ಆತ್ಮ ಬಲವು ಶಾರೀರಿಕ ಬಲಕ್ಕಿಂತಲೂ ದೊಡ್ಡದು. ದೈಹಿಕವಾಗಿ ಬೃಹತ್ ಗಾತ್ರದಲ್ಲಿರುವ ಆನೆಗೂ ಆತ್ಮಬಲವಿದ್ದರೆ ಮಾತ್ರ ಚಟುವಟಿಕೆಯಿಂದ ಕೂಡಿರುತ್ತದೆ. ಇಲ್ಲದಿದ್ದರೆ ಇಲ್ಲ. ಆತ್ಮಬಲದ ಕುರಿತಂತೆ ವಾಟ್ಸಪ್ ನಲ್ಲಿ ಒಮ್ಮೆ ಓದಿದ ಕಥೆಯನ್ನು ಉದಾಹರಿಸಲು ಇಚ್ಚಿಸುತ್ತೇನೆ. ಇದು ಪ್ರಸ್ತುತ ಓದುಗರಿಗೂ ಇಷ್ಟವಾಗಬಹುದು ಎಂಬುದು ನನ್ನ ಭಾವನೆ. ಒಮ್ಮೆ ಓರ್ವ ರಾಜನ ಸೈನ್ಯದಲ್ಲಿ ನೂರಾರು ಕುದುರೆ, ಒಂಟೆ, ಆನೆ, ಕಾಲಾಳುಗಳು ಇದ್ದವು. ರಾಜನಿಗೆ ಒಂದು ಆನೆಯ ಮೇಲೆ ಬಹಳ ಪ್ರೀತಿ. ಆ ಆನೆಯು ರಾಜನ ಪ್ರತಿಯುದ್ಧದಲ್ಲೂ ಮುನ್ನುಗ್ಗಿ ಧೈರ್ಯದಿಂದ ಯುದ್ಧಭೂಮಿಯಲ್ಲಿ ರಾಜನಿಗೆ ಗೆಲುವನ್ನು ತಂದು ಕೊಡಲು ಶ್ರಮಿಸುತ್ತಿತ್ತು. ಪ್ರತಿ ಸಲವೂ ಆ ಅನೆಯಿಂದಾಗಿ ರಾಜ ಯುದ್ಧದಲ್ಲಿ ಗೆಲುವನ್ನು ಸಾಧಿಸುತ್ತಿದ್ದನು. ಹೀಗೆ ಕೆಲಸ ಮಾಡುತ್ತಿದ್ದ ಆನೆಗೂ ಕಾಲಾಂತರದಲ್ಲಿ ವಯಸ್ಸಾಗುತ್ತಾ ಬಂತು ಇದನ್ನು ಗಮನಿಸಿದ ರಾಜ ಆನೆಯನ್ನು ಇನ್ನು ಮುಂದೆ ಯಾವುದೇ ಯುದ್ಧಕ್ಕೆ ಕರೆದುಕೊಂಡು ಹೋಗುವುದು ಬೇಡವೆಂದು ತೀರ್ಮಾನಿಸಿ, ಆನೆಯ ಮೇಲಿನ ಪ್ರೀತಿಯಿಂದ ಅದನ್ನು ಆಭಯಾರಣ್ಯದಲ್ಲಿ ಬಿಟ್ಟು , ಚೆನ್ನಾಗಿ ನೋಡಿಕೊಳ್ಳುವಂತೆ ಸೈನಿಕರಿಗೆ ಆದೇಶಿಸಿದನು.
ಆದರೆ ಆನೆ ಕಾಲಕ್ರಮೇಣ ಮಂಕಾಗುತ್ತಾ ಬಂತು, ಒಮ್ಮೆ ನೀರು ಕುಡಿಯಲು ಹೋದ ಆನೆ ಕೆಸರಿನಲ್ಲಿ ಸಿಕ್ಕಿಕೊಂಡು ಮೇಲೆಬರಲು ಸಾಧ್ಯವಾಗದೆ ಒದ್ದಾಡುತ್ತಿತ್ತು, ಇದನ್ನು ಗಮನಸಿದ ಸೈನಿಕರು ಆನೆಯನ್ನು ನೀರಿನಿಂದ ಮೇಲೆ ತರಲು ಪ್ರಯತ್ನಿಸಿದರು. ಆದರೂ ಆನೆ ಕೆಸರಿನಿಂದ ಮೇಲೆಳಲು ಆಗಲೇ ಇಲ್ಲ. ಈ ವಿಚಾರವನ್ನು ರಾಜನ ಗಮನಕ್ಕೆ ತಂದಾಗ ತಕ್ಷಣ ಸೈನಿಕರೊಂದಿಗೆ ಆನೆ ಇದ್ದ ಸ್ಥಳಕ್ಕೆ ಬಂದ ರಾಜ ಚಿಂತೆಗೊಳಗಾದನು. ತುಂಬು ಪ್ರೀತಿಯ ಆನೆ ಕೆಸರಿನಲ್ಲಿ ಸಿಕ್ಕಿಕೊಂಡಿರುವುದು ರಾಜನ ಮನಸ್ಸಿಗೆ ತುಂಬ ಬೇಸರವಾಯಿತು. ಆಗ ತಕ್ಷಣ ಮಂತ್ರಿಯನ್ನು ಕರೆಯಿಸಿ ಏನಾದರು ಮಾಡಿ ಆನೆಯನ್ನು ಕೆಸರಿನಿಂದ ಮೇಲಕ್ಕೆ ಬರುವಂತೆ ಮಾಡಲು ಸೂಚಿಸಿದ. ತಕ್ಷಣ ಮಂತ್ರಿ ಈ ಸಣ್ಣ ಕೆಲಸಕ್ಕೆ ಇಷ್ಟೊಂದು ಚಿಂತೆ ಏಕೆ ರಾಜ ಎಂದು ನಗುತ್ತಾ ಸೈನಿಕರಿಗೆ ರಣ ಕಹಳೆಯನ್ನು ಮೊಳಗಿಸಲು ಸೂಚಿಸಿದ. ರಣ ಕಹಳೆಯ ಸದ್ದು ಆನೆಯ ಕಿವಿಗೆ ಬಿದ್ದೊಡನೆ ತನ್ನ ಆತ್ಮಬಲದಿಂದ ಆನೆ ಸಲಿಸಾಗಿ ಕೆಸರಿನಿಂದ ಮೇಲೆ ಬಂತು. ರಾಜನಿಗೆ ಬಹಳ ಸಂತೋಷವಾಯಿತು.
ಆಗ ಮಂತ್ರಿ ಹೇಳಿದ ಪ್ರಭು ಶರೀರ ಬಲವೊಂದೆ ಬದುಕಲ್ಲ , ಬದುಕಲು ಒಳಗಿನಿಂದ ಒಂದು ಸ್ಪೂರ್ತಿ ಬೇಕು. ನನ್ನ ಅವಶ್ಯಕತೆ ಈ ಜಗತ್ತಿಗಿದೆ ಎಂಬ ಭಾವದ ಪ್ರೇರಣೆ ಬೇಕು. ಆ ಸ್ಫೂರ್ತಿ ಮತ್ತು ಪ್ರೇರಣೆಯೇ ಆತ್ಮಬಲ ಆ ಸ್ಫೂರ್ತಿ ಬದುಕಲು ಪ್ರೇರೆಪಿಸಿದಾಗ ಮಾತ್ರ ಬದುಕುವ ಛಲ ಬರುತ್ತದೆ. ಆ ಸ್ಪೂರ್ತಿ ನಮ್ಮ ಮೇಲೆ ನಮ್ಮವರು ಇಟ್ಟಿರುವ ಭರವಸೆ, ಪ್ರೀತಿಗಳಿಂದ ಸಿಗುತ್ತದೆ. ಒಂದು ಭರವಸೆಯ ಮಾತು! ನಿಷ್ಕಲ್ಮಶ ನಗು, ಪ್ರೀತಿ ಇಷ್ಟೇ ಸಾಕು! ಧೈರ್ಯದಿಂದ ಬದುಕಲು ಮತ್ತು ನಮ್ಮ ಆತ್ಮ ಬಲ ವನ್ನು ಜಾಗೃತಗೊಳಿಸಲು.
ಅಪರೂಪದ ಮನುಷ್ಯ ಜೀವನವನ್ನು ಅರ್ಥಪೂರ್ಣವಾಗಿ ಸಾರ್ಥಕ್ಯ ಗೊಳಿಸಿಕೊಳ್ಳಲು, ಆತ್ಮಬಲ ಸದಾ ನಮ್ಮೊಂದಿಗೆ ಇರಬೇಕು. ವಸುದೈವ ಕುಟುಂಬಕಂ ಹಿನ್ನೆಲೆಯಲ್ಲಿ ವಿಶ್ವದೇಳ್ಗೆಯ ಮಹದೋದ್ದೇಶವನ್ನು ಇಟ್ಟುಕೊಂಡು ಮಹಾತ್ವಾಕಾಂಕ್ಷೆಯಿಂದ ಗಟ್ಟಿತನದ ಆತ್ಮಬಲದೊಂದಿಗೆ ಕಾರ್ಯ ನಿರ್ವಹಿಸಿದಾಗ ಅಸಾಧ್ಯವೂ ಸಾಧ್ಯವೆನಿಸುತ್ತದೆ.
-ಕೆ.ಎನ್.ಚಿದಾನಂದ. ಹಾಸನ
