ಕಾರಿರುಳು ನಭದೊಳಗೆ ಅಗಣಿತದ ತಾರೆಗಳು
ಬೀರುವವು ತನಿಬೆಳಕ ಮಿಂಚುಹುಳದಂತೆ |
ಸಾರುವವು ಲೋಕಕ್ಕೆ ಕಿರುಹಣತೆ ಮಿಗಿಲೆಂಬ
ನೇರ ಸಂದೇಶವನು - ಪುಟ್ಟಕಂದ || ೧ ||
ಕಾರಿರುಳು ಹಾದಿಯಲಿ ಸಿಲುಕಿರುವ ಪಥಿಕರಿಗೆ
ಹೋರುವುದು ಅನಿವಾರ್ಯ ಕರಿದು ತಮದೊಡನೆ |
ಯಾರೆಷ್ಟು ಜಪಿಸಿದರು ರವಿಯುದಿಸಿ ಬರದಿರಲು
ನೇರನಡೆ ಬಲುಕಷ್ಟ - ಪುಟ್ಟಕಂದ || ೨ ||
ಕಾರಿರುಳು ಪಸರಿಸಿದ ಗಾಢಾಂಧಕಾರದಲಿ
ಬೀರಿದರೆ ಕಿರುಹಣತೆ ತಮವ ಸರಿಸುವುದೆ |
ನಾರಿಯರು ಬೆಳಗುತಿಹ ಸೌಂದರ್ಯ ಕಾಲ್ದೀಪ
ಊರಮಂದಿಗೆ ಮುದವು - ಪುಟ್ಟಕಂದ || ೩ ||
ಕಾರಿರುಳು ಲೋಕದಲಿ ಗಾಢತಮವಾವರಿಸೆ
ಭೂರುಹದಿ ಬಾವಲಿಗಳಾಡ ತೊಡಗುವವು |
ಭೇರಿಗಳ ಸದ್ದಿಹುದು ಜಾತ್ರೆಗಳ ಗದ್ದಲದಿ
ಮಾರುತಿರೆ ಮಣಿಸರಕ - ಪುಟ್ಟಕಂದ || ೪ ||
ಕಾರಿರುಳು ಕಳ್ಳರಿಗೆ ಕಲ್ಯಾಣಕಾರಕವು
ಜೋರಾಗಿ ಕೊರೆಯಲಿಕೆ ಗೋಡೆ ಕನ್ನವನು |
ಕೇರಿ ಬೀದಿಯ ಜನರು ನಿದ್ರಿಸಿಹ ಸಮಯದಲಿ
ಭೂರಿಧನ ದೋಚಲಿಕೆ - ಪುಟ್ಟಕಂದ || ೫ ||
ಕಾರಿರುಳು ಜನಿಸಿದನು ಜಗದಗುರು ಭಗವಂತ
ಭಾರಿ ಮಳೆಸುರಿದ ಪ್ರವಾಹದಿರುಳಲ್ಲಿ |
ಊರುಕೇರಿಗಳೆಲ್ಲ ಸಿಂಗರದಿ ಶೋಭಿಸಲು
ನಾರಿಯರು ಹಾಡಿದರು - ಪುಟ್ಟಕಂದ || ೬ ||
ಕಾರಿರುಳು ಕಾಡಿನಲಿ ಕಾಡುಮೃಗಗಳ ಬೇಟೆ
ಭಾರಿ ಹೋರಾಟದಲಿ ನಡೆಯುವುದು ಸಹಜ |
ವಾರಣಾವತದರಣ್ಯದಲಿ ಲಾಕ್ಷಾಗೃಹವ
ಸೂರೆಗೊಂಡಿಹನಗ್ನಿ - ಪುಟ್ಟಕಂದ || ೭ ||
ಕಾರಿರುಳು ಘಟಿಸುವವು ಅಘಟಿತದ ಘಟನೆಗಳು
ಮಾರಿಬಿಳಿಯರು ತೊಲಗಿದರು ದೇಶತೊರೆದು |
ಯಾರೇನು ನೀಡಿದರು ಸಿದ್ಧಾರ್ಥನುಳಿದಿಹನೆ
ನೇರ ನಡೆದನು ಗಯೆಗೆ - ಪುಟ್ಟಕಂದ || ೮ ||
ಕಾರಿರುಳು ಕಳೆಯುವವು ದಿನ ಮಾಸ ವರ್ಷಗಳು
ವಾರಿಯಲಿ ತೇಲುತಿರೆ ಹುಣ್ಣಿಮೆಯ ಬಿಂಬ |
ನೂರಾರು ಸಂಭ್ರಮದ ಶುಭಗಳಿಗೆ ಸಾಕ್ಷಿಯಿದು
ಮಾರಸುಂದರ ರಾತ್ರಿ - ಪುಟ್ಟಕಂದ || ೯ ||
(ಗಜಪ್ರಾಸವಿರುವ ಛಂದೋಬದ್ಧ ಆಶು ಮುಕ್ತಕಗಳು)
ವಿ.ಬಿ.ಕುಳಮರ್ವ, ಕುಂಬ್ಳೆ ✍️
(ಉಪಯುಕ್ತ ನ್ಯೂಸ್)
ಉಪಯುಕ್ತ ನ್ಯೂಸ್’ ಫೇಸ್‌ಬುಕ್ ಪುಟ ಲೈಕ್ ಮಾಡಿ
