ಬೆಂಗಳೂರಿನ ಮಲ್ಲೇಶ್ವರಂನಲ್ಲಿರುವ ಹವ್ಯಕ ಭವನದಲ್ಲೊಂದು ಅವಿಸ್ಮರಣೀಯ ಕಾರ್ಯಕ್ರಮ ಅದಾಗಿತ್ತು. ಬಹುಶಃ ಹವ್ಯಕ ಸಮುದಾಯದಲ್ಲೇ ಮೊದಲನೆಯದು ಎನ್ನಬಹುದಾದ ಬೃಹತ್ ಕುಟುಂಬ ಮಿಲನ ಕಾರ್ಯಕ್ರಮ- ಗದ್ದೆಮನೆ ಕುಟುಂಬ ಸಂಗಮದ 3ನೇ ಆವೃತ್ತಿಯನ್ನು ನವೆಂಬರ್ 16ರಂದು ಆಯೋಜಿಸಲಾಗಿತ್ತು.
ಇದಕ್ಕೆ ಬೃಹತ್ ಎನ್ನುವ ವಿಶೇಷಣ ಯಾಕೆ ಎಂದರೆ, ಸುಮಾರು 1000ಕ್ಕೂ ಅಧಿಕ ಸದಸ್ಯರಿರುವ ಒಂದು ಆಲದ ಮರದಂತಹ ಕುಟುಂಬ ಈ ಗದ್ದೆಮನೆ ಕುಟುಂಬ. ಸುಮಾರು 350 ವರ್ಷಗಳ ಹಿಂದೆ ಮೂಲದಲ್ಲಿ ಗದ್ದೆಮನೆಯಾಗಿ ಗುರುತಿಸಲ್ಪಡುತ್ತಿದ್ದ ಕುಟುಂಬವು ಇದೀಗ ಏಳು ಶಾಖೆಗಳಾಗಿ ಜಗದಗಲ ವ್ಯಾಪಿಸಿದೆ. ಅಷ್ಟೇ ಅಲ್ಲ, ಈ ಮೂಲ ಕುಟುಂಬದ ಶಾಖೆಗಳ ಕುಡಿಗಳು ಉಪ ಶಾಖೆಗಳಾಗಿ ತಮ್ಮ ತಮ್ಮ ಕಾರ್ಯಕ್ಷೇತ್ರಗಳಲ್ಲಿ ಉತ್ಕೃಷ್ಟ ಎನ್ನಬಹುದಾದ ಸಾಧನೆಗಳನ್ನೇ ಮಾಡಿದ್ದಾರೆ. ಅ ಮೂಲಕ ಸಮಾಜದ ನಾನಾ ಸ್ತರಗಳಲ್ಲಿ ವಿಶಿಷ್ಟ ಸ್ಥಾನಗಳನ್ನು ಪಡೆದು ಗುರುತಿಸಲ್ಪಟ್ಟಿದ್ದಾರೆ.
ಇಂತಹ ಒಂದು ಕುಟುಂಬದ ಎಲ್ಲ ಶಾಖೆಗಳನ್ನು ಒಗ್ಗೂಡಿಸಿ ಏಕಛತ್ರದಡಿ ಸಂಘಟಿಸುವ ಪ್ರಯತ್ನ ಸರಿಸುಮಾರು 6 ವರ್ಷಗಳಿಂದ ನಡೆಯುತ್ತ ಬಂದಿದೆ. ಇದುವರೆಗೆ ಮೂರು ಬಾರಿ ಗದ್ದೆಮನೆ ಕುಟುಂಬ ಸಂಗಮಗಳು ನಡೆದಿವೆ. ಮೊದಲನೆಯ ಸಂಗಮ- ಗದ್ದೆಮನೆ ಕುಟುಂಬದ ಮೂಲಸ್ಥಳವಾದ ಶಿವಮೊಗ್ಗ ಜಿಲ್ಲೆಯ ಸೊರಬ ತಾಲೂಕಿನ ಜಂಬೆಹಳ್ಳಿ ದುರ್ಗಾಪರಮೇಶ್ವರಿ ದೇವಸ್ಥಾನದಲ್ಲಿ ನಡೆದಿತ್ತು. ಎರಡನೆಯ ಸಂಗಮ- ಕಾಸರಗೋಡು ತಾಲೂಕಿನ ಕುಮಾರಮಂಗಲ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದಲ್ಲಿ ಕಳೆದ ವರ್ಷ ನಡೆದಿತ್ತು.
ಇದೀಗ ಮಲ್ಲೇಶ್ವರಂನ ಹವ್ಯಕ ಭವನದಲ್ಲಿ ನಡೆದಿರುವುದು ಮೂರನೆಯ ಗದ್ದೆಮನೆ ಕುಟುಂಬ ಸಂಗಮ. ಈ ಬಾರಿ 100ಕ್ಕೂ ಅಧಿಕ ಸದಸ್ಯರು ಒಂದೆಡೆ ಕಲೆತು ಕುಟುಂಬದ ಬಂಧವನ್ನು ಮತ್ತಷ್ಟು ಗಟ್ಟಿಗೊಳಿಸುವ ನಿಟ್ಟಿನಲ್ಲಿ ಹಲವಾರು ಯೋಜನೆಗಳು, ರೂಪುರೇಷೆಗಳನ್ನು ಚರ್ಚಿಸಲಾಯಿತು. ಗದ್ದೆಮನೆ ಕುಟುಂಬ ಸೇವಾ ಟ್ರಸ್ಟ್‌ನ ಛತ್ರದ ಅಡಿಯಲ್ಲಿ ಗುಂಪು ಆರೋಗ್ಯ ವಿಮೆ, ಶಿಕ್ಷಣ ಸಹಾಯ ನಿಧಿ, ಅಗತ್ಯವಿರುವವರಿಗೆ ಉದ್ಯೋಗ ಸಹಾಯದ ವ್ಯವಸ್ಥೆ- ಮುಂತಾದ ಯೋಜನೆಗಳಿಗೆ ಸ್ಪಷ್ಟ ರೂಪ ನೀಡುವ ಪ್ರಯತ್ನ ಮಾಡಲಾಯಿತು.
ವಿಶಾಲವಾದ ಗದ್ದೆಮನೆ ಕುಟುಂಬದ ವಿವಿಧ ಶಾಖೆಗಳ ಸದಸ್ಯರಾಗಿ ತಮ್ಮ ತಮ್ಮ ಕ್ಚೇತ್ರಗಳಲ್ಲಿ ವಿಶಿಷ್ಟ ಸಾಧನೆಗಳನ್ನು ಮಾಡಿದ 13 ಸದಸ್ಯರನ್ನು ಗುರುತಿಸಿ ಗೌರವಿಸಲಾಯಿತು.
ಗದ್ದೆಮನೆ ಕುಟುಂಬದ ಕುಳಮರ್ವ ನಡುಮನೆ ಶಾಖೆಯ ಡಾ. ಗೌತಮ್ ಕುಳಮರ್ವ ಅವರು ಡೇಟಾ ಪ್ರಸ್ತುತಿಯ ಮೂಲಕ ಹಲವು ಉಪಯುಕ್ತ ಮಾಹಿತಿಗಳ ವಿಶ್ಲೇಷಣೆ ನಡೆಸಿದರು. ಮುಂದಿನ ದಿನಗಳಲ್ಲಿ ಸದಸ್ಯರ ಡೇಟಾಗಳನ್ನು ಮತ್ತಷ್ಟು ವ್ಯವಸ್ಥಿತಗೊಳಿಸುವ ಮೂಲಕ ಪ್ರಸ್ತಾವಿತ ಸೇವಾ ಯೋಜನೆಗಳನ್ನು ಹೆಚ್ಚು ಸಮರ್ಪಕಗೊಳಿಸುವ ಸಾಧ್ಯತೆ, ಅವಕಾಶ ಮತ್ತು ಅಗತ್ಯಗಳನ್ನು ವಿವರಿಸಿದರು.
ಬೆಳಗ್ಗೆ ಡಾ. ಕಾವ್ಯಶ್ರೀ ಕುಳಮರ್ವ ಅವರ ಪ್ರಾರ್ಥನೆಯೊಂದಿಗೆ ಕುಟುಂಬ ಸಂಗಮದ ಕಾರ್ಯಕ್ರಮಗಳು ಆರಂಭವಾದವು. ಹಿರಿಯರಾದ ಕವಿ, ಸಾಹಿತಿ, ಶಿಕ್ಷಣತಜ್ಞ ವಿ.ಬಿ. ಕುಳಮರ್ವ ಅವರು ಪ್ರಾಸ್ತಾವಿಕ ನುಡಿಗಳನ್ನಾಡಿದರು. ಬಳಿಕ ದೀಪೋಜ್ವಲನದೊಂದಿಗೆ ಔಪಚಾರಿಕ ಉದ್ಘಾಟನೆ ನೆರವೇರಿತು. ಇತ್ತೀಚೆಗೆ ಅಗಲಿದ ಕುಟುಬದ ಒಬ್ಬ ಸದಸ್ಯ ಶ್ರೀ ಸುಬ್ರಹ್ಮಣ್ಯ ಭಟ್ಟರಿಗೆ ಶ್ರದ್ಧಾಂಜಲಿ ಸಲ್ಲಿಸಲಾಯಿತು.
ಮುಖ್ಯ ಅತಿಥಿಗಳಾಗಿ ಪಾಲ್ಗೊಂಡ ಹಿರಿಯ ಗಮಕಿ ತೆಕ್ಕೇಕೆರೆ ಸುಬ್ರಹ್ಮಣ್ಯ ಭಟ್ಟರು ಈ ರೀತಿ ಕುಟುಂಬ ಸಂಗಮದ ಅವಶ್ಯಕತೆ, ಪ್ರಾಮುಖ್ಯತೆಗಳ ಕುರಿತು ಹಲವಾರು ನಿದರ್ಶನಗಳೊಂದಿಗೆ ಸ್ಫೂರ್ತಿದಾಯಕವಾಗಿ ತಮ್ಮ ವಿಚಾರಗಳನ್ನು ಮಂಡಿಸಿದರು.
ಬಳಿಕ ಕುಟುಂಬದ ಹಿರಿಯರಾದ ಪ್ರೊ. ಕೆ. ಎಸ್‌ ಭಟ್ ಅವರು ಸ್ಮರಣ ಸಂಚಿಕೆ ಹಾಗೂ ಕುಲದೇವತೆ ಶ್ರೀ ದುರ್ಗಾಪರಮೇಶ್ವರಿ ದೇವಿಯ ಭಾವಚಿತ್ರವನ್ನು ಬಿಡುಗಡೆ ಮಾಡಿದರು.
ಇದೇ ಸಂದರ್ಭದಲ್ಲಿ, ಕೋಳಾರಿ ಡಾ. ಶಿವಶಂಕರ ಭಟ್ ಅವರು ಸಿದ್ಧಪಡಿಸಿದ 45 ಹವ್ಯಕ ಕುಟುಂಬಗಳ ವಂಶವೃಕ್ಷ (Family Tree) ಕೃತಿಗಳನ್ನು ಬಿಡಗಡೆ ಮಾಡಲಾಯಿತು. ಅವರು ಕಳೆದ 25 ವರ್ಷಗಳಿಂದ ಹವ್ಯಕ ಕುಟುಂಬಗಳ ಡೇಟಾ ಸಂಗ್ರಹ ಮತ್ತು ಡಿಎನ್ ಎ ವಿಶ್ಲೇಷಣೆ ನಡೆಸುತ್ತಿದ್ದಾರೆ.
ಅಲ್ಲದೆ, ಪ್ರಸ್ತುತ ನೆದರ್ಲೆಂಡ್ಸ್‌ನಲ್ಲಿ ಭಾರತದ ಯೋಗ ರಾಯಭಾರಿಯಾಗಿ ಸೇವೆ ಸಲ್ಲಿಸುತ್ತಿರುವ ವಿಜಯಗಣೇಶ ಕೋರಿಕ್ಕಾರು ಅವರ ಆಯುರ್ವೇದ ವಿಪುಶ ಸಂಸ್ಥೆಯ ಗೃಹೋತ್ಪನ್ನಗಳನ್ನು (ಹೋಮ್ ಪ್ರಾಡಕ್ಟ್ಸ್) ಪ್ರದರ್ಶಿಸಲಾಯಿತು.
ದೀಪ್ತಿ ಪ್ರಸಾದ್ ಅವರ ಚಿತ್ರಕಲಾಪ್ರದರ್ಶನ ಏರ್ಪಡಿಸಲಾಗಿತ್ತು. ಪುಟಾಣಿ ಅಕ್ಷಯ್ ಭಾರದ್ವಾಜ್ ವಿಷ್ಣು ಸಹಸ್ರನಾಮ ಸ್ತೋತ್ರಗಳನ್ನು ಸ್ಫುಟವಾಗಿ ಪ್ರಸ್ತುತಪಡಿಸಿದ.
ರಕ್ಷಾ ಕೋರಿಕ್ಕಾರು ಅವರಿಂದ ಭರತನಾಟ್ಯ ಪ್ರದರ್ಶನವಿತ್ತು. ಮಧ್ಯಾಹ್ನ ಸಾಂಪ್ರದಾಯಿಕವಾದ ಭೋಜನ ಕೂಟ ಏರ್ಪಡಿಸಲಾಗಿತ್ತು.
ಕಳೆದ 25 ವರ್ಷಗಳಿಂದ ಇದುವರೆಗೆ 55,000ಕ್ಕೂ ಅಧಿಕ ಹವ್ಯಕರ ಕುಟುಂಬದ ಡೇಟಾಗಳನ್ನು ಸಂಗ್ರಹಿಸಿ, ಡಿಎನ್‌ಎ ವಿಶ್ಲೇಷಣೆ ಮಾಡಿ ವೈಜ್ಞಾನಿಕ ಅಧ್ಯಯನ ನಡೆಸಿದ ವಿಜ್ಞಾನಿ ಡಾ. ಕೋಳಾರಿ ಶಿವಶಂಕರ ಭಟ್ ದಂಪತಿಗಳನ್ನು ವಿಶೇಷವಾಗಿ ಗೌರವಿಸಲಾಯಿತು.
ಒಟ್ಟಾರೆ ಕಾರ್ಯಕ್ರಮದ ನಿರೂಪಣೆ ಮಾಡಿದ ಪ್ರತಿಭಾವಂತ ಯುವ ಕಾನೂನು ವಿದ್ಯಾರ್ಥಿನಿ ಪ್ರಿಯಾಂಕಾ ಗೋವಿಂದರಾಜ್ ಭಕ್ತಿಗೀತೆ, ಭಜನೆಗಳನ್ನು ಹಾಡಿ ಕಾರ್ಯಕ್ರಮದ ಮೆರುಗನ್ನು ಹೆಚ್ಚಿಸಿದರು.
ಕೋರಿಕ್ಕಾರು ಶಾಖೆಯ ಪುಟಾಣಿ ಸಂವೃತ ಭಕ್ತಿಗೀತೆಯನ್ನು ಹಾಡಿದಳು. ಶ್ರೀಮತಿ ಸಹನಾ ಕೈಲಂಕಜೆ ಅವರು ಇಂಪಾದ ಗಾಯನ ಪ್ರಸ್ತುತಪಡಿಸಿದರು.
ಹಿರಿಯರಾದ, ನಿವೃತ್ತ ಬ್ಯಾಂಕ್ ಅಧಿಕಾರಿ ಬಳ್ಳಂಬೆಟ್ಟು ಶಾಮ ಭಟ್ಟರು ತಮ್ಮ ಸಹೋದರ ಬಳ್ಳಂಬೆಟ್ಟು ಕೇಶವ ಭಟ್ಟರ ಬಗ್ಗೆ ನೆನಪುಗಳನ್ನು ಹಂಚಿಕೊಂಡರು.
ಕೊನೆಯದಾಗಿ ಶಾಂತಿಮಂತ್ರದೊಂದಿಗೆ ಕಾರ್ಯಕ್ರಮ ಸಂಪನ್ನಗೊಂಡಿತು. ಗದ್ದೆಮನೆ ಕುಟುಂಬ ಸಂಗಮವು ಒಟ್ಟಾರೆಯಾಗಿ ಬಲಿಷ್ಠ ಮತ್ತು ಸುರಕ್ಷಿತ ಕುಟುಂಬಗಳ ಮೂಲಕ ಸುಭದ್ರ ಸಮಾಜವನ್ನು ಕಟ್ಟಬಹುದು ಎಂಬ ಸಂದೇಶವನ್ನು ಸಾರಿತು. ಮುಂದೆ ನಡೆಯಬಹುದಾದ ಇತರ ಕುಟುಂಬಗಳ ಸಂಗಮಕ್ಕೂ ಪ್ರೇರಣೆಯಾಯಿತು.
ಉಪಯುಕ್ತ ನ್ಯೂಸ್ ಈಗ ಸ್ವದೇಶಿ ಸಾಮಾಜಿಕ ಜಾಲತಾಣ Arattai ನಲ್ಲಿ... ನಮ್ಮ ಚಾನೆಲ್‌ಗೆ ನೀವೂ ಜಾಯಿನ್ ಆಗಿ.
ನಿರಂತರ ಅಪ್‌ಡೇಟ್‌ಗಳಿಗಾಗಿ ಉಪಯುಕ್ತ ನ್ಯೂಸ್ ಟೆಲಿಗ್ರಾಂ ಚಾನೆಲ್‌ಗೆ ಜಾಯಿನ್ ಆಗಿ
ಉಪಯುಕ್ತ ನ್ಯೂಸ್’ ಫೇಸ್‌ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್ ವಾಟ್ಸಪ್‌ ಗ್ರೂಪ್‌ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ
