ನವದೆಹಲಿ: ಭಾರತದ ಉದ್ಯಮ ಮತ್ತು ಆಂತರಿಕ ವ್ಯಾಪಾರ ಪರಿಸರ ವ್ಯವಸ್ಥೆಯಲ್ಲಿ ಬಹುಭಾಷಾ ಡಿಜಿಟಲ್ ಸಾಮರ್ಥ್ಯಗಳನ್ನು ಬಲಪಡಿಸಲು 'ಡಿಜಿಟಲ್ ಇಂಡಿಯಾ ಭಾಷಿಣಿ' (BHASHINI) ವಿಭಾಗವು, ಕೇಂದ್ರ ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವಾಲಯದ ಅಡಿಯಲ್ಲಿ ಬರುವ 'ಉದ್ಯಮ ಮತ್ತು ಆಂತರಿಕ ವ್ಯಾಪಾರ ಉತ್ತೇಜನ ಇಲಾಖೆ' (DPIIT) ಜೊತೆಗೆ ಮಹತ್ವದ ಒಪ್ಪಂದಕ್ಕೆ ಸಹಿ ಹಾಕಿದೆ.
ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯದ ಪ್ರಕಾರ, ಈ ಪಾಲುದಾರಿಕೆಯು ಡಿಪಿಐಐಟಿಯ ಡಿಜಿಟಲ್ ಪ್ಲಾಟ್ಫಾರ್ಮ್ಗಳಲ್ಲಿ ಬಹುಭಾಷಾ ಪ್ರವೇಶ, ಬಹುಭಾಷಾ ಆಡಳಿತ ಮತ್ತು ಬಹುಭಾಷಾ ಸೇವಾ ವಿತರಣೆಯನ್ನು ಉತ್ತೇಜಿಸುವ ಗುರಿಯನ್ನು ಹೊಂದಿದೆ.
ಈ ಒಪ್ಪಂದದ ಪ್ರಮುಖ ಉದ್ದೇಶಗಳು:
ಭಾಷೆಯ ಅಡೆತಡೆಗಳ ನಿವಾರಣೆ: ಸರ್ಕಾರಿ ಮಾಹಿತಿ, ಸ್ಟಾರ್ಟ್ಅಪ್ (ನವೋದ್ಯಮ) ಮತ್ತು ಕೈಗಾರಿಕಾ ಸೇವೆಗಳು, ನೀತಿ ಸಂವಹನ ಹಾಗೂ ನಾಗರಿಕರ ಪಾಲ್ಗೊಳ್ಳುವಿಕೆಯಲ್ಲಿ ಎದುರಾಗುವ ಭಾಷೆಯ ಅಡೆತಡೆಗಳನ್ನು ಇದು ನಿವಾರಿಸಲಿದೆ.
ಅರ್ಗಾನಿಕ್ ಉದ್ಯಮಶೀಲತೆಗೆ ಬೆಂಬಲ: ಇಂಗ್ಲಿಷ್ ಅಥವಾ ಹಿಂದಿ ಭಾಷೆಯ ಜ್ಞಾನ ಕಡಿಮೆ ಇರುವ, ಗ್ರಾಮೀಣ ಹಾಗೂ ಸಣ್ಣ ನಗರಗಳ ಉದ್ಯಮಿಗಳು ಮತ್ತು ಹೂಡಿಕೆದಾರರು ಇನ್ನು ಮುಂದೆ ತಮ್ಮದೇ ಮಾತೃಭಾಷೆಯಲ್ಲಿ ಸರ್ಕಾರಿ ಯೋಜನೆಗಳು ಮತ್ತು ಸೇವೆಗಳ ಲಾಭವನ್ನು ಪಡೆಯಬಹುದು.
ಒಳಗೊಳ್ಳುವಿಕೆಯ ಹೂಡಿಕೆ ವ್ಯವಸ್ಥೆ: ಎಲ್ಲ ವರ್ಗದ ಜನರನ್ನು ಒಳಗೊಳ್ಳುವಂತಹ ಹೂಡಿಕೆ ಪರಿಸರವನ್ನು ನಿರ್ಮಿಸಲು ಇದು ನೆರವಾಗಲಿದೆ.
ಈ ಒಪ್ಪಂದವು ಕೃತಕ ಬುದ್ಧಿಮತ್ತೆ (AI) ಆಧಾರಿತ ಡಿಜಿಟಲ್ ಆಡಳಿತವನ್ನು ಮತ್ತಷ್ಟು ಬಲಪಡಿಸಲಿದೆ. ಭಾಷೆಯ ಗಡಿಗಳನ್ನು ಮೀರಿ, ದೇಶದ ಪ್ರತಿಯೊಬ್ಬ ಪ್ರಜೆಗೂ ಡಿಜಿಟಲ್ ಮತ್ತು ಆರ್ಥಿಕ ಸೌಲಭ್ಯಗಳು ತಲುಪುವಂತೆ ಮಾಡುವಲ್ಲಿ 'ಭಾಷಿಣಿ' ಪ್ಲಾಟ್ಫಾರ್ಮ್ ಈಗ ದೇಶದ ಪ್ರಮುಖ ಭಾಷಾ ಮೂಲಸೌಕರ್ಯವಾಗಿ ಹೊರಹೊಮ್ಮಿದೆ.
