ಮುಕ್ತಕಗಳು: ಬೆಳಗೊಸಗೆ

ಬೆಳಗೊಸಗೆ ದೊರೆವಾಗ ಕಾರಿರುಳು ಕಳೆಯುವುದು  

ಒಳಗೊಳಗೆ ಸಂತಸವು ಮೂಡುವುದು ಮನದಿ | 

ಕೊಳದಲ್ಲಿ ತಾವರೆಯು ಅರಳುತಿರೆ ನಸುನಗುತ  

ಇಳೆಯಲ್ಲಿ ಪರಿತೋಷ - ಪುಟ್ಟಕಂದ ||  ೧ || 

ಥಳಥಳಿಪ ದಿನಕರನು ಆಗಸದಿ ಹೊಳೆಯುತಿರೆ  

ಬೆಳಗೊಸಗೆ ವರದೊರೆತ ಸಂತಸವೆ ಮಿಗಿಲು | 

ಕಳೆಯುವರು ಬಳಲಿಕೆಯ ವೀರಯೋಧರು ಧುರದ   

ಕೊಳುಗುಳದ ರಂಗದಲಿ - ಪುಟ್ಟಕಂದ || ೨ ||  

ಬೆಳಗೊಸಗೆ ಪಡೆಯುವನು ಬಾಹುಬಲಿ ಬೆಟ್ಟದಲಿ  

ಬೆಳುಗೊಳದ ಸಹಜ ಸೌಂದರ್ಯವೀಕ್ಷಿಸುತ |  

ತಿಳಿಗೊಳದ ಸಲಿಲದಲಿ ಪಡಿನೆರಳು ಮಾರ್ಪೊಳೆಯೆ  

ತಳಿರು ತೋರಣವಕ್ಕು - ಪುಟ್ಟಕಂದ || ೩ ||  

ಮೂಡಣದಿ ರವಿಯುದಿಸಿ ನೀಡುವನು ಬೆಳಗೊಸಗೆ  

ನಾಡಿನಲಿ ಸುಖಶಾಂತಿ ಸುಗ್ಗಿಯನು ಬಯಸಿ |   

ಕಾಡಿನಲಿ ಕಿರಣಗಳ ಕಾಂತಿಯನು ಬೀರುತಲಿ 

ತೀಡುವನು ವಸುಮತಿಯ - ಪುಟ್ಟಕಂದ || ೪ ||  

ಪ್ರಕೃತಿಯು ನೀಡುತಿಹ ಬೆಳಗೊಸಗೆ ವರವನ್ನು  

ಸುಕೃತವೆಂದು ತಿಳಿದವಗೆಲ್ಲು ಸೋಲಿರದು |  

ವಿಕೃತವಹ ಚಿಂತನೆಯ ಮಾಡಿದರೆ ಗತಿಯಿರದು  

ಕುಕೃತಿಗಳ ಮರೆತುಬಿಡು - ಪುಟ್ಟಕಂದ || ೫ || 

( ಬೆಳಗೊಸಗೆ ಎಂಬ ದತ್ತಪದವೊಳಗೊಂಡಂತೆ ರಚಿಸಿದ ಪಂಚ ಮುಕ್ತಕಗಳು) 

ವಿ.ಬಿ.ಕುಳಮರ್ವ , ಕುಂಬ್ಳೆ ✍️

ವಿಕಾಸ್ ಪಿಯು ಕಾಲೇಜ್ ಮಂಗಳೂರು#Vikaas #VikaasPUCollege #Mangalore #education #career pic.twitter.com/g5H01eE0YI

— Upayuktha News (@UpayukthaNews) August 25, 2021