ಅಥೆನ್ಸ್: “ವಿಶ್ವದ ಸ್ಥಿರತೆ ಮತ್ತು ಉಳಿವು ಭಗವದ್ಗೀತೆ ಹಾಗೂ ದೇವಿ ಮಹಾತ್ಮ್ಯದ ಸಂದೇಶಗಳ ಮೇಲೆ ಅವಲಂಬಿತವಾಗಿದೆ. ಮಹಿಷಾಸುರನು ಅಹಂಕಾರದ ಪ್ರತಿರೂಪವಾಗಿದ್ದು ಲೋಕವನ್ನು ಕಾಡಿದನು; ದೇವಿಯು ದೈವತ್ವದ ಪ್ರತಿನಿಧಿಯಾಗಿ ಅದನ್ನು ಜಯಿಸಿ ಧರ್ಮದ ಸ್ಥಾಪನೆ ಮಾಡಿದಳು,” ಎಂದು ಶ್ರೀ ಸುಗುಣೇಂದ್ರ ತೀರ್ಥ ಸ್ವಾಮೀಜಿ ಹೇಳಿದರು.
ಗ್ರೀಸ್ನ ಅಥೆನ್ಸ್ನಲ್ಲಿ ಏಪ್ರಿಲ್ 27ರಂದು ನಡೆದ ಎರಡು ದಿನಗಳ ಅಂತಾರಾಷ್ಟ್ರೀಯ ಕಾರ್ಯಕ್ರಮದ ಉದ್ಘಾಟನೆಯಲ್ಲಿ ಅವರು ಮುಖ್ಯ ಭಾಷಣ ಮಾಡಿದರು. ಇದೇ ಸಂದರ್ಭದಲ್ಲಿ “ಕ್ರಾನಿಕಲ್ಸ್ ಆಫ್ ದೇವಿ” ಎಂಬ ಚಲನಚಿತ್ರವನ್ನು ಬಿಡುಗಡೆ ಮಾಡಲಾಗಿದ್ದು, ಅನ್ಯಾಯದ ಮೇಲೆ ಶಾಂತಿ ಮತ್ತು ಧರ್ಮದ ಜಯವಾಗುವ ಸಂದೇಶವನ್ನು ಕಾರ್ಯಕ್ರಮ ಒತ್ತಿಹೇಳಿತು.
ಭಾರತ ಮತ್ತು ಪಾಶ್ಚಾತ್ಯ ನಾಗರಿಕತೆಗಳ ಸಾಂಸ್ಕೃತಿಕ ಸಂಗಮದ ಸಂಕೇತವಾಗಿ ಈ ಕಾರ್ಯಕ್ರಮವನ್ನು ಆಯೋಜಿಸಲಾಗಿತ್ತು. ಗ್ರೀಸ್ನಲ್ಲಿ ಇದೇ ಮೊದಲ ಬಾರಿಗೆ ನಡೆದ ಈ ರೀತಿಯ ಕಾರ್ಯಕ್ರಮದಲ್ಲಿ ಭಾರತದಿಂದ ಧಾರ್ಮಿಕ ಗುರುಗಳು, ಪಂಡಿತರು ಹಾಗೂ ಚಿಂತಕರು ಭಾಗವಹಿಸಿದ್ದರು.
ಕಾರ್ಯಕ್ರಮದಲ್ಲಿ ಭದ್ರೇಶ್ ದಾಸ್ ಸ್ವಾಮೀಜಿ (ಬಿಎಪಿಎಸ್ ಸ್ವಾಮಿನಾರಾಯಣ ಸಂಸ್ಥೆ), ಚೆನ್ನ ಸಿದ್ಧರಾಮ ಸ್ವಾಮೀಜಿ ಸೇರಿದಂತೆ ಅನೇಕ ಗಣ್ಯರು ಉಪಸ್ಥಿತರಿದ್ದರು. ಗ್ರೀಕ್ ನಟ ಅಂಥಿಮೋಸ್ ಅನಾನಿಯಾಡಿಸ್ ಹಾಗೂ ಭಾರತದ ರಾಯಭಾರ ಕಚೇರಿಯ ಚಾರ್ಜ್ ಡಿ ಅಫೈರ್ಸ್ ಬಾಲಾಜಿ ನಾಗರಥ್ ಕೂಡ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.
ಗ್ರೀಕ್ ಸರ್ಕಾರದ ಈ ರೀತಿಯ ಕಾರ್ಯಕ್ರಮಗಳ ಆಯೋಜನೆಗೆ ಸ್ವಾಮೀಜಿ ಮೆಚ್ಚುಗೆ ವ್ಯಕ್ತಪಡಿಸಿದರು. ವಿಶ್ವದಲ್ಲಿ ಸಹೋದರತ್ವ ಮತ್ತು ಏಕತೆಯ ಸಂದೇಶ ನೀಡಲು ಆರಂಭವಾದ ಒಲಿಂಪಿಕ್ಸ್ನ ನೆಲ ಗ್ರೀಸ್ ಆಗಿದ್ದು, “ವಸುಧೈವ ಕುಟುಂಬಕಂ” ಎಂಬ ಭಾರತೀಯ ಮೌಲ್ಯಗಳೊಂದಿಗೆ ಅದನ್ನು ಅವರು ಸಂಪರ್ಕಿಸಿದರು.
ಸಭೆಯನ್ನುದ್ದೇಶಿಸಿ ಮಾತನಾಡಿದ ಶ್ರೀ ಸುಗುಣೇಂದ್ರ ತೀರ್ಥ ಸ್ವಾಮೀಜಿ, ಭಗವದ್ಗೀತೆ ಮತ್ತು ದೇವಿ ಮಹಾತ್ಮ್ಯಗಳ ನಡುವಿನ ತತ್ತ್ವಸಾಮ್ಯಗಳನ್ನು ವಿವರಿಸಿ, ಎರಡೂ ಗ್ರಂಥಗಳು ಅಹಂಕಾರದ ಮೇಲೆ ಧರ್ಮದ ಜಯ, ಅನ್ಯಾಯದ ಮೇಲೆ ನ್ಯಾಯದ ಸ್ಥಾಪನೆ ಹಾಗೂ ಯುದ್ಧಕ್ಕಿಂತ ಶಾಂತಿಯ ಮಹತ್ವವನ್ನು ಸಾರುತ್ತವೆ ಎಂದು ಹೇಳಿದರು.
ಈ ಧಾರ್ಮಿಕ ಸಂಕಲ್ಪದ ಭಾಗವಾಗಿ ಕೈಗೊಂಡಿರುವ ಕೋಟಿ ಗೀತಾ ಲೇಖನ ಸಂಕಲ್ಪದ ಕುರಿತು ಅವರು ಪ್ರಸ್ತಾಪಿಸಿ, ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ಗಣ್ಯರು, ಗ್ರೀಕ್ ನಾಗರಿಕರು ಸೇರಿದಂತೆ ಹಲವರಿಗೆ ಕೋಟಿ ಗೀತಾ ಲೇಖನ ಯಜ್ಞ ದೀಕ್ಷೆ ನೀಡಿದರು.
ಕಾರ್ಯಕ್ರಮವು ಸ್ವಾಮೀಜಿಗಳ ಸನ್ಮಾನದೊಂದಿಗೆ ಸಮಾಪ್ತಿಯಾಯಿತು.
ಉಪಯುಕ್ತ ನ್ಯೂಸ್ ಈಗ ಸ್ವದೇಶಿ ಸಾಮಾಜಿಕ ಜಾಲತಾಣ Arattai ನಲ್ಲಿ... ನಮ್ಮ ಚಾನೆಲ್ಗೆ ನೀವೂ ಜಾಯಿನ್ ಆಗಿ.
ನಿರಂತರ ಅಪ್ಡೇಟ್ಗಳಿಗಾಗಿ ಉಪಯುಕ್ತ ನ್ಯೂಸ್ ಟೆಲಿಗ್ರಾಂ ಚಾನೆಲ್ಗೆ ಜಾಯಿನ್ ಆಗಿ
ಉಪಯುಕ್ತ ನ್ಯೂಸ್’ ಫೇಸ್ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್ ವಾಟ್ಸಪ್ ಗ್ರೂಪ್ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ
