ಇಸಿಜಿ ಅಥವಾ ಎಲೆಕ್ಟ್ರೋಕಾರ್ಡಿಯೋಗ್ರಾಂ ಎನ್ನುವುದು ಒಂದು ಸರಳ ಹೃದಯ ಪರೀಕ್ಷೆಯಾಗಿದ್ದು, ಹೃದಯದ ಬಡಿತದ ರಿಥಮ್ ಅಥವಾ ಏರಿಳಿತದ ನಮೂನೆ ಹಾಗೂ ಹೃದಯದ ವಿದ್ಯುತ್ ತರಂಗಗಳ ಬಗ್ಗೆ ನಿಖರವಾಗಿ ಮಾಹಿತಿ ನೀಡುತ್ತದೆ. ಮನುಷ್ಯನ ಹೃದಯದಲ್ಲಿ ವಿದ್ಯುತ್ ಅಲೆಗಳು ಉತ್ಪತ್ತಿಯಾಗಿ ನಿರಂತರವಾಗಿ ಹೃದಯ ಚಲನೆಯಲ್ಲಿರುವಂತೆ ಮಾಡುತ್ತದೆ. ಈ ವಿದ್ಯುತ್ ತರಂಗಗಳು ಒಂದು ವಿಶಿಷ್ಟವಾದ ಮತ್ತು ಪೂರ್ವನಿರ್ಧರಿತವಾದ ನಮೂನೆಯಲ್ಲಿ ಹೃದಯದೆಲ್ಲೆಡೆ ಹರಿಯುತ್ತದೆ ಮತ್ತು ಹೃದಯದ ಸ್ನಾಯುಗಳು ನಿರಂತರವಾಗಿ ಚಲನೆಯಲ್ಲಿರುವಂತೆ ಮಾಡುತ್ತದೆ.

ಈ ವಿದ್ಯುತ್ ತರಂಗಗಳ ಅಲೆಯನ್ನು ವೈದ್ಯರು ವ್ಯಕ್ತಿಯ ದೇಹದ ಹೊರಭಾಗದ ಚರ್ಮಕ್ಕೆ ಜೋಡಿಸಲಾದ ಸೆನ್ಸಾರ್‌ಗಳ ಮುಖಾಂತರ ದಾಖಲು ಮಾಡಬಹುದಾಗಿದೆ. ಇದನ್ನೇ ಸಂಕ್ಷಿಪ್ತವಾಗಿ ಇಸಿಜಿ ಎನ್ನಲಾಗುತ್ತದೆ. 1910 ರಲ್ಲಿ ಇಥೊವನ್ ಎಂಬ ವಿಜ್ಞಾನಿ ಸ್ಟಿಂಗ್ ಗೆಲ್ಟೆಮೋ ಮೀಟರ್ ಎಂಬ ಯಂತ್ರದ ಮುಖಾಂತರ ಇಸಿಜಿಯನ್ನು ಸಂಶೋಧನೆ ಮಾಡಿದ. ಈ ಸಂಶೋಧನೆ ನಡೆದು ಸುಮಾರು 111 ವರ್ಷಗಳು ಕಳೆದು ಹೋಗಿದೆ. ಆದರೆ ಇಂದಿಗೂ ಇಸಿಜಿ ಎನ್ನುವುದು ಹೃದಯ ರೋಗದ ಪತ್ತೆಹಚ್ಚುವಿಕೆಯ ಅತ್ಯಂತ ಜನಪ್ರಿಯ, ಸರಳ ಮತ್ತು ಪ್ರಾಥಮಿಕ ಪರೀಕ್ಷೆಯಾಗಿಯೇ ಉಳಿದಿದೆ.

ಪ್ರತಿ ಬಾರಿ ಹೃದಯ ಬಡಿಯುವಾಗಲೂ ಉಂಟಾಗುವ ವಿದ್ಯುತ್ ತರಂಗಗಳ ಅಲೆಯನ್ನು ಇಸಿಜಿ ಯಂತ್ರ ದಾಖಲು ಮಾಡುತ್ತದೆ. ಮತ್ತು ಹೃದಯದ ಬಡಿತದ ಮಾದರಿ, ಅದರ ಬಡಿತದ ವೇಗ ಮತ್ತು ರಿಥಮ್ ಬಗ್ಗೆ ಸೂಕ್ಷ್ಮವಾದ ಮಾಹಿತಿಯನ್ನು ಕಾಗದದಲ್ಲಿ ಪ್ರಿಂಟ್ ಮೂಲಕ ವೈದ್ಯರಿಗೆ ಒದಗಿಸಿಕೊಡುತ್ತದೆ. ಈ ಪರೀಕ್ಷೆ ಮಾಡಲು ನುರಿತ ತಜ್ಞ ತಂತ್ರಜ್ಞರು ಸಹಕರಿಸುತ್ತಾರೆ. ಆಸ್ಪತ್ರೆಯ ಹೊರ ರೋಗಿ ವಿಭಾಗದಲ್ಲಿಯೂ ಈ ಪರೀಕ್ಷೆ ಮಾಡಬಹುದಾಗಿದೆ, ಆದರೆ ‘ಇಸಿಜಿ’ ರಿಪೋರ್ಟನ್ನು ಓದಲು ನುರಿತ ವೈದ್ಯರು ಅತೀ ಅವಶ್ಯಕ.

ಯಾಕೆಂದರೆ ಸಣ್ಣ ಪುಟ್ಟ ವ್ಯತ್ಯಾಸಗಳನ್ನು ಗುರುತಿಸಲು ದಕ್ಷ ಮತ್ತು ಪರಿಣಿತ ವೈದ್ಯರು ಬೇಕಾಗುತ್ತದೆ. ಈಗ ತಂತ್ರಜ್ಞಾನ ಮುಂದುವರೆದ ಕಾರಣದಿಂದ ಇಸಿಜಿ ರಿಪೋರ್ಟನ್ನು ಹೃದಯದ ತಜ್ಞರಿಗೆ ಅಥವಾ ನುರಿತ ವೈದ್ಯರಿಗೆ ಕಳುಹಿಸಿ ತಕ್ಷಣವೇ ಹೃದಯದ ತೊಂದರೆಗಳನ್ನು ಗುರುತಿಸಲು ಸಾಧ್ಯವಿದೆ. ರೋಗಿಯ ರೋಗದ ಲಕ್ಷಣಗಳನ್ನು ಅವಲಂಬಿಸಿಕೊಂಡು ಯಾವಾಗ ಇಸಿಜಿ ಮಾಡಬೇಕು ಎಂಬುದನ್ನು ವೈದ್ಯರು ನಿರ್ಧರಿಸುತ್ತಾರೆ. ಸಣ್ಣ ಪುಟ್ಟ ಜ್ವರ, ತಲೆನೋವು ಬಂದಾಗಲೆಲ್ಲಾ ಇಸಿಜಿ ಮಾಡಿಸಬೇಕು ಎಂದು ವೈದ್ಯರನ್ನು ಒತ್ತಾಯಿಸುವುದು ನ್ಯಾಯ ಸಮ್ಮತವಲ್ಲ.

ಯಾವಾಗ ಇಸಿಜಿ ಅಗತ್ಯವಿದೆ?

ಹೃದಯ ಸಂಬಂಧಿ ಕಾಯಿಲೆಗಳನ್ನು ಪತ್ತೆ ಮಾಡಲು ಇಸಿಜಿ ಪ್ರಾಥಮಿಕ ಪರೀಕ್ಷೆಯಾಗಿರುತ್ತದೆ. ರೋಗಿ ಎದೆ ನೋವು, ಹೃದಯ ಜೋರಾಗಿ ಬಡಿಯುತ್ತಿರುವಾಗ, ತಲೆಸುತ್ತುವಿಕೆ, ಉಸಿರಾಡಲು ಕಷ್ಟವಾಗುವುದು ಮುಂತಾದ ಸಮಸ್ಯೆಗಳಿಗಾಗಿ ವೈದ್ಯರ ಬಳಿ ಬಂದಾಗ ವೈದ್ಯರು ಈ ಪರೀಕ್ಷೆಗೆ ಆದೇಶಿಸುತ್ತಾರೆ. ಯಾವ ವೈದ್ಯರೂ ನೇರವಾಗಿ ಇಕೋಕರ‍್ಡಿಯೋಗ್ರಾಂ, ಟ್ರೆಡ್‌ಮಿಲ್‌ಟೆಸ್ಟ್ (ಸ್ಟ್ರೆಸ್ ಟೆಸ್ಟ್) ಅಥವಾ ಆಂಜಿಯೋಗ್ರಾಂ ಪರೀಕ್ಷೆಯನ್ನು ನೇರವಾಗಿ ಮಾಡುವುದಿಲ್ಲ. ಇಸಿಜಿ ಪರೀಕ್ಷೆ ಮಾಡಿದ ಬಳಿಕವೇ ಮುಂದೆ ಯಾವ ಪರೀಕ್ಷೆ ಬೇಕು ಎಂಬುದನ್ನು ನಿರ್ಧರಿಸುತ್ತಾರೆ. ರೋಗಿಯ ವಯಸ್ಸು, ದೇಹದ ಪ್ರಕೃತಿ, ರೋಗದ ತೀವ್ರತೆ, ರೋಗಿಯ ಆ ಕ್ಷಣದ ಆರೋಗ್ಯ ಸ್ಥಿತಿ ಎಲ್ಲವನ್ನು ಗಮನಿಸಿ ಯಾವ ಪರೀಕ್ಷೆ, ಯಾವಾಗ, ಎಲ್ಲಿ ಮಾಡಬೇಕು ಎಂಬುದನ್ನು ವೈದ್ಯರೇ ನಿರ್ಧರಿಸುತ್ತಾರೆ.

ಇನ್ನು ಸಾಮಾನ್ಯವಾಗಿ ಅರಿವಳಿಕೆ ನೀಡುವ ಮೊದಲು ರೋಗಿಗಳ ಫಿಟ್‌ನೆಸ್ ಅಥವಾ ಹೃದಯದ ಕಾರ್ಯಕ್ಷಮತೆಯನ್ನು ತಿಳಿಯಲು ಇಸಿಜಿ ಮತ್ತು ಪರೀಕ್ಷೆಯನ್ನು ಮಾಡುತ್ತಾರೆ.

ಇಸಿಜಿಯಿಂದ ಏನನ್ನು ತಿಳಿಯಬಹುದು?

1. ಹೃದಯ ನಿಯಮಿತವಾಗಿ ಬಡಿಯುತ್ತಿದೆಯೋ ಅಥವಾ ಅನಿಯಂತ್ರಿತವಾಗಿ ಬಡಿಯುತ್ತಿದೆಯೋ ಎಂಬುದರ ಮಾಹಿತಿ ಇಸಿಜಿಯಿಂದ ತಿಳಿಯುತ್ತದೆ. ಇನ್ನು ಹೃದಯದ ಬಡಿತದ ವೇಗವನ್ನು ಇಸಿಜಿಯಿಂದ ತಿಳಿಯಬಹುದಾಗಿದೆ. ಮುಖ್ಯವಾಗಿ ಅರಿಥ್‌ಮಿಯಾ ಎಂಬ ಹೃದಯದ ರೋಗದ ಸ್ಥಿತಿಯ ಬಗ್ಗೆ ಪ್ರಾಥಮಿಕ ಮಾಹಿತಿ ಇಸಿಜಿ ಪರೀಕ್ಷೆಯಿಂದ ತಿಳಿಯಬಹುದಾಗಿದೆ.

2. ಹೃದಯಾಘಾತವಾಗಿ ಹೃದಯದ ಭಾಗಗಳಿಗೆ ರಕ್ತಸಂಚಾರ ಸರಿಯಾಗಿ ಪೂರೈಕೆಯಾಗದಿದ್ದಲ್ಲಿ ಇಸಿಜಿಯಲ್ಲಿ ಪ್ರಾಥಮಿಕ ಮಾಹಿತಿ ಸಿಗಬಹುದು. ಹೃದಯಾಘಾತವಾದ ಬಗ್ಗೆ ಅಲ್ಪಸ್ವಲ್ಪ ಮಾಹಿತಿ ಇಸಿಜಿಯಲ್ಲಿ ಕಾಣಬಹುದಾಗಿದೆ

3. ಹೃದಯ ರಕ್ತನಾಳಗಳ ಸಂಬಂಧಿ ರೋಗಗಳು ಇದ್ದಲ್ಲಿ ಹೃದಯ ಬಡಿತದ ವ್ಯತ್ಯಾಸ ಹಾಗೂ ಇಸಿಜಿ ಪ್ಯಾಟರ್ನ್ ಅಥವಾ ಇಸಿಜಿಯ ವಿನ್ಯಾಸದಲ್ಲಿ ವ್ಯತ್ಯಾಸ ಕಂಡುಬರುತ್ತದೆ.

4. ರೋಗಿ ಅಧಿಕ ರಕ್ತದೊತ್ತಡ ಮತ್ತು ಹೃದಯ ವೈಫಲ್ಯದಿಂದ ಬಳಲುತ್ತಿದ್ದಲ್ಲಿ, ಹೃದಯದ ಗೋಡೆಗಳ ಸ್ನಾಯುಗಳು ದಪ್ಪಗಾಗುತ್ತದೆ ಮತ್ತು ದೊಡ್ಡದಾಗುತ್ತದೆ. ಇದನ್ನು ಕರ‍್ಡಿಯೋಮಯೋಪತಿ ಅಥವಾ ಕರ‍್ಡಿಯೋಮೆಗಾಲೆ ಎನ್ನುತ್ತಾರೆ. ಈ ಸಂದರ್ಭಗಳಲ್ಲಿ ಇಸಿಜಿ ವಿನ್ಯಾಸದಲ್ಲಿ ವ್ಯತ್ಯಾಸ ಕಂಡುಬರುತ್ತದೆ.

5. ಕೆಲವೊಮ್ಮೆ ನಿರಂತರವಾಗಿ ನಿಯಮಿತ ಅಂತರದಲ್ಲಿ ಇಸಿಜಿ ಪರೀಕ್ಷೆ ಮಾಡಿ ರೋಗಿಯ ಹೃದಯದ ಚಲನೆ ಮತ್ತು ಬಡಿತದ ವಿನ್ಯಾಸವನ್ನು ಅಭ್ಯಸಿಸಲಾಗುತ್ತದೆ. ಹೃದಯ ರೋಗಿಗಳ ಚಿಕಿತ್ಸೆ ಸಂದರ್ಭದಲ್ಲಿಯೂ, ರೋಗಿಯ ಹೃದಯದ ಕ್ಷಮತೆಯನ್ನು ತಿಳಿಯಲು ನಿಯಮಿತವಾಗಿ ಇಸಿಜಿ ಪರೀಕ್ಷೆ ಮಾಡುತ್ತಾರೆ. ಒಟ್ಟಿನಲ್ಲಿ ಯಾವಾಗ, ಎಲ್ಲಿ, ಎಷ್ಟುಬಾರಿ ಇಸಿಜಿ ಮಾಡಬೇಕು ಮತ್ತು ಹೆಚ್ಚಿನ ಪರೀಕ್ಷೆಯ ಅಗತ್ಯ ಇದೆಯೋ ಎಂಬುದನ್ನು ವೈದ್ಯರೇ ನಿರ್ಧರಿಸುತ್ತಾರೆ.

6. ಈ ಹಿಂದೆ ಹೃದಯಾಘಾತವಾಗಿದ್ದರೆ ಚಿಕಿತ್ಸೆಯ ಪರಿಣಾಮಕಾರತ್ವವನ್ನು ತಿಳಿಯಲು ಮತ್ತು ರೋಗಿಯ ಹೃದಯದ ಆರೋಗ್ಯ ಸ್ಥಿತಿಯನ್ನು ತಿಳಿಯಲು ಇಸಿಜಿ ಮಾಡುತ್ತಾರೆ.

7. ಪೇಸ್‌ಮೇಕರ್ ಅಳವಡಿಸಿದ ರೋಗಿಗಳಲ್ಲಿ ಹೃದಯದ ಕಾರ್ಯಕ್ಷಮತೆಯನ್ನು ತಿಳಿಯಲು ಇಸಿಜಿಯನ್ನು ಮಾಡುತ್ತಾರೆ.

ಇನ್ನು ಹೋಲ್ಟರ್ ಮಾನಿಟರ್ ಎನ್ನುವುದು ಒಂದು ಸಣ್ಣದಾದ ರೋಗಿ ಧರಿಸಬಹುದಾದ ಯಂತ್ರವಾಗಿದ್ದು, ರೋಗಿಯ ದೇಹಕ್ಕೆ ಈ ಯಂತ್ರವನ್ನು ಜೋಡಿಸಲಾಗುತ್ತದೆ. ಈ ಯಂತ್ರವು 24 ರಿಂದ 48 ಗಂಟೆಗಳ ಕಾಲ ನಿರಂತರವಾಗಿ ಹೃದಯದ ಬಡಿತ ಮತ್ತು ಲಯವನ್ನು ದಾಖಲಿಸುತ್ತದೆ. ಈ ರೀತಿ ದಾಖಲಿಸಲಾದ ಇಸಿಜಿಯಿಂದ ವೈದ್ಯರಿಗೆ ಬೇಕಾದ ಎಲ್ಲಾ ಮಾಹಿತಿಗಳು ದೊರಕುತ್ತದೆ ಮತ್ತು ಹೃದಯದ ಕಾರ‍್ಯಕ್ಷಮತೆ ಬಗ್ಗೆ ಹೆಚ್ಚಿನ ಮಾಹಿತಿ ಲಭ್ಯವಾಗುತ್ತದೆ. ಇನ್ನೊಂದು ಈವೆಂಡ್ ಮಾನಿಟರ್ ಎನ್ನುವ ಯಂತ್ರವಿದ್ದು ಇದನ್ನು 30 ದಿನಗಳ ಕಾಲ ಧರಿಸಬಹುದು. ಇದು ದಿನದಲ್ಲಿ ಕೆಲವು ನಿಮಿಷಗಳ ಕಾಲ ಹೃದಯದ ಇಸಿಜಿಯನ್ನು ದಾಖಲಿಸುತ್ತದೆ. ರೋಗಿಗೆ ಹೃದಯ ಬೇನೆಯ ಅನುಭವವಾದಾಗ, ಸಣ್ಣ ಗುಂಡಿಯನ್ನು ಒತ್ತಿದಾಗ ತಕ್ಷಣವೇ ಹೃದಯದ ಲಯ, ವೇಗ ಮತ್ತು ಬಡಿತವನ್ನು ಇಸಿಜಿ ರೂಪದಲ್ಲಿ ದಾಖಲಿಸುತ್ತದೆ.

ಹೇಗೆ ಇಸಿಜಿ ದಾಖಲು ಮಾಡುತ್ತಾರೆ?

ಇದೊಂದು ಸರಳ, ನೋವುರಹಿತ, ಸುರಕ್ಷಿತ ಪರೀಕ್ಷೆಯಾಗಿರುತ್ತದೆ. ರೋಗಿಯ ದೇಹಕ್ಕೆ, ಎದೆಭಾಗ ಮತ್ತು ಕೈ ಕಾಲುಗಳಿಗೆ ಸುಮಾರು 12 ಎಲೆಕ್ಟ್ರೋಡ್‌ ಗಳನ್ನು ಜೋಡಿಸಲಾಗುತ್ತದೆ. ಎಲೆಕ್ಟ್ರೋಡ್‌ ಗಳು ದೇಹಕ್ಕೆ ಸರಿಯಾಗಿ ಜೋಡಿಸಲು ಸಾಧ್ಯವಾಗುವಂತೆ ದೇಹದಲ್ಲಿ ರೋಮಗಳಿದ್ದರೆ ತೆಗೆಯುತ್ತಾರೆ. ಈ ಎಲೆಕ್ಟ್ರೋಡ್‌ನ ಇನ್ನೊಂದು ಬದಿಯನ್ನು ಇಸಿಜಿ ಮಾನಿಟರ್ ಯಂತ್ರಕ್ಕೆ ಜೋಡಿಸಿರುತ್ತಾರೆ. ಹೃದಯದಲ್ಲಿ ಉಂಟಾಗುವ ವಿದ್ಯುತ್ ತರಂಗಗಳ ಅಲೆಯನ್ನು ಈ ಎಲೆಕ್ಟ್ರೋಡ್‌ಗಳು ತಂತಿಯ ಮುಖಾಂತರ ಇಸಿಜಿ ಯಂತ್ರಕ್ಕೆ ರವಾನಿಸುತ್ತಾರೆ. ಕಂಪ್ಯೂಟರ್ ಈ ದಾಖಲಾದ ಹೃದಯದ ವಿದ್ಯುತ್ ತರಂಗಗಳ ಲಯ, ವೇಗ, ಬಡಿತವನ್ನು ದಾಖಲು ಮಾಡಿ, ಕಾಗದದಲ್ಲಿ ಇಸಿಜಿ ರಿಪೋರ್ಟ್ ಪ್ರಿಂಟ್ ರೂಪದಲ್ಲಿ ದೊರಕುತ್ತದೆ. ಈ ಪರೀಕ್ಷೆ ಕೆಲವೇ ನಿಮಿಷಗಳಲ್ಲಿ ಮುಗಿಯುತ್ತದೆ. ಈ ಪರೀಕ್ಷೆ ಮಾಡುವಾಗ ರೋಗಿ ಅಲ್ಲಾಡುತ್ತಿದ್ದರೆ ಅಥವಾ ನಡುಗುತ್ತಿದ್ದರೆ ಸರಿಯಾದ ರಿಪೋರ್ಟ್ ದೊರಕುವುದಿಲ್ಲ. ರೋಗಿಯನ್ನು ಅಂಗಾತ ಮಲಗಿಸಿ ಈ ಪರೀಕ್ಷೆ ಮಾಡಲಾಗುತ್ತದೆ.

ಇಸಿಜಿ ನ್ಯೂನತೆಗಳು:

1. ಇಸಿಜಿ ಎನ್ನುವುದು ಹೃದಯದ ಪ್ರಾಥಮಿಕ ಪರೀಕ್ಷೆಯಾಗಿದ್ದು ಪರಿಪೂರ್ಣ ಮಾಹಿತಿ ಸಿಗದೇ ಇರಲೂಬಹುದು. ಇಸಿಜಿಯಲ್ಲಿ ಸಾಮಾನ್ಯವಾಗಿ ಒಂದೇ ರೀತಿಯ ನಮೂನೆ ಇರುತ್ತದೆ. ಮೇಲ್ಮುಖವಾಗಿ ಇರುವ ಅಲೆಗಳು ಮತ್ತು ಕೆಳಮುಖವಾಗಿ ಇರುವ ಅಲೆಗಳು ಇರುತ್ತದೆ. ಇವುಗಳ ನಡುವಿನ ಅಂತರವೂ ನಿರ್ದಿಷ್ಟ ಅಳತೆಯಲ್ಲಿರುತ್ತದೆ. ಸಾಮಾನ್ಯವಾಗಿ ಕಂಡುಬರುವ ಬದಲಾವಣೆಗಳನ್ನು ಇದರ ಜೊತೆಗೆ ಹೋಲಿಸಿ ಹೃದಯದ ತೊಂದರೆಗಳ ಬಗ್ಗೆ ಮಾಹಿತಿ ಕಲೆ ಹಾಕುತ್ತಾರೆ. ಕೆಲವೊಮ್ಮೆ ಸೂಕ್ತ ಮಾಹಿತಿ ಸಿಗದೇ ಇರಲೂಬಹುದು. ಕೆಲವೊಮ್ಮೆ ಅತಿ ಮುಖ್ಯವಾದ ಮಾಹಿತಿ ಸಿಗಲೂಬಹುದು. ಒಟ್ಟಿನಲ್ಲಿ ಯಾವತ್ತೋ ಮಾಡಿಸಿದ ನಾರ್ಮಲ್ ಇಸಿಜಿ ರಿಪೋರ್ಟ್ ಹಿಡಿದುಕೊಂಡು ನನ್ನ ಹೃದಯ ಆರೋಗ್ಯಪೂರ್ಣವಾಗಿದೆ ಎಂದು ಊರಿಡೀ ಹೇಳಿಕೊಂಡು ಉಡಾಫೆಯಿಂದ ವರ್ತಿಸುವುದು ಮೂರ್ಖತನದ ಪರಮಾವಧಿ.

2. ಸಾಮಾನ್ಯವಾಗಿ ಹೃದಯದ ಲಯದ ಬಗ್ಗೆ ಇಸಿಜಿಯಲ್ಲಿ ಹೆಚ್ಚಿನ ಮಾಹಿತಿ ದೊರಕುತ್ತದೆ. ಹೃದಯದ ಯಾವುದಾದರೂ ಭಾಗದಲ್ಲಿ ವಿದ್ಯುತ್ ತರಂಗಗಳ ಚಲನೆಗೆ ಅಡ್ಡಿಯಾದಲ್ಲಿ ಈ ಲಯವು ತಪ್ಪಿ ಹೋಗಿ ಇಸಿಜಿಯಲ್ಲಿ ಗೋಚರವಾಗುತ್ತದೆ. ಆದರೆ ಕೆಲವೊಮ್ಮೆ ಬೀಟಾ ಬ್ಲಾಕರ್ ಔಷಧಿ ಸೇವಿಸಿದಾಗ, ಕೊಕ್ಸೆನ್, ಅಂಫೆಟಮೈನ್ ಮತ್ತು ಶೀತ ಹಾಗೂ ನೆಗಡಿಗೆ ಸೇವಿಸಿದ ಔಷಧಿಗಳನ್ನು ಸೇವಿಸಿದಾಗಲೂ ಹೃದಯದ ಲಯದಲ್ಲಿ ವ್ಯತ್ಯಾಸವಾಗಿ ಇಸಿಜಿಯಲ್ಲಿ ಕಂಡುಬರುತ್ತದೆ. ಹಾಗಾಗಿ ಇಸಿಜಿಯಲ್ಲಿ ವ್ಯತ್ಯಾಸ ಇದ್ದಾಗಲೆಲ್ಲ ರೋಗ ಇರಲೇಬೇಕೆಂದಿಲ್ಲ.

3. ಇಸಿಜಿ ರಿಪೋರ್ಟಿನಲ್ಲಿ ಹೃದಯಕ್ಕೆ ಉಂಟಾದ ಆಘಾತದ ಬಗ್ಗೆ ಮಾತ್ರ ಅಲ್ಪ ಮಾಹಿತಿ ದೊರಕುತ್ತದೆ. ಆದರೆ ಎಷ್ಟು ಪ್ರಮಾಣದಲ್ಲಿ ಯಾವ ರೀತಿಯ ಆಘಾತವಾಗಿದೆ ಎಂಬುದನ್ನು ತಿಳಿಯಲು ಇಕೋಕರ‍್ಡಿಯೋಗ್ರಾಂ ಪರೀಕ್ಷೆ ಬೇಕಾಗಬಹುದು.

4. ಹೃದಯಾಘಾತ ಆದ ತಕ್ಷಣವೇ ಇಸಿಜಿ ನಾರ್ಮಲ್ ಇರಬಹುದು. ಸಂಶಯವಿದ್ದರೆ ಮಗದೊಮ್ಮೆ ಇಸಿಜಿ ಮಾಡಬೇಕು ಇಲ್ಲವಾದರೆ ಉನ್ನತ ಪರೀಕ್ಷೆಗೆ ರೋಗಿಯನ್ನು ಕರೆದೊಯ್ಯಬೇಕು. ನೆನಪಿರಲಿ, ನಾರ್ಮಲ್ ಇಸಿಜಿ ಎನ್ನುವುದು ಅಮರತ್ವದ ಪ್ರಮಾಣ ಪತ್ರ ಅಲ್ಲವೇ ಅಲ್ಲ.

5. ಥೈರಾಯ್ಡ್ ತೊಂದರೆ, ಅಧಿಕ ರಕ್ತದೊತ್ತಡ, ಶ್ವಾಸ ಕೋಶದ ಕಾಯಿಲೆ, ರಕ್ತದಲ್ಲಿ ಪೊಟಾಸಿಯಂ ಪ್ರಮಾಣದ ಏರಿಕೆ ಮತ್ತು ಇಳಿಕೆ ಹೀಗೆ ಹತ್ತು ಹಲವು ಕಾರಣಗಳಿಂದ ಇಸಿಜಿಯಲ್ಲಿ ಲಯ ಹಾಗೂ ಏರಿಳಿತದ ಬದಲಾವಣೆ ಕಾಣಿಸಬಹುದು. ಇಂಥ ಸಂದರ್ಭಗಳಲ್ಲಿ ರೋಗಿಯ ರೋಗದ ಚರಿತ್ರೆ, ದೇಹ ಪ್ರಕೃತಿ ಮತ್ತು ರೋಗದ ಚಿಹ್ನೆಗಳನ್ನು ಇಸಿಜಿ ಜೊತೆ ತಾಳೆ ಹಾಕಿ ವೈದ್ಯರು ರೋಗ ನಿರ್ಣಯ ಮಾಡುತ್ತಾರೆ.

ಒಟ್ಟಿನಲ್ಲಿ ನಾರ್ಮಲ್ ಇಸಿಜಿ ರಿಪೋರ್ಟ್ ಬಂದಲ್ಲಿ ನಿಮ್ಮ ಹೃದಯ ಸುರಕ್ಷಿತ ಎಂದು ಎಂದಿಗೂ ಬೀಗಬೇಡಿ ಮತ್ತು ಅಸಹಜ ಇಸಿಜಿ ರಿಪೋರ್ಟ್ ಬಂದಲ್ಲಿ ಹೃದ್ರೋಗ ಇದೆ ಎಂದೂ ಕೊರಗಬೇಡಿ. ನಿಮ್ಮ ವೈದ್ಯರು ಏನು ಹೇಳುತ್ತಾರೆ ಮತ್ತು ಏನು ಸಲಹೆ ನೀಡುತ್ತಾರೆ ಅದನ್ನು ಚಾಚು ತಪ್ಪದೆ ಪಾಲಿಸಬೇಕು.

ಕೊನೆಮಾತು:

ಇಸಿಜಿ ಎನ್ನುವುದು ಬಹಳ ಸರಳ, ಸುರಕ್ಷಿತ ಮತ್ತು ನೋವು ರಹಿತ ಪರೀಕ್ಷೆಯಾಗಿದ್ದು, ಹೃದಯದ ಕಾರ‍್ಯಕ್ಷಮತೆ, ಲಯ, ಬಡಿತ, ವೇಗ ಮತ್ತು ರೋಗಗಳ ಅಲ್ಪಸ್ವಲ್ಪ ಮಾಹಿತಿ ನೀಡುತ್ತದೆ. ಬರೀ ಇಸಿಜಿ ರಿಪೋರ್ಟ್ ತೆಗೆದುಕೊಂಡು ಹೋಗಿ ವೈದ್ಯರ ಬಳಿ ಹೋದಲ್ಲಿ ವೈದ್ಯರಿಗೆ ನಿಮ್ಮ ಹೃದಯದ ಜಾತಕದ ಬಗ್ಗೆ ಯಾವುದೇ ಮಾಹಿತಿ ಸಿಗಲಾರದು. ವೈದ್ಯರು ರೋಗಿಯ ರೋಗದ ಚರಿತ್ರೆ, ರೋಗದ ಲಕ್ಷಣಗಳ ಮತ್ತು ಇಸಿಜಿ ರಿಪೋರ್ಟ್ ಎಲ್ಲವನ್ನು ತಾಳೆ ಹಾಕಿ ರೋಗ ನಿರ್ಣಯ ಮಾಡುತ್ತಾರೆ.

ರೋಗಿಯನ್ನು ಪರೀಕ್ಷಿಸದೇ ಇಸಿಜಿ ನೋಡುವುದು ಅರ್ಥಹೀನ. ಒಂದು ಇಸಿಜಿಯಲ್ಲಿ ಮುಖ್ಯವಾಗಿ P ಅಲೆ , QRS ಸಂಕೀರ್ಣ ಮತ್ತು T ಅಲೆ ಇರುತ್ತದೆ. ಈ ಮೂರು ವಿಷಯಗಳು ಹೃತ್ಕರ್ಣ ಮತ್ತು ಹೃತ್ಕರ್ಷಗಳ ಬಗ್ಗೆ ಸಾಕಷ್ಟು ಮಾಹಿತಿ ನೀಡುತ್ತಾರೆ. F P ಮತ್ತು T ಅಲೆಗಳಲ್ಲಿನ ವ್ಯತ್ಯಾಸ, QRS ಸಂಕೀರ್ಣದಲ್ಲಿ ವ್ಯತ್ಯಾಸವನ್ನು ವೈದ್ಯರು ಅಧ್ಯಯನ ಮಾಡಿ ಹೃದಯದ ರೋಗದ ಬಗ್ಗೆ ಮಾಹಿತಿ ಪಡೆಯುತ್ತಾರೆ. ಒಟ್ಟಿನಲ್ಲಿ ಇಸಿಜಿ ಎನ್ನುವುದು ಒಂದು ಮಹತ್ವದ ಹೃದಯ ಪರೀಕ್ಷೆಯಾಗಿದ್ದು, ಇದಕ್ಕೆ ಅದರದೇ ಆದ ಇತಿ ಮಿತಿಗಳಿವೆ. ಇದನ್ನು ವೈದ್ಯರು ಸೂಕ್ತವಾಗಿ ತಿಳಿಸುತ್ತಾರೆ. ಯಾವಾಗ ಇಸಿಜಿ ಮಾಡಬೇಕು ಮತ್ತು ಇಸಿಜಿ ಹೊರತಾದ ಇತರ ಪರೀಕ್ಷೆ ಅಗತ್ಯವಿದೆ ಎಂಬುದನ್ನು ನಿಮ್ಮ ವೈದ್ಯರೇ ನಿರ್ಧರಿಸುತ್ತಾರೆ.

ಹೃದಯದ ಸ್ನಾಯುಗಳಿಗೆ ಆಘಾತವಾದಾಗ ರಕ್ತದಲ್ಲಿನ ಪೊಟಾಸಿಯಂ ಮತ್ತು ಕ್ಯಾಲ್ಸಿಯಂ ಏರಿಳಿಕೆ, ಜನ್ಮಜಾನ ಹೃದಯ ತೊಂದರೆ, ಹೃದಯ ದೊಡ್ಡದಾಗುವಿಕೆ, ಹೃದಯದ ಸುತ್ತ ನೀರು ತುಂಬುವಿಕೆ, ಹೃದಯದ ಉರಿಯೂತ, ಹೃದಯದ ರಕ್ತನಾಳಗಳಲ್ಲಿ ರಕ್ತ ಪೂರೈಕೆಯಲ್ಲಿ ವ್ಯತ್ಯಾಸ, ಹಿಂದೆ ಉಂಟಾದ ಹೃದಯಾಘಾತ ಹೀಗೆ ಹಲವಾರು ಕಾರಣಗಳಿಂದ ಇಸಿಜಿಯಲ್ಲಿ ವ್ಯತ್ಯಾಸ ಗೋಚರಿಸಬಹುದು. ಇಸಿಜಿ ರಿಪೋರ್ಟ್ ಗಳನ್ನು ನಿಮ್ಮ ವೈದ್ಯರು ಅಧ್ಯಯನ ಮಾಡಿ, ಯಾವ ಚಿಕಿತ್ಸೆ ನೀಡಬೇಕು ಅಥವಾ ಇನ್ನು ಹೆಚ್ಚಿನ ಪರೀಕ್ಷೆ ಅಗತ್ಯವಿದೆ ಎಂಬುದನ್ನು ನಿರ್ಧರಿಸುತ್ತಾರೆ. ನಿಮ್ಮ ವೈದ್ಯರ ಸಲಹೆ ಮತ್ತು ಮಾರ್ಗದರ್ಶನವನ್ನು ಚಾಚು ತಪ್ಪದೆ ಪಾಲಿಸುವುದರಲ್ಲಿಯೇ ರೋಗಿಗಳ ಹಿತ ಅಡಗಿದೆ.

✍ ಡಾ|| ಮುರಲೀ ಮೋಹನ್ ಚೂಂತಾರು

BDS, MDS,DNB,MOSRCSEd(U.K), FPFA, M.B.A

ಸುರಕ್ಷಾದಂತ ಚಿಕಿತ್ಸಾಲಯ

ಹೊಸಂಗಡಿ – 671 323

ಮೊ : 9845135787