲ್ ಆಕ್ರಮಿಸಿಕೊಂಡಿದೆ. ಒಂದೇ ಮನೆಯ ನಾಲ್ಕು ಜನರು ಒಂದೇ ಕೊಠಡಿಯಲ್ಲಿ ಕುಳಿತಿದ್ದರೂ, ನಾಲ್ಕು ವಿಭಿನ್ನ ಡಿಜಿಟಲ್ ಜಗತ್ತುಗಳಲ್ಲಿ ಬದುಕುತ್ತಿರುವಂತೆ ಕಾಣುತ್ತದೆ.
ವರದಾನವಾದ ಡಿಜಿಟಲ್ ಸಂಪರ್ಕಗಳು:
ಸಾಮಾಜಿಕ ಜಾಲತಾಣಗಳು ಜನರನ್ನು ಹತ್ತಿರ ತಂದಿವೆ ಎನ್ನುವುದು ಸುಳ್ಳಲ್ಲ. ಅಮೆರಿಕದಲ್ಲಿರುವ ಮಗ ಭಾರತದಲ್ಲಿರುವ ತನ್ನ ತಂದೆ-ತಾಯಿಯೊಂದಿಗೆ ಪ್ರತಿದಿನ ವಿಡಿಯೋ ಕಾಲ್ ಮಾಡಬಹುದು. ಶಾಲೆಯ ಹಳೇ ಸ್ನೇಹಿತರು ಹಲವು ವರ್ಷಗಳ ನಂತರ ಮತ್ತೆ ಒಂದಾಗಬಹುದು. ತುರ್ತು ಸಂದರ್ಭಗಳಲ್ಲಿ ಸಹಾಯ ಕ್ಷಣಾರ್ಧದಲ್ಲಿ ತಲುಪಬಹುದು. ರಕ್ತದಾನದ ಅಗತ್ಯವಿದ್ದರೂ, ಕಾಣೆಯಾದ ವ್ಯಕ್ತಿಯ ಮಾಹಿತಿ ಬೇಕಿದ್ದರೂ, ಎಷ್ಟೋ ಸಮಾಜಮುಖಿ ಕೆಲಸಗಳಿಗೆ ಜನರನ್ನು ಒಂದಾಗಿಸಬೇಕಾದರೂ ಸಾಮಾಜಿಕ ಜಾಲತಾಣಗಳು ಅತ್ಯಂತ ಪರಿಣಾಮಕಾರಿ ಸಾಧನಗಳಾಗಿವೆ. ಆದರೆ ಪ್ರತಿಯೊಂದು ನಾಣ್ಯಕ್ಕೂ ಎರಡು ಮುಖಗಳಿರುವಂತೆ, ಇದಕ್ಕೂ ಇನ್ನೊಂದು ಕರಾಳ ಮುಖವಿದೆ.
ಹೆಚ್ಚುತ್ತಿರುವ ಮೌನ, ಮಾಯವಾಗುತ್ತಿರುವ ಮಾತು:
ಇಂದು ಅನೇಕ ಮನೆಗಳಲ್ಲಿ ಮಾತಿಗಿಂತ ಮೆಸೇಜ್ಗಳೇ ಹೆಚ್ಚು. ಒಟ್ಟಿಗೆ ಕುಳಿತಿರುವವರು ಮಾತನಾಡಿಕೊಳ್ಳುವುದಕ್ಕಿಂತ ಫೋನ್ ನೋಡುವುದರಲ್ಲೇ ಬ್ಯುಸಿ. ಕೆಲವೊಮ್ಮೆ ಊಟದ ಮೇಜಿನ ಮೇಲೂ ಮೌನವೇ ಹೆಚ್ಚು, ಮಾತು ಕಡಿಮೆ. ಸಂಬಂಧಗಳು ಉಳಿದಿವೆ. ಆದರೆ ಸಂಭಾಷಣೆಗಳು ಕಡಿಮೆಯಾಗುತ್ತಿವೆ. ಜಗತ್ತಿನೊಂದಿಗೆ ಸಂಪರ್ಕ ಹೆಚ್ಚಾದರೂ, ಒಡನಾಡಿಗಳೊಂದಿಗೆ ಆತ್ಮೀಯತೆ ಕಡಿಮೆಯಾಗುತ್ತಿದೆ ಎಂಬ ಭಾವನೆ ಮೂಡುತ್ತಿದೆ.
ಯುವಜನತೆಯ ಸವಾಲುಗಳು ಮತ್ತು ಅವಕಾಶಗಳು:
ಯುವಜನರ ಬದುಕಿನಲ್ಲಿ ಸಾಮಾಜಿಕ ಜಾಲತಾಣಗಳು ಇಂದು ದೈತ್ಯ ಸ್ಥಾನ ಪಡೆದಿವೆ. ಇದು ಎಷ್ಟು ಒಳ್ಳೆಯದೋ, ಅಷ್ಟೇ ದೊಡ್ಡ ಸವಾಲೂ ಹೌದು. ಇಂದು ಒಬ್ಬ ವಿದ್ಯಾರ್ಥಿ ತನ್ನ ಪ್ರತಿಭೆಯನ್ನು ಇಡೀ ಜಗತ್ತಿಗೆ ತೋರಿಸಬಹುದು. ಹಾಡು, ಚಿತ್ರಕಲೆ, ವಿಜ್ಞಾನ, ಕೃಷಿ, ವ್ಯವಹಾರ, ಶಿಕ್ಷಣ - ಯಾವ ಕ್ಷೇತ್ರವಾದರೂ ಮುಕ್ತ ಅವಕಾಶಗಳು ತೆರೆದಿವೆ. ಒಂದು ಸಣ್ಣ ಹಳ್ಳಿಯ ಯುವಕನೂ ತನ್ನ ಕ್ರಿಯಾಶೀಲತೆಯಿಂದ ಲಕ್ಷಾಂತರ ಜನರನ್ನು ತಲುಪಬಹುದು. ಹಿಂದೆ ಕನಸಾಗಿದ್ದ ಅನೇಕ ಅವಕಾಶಗಳು ಇಂದು ಕುಳಿತ ಜಾಗದಲ್ಲೇ ವಾಸ್ತವವಾಗಿವೆ.
ಆದರೆ ಅದೇ ಸಮಯದಲ್ಲಿ, ಅಪಾಯಕಾರಿ 'ಹೋಲಿಕೆಯ ಮನೋಭಾವವೂ' ಹೆಚ್ಚಾಗಿದೆ. ಜಾಲತಾಣಗಳಲ್ಲಿ ಇತರರ ಯಶಸ್ಸು ಮಾತ್ರ ಕಾಣುತ್ತದೆ; ಅವರ ಹಿನ್ನಲೆಯ ಹೋರಾಟ ಯಾರಿಗೂ ಕಾಣುವುದಿಲ್ಲ. ದುಬಾರಿ ಕಾರು, ಪ್ರವಾಸ, ಐಷಾರಾಮಿ ಜೀವನ—ಇವೆಲ್ಲವನ್ನೂ ನೋಡಿ "ನನ್ನ ಜೀವನ ಮಾತ್ರ ಹೀಗೆ ಯಾಕೆ?" ಎಂಬ ಕೀಳರಿಮೆ ಅನೇಕ ಯುವಕರ ಮನಸ್ಸಿನಲ್ಲಿ ಮೂಡುತ್ತದೆ. ಪರಿಣಾಮವಾಗಿ ಆತ್ಮವಿಶ್ವಾಸ ಕುಗ್ಗುತ್ತದೆ. ಕೆಲವರಿಗಂತೂ "ಲೈಕ್" ಮತ್ತು "ಫಾಲೋವರ್ಸ್"ಗಳ ಸಂಖ್ಯೆಯೇ ತಮ್ಮ ಜೀವನದ ಮೌಲ್ಯವನ್ನು ನಿರ್ಧರಿಸುತ್ತಿವೆ ಎಂಬ ಭ್ರಮೆ ಉಂಟಾಗುತ್ತಿದೆ.
ವದಂತಿಗಳ ಸಂತೆ ಮತ್ತು ಮಾಹಿತಿ ಮಾಲಿನ್ಯ
ನಮಗೆ ತಲುಪುವ ಮಾಹಿತಿಯ ವಿಷಯದಲ್ಲೂ ಇದೇ ಆತಂಕ ಎದುರಾಗಿದೆ. ಇಂದು ಒಂದು ಸುದ್ದಿ ಸತ್ಯವೇ ಅಥವಾ ಸುಳ್ಳೇ ಎಂಬುದನ್ನು ತಿಳಿದುಕೊಳ್ಳುವುದಕ್ಕಿಂತ, ಅದನ್ನು "ಮೊದಲು ನಾನು ಹಂಚಿಕೊಳ್ಳಬೇಕು" ಎಂಬ ಆತುರವೇ ಎಲ್ಲರಲ್ಲಿದೆ. ಪರಿಣಾಮವಾಗಿ ಸುಳ್ಳು ಸುದ್ದಿಗಳು, ಅಪೂರ್ಣ ಮಾಹಿತಿಗಳು ಮತ್ತು ವದಂತಿಗಳು ಸಮಾಜದಲ್ಲಿ ಗೊಂದಲ ಸೃಷ್ಟಿಸುತ್ತವೆ. ಒಂದು ಕ್ಲಿಕ್ನಿಂದ ಲಕ್ಷಾಂತರ ಜನರನ್ನು ತಲುಪುವ ಮಾಹಿತಿ, ಕೆಲವೊಮ್ಮೆ ಲಕ್ಷಾಂತರ ಜನರನ್ನು ತಪ್ಪು ದಾರಿಗೆ ಕೊಂಡೊಯ್ಯಬಹುದು.
ರಾಜಕೀಯ, ಸಮಾಜಸೇವೆ, ಪರಿಸರ, ಶಿಕ್ಷಣ, ಆರೋಗ್ಯ - ಯಾವ ಕ್ಷೇತ್ರವನ್ನೇ ತೆಗೆದುಕೊಂಡರೂ ಸಾಮಾಜಿಕ ಜಾಲತಾಣಗಳು ಇಂದು ಪ್ರಮುಖ ಪಾತ್ರ ವಹಿಸುತ್ತಿವೆ. ಜನರು ತಮ್ಮ ಅಭಿಪ್ರಾಯಗಳನ್ನು ಮುಕ್ತವಾಗಿ ವ್ಯಕ್ತಪಡಿಸುತ್ತಿದ್ದಾರೆ, ಒಳ್ಳೆಯ ಕೆಲಸಗಳು ಹೆಚ್ಚು ಜನರನ್ನು ತಲುಪುತ್ತಿವೆ. ಆದರೆ, ಇದೇ ವೇಳೆ ದ್ವೇಷ, ಸುಳ್ಳು ಪ್ರಚಾರ ಮತ್ತು ಅಪಪ್ರಚಾರವೂ ಅಷ್ಟೇ ವೇಗದಲ್ಲಿ ಹರಡುತ್ತಿರುವುದು ಕಳವಳಕಾರಿ ಸಂಗತಿ.
ಉದ್ಯಮ ರಂಗದ ಹೊಸ ದಿಗಂತ
ವ್ಯಾಪಾರ ಕ್ಷೇತ್ರದಲ್ಲಿಯೂ ಇದರಿಂದ ದೊಡ್ಡ ಬದಲಾವಣೆ ಕಂಡುಬಂದಿದೆ. ಹಿಂದೆ ದೊಡ್ಡ ಕಂಪನಿಗಳಿಗೆ ಮಾತ್ರ ಜಾಹೀರಾತಿನ ಅವಕಾಶ ಇತ್ತು. ಇಂದು ಮನೆಯಲ್ಲೇ ತಯಾರಿಸಿದ ಉತ್ಪನ್ನವನ್ನೂ ಸಾಮಾಜಿಕ ಜಾಲತಾಣಗಳ ಮೂಲಕ ಜಗತ್ತಿನ ಮಾರುಕಟ್ಟೆಗೆ ಪರಿಚಯಿಸಬಹುದು. ಸಾವಿರಾರು ಯುವಕರು ಇದರ ಮೂಲಕ ಸ್ವಯಂ ಉದ್ಯೋಗ ಕಂಡುಕೊಂಡಿದ್ದಾರೆ. ಅನೇಕ ಮಹಿಳೆಯರು ಮನೆಯ ಹೊಸ್ತಿಲು ದಾಟದೆಯೇ ಯಶಸ್ವಿ ಉದ್ಯಮಿಗಳಾಗಿದ್ದಾರೆ. ತಂತ್ರಜ್ಞಾನವು ವ್ಯಾಪಾರದ ಅವಕಾಶಗಳನ್ನು ಜನಸಾಮಾನ್ಯರ ಮನೆಬಾಗಿಲಿಗೂ ತಲುಪಿಸಿದೆ.
ಸಮಯದ ಸುಳಿಯಲ್ಲಿ ಮಾನವ
ಆದರೆ ಇಲ್ಲೊಂದು ಯಕ್ಷಪ್ರಶ್ನೆ ಕಾಡುತ್ತದೆ, ನಾವು ಮೊಬೈಲ್ ಬಳಸುತ್ತಿದ್ದೇವೆಯೇ? ಅಥವಾ ಮೊಬೈಲ್ ನಮ್ಮ ಸಮಯವನ್ನು ಬಳಸುತ್ತಿದೆಯೇ?
"ಐದು ನಿಮಿಷ" ಎಂದು ಕೈಗೆತ್ತಿಕೊಂಡ ಫೋನ್, ಒಂದು ಗಂಟೆಯ ನಂತರವೂ ಕೈಯಲ್ಲೇ ಇರುತ್ತದೆ. ಎಷ್ಟು ವಿಡಿಯೋ ನೋಡಿದೆವು ಎಂಬುದು ನೆನಪಿರದಿದ್ದರೂ, ಅಮೂಲ್ಯವಾದ ಸಮಯ ಕಳೆದುಹೋಯಿತು ಎಂಬುದು ಮಾತ್ರ ನಂತರ ಅರಿವಾಗುತ್ತದೆ. ಸಮಯದ ಜೊತೆಗೆ ನಮ್ಮ ಗಮನ, ಏಕಾಗ್ರತೆ ಮತ್ತು ಮಾನಸಿಕ ಶಾಂತಿಯೂ ನಿಧಾನವಾಗಿ ಕ್ಷೀಣಿಸುತ್ತಿದೆ.
ವಿವೇಕವೇ ನಮ್ಮ ರಕ್ಷಾಕವಚ
ಸಾಮಾಜಿಕ ಜಾಲತಾಣಗಳು ಬೆಂಕಿಯಂತೆ.... ಅಡುಗೆ ಮಾಡಲು ಬಳಸಿದರೆ ಅದು ಉಪಯುಕ್ತ, ನಿಯಂತ್ರಣ ತಪ್ಪಿದರೆ ಇಡೀ ಮನೆಯೇ ಭಸ್ಮ. ಇಲ್ಲಿ ತಪ್ಪು ಬೆಂಕಿಯದ್ದಲ್ಲ, ಅದನ್ನು ನಾವು ಬಳಸುವ ರೀತಿಯಲ್ಲಿರುತ್ತದೆ. ಇದೇ ಮಾತು ಸಾಮಾಜಿಕ ಜಾಲತಾಣಗಳಿಗೂ ಅನ್ವಯಿಸುತ್ತದೆ.
ನಾವು ತಂತ್ರಜ್ಞಾನದ ಬೆಳವಣಿಗೆಯನ್ನು ತಡೆಯಲು ಸಾಧ್ಯವಿಲ್ಲ, ಅದರ ಅಗತ್ಯವೂ ಇಲ್ಲ. ಆದರೆ ಅದನ್ನು ಬಳಸುವ ವಿವೇಕ ಮತ್ತು ಸಂಸ್ಕಾರವನ್ನು ಬೆಳೆಸಿಕೊಳ್ಳಬೇಕು. ಯಾವ ಮಾಹಿತಿಯನ್ನು ನಂಬಬೇಕು, ಎಷ್ಟು ಸಮಯ ಸ್ಕ್ರೀನ್ ನೋಡಬೇಕು, ಏನನ್ನು ಹಂಚಿಕೊಳ್ಳಬೇಕು ಮತ್ತು ಏನನ್ನು ನಿರ್ಲಕ್ಷಿಸಬೇಕು ಎಂಬ ಸ್ಪಷ್ಟತೆ ಪ್ರತಿಯೊಬ್ಬರಲ್ಲೂ ಇರಬೇಕು.
ಸಾಮಾಜಿಕ ಜಾಲತಾಣಗಳು ನಮ್ಮ ಕೈಯಲ್ಲಿರುವ ಅತ್ಯಂತ ಶಕ್ತಿಯುತ ಸಾಧನ. ಅದು ಸಮಾಜವನ್ನು ಕಟ್ಟುವ ಶಕ್ತಿಯನ್ನೂ ಹೊಂದಿದೆ, ಒಡೆಯುವ ಶಕ್ತಿಯನ್ನೂ ಹೊಂದಿದೆ. ಅದನ್ನು ಯಾವ ದಿಸೆಯಲ್ಲಿ ಬಳಸಬೇಕು ಎಂಬ ಅಂತಿಮ ನಿರ್ಧಾರ ತಂತ್ರಜ್ಞಾನದ ಕೈಯಲ್ಲಿಲ್ಲ, ಅದನ್ನು ಹಿಡಿದಿರುವ ನಮ್ಮ ಕೈಯಲ್ಲಿದೆ.
ಆದ್ದರಿಂದ... ನಾವು ಸಾಮಾಜಿಕ ಜಾಲತಾಣಗಳನ್ನು ಬಳಸುತ್ತಿದ್ದೇವೆಯೇ? ಅಥವಾ ಸಾಮಾಜಿಕ ಜಾಲತಾಣಗಳೇ ನಮ್ಮನ್ನು ಬಳಸಿಕೊಳ್ಳುತ್ತಿದ್ದವೆಯೇ? ಇದಕ್ಕೆ ಸರಿಯಾದ ಉತ್ತರ ಕಂಡುಕೊಂಡಾಗ ಮಾತ್ರ ನಮ್ಮ ತಿಳುವಳಿಕೆ ಸಾರ್ಥಕವೆನಿಸುತ್ತದೆ.
- ಅಖಿಲೇಶ್ ಕೀರಿಕ್ಕಾಡು
ಉಪಯುಕ್ತ ನ್ಯೂಸ್ ಈಗ ಸ್ವದೇಶಿ ಸಾಮಾಜಿಕ ಜಾಲತಾಣ Arattai ನಲ್ಲಿ... ನಮ್ಮ ಚಾನೆಲ್ಗೆ ನೀವೂ ಜಾಯಿನ್ ಆಗಿ.
ನಿರಂತರ ಅಪ್ಡೇಟ್ಗಳಿಗಾಗಿ ಉಪಯುಕ್ತ ನ್ಯೂಸ್ ಟೆಲಿಗ್ರಾಂ ಚಾನೆಲ್ಗೆ ಜಾಯಿನ್ ಆಗಿ
ಉಪಯುಕ್ತ ನ್ಯೂಸ್’ ಫೇಸ್ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್ ವಾಟ್ಸಪ್ ಗ್ರೂಪ್ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ
