ಪುಟ್ಟ ಗುಬ್ಬಿ ದೊಡ್ಡ ಸುದ್ದಿ
ಮಾಡಿತಿಂದಿಗೆ |
ನೆಟ್ಟ ನೋಟದಿಂದ ನೋಡಿ
ಬಂದಿತಿಲ್ಲಿಗೆ ||
ಕಾಳು ಕಡ್ಡಿ ಕೊಟ್ಟು ನಾನು
ತಿನ್ನಲೆಂದೆನು |
ನಾಳೆ ನಿನಗೆ ಬಣ್ಣದಂಗಿ
ತರುವೆನೆಂದೆನು ||
ಗುಬ್ಬಿ ನಿನ್ನ ಗೂಡಿನಲ್ಲಿ
ನಾನು ಸಲಹುವೆ |
ಹಬ್ಬಕೆಂದು ನಿನಗೆ ನಾನು
ತಿಂಡಿ ಮಾಡುವೆ ||
ನಿನ್ನ ಮರಿಯ ಮುದ್ದು ಮಾಡಿ
ಗುಟುಕು ನೀಡುವೆ |
ಅನ್ನ ಸಾರು ಎಲ್ಲ ಬಡಿಸಿ
ತಿನಲು ಹೇಳುವೆ ||
ಗುಬ್ಬಿ ನೀನು ಬಹಳ ಚಂದ
ನಿನ್ನ ಮರೆಯೆನು |
ಸುಬ್ಬಿಯೆಂದು ಕರೆದು ನಿನ್ನ
ಮುದ್ದು ಗೈವೆನು ||
ಇಂದು ನಿನ್ನ ಹುಟ್ಟುಹಬ್ಬ
ಮಾಡಿ ನಲಿವೆನು |
ಮುಂದೆ ನಿನ್ನ ನೆನಪಿನಲ್ಲಿ
ನಾನು ಇರುವೆನು ||
(ಗುಬ್ಬಚ್ಚಿಯ ನೆನಪಿಗಾಗಿ ಶಿಶುಗೀತೆ)
ವಿ.ಬಿ. ಕುಳಮರ್ವ, ಕುಂಬ್ಳೆ
