ಅಷ್ಟಲಕ್ಷ್ಮಿ ದರ್ಶನ ಯುವ ವಿನಿಮಯ ಕಾರ್ಯಕ್ರಮ
ಕೊಹಿಮಾ, ಫೆ. 8: ಅಷ್ಟಲಕ್ಷ್ಮಿ ದರ್ಶನ ಯುವ ವಿನಿಮಯ ಕಾರ್ಯಕ್ರಮದ ಅಂಗವಾಗಿ ಲಡಾಖ್ ಹಾಗೂ ಕೇರಳದಿಂದ ಆಗಮಿಸಿರುವ 44 ವಿದ್ಯಾರ್ಥಿಗಳ ನಿಯೋಗವು, ಶಿಕ್ಷಕರ ಮಾರ್ಗದರ್ಶನದೊಂದಿಗೆ ಪ್ರಸ್ತುತ ನಾಗಾಲ್ಯಾಂಡ್ಗೆ ಭೇಟಿ ನೀಡಿದೆ. ಫೆಬ್ರವರಿ 14ರವರೆಗೆ ಈ ನಿಯೋಗಕ್ಕೆ ನಾಗಾಲ್ಯಾಂಡ್ ವಿಶ್ವವಿದ್ಯಾಲಯದ ಮೆಡ್ಜಿಪೆಮಾ ಕ್ಯಾಂಪಸ್ ಆತಿಥ್ಯ ವಹಿಸಿದೆ.
ಈ ಕಾರ್ಯಕ್ರಮವು ಉತ್ತರ ಪೂರ್ವಾಭಿವೃದ್ಧಿ ಸಚಿವಾಲಯ (MDoNER) ಹಾಗೂ ಉತ್ತರ ಪೂರ್ವ ಪರಿಷತ್ (NEC), ಶಿಲ್ಲಾಂಗ್ ಇವರ ಸಹಯೋಗದಲ್ಲಿ ಜಾರಿಗೊಂಡಿರುವ ಮಹತ್ವದ ಉಪಕ್ರಮವಾಗಿದೆ. ದೇಶದ ವಿಭಿನ್ನ ಪ್ರದೇಶಗಳ ನಡುವೆ ರಾಷ್ಟ್ರೀಯ ಏಕತೆ, ಸಾಂಸ್ಕೃತಿಕ ಪರಸ್ಪರ ಅರಿವು ಮತ್ತು ಪರಸ್ಪರ ಗೌರವವನ್ನು ಬಲಪಡಿಸುವ ಮೂಲಕ “ಏಕ್ ಭಾರತ್ ಶ್ರೇಷ್ಠ ಭಾರತ್” ಪರಿಕಲ್ಪನೆಯನ್ನು ಉತ್ತೇಜಿಸುವುದು ಇದರ ಮುಖ್ಯ ಉದ್ದೇಶವಾಗಿದೆ.
ಕಾರ್ಯಕ್ರಮದ ಭಾಗವಾಗಿ, ನಿಯೋಗದ ಸದಸ್ಯರು ನಾಗಾಲ್ಯಾಂಡ್ನ ಹಿರಿಯ ರಾಜಕೀಯ ನಾಯಕ ಹಾಗೂ ಪದ್ಮಭೂಷಣ ಪುರಸ್ಕೃತ ಡಾ. ಎಸ್.ಸಿ. ಜಮೀರ್, ಮಹಾರಾಷ್ಟ್ರ, ಗುಜರಾತ್, ಗೋವಾ ಹಾಗೂ ಒಡಿಶಾ ರಾಜ್ಯಗಳ ಮಾಜಿ ರಾಜ್ಯಪಾಲರೊಂದಿಗೆ ಸಂವಾದ ನಡೆಸಿದರು.
ಈ ಸಂದರ್ಭದಲ್ಲಿ ಮಾತನಾಡಿದ ಡಾ. ಜಮೀರ್, ವಿದ್ಯಾರ್ಥಿಗಳು ರಾಜ್ಯ ಗಡಿಗಳನ್ನು ಮೀರಿ ಚಿಂತಿಸಿ ಜಾಗತಿಕ ದೃಷ್ಟಿಕೋನವನ್ನು ಬೆಳೆಸಿಕೊಳ್ಳಬೇಕೆಂದು ಕರೆ ನೀಡಿದರು. ತಮ್ಮ ತಮ್ಮ ರಾಜ್ಯಗಳ ರಾಯಭಾರಿಗಳಾಗಿರುವ ನೀವು, ನಿಮ್ಮ ಪ್ರದೇಶಗಳಷ್ಟೇ ಅಲ್ಲದೆ ರಾಷ್ಟ್ರದ ಭವಿಷ್ಯ ರೂಪಿಸುವ ಜವಾಬ್ದಾರಿಯನ್ನೂ ಹೊತ್ತಿದ್ದೀರಿ ಎಂದು ಅವರು ಹೇಳಿದರು.
ಕಾರ್ಯಕ್ರಮದ ಅವಧಿಯಲ್ಲಿ ಉತ್ತರ ಪೂರ್ವ ಭಾರತದ ಎಂಟು ರಾಜ್ಯಗಳ ಕುರಿತು ತರಗತಿ ಉಪನ್ಯಾಸಗಳ ಜೊತೆಗೆ, ನಾಗಾಲ್ಯಾಂಡ್ನ ಐತಿಹಾಸಿಕ ಹಾಗೂ ಸಾಂಸ್ಕೃತಿಕ ಮಹತ್ವದ ಸ್ಥಳಗಳಿಗೆ ಭೇಟಿ ವ್ಯವಸ್ಥೆ ಮಾಡಲಾಗಿದೆ. ಇದರಿಂದ ವಿದ್ಯಾರ್ಥಿಗಳಿಗೆ ರಾಜ್ಯದ ಸಮೃದ್ಧ ಪರಂಪರೆ ಹಾಗೂ ಸಾಂಸ್ಕೃತಿಕ ವೈವಿಧ್ಯತೆಯನ್ನು ನೇರವಾಗಿ ಅನುಭವಿಸುವ ಅವಕಾಶ ದೊರೆತಿದೆ.
ಉಪಯುಕ್ತ ನ್ಯೂಸ್ ಈಗ ಸ್ವದೇಶಿ ಸಾಮಾಜಿಕ ಜಾಲತಾಣ Arattai ನಲ್ಲಿ... ನಮ್ಮ ಚಾನೆಲ್ಗೆ ನೀವೂ ಜಾಯಿನ್ ಆಗಿ.
ನಿರಂತರ ಅಪ್ಡೇಟ್ಗಳಿಗಾಗಿ ಉಪಯುಕ್ತ ನ್ಯೂಸ್ ಟೆಲಿಗ್ರಾಂ ಚಾನೆಲ್ಗೆ ಜಾಯಿನ್ ಆಗಿ
ಉಪಯುಕ್ತ ನ್ಯೂಸ್’ ಫೇಸ್ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್ ವಾಟ್ಸಪ್ ಗ್ರೂಪ್ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ
