ತ್ಯಾಜ್ಯ ವಿಲೇವಾರಿಗೆ ಬೆಂಗಳೂರು ಸಂಸ್ಥೆಯಿಂದ ನವೀನ ಪರಿಹಾರ
ವಿಶೇಷ ವರದಿ: ರಾಮಚಂದ್ರ ಮುಳಿಯಾಲ
ಬೆಂಗಳೂರು: ತ್ಯಾಜ್ಯ ವಿಲೇವಾರಿ ಸಮರ್ಪಕವಾಗಿ ನಡೆಯಬೇಕಾದರೆ ಮೂಲದಲ್ಲೇ ಕಸ ವಿಂಗಡಣೆಯಾಗಬೇಕು. ಆ ನಿಟ್ಟಿನಲ್ಲಿ ಹಸಿ ಕಸ ಹಾಗೂ ಒಣ ಕಸವನ್ನು ಪ್ರತ್ಯೇಕಿಸಿ ಕೊಡಿ ಎಷ್ಟು ಹೇಳಿದರೂ ಜನರಿಂದ ಅದು ಸಾಧ್ಯವಾಗುತ್ತಿಲ್ಲ. ಅದಕ್ಕಾಗಿಯೇ ಈಗ ಬಂದಿದೆ ಎಐ ಆಧಾರಿತ ಕಸದ ಬುಟ್ಟಿ.
ಈ ಎಐ ಆಧಾರಿತ ಕಸದ ಬುಟ್ಟಿ ಯಂತ್ರದಲ್ಲಿ 6 ಬುಟ್ಟಿಗಳಿವೆ. ನೀವು ಬಿಸಾಕಬೇಕಿರುವ ವಸ್ತುವನ್ನು ಆ ಯಂತ್ರದ ಮುಂದೆ ಹಿಡಿದರೆ ಸಾಕು, ನಿಮ್ಮ ಕೈಯಲ್ಲಿ ಪ್ಲಾಸ್ಟಿಕ್ ಇದೆಯೋ, ಗಾಜಿನ ಬಾಟಲಿ ಇದೆಯೋ, ಹಸಿ ಪದಾರ್ಥವಿದೆಯೋ ಎಂಬುದನ್ನು ಎಐ ಸೆನ್ಸರ್ ಗುರುತಿಸಿ ಅದಕ್ಕೆ ತಕ್ಕುನಾದ ಬುಟ್ಟಿಯ ಬಾಗಿಲು ತೆರೆಯುತ್ತದೆ. ಅದರೊಳಗೆ ಹಾಕುವುದಷ್ಟೇ ನಮ್ಮ ಕೆಲಸ.
ಬೆಂಗಳೂರಿನ ಎಚ್‌ಎಸ್‌ಆರ್ ಲೇಔಟ್‌ನ ಎಐಸ್ಮಾರ್ಟ್ ಬಿನ್ ಎಂಬ ಸಂಸ್ಥೆ ಅಭಿವೃದ್ಧಿಪಡಿಸಿರುವ ಈ ಕಸದ ಬುಟ್ಟಿಯ ಹೆಸರು ಬಿನ್‌ಪ್ರೊ. ಬೆಂಗಳೂರು ಅಂತಾರಾಷ್ಟ್ರೀಯ ಪ್ರದರ್ಶನ ಕೇಂದ್ರದಲ್ಲಿ ನ.18 ರಂದು ಆರಂಭಗೊಂಡಿರುವ 3 ದಿನಗಳ ಟೆಕ್ ಸಮಿಟ್-2025 ರ ವಸ್ತುಪ್ರದರ್ಶನದಲ್ಲಿ ಇದು ಗಮನಸೆಳೆಯಿತು.
ನಮ್ಮ ಸ್ಮಾರ್ಟ್ ಕಸದ ಬುಟ್ಟಿ ಶೇ.95ರಷ್ಟು ನಿಖರತೆಯೊಂದಿಗೆ ಕಸ ವಿಂಗಡಣೆ ನಡೆಸುತ್ತದೆ. ತ್ಯಾಜ್ಯ ವಿಲೇವಾರಿಯ ನಿಟ್ಟಿನಲ್ಲಿ ಬಿನ್‌ಪ್ರೊ ಮಹತ್ವದ ಕೊಡುಗೆ ನೀಡಲಿದೆ. ಪೇಟೆಂಟ್‌ನೊಂದಿಗೆ ಮಾರುಕಟ್ಟೆಗೆ ಬಿನ್‌ಪ್ರೊ ಅನ್ನು ತರುತ್ತಿದ್ದು, ಮೊದಲ ಹಂತದಲ್ಲಿ ವಿಮಾನ ನಿಲ್ದಾಣ, ರೈಲ್ವೆ ನಿಲ್ದಾಣ, ಮಾಲ್‌ಗಳು ನಮ್ಮ ಗುರಿಯಾಗಿದೆ. 400 ಲೀಟರ್ ಸಾಮರ್ಥ್ಯದ ಬಿನ್ ಪ್ರೊ ಬೆಲೆ 40,000 ರೂ.ನಿಂದ 1.5 ಲಕ್ಷ ರೂ. ತನಕ ಇರಲಿದೆ ಎಂದು ಸಂಸ್ಥೆಯ ಸಂಸ್ಥಾಪಕರಾದ ಅನುಪಮ್ ಮಹಾಜನ್ ಹೇಳಿದರು.
ಮುಂದೆ ಬರಲಿದೆ ಕಸ ವಿಂಗಡಿಸುವ ಯಂತ್ರ
ಮುಂದಿನ ಹೆಜ್ಜೆಯಾಗಿ, ಎಐಸ್ಮಾರ್ಟ್ ಬಿನ್ ಸಂಸ್ಥೆ, ಮಿಶ್ರ ಒಣ ತ್ಯಾಜ್ಯವನ್ನು ತಾನೇ ವಿಂಗಡಿಸುವಂತಹ ವಿಶ್ವದಲ್ಲೇ ಪ್ರಪ್ರಥಮ ಯಂತ್ರವನ್ನು ಅಭಿವೃದ್ಧಿಪಡಿಸುತ್ತಿದೆ. ಸಂಪೂರ್ಣ ಸ್ವಯಂಚಾಲಿತವಾಗಿರಲಿರುವ ಆ ಯಂತ್ರ ಎಐ ಇಮೇಜಿಂಗ್, ರೋಬೋಟಿಕ್, ಕನ್ವೇಯರ್ ತಂತ್ರಜ್ಞಾನವನ್ನು ಒಳಗೊಂಡಿರಲಿದೆ. ಅದಕ್ಕೆ ಪೇಟೆಂಟ್ ಪಡೆಯುವ ಪ್ರಕ್ರಿಯೆ ಪ್ರಗತಿಯಲ್ಲಿದೆ ಎಂದು ಅನುಪಮ್ ಅವರು ವಿವರಿಸಿದರು.
ಹೆಚ್ಚಿನ ಮಾಹಿತಿಗೆ ಸಂಪರ್ಕಿಸಿ: anupamm@aismartbin.com
ಉಪಯುಕ್ತ ನ್ಯೂಸ್ ಈಗ ಸ್ವದೇಶಿ ಸಾಮಾಜಿಕ ಜಾಲತಾಣ Arattai ನಲ್ಲಿ... ನಮ್ಮ ಚಾನೆಲ್‌ಗೆ ನೀವೂ ಜಾಯಿನ್ ಆಗಿ.
ನಿರಂತರ ಅಪ್‌ಡೇಟ್‌ಗಳಿಗಾಗಿ ಉಪಯುಕ್ತ ನ್ಯೂಸ್ ಟೆಲಿಗ್ರಾಂ ಚಾನೆಲ್‌ಗೆ ಜಾಯಿನ್ ಆಗಿ
ಉಪಯುಕ್ತ ನ್ಯೂಸ್’ ಫೇಸ್‌ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್ ವಾಟ್ಸಪ್‌ ಗ್ರೂಪ್‌ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ
