ಭಾರತಕ್ಕಿಲ್ಲ ಯುವ ಆವಿಷ್ಕಾರಿಗಳ ಕೊರತೆ, ಚೀನಾವನ್ನು ಹಿಮ್ಮೆಟ್ಟಲು ಬೇಕಿದೆ ನಾವೀನ್ಯತಾ ಸ್ನೇಹಿ ನಿಯಂತ್ರಕ ವ್ಯವಸ್ಥೆ
ಸರ್ಕಾರಕ್ಕೆ ಕಿವಿಮಾತು ಹೇಳಿದ ಬಯೋಕಾನ್ ಮುಖ್ಯಸ್ಥೆ ಕಿರಣ್ ಮಜುಂದಾರ್ ಷಾ

ಉಪಯುಕ್ತ ನ್ಯೂಸ್ ವಿಶೇಷ ವರದಿ: ರಾಮಚಂದ್ರ ಮುಳಿಯಾಲ

ಬೆಂಗಳೂರು: ಭಾರತದ ಬಯೋಟೆಕ್ ಕ್ಷೇತ್ರದ ನವೀನ ಆವಿಷ್ಕಾರಗಳಿಗೆ ಕ್ಷಿಪ್ರವಾಗಿ ಪರವಾನಗಿ ಸಿಗಬೇಕಿದೆ. ಇದಕ್ಕಾಗಿ ನಿಯಂತ್ರಕ ಸಂಸ್ಥೆಗಳ ಬೆಂಬಲ ಬೇಕು ಎಂದು ಬಯೋಕಾನ್ ಮುಖ್ಯಸ್ಥೆ ಕಿರಣ್ ಮಜುಂದಾರ್ ಷಾ ಅವರು ಸರ್ಕಾರಕ್ಕೆ ಕಿವಿಮಾತು ಹೇಳಿದರು.

ಬೆಂಗಳೂರಿನ ಅಂತಾರಾಷ್ಟ್ರೀಯ ವಸ್ತುಪ್ರದರ್ಶನ ಕೇಂದ್ರದಲ್ಲಿ ನ.18ರಂದು ಆರಂಭಗೊಂಡ ಟೆಕ್ ಸಮಿಟ್-2025ರ ಅಂಗವಾಗಿ ಮೊದಲ ದಿನ ನಡೆದ “ಬಿಟಿಯ ಭವಿಷ್ಯ ರೂಪಿಸುತ್ತಿರುವ ಹೊರಹೊಮ್ಮುತ್ತಿರುವ ತಂತ್ರಜ್ಞಾನಗಳು” ಕುರಿತ ಸಂವಾದದಲ್ಲಿ ಮಾತನಾಡಿದ ಷಾ ಅವರು, ಜೈವಿಕ ತಂತ್ರಜ್ಞಾನ ಕ್ಷೇತ್ರದಲ್ಲಿ ಚೀನಾ ದಾಪುಗಾಲು ಇಡುತ್ತಿದೆ. ನಿಯಂತ್ರಕ ಸಂಸ್ಥೆಗಳ ತ್ವರಿತ ಸ್ಪಂದನೆಯಲ್ಲಿ ಚೀನಾ ಮುಂದಿರುವುದೇ ಇದಕ್ಕೆ ಕಾರಣ ಎಂದು ಬೊಟ್ಟು ಮಾಡಿದರು.

ಭಾರತದಲ್ಲೂ ನವೀನ ಆವಿಷ್ಕಾರಗಳನ್ನು ರೂಪಿಸುವ ಯುವ ಪ್ರತಿಭೆಗಳು ಹೇರಳವಾಗಿ ಇದ್ದಾರೆ. ಆದರೆ ನೈತಿಕ ಜೈವಿಕ ತಂತ್ರಜ್ಞಾನ ಆವಿಷ್ಕಾರಗಳಿಗೆ ಪರವಾನಗಿ ದೊರೆಯಲು ವಿಳಂಬವಾಗುತ್ತಿದೆ. ನಿಯಂತ್ರಕರು ಹಾಗೂ ಆವಿಷ್ಕಾರಿಗಳು ಜತೆಜತೆಗೆ ಸಾಗಬೇಕು. ನಾವೀನ್ಯತಾಸ್ನೇಹಿ ನಿಯಂತ್ರಕ ವ್ಯವಸ್ಥೆ ಭಾರತದಲ್ಲೂ ಬೇಕಿದೆ. ಜೈವಿಕ ತಂತ್ರಜ್ಞಾನ ಕ್ಷೇತ್ರದ ಪ್ರವರ್ತಕ ಹೆಜ್ಜೆಗಳಿಗೆ ನಿಯಂತ್ರಕ ಸಂಸ್ಥೆಗಳು ವೇಗವಾಗಿ ಸ್ಪಂದಿಸಬೇಕು ಎಂಬುದು ಉದ್ಯಮದ ಆಶಯವಾಗಿದೆ ಎಂದು ಅವರು ಹೇಳಿದರು.

ಹಸಿರು, ನೈತಿಕ ಎಐ ಇಂದಿನ ಅಗತ್ಯ

2047ರ ವಿಕಸಿತ ಭಾರತಕ್ಕಾಗಿ ಸುಸ್ಥಿರ, ಜಾಗತಿಕವಾಗಿ ಸ್ಪರ್ಧಾತ್ಮಕವಾದಂತಹ ನಮ್ಮ ಸ್ವಂತ ಜೈವಿಕ ತಂತ್ರಜ್ಞಾನ ಬೇಕಿದೆ. ಬಯೋಟೆಕ್‌ನಲ್ಲಿ ದೇಶ ಸ್ವಾಯತ್ತತೆ ಸಾಧಿಸಬೇಕು. ಹಸಿರು, ನೈತಿಕ ಎಐಯ ಬೆಂಬಲದೊಂದಿಗೆ ಜೈವಿಕ ಕ್ಷೇತ್ರವನ್ನು ನಾವು ಮುನ್ನಡೆಸಬೇಕು ಎಂದು ಕಿರಣ್ ಅವರು ಹೇಳಿದರು.

ಅಮೆರಿಕವನ್ನು ಮೀರಿಸಲಿದೆ ಚೀನಾ

ಪ್ರಸ್ತುತ 1.6 ಲಕ್ಷಕೋಟಿ ಡಾಲರ್‌ನ ಜಾಗತಿಕ ಬಯೋಟೆಕ್ ಮಾರುಕಟ್ಟೆ 2030ರ ವೇಳೆಗೆ 3.9 ಲಕ್ಷಕೋಟಿ ಡಾಲರ್ ತಲುಪಲಿದೆ. ಸದ್ಯಕ್ಕೆ ಯುಎಸ್. ಜಾಗತಿಕ ನಾಯಕನಾಗಿದ್ದು, 2030ರ ವೇಳೆಗೆ ಚೀನಾ ಈ ಸ್ಥಾನವನ್ನು ಆಕ್ರಮಿಸಲಿದೆ. ಚೀನಾದ ನಾವೀನ್ಯತೆ ಪರವಾದ ನಿಯಂತ್ರಣಗಳೇ ಆ ದೇಶದ ಬಿಟಿ ಪ್ರಗತಿಗೆ ಮುಖ್ಯ ಕಾರಣವಾಗಿದೆ ಎಂದು ನೀತಿ ಫ್ರಾಂಟಿಯರ್ ಟೆಕ್ ಹಬ್‌ನ ದೇಬ್‌ಜಾನಿ ಘೋಷ್ ಹೇಳಿದರು.

ಬಯೋಟೆಕ್ ಮೂಲಕ ಆರೋಗ್ಯಸೇವೆ, ಕೃಷಿ, ಉತ್ಪಾದನೆ, ಪರಿಸರ ಸುಸ್ಥಿರತೆಯಲ್ಲಿ ಮರುಆವಿಷ್ಕಾರ ಸಾಧಿಸಲು ಭಾರತ ಸಾಮರ್ಥ್ಯ ಹೊಂದಿದೆ. ನೈತಿಕವಾಗಿ ಸೆಲ್ ಪ್ರೋಗ್ರಾಮಿಂಗ್ ಆಗಬೇಕಿದೆ. ಭಾರತದಲ್ಲೂ ಜೈವಿಕ ತಂತ್ರಜ್ಞಾನ ಕ್ಷೇತ್ರವು ಕಳೆದ 1 ದಶಕದಲ್ಲಿ 16 ಪಟ್ಟು ಬೆಳೆದಿದೆ. ನಿಯಂತ್ರಕ ಸಂಸ್ಥೆಗಳು ಇನ್ನಷ್ಟು ಪೂರಕವಾಗಿ ಸ್ಪಂದಿಸಿದರೆ ಕ್ಷೇತ್ರದ ವೇಗವರ್ಧನೆ ಸಾಧ್ಯ ಎಂದು ಅವರು ಅಭಿಪ್ರಾಯಪಟ್ಟರು.

ಜೈವಿಕ ಆರ್ಥಿಕತೆ ಗುರಿ 1.2 ಲಕ್ಷ ಕೋಟಿ ಡಾಲರ್

ಈ ಸಂವಾದವನ್ನು ಸಂಯೋಜಿಸಿದ, ಎಬಿಎಲ್ಇನ ಅಧ್ಯಕ್ಷರಾದ, ಜಿ.ಎಸ್.ಕೃಷ್ಣನ್ ಅವರು, ದೇಶದ ಜೈವಿಕ ಆರ್ಥಿಕತೆಯು 2024ರಲ್ಲಿ 165.7 ಶತಕೋಟಿ ಡಾಲರ್ ಇತ್ತು. 2030ರಲ್ಲಿ ಇದು 330 ಶತಕೋಟಿ ಡಾಲರ್ ಹಾಗೂ 2047 ರಲ್ಲಿ 1.2 ಲಕ್ಷಕೋಟಿ ಡಾಲರ್ ಸಾಧಿಸುವ ಗುರಿ ಹೊಂದಲಾಗಿದೆ ಎಂದರು.

ಉಪಯುಕ್ತ ನ್ಯೂಸ್ ಈಗ ಸ್ವದೇಶಿ ಸಾಮಾಜಿಕ ಜಾಲತಾಣ Arattai ನಲ್ಲಿ... ನಮ್ಮ ಚಾನೆಲ್‌ಗೆ ನೀವೂ ಜಾಯಿನ್ ಆಗಿ.

ನಿರಂತರ ಅಪ್‌ಡೇಟ್‌ಗಳಿಗಾಗಿ ಉಪಯುಕ್ತ ನ್ಯೂಸ್‌ ಟೆಲಿಗ್ರಾಂ ಚಾನೆಲ್‌ಗೆ ಜಾಯಿನ್‌ ಆಗಿ

ಉಪಯುಕ್ತ ನ್ಯೂಸ್‌’ ಫೇಸ್‌ಬುಕ್ ಪುಟ ಲೈಕ್ ಮಾಡಿ