ಮಂಗಳೂರು: ಹಿರಿಯ ಪತ್ರಕರ್ತ, “ಚಾರೋಳಿ ಕಿಂಗ್” ಹಾಗೂ ಬಹುಭಾಷಾ ಸಾಹಿತಿ
ರೇಮಂಡ್ ಡಿಕುನ್ಹಾ ತಾಕೋಡೆ ಅವರ ಕೊಂಕಣಿ ಕವನ
ಸಂಕಲನ “ಚುನ್ಯಾಚೊ ಫೊಂಡ್” ಬುಧವಾರ ಮಂಗಳೂರಿನ ಪ್ರೆಸ್ ಕ್ಲಬ್ನಲ್ಲಿ ಅದ್ದೂರಿಯಾಗಿ ಬಿಡುಗಡೆಯಾಯಿತು.
ಕನ್ನಡ ಹಾಗೂ ದೇವನಗರಿ ಲಿಪಿಯಲ್ಲಿ
ಪ್ರಕಟಗೊಂಡಿರುವ ಈ ಕವನ ಸಂಕಲನವನ್ನು
ಅನಿವಾಸಿ ಭಾರತೀಯ ಉದ್ಯಮಿ ಹಾಗೂ ಸಮಾಜಸೇವಕರಾದ ಮೈಕಲ್
ಡಿಸೋಜಾ ಬಿಡುಗಡೆಗೊಳಿಸಿದರು.
ಪುಸ್ತಕ ಬಿಡುಗಡೆ ಬಳಿಕ ಮಾತನಾಡಿದ ಮೈಕಲ್
ಡಿಸೋಜಾ , “ಮೈಕಲ್ ಡಿಸೋಜಾ ವಿಷನ್ ಕೊಂಕಣಿ” (MDVK) ಯೋಜನೆ ಬರಹಗಾರರನ್ನು ಪ್ರೋತ್ಸಾಹಿಸುವ ಮತ್ತು ಕೊಂಕಣಿ ಮಾತೃಭಾಷೆಯನ್ನು ಬೆಳೆಸುವ ಉದ್ದೇಶದಿಂದ ಆರಂಭಿಸಲಾಗಿದೆ ಎಂದು ಹೇಳಿದರು.
“ಒಬ್ಬ ಹಿರಿಯ ಸಾಹಿತಿ ನನಗೆ ಒಮ್ಮೆ ಭಾವುಕರಾಗಿ
ಹೇಳಿದ್ದರು – ನಾನು ಅನೇಕ ಸಾಹಿತ್ಯ
ಕೃತಿಗಳನ್ನು ಬರೆದಿದ್ದೇನೆ, ಆದರೆ ಅವು ಪ್ರಕಟವಾಗಲಿಲ್ಲ.
ಅದು ಒಂಬತ್ತು ತಿಂಗಳು ಗರ್ಭದಲ್ಲಿ ಮಗುವನ್ನು ಹೊತ್ತು ಕೊನೆಗೆ ಸತ್ತ ಮಗುವಿಗೆ ಜನ್ಮ
ನೀಡಿದಂತಾಗಿದೆ. ಒಂದು ಕೃತಿ ಪ್ರಕಟವಾಗಿ
ಓದುಗರಿಗೆ ತಲುಪಿದಾಗ ಮಾತ್ರ ಲೇಖಕರ ಪರಿಶ್ರಮ ಸಾರ್ಥಕವಾಗುತ್ತದೆ,” ಎಂದು ಅವರು ನೆನಪಿಸಿಕೊಂಡರು.
ಇಂತಹ ಬರಹಗಾರರಿಗೆ ಬೆಂಬಲ ನೀಡಿ, ಅವರ ಕೃತಿಗಳನ್ನು ಸಮಾಜದ
ಮುಂದೆ ತರುವ ಉದ್ದೇಶದಿಂದಲೇ ಈ
ಯೋಜನೆ ಆರಂಭಿಸಲಾಗಿದೆ ಎಂದು ತಿಳಿಸಿದರು. ಜೊತೆಗೆ
ರೇಮಂಡ್ ಡಿಕುನ್ಹಾ ತಾಕೋಡೆ ಅವರು ಕೊಂಕಣಿ ಭಾಷೆ,
ಸಾಹಿತ್ಯ ಹಾಗೂ ಸಂಸ್ಕೃತಿಗೆ ನೀಡುತ್ತಿರುವ
ಸೇವೆಯನ್ನು ಶ್ಲಾಘಿಸಿ, ಪತ್ರಿಕೋದ್ಯಮ ಮತ್ತು ಸಾಹಿತ್ಯ ಕ್ಷೇತ್ರದಲ್ಲಿನ ಸಾಧನೆಯನ್ನು ಕೊಂಡಾಡಿದರು.
ಹೆನ್ರಿ ಮೆಂಡೋನ್ಸಾ (ಹೆಚ್.ಎಂ. ಪೆರ್ನಾಲ್)
ಮಾತನಾಡಿ, ಮೈಕಲ್ ಡಿಸೋಜಾ ಅವರು ಕೊಂಕಣಿ ಸಾಹಿತ್ಯಕ್ಕೆ
ದೊಡ್ಡ ಆಸ್ತಿಯಾಗಿದ್ದಾರೆ ಎಂದರು.
MDVK ಸಮಿತಿ ಮುಖ್ಯಸ್ಥ “ಚುನ್ಯಾಚೊ ಫೊಂಡ್ ಸೇರಿ ಇದುವರೆಗೆ MDVK ಯೋಜನೆಯಡಿ
46 ಪುಸ್ತಕಗಳು ಪ್ರಕಟಗೊಂಡಿವೆ. ಮುಂದಿನ ಐದು ವರ್ಷಗಳಲ್ಲಿ 100 ಪುಸ್ತಕಗಳನ್ನು
ಪ್ರಕಟಿಸುವ ನಮ್ಮ ಗುರಿ ನಿಶ್ಚಿತವಾಗಿ
ನೆರವೇರುತ್ತದೆ,” ಎಂದು ವಿಶ್ವಾಸ ವ್ಯಕ್ತಪಡಿಸಿದರು.
ಕೊಂಕಣಿ ಸಾಹಿತ್ಯದಲ್ಲಿ ಆಸಕ್ತಿ ಹೊಂದಿರುವ ಬರಹಗಾರರು ತಮ್ಮ ಅಂತಿಮ ಪಿಡಿಎಫ್
ಪ್ರತಿಯನ್ನು vissionkonkani@gmail.com ಗೆ ಕಳುಹಿಸಬಹುದು ಅಥವಾ
ರಾಹುಲ್ ಅಡ್ವರ್ಟೈಸರ್ಸ್ ಕಚೇರಿಗೆ ಹಾರ್ಡ್ ಕಾಪಿಯನ್ನು ಸಲ್ಲಿಸಬಹುದು ಎಂದು ಅವರು ಮನವಿ
ಮಾಡಿದರು. “ಇದು ಪ್ರತಿಯೊಬ್ಬ ಕೊಂಕಣಿ
ಬರಹಗಾರರಿಗೆ ದೊರೆತಿರುವ ಉತ್ತಮ ಅವಕಾಶ,” ಎಂದರು.
ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ದಕ್ಷಿಣ ಕನ್ನಡ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷರು ಪುಷ್ಪರಾಜ್
ಬಿ.ಎನ್. ಮಾತನಾಡಿ, “ಯಾವುದೇ
ಪ್ರತಿಫಲವನ್ನು ನಿರೀಕ್ಷಿಸದೆ ಒಳ್ಳೆಯ ಕೆಲಸ ಮಾಡುವ ವ್ಯಕ್ತಿಯ
ಜೀವಂತ ಉದಾಹರಣೆ ಮೈಕಲ್ ಡಿಸೋಜಾ. ವ್ಯಕ್ತಿ ಸಾಯಬಹುದು, ಆದರೆ ಸಾಹಿತ್ಯ ಎಂದಿಗೂ
ಸಾಯುವುದಿಲ್ಲ. ರೇಮಂಡ್ ಡಿಕುನ್ಹಾ ಅವರು ತಮ್ಮ ಸಾಹಿತ್ಯ
ಕೃತಿಗಳ ಮೂಲಕ ಅದನ್ನು ಸಾಬೀತುಪಡಿಸಿದ್ದಾರೆ,”
ಎಂದರು.
“ಜಗತ್ತಿನ ಅತ್ಯಂತ ಶ್ರೀಮಂತ ಭಾಷೆ ಮೌನ. ಸಾಹಿತ್ಯ
ಮತ್ತು ಕಲೆ ಭಾಷೆಯ ಗಡಿಗಳನ್ನು
ಮೀರಿ ಮಾನವ ಮನಸ್ಸನ್ನು ಸ್ಪರ್ಶಿಸುವ
ಶಕ್ತಿ ಹೊಂದಿವೆ. ಆ ದಾರಿಯಲ್ಲಿ ಮೈಕಲ್
ಡಿಸೋಜಾ ಅದ್ಭುತ ಕೆಲಸ ಮಾಡುತ್ತಿದ್ದಾರೆ,” ಎಂದು
ಹೇಳಿದರು.
ಅತಿಥಿಗಳನ್ನು ಸ್ವಾಗತಿಸಿದ ರೇಮಂಡ್ ಡಿಕುನ್ಹಾ ತಾಕೋಡೆ ಮಾತನಾಡಿ, “ಸಹಾಯಧನ ನೀಡುವುದು ದೊಡ್ಡ ವಿಷಯವಲ್ಲ; ಆ ನೆರವು ಸರಿಯಾದ
ಉದ್ದೇಶಕ್ಕೆ ಬಳಕೆಯಾಗುತ್ತಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳುವುದು ಇನ್ನಷ್ಟು ಮುಖ್ಯ. ನನ್ನ 60ರ ವಯಸ್ಸಿನಲ್ಲಿಯೂ ನಾನು
ಬರವಣಿಗೆಯನ್ನು ಮುಂದುವರಿಸಿರುವುದು ಸುತ್ತಮುತ್ತಲಿನವರ ಪ್ರೋತ್ಸಾಹ ಮತ್ತು ಬೆಂಬಲದಿಂದಲೇ,” ಎಂದರು.
ಕನ್ನಡ ಹಾಗೂ ದೇವನಾಗರಿ ಲಿಪಿಯಲ್ಲಿ
ಪ್ರಕಟಗೊಂಡಿರುವ ಈ ಕೃತಿಯನ್ನು ಶೀಘ್ರದಲ್ಲೇ
ಗೋವಾದಲ್ಲಿಯೂ ಬಿಡುಗಡೆ ಮಾಡಲಾಗುವುದು ಎಂದು ಅವರು ತಿಳಿಸಿದರು.
ಈ ಸಂದರ್ಭದಲ್ಲಿ ಮೈಕಲ್ ಡಿಸೋಜಾ ಅವರನ್ನು ಗಣ್ಯರು ಶಾಲು ಹೊದಿಸಿ ಸನ್ಮಾನಿಸಿದರು.
ಕಾರ್ಯಕ್ರಮದಲ್ಲಿ
MDVK ಸಮಿತಿ ಸದಸ್ಯರು ಮೆಲ್ವಿನ್ ರೊಡ್ರಿಗಸ್, ಟೈಟಸ್ ನೊರೊನ್ಹಾ ಹಾಗೂ ದಕ್ಷಿಣ ಕನ್ನಡ
ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಪ್ರಧಾನ ಕಾರ್ಯದರ್ಶಿ
ರಾಜೇಶ್ ಪೂಜಾರಿ ಉಪಸ್ಥಿತರಿದ್ದರು.
ಹಿರಿಯ ಪತ್ರಕರ್ತ ಭಾಸ್ಕರ್ ರೈ ಕಟ್ಟ ಕಾರ್ಯಕ್ರಮ
ನಿರೂಪಿಸಿದರು. ರಿಯಾನಾ ಡಿಕುನ್ಹಾ ವಂದಿಸಿದರು.
ನಿರಂತರ ಅಪ್ಡೇಟ್ಗಳಿಗಾಗಿ ಉಪಯುಕ್ತ ನ್ಯೂಸ್ ಟೆಲಿಗ್ರಾಂ ಚಾನೆಲ್ಗೆ ಜಾಯಿನ್ ಆಗಿ
ಉಪಯುಕ್ತ ನ್ಯೂಸ್’ ಫೇಸ್ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್ ವಾಟ್ಸಪ್ ಗ್ರೂಪ್ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ
