ಕೋವಿಡ್ ಬಳಿಕ ಜನರು ನಡೆಸುತ್ತಿದ್ದಾರೆ ಹಣಕಾಸು ನಿರ್ವಹಣೆ ಕುರಿತು ಮುಕ್ತ ಮಾತುಕತೆ
ವಿಶೇಷ ವರದಿ: ರಾಮಚಂದ್ರ ಮುಳಿಯಾಲ
ಬೆಂಗಳೂರು: ಹಣಕಾಸು ತಂತ್ರಜ್ಞಾನ ಕ್ಷೇತ್ರಕ್ಕೆ ವಿಶ್ವಾಸಾರ್ಹತೆ ಹಾಗೂ ಪ್ರಾಮಾಣಿಕತೆಯೇ ಮೂಲವಾಗಿದೆ. ವಿಶ್ವಾಸಾರ್ಹವೆನಿಸುವ ಫಿನ್‌ಟೆಕ್ ಕಂಪನಿಗಳಲ್ಲಿ ಜನರು ಹಣ ಹೂಡಲು ಮುಂದೆ ಬರುತ್ತಾರೆ ಎಂದು ಸ್ಮಾಲ್‌ಕೇಸ್ ಸಂಸ್ಥೆಯ ಸಂಸ್ಥಾಪಕರಾದ ವಸಂತ್ ಕಾಮತ್ ಅವರು ಅಭಿಪ್ರಾಯಪಟ್ಟಿದ್ದಾರೆ.
ಬೆಂಗಳೂರಿನ ಅಂತಾರಾಷ್ಟ್ರೀಯ ವಸ್ತುಪ್ರದರ್ಶನ ಕೇಂದ್ರದಲ್ಲಿ ನ.18ರಂದು ಆರಂಭಗೊಂಡ ಟೆಕ್ ಸಮಿಟ್-2025ರ ಅಂಗವಾಗಿ ಮೊದಲ ದಿನ ನಡೆದ “2030ರ ಫಿನ್‌ಟೆಕ್‌ನ ಮುನ್ನೋಟ” ಕುರಿತ ಸಂವಾದದಲ್ಲಿ ಅವರು ಮಾತನಾಡಿದರು.
ಫಿನ್‌ಟೆಕ್ ಕ್ಷೇತ್ರವನ್ನು ಕೋವಿಡ್‌ಪೂರ್ವ ಹಾಗೂ ಕೋವಿಡೋತ್ತರ ಎಂದು ವರ್ಗೀಕರಿಸಬಹುದು. ಕೋವಿಡ್‌ನ ನಂತರ ಜನರು ಹಣಕಾಸು ನಿರ್ವಹಣೆಯ ಕುರಿತು ಮುಕ್ತವಾಗಿ ಮಾತನಾಡತೊಡಗಿದ್ದಾರೆ. ಅವರಿಗೆ ಹೊಸ ಮಾಹಿತಿ ಸಂಪನ್ಮೂಲಗಳಿಗೆ ಒಡ್ಡಿಕೊಳ್ಳುವಿಕೆ ಹೆಚ್ಚಿದೆ. ಇದೊಂದು ಗಮನಾರ್ಹವಾದ ವರ್ಗಾವಣೆಯಾಗಿದೆ. ಯುವ ಜನಾಂಗ ಫಿನ್‌ಟೆಕ್‌ನತ್ತ ಮುಖ ಮಾಡಿದ್ದಾರೆ ಎಂದು ಕಾಮತ್ ಅವರು ಹೇಳಿದರು.
ಎಐ ಇನ್ನಷ್ಟು ವ್ಯಾಪಕವಾಗಬೇಕಿದೆ:
ಪ್ರಸ್ತುತ ಗ್ರಾಹಕ ಬೆಂಬಲ, ವಂಚನೆ ತಡೆ, ಹಣಕಾಸು ಪ್ರಕ್ರಿಯೆ ಇತ್ಯಾದಿ ಪ್ರಾಥಮಿಕ ವಿಷಯಗಳಲ್ಲಷ್ಟೇ ಎಐ ಬಳಕೆ ಆಗುತ್ತಿದೆ. ಫಿನ್‌ಟೆಕ್‌ನಲ್ಲಿ ಎಐ ಕ್ರಾಂತಿ ಇನ್ನಷ್ಟೇ ಆಗಬೇಕಿದೆ. ಬಿಲ್‌ಗಳನ್ನು ಪ್ರಶಸ್ತಗೊಳಿಸುವುದು, ವೆಚ್ಚ ನಿರ್ವಹಣೆ ಇತ್ಯಾದಿ ಸಂಗತಿಗಳಲ್ಲಿ ಎಐ ಅನ್ನು ಸಶಕ್ತವಾಗಿ ಬಳಸಿಕೊಳ್ಳಬೇಕಿದೆ ಎಂದು ಪೇ3 ಸಂಸ್ಥೆಯ ಸಹಸಂಸ್ಥಾಪಕರು ಮತ್ತು ಸಿಇಒ ಆಗಿರುವ ಪ್ರಿಯಾ ಕಾರ್ಣಿಕ್ ಹೇಳಿದರು.
ಜನರಿಗೆ ಹಣಕಾಸು ವ್ಯವಹಾರಗಳ ರಸೀತಿ, ಮಾಹಿತಿ ತಕ್ಷಣವೇ ಬೇಕು. ಈ ಕಾರಣಕ್ಕಾಗಿಯೇ ಹಣಕಾಸು ತಂತ್ರಜ್ಞಾನ ಕ್ಷೇತ್ರದತ್ತ ಗ್ರಾಹಕರ ವರ್ಗಾವಣೆಯಾಗುತ್ತಿದೆ ಎಂದರು.
ರೇಝರ್‌ಪೇ ಸಂಸ್ಥೆಯ ನೀತಿ ಮುಖ್ಯಸ್ಥರಾದ ಶರಣ್ಯಾ ಗೋಪಿನಾಥ್ ಅವರು ಈ ಸಂವಾದವನ್ನು ನಿರ್ವಹಿಸಿದರು.
ಉಪಯುಕ್ತ ನ್ಯೂಸ್ ಈಗ ಸ್ವದೇಶಿ ಸಾಮಾಜಿಕ ಜಾಲತಾಣ Arattai ನಲ್ಲಿ... ನಮ್ಮ ಚಾನೆಲ್‌ಗೆ ನೀವೂ ಜಾಯಿನ್ ಆಗಿ.
ನಿರಂತರ ಅಪ್‌ಡೇಟ್‌ಗಳಿಗಾಗಿ ಉಪಯುಕ್ತ ನ್ಯೂಸ್ ಟೆಲಿಗ್ರಾಂ ಚಾನೆಲ್‌ಗೆ ಜಾಯಿನ್ ಆಗಿ
ಉಪಯುಕ್ತ ನ್ಯೂಸ್’ ಫೇಸ್‌ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್ ವಾಟ್ಸಪ್‌ ಗ್ರೂಪ್‌ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ
