ಕನ್ನಡದ ನೆಲ, ಕನ್ನಡಿಗರ ನೆಲ, ಕನ್ನಡವೇ ಆಡಳಿತ ಭಾಷೆ ಎಂಬ ಹೆಮ್ಮೆ ನಮ್ಮದು. ಆದರೆ ಇದೇ ನೆಲದಲ್ಲಿ ಕನ್ನಡಕ್ಕೆ ಆದ್ಯತೆ ಸಿಗುತ್ತಿಲ್ಲ, ಕನ್ನಡವನ್ನು ಉಲ್ಲೇಖಿಸಿದರೆ ಉದ್ಯೋಗಾವಕಾಶಕ್ಕೆ ಹಿನ್ನಡೆಯಾಗುತ್ತದೆ ಎಂಬ ಆತಂಕ ವ್ಯಕ್ತವಾಗುತ್ತಿರುವುದು ನಿಜಕ್ಕೂ ಕಳವಳಕಾರಿ. ರೆಸ್ಯೂಮ್‌ನಲ್ಲಿ ಕನ್ನಡ ಭಾಷೆಯನ್ನು ಉಲ್ಲೇಖಿಸಿದರೆ ಐಟಿ ಕಂಪನಿಗಳಲ್ಲಿ ಉದ್ಯೋಗ ಸಿಗುವುದಿಲ್ಲ; ತೆಲುಗು ಮತ್ತು ತಮಿಳು ಭಾಷೆಗಳಿಗೆ ಹೆಚ್ಚಿನ ಆದ್ಯತೆ ನೀಡಲಾಗುತ್ತದೆ ಎಂಬ ಯುವತಿಯೊಬ್ಬರ ಅಳಲು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿರುವುದು ಕನ್ನಡದ ಇಂದಿನ ಸ್ಥಿತಿಯ ಕುರಿತು ಗಂಭೀರ ಚರ್ಚೆಗೆ ನಾಂದಿ ಹಾಡಿದೆ. ಯುವತಿಯ ಅಳಲು ಕನ್ನಡಿಗರ ಭಾಷಾಭಿಮಾನ ಮತ್ತು ಉದ್ಯೋಗಾವಕಾಶಗಳ ಕುರಿತು ಆತ್ಮಾವಲೋಕನ ನಡೆಸಬೇಕಾದ ಅಗತ್ಯವನ್ನು ಎತ್ತಿಹಿಡಿದಿದೆ.
ಜಾಗತೀಕರಣದ ಇಂದಿನ ಯುಗದಲ್ಲಿ ಇಂಗ್ಲಿಷ್ ಸೇರಿದಂತೆ ವಿವಿಧ ಭಾಷೆಗಳ ಜ್ಞಾನ ಉದ್ಯೋಗಕ್ಕೆ ಪೂರಕವಾಗಿರುವುದು ಸಹಜ. ಬಹುಭಾಷಾ ಜ್ಞಾನವು ಉದ್ಯೋಗಾವಕಾಶಗಳನ್ನು ವಿಸ್ತರಿಸುತ್ತದೆ ಎಂಬುದರಲ್ಲಿ ಎರಡು ಮಾತಿಲ್ಲ. ಆದರೆ ಇತರ ಭಾಷೆಗಳನ್ನು ಕಲಿಯುವುದಕ್ಕಾಗಿ ಕನ್ನಡವನ್ನು ಕಡೆಗಣಿಸಬೇಕೆಂಬ ಮನೋಭಾವ ಸರಿಯಲ್ಲ. ಯಾವುದೇ ಭಾಷೆಯ ಬಗ್ಗೆ ದ್ವೇಷ ಬೆಳೆಸುವುದು ಕನ್ನಡಾಭಿಮಾನವಲ್ಲ; ನಮ್ಮ ಭಾಷೆಗೆ ಸಿಗಬೇಕಾದ ನ್ಯಾಯಯುತ ಸ್ಥಾನಮಾನವನ್ನು ಪ್ರತಿಪಾದಿಸುವುದೇ ನಿಜವಾದ ಭಾಷಾಭಿಮಾನ. ಕನ್ನಡದ ನೆಲದಲ್ಲಿ ಕಾರ್ಯನಿರ್ವಹಿಸುವ ಸಂಸ್ಥೆಗಳು ಸ್ಥಳೀಯ ಭಾಷೆ ಮತ್ತು ಸಂಸ್ಕೃತಿಗೆ ಗೌರವ ನೀಡುವ ಮನೋಭಾವ ಬೆಳೆಸಿಕೊಳ್ಳಬೇಕು.
ಉದ್ಯೋಗವೆಂಬುದು ಯುವಜನರ ಬದುಕಿನ ಪ್ರಮುಖ ಆಧಾರ. ಅರ್ಹತೆ, ಕೌಶಲ, ಅನುಭವ ಮತ್ತು ಕಾರ್ಯಕ್ಷಮತೆಯ ಆಧಾರದ ಮೇಲೆ ಉದ್ಯೋಗಾವಕಾಶಗಳು ದೊರೆಯಬೇಕು. ನಿರ್ದಿಷ್ಟ ಉದ್ಯೋಗಕ್ಕೆ ಭಾಷಾ ಕೌಶಲ ಅಗತ್ಯವಿದ್ದರೆ ಅದಕ್ಕೆ ತಕ್ಕ ಆದ್ಯತೆ ನೀಡಬಹುದು. ಆದರೆ ಕನ್ನಡದ ಜ್ಞಾನವನ್ನು ಹೊಂದಿರುವುದೇ ಉದ್ಯೋಗಕ್ಕೆ ಅಡ್ಡಿಯಾಗುತ್ತದೆ ಎಂಬ ಭಾವನೆ ಯುವಜನರಲ್ಲಿ ಮೂಡಿದರೆ ಅದು ಆತಂಕಕಾರಿ ಬೆಳವಣಿಗೆ. ಇಂತಹ ದೂರುಗಳು ಕೇಳಿಬಂದಾಗ ಅವುಗಳನ್ನು ನಿರ್ಲಕ್ಷಿಸುವ ಬದಲು, ಸಂಬಂಧಪಟ್ಟ ಸಂಸ್ಥೆಗಳು ಪಾರದರ್ಶಕ ನೇಮಕಾತಿ ನೀತಿಗಳ ಮೂಲಕ ಅನುಮಾನಗಳಿಗೆ ತೆರೆ ಎಳೆಯಬೇಕು. ಕನ್ನಡಿಗರಿಗೂ ಸಮಾನ ಅವಕಾಶಗಳು ದೊರೆಯುತ್ತಿವೆಯೇ ಎಂಬುದನ್ನು ಪರಿಶೀಲಿಸಬೇಕು.
ನವೆಂಬರ್‌ 1ರ ಕನ್ನಡ ರಾಜ್ಯೋತ್ಸವ ಸಮೀಪಿಸುತ್ತಿರುವ ಈ ಸಂದರ್ಭದಲ್ಲಿ ಕನ್ನಡದ ಹಿರಿಮೆ, ಗರಿಮೆ ಮತ್ತು ಇತಿಹಾಸವನ್ನು ಸ್ಮರಿಸುವುದರ ಜೊತೆಗೆ ಕನ್ನಡದ ಪ್ರಸ್ತುತ ಸ್ಥಿತಿಯ ಬಗ್ಗೆಯೂ ಚಿಂತಿಸಬೇಕಿದೆ. ರಾಜ್ಯೋತ್ಸವದಂದು ಕನ್ನಡದ ಧ್ವಜ ಹಾರಿಸಿ, ಕನ್ನಡದ ಘೋಷಣೆಗಳನ್ನು ಮೊಳಗಿಸಿ, ಭಾಷಣಗಳಲ್ಲಿ ಕನ್ನಡದ ಮಹತ್ವವನ್ನು ಸಾರಿದರೆ ಮಾತ್ರ ಭಾಷೆ ಉಳಿಯುವುದಿಲ್ಲ. ಶಿಕ್ಷಣ, ಉದ್ಯೋಗ, ಆಡಳಿತ, ವ್ಯಾಪಾರ ಮತ್ತು ತಂತ್ರಜ್ಞಾನ ಕ್ಷೇತ್ರಗಳಲ್ಲಿ ಕನ್ನಡಕ್ಕೆ ಗೌರವಯುತ ಸ್ಥಾನ ದೊರೆತಾಗ ಮಾತ್ರ ರಾಜ್ಯೋತ್ಸವದ ಆಚರಣೆ ಸಾರ್ಥಕವಾಗುತ್ತದೆ.
ಕನ್ನಡಿಗರು ಇತರ ಭಾಷೆಗಳನ್ನು ಕಲಿಯುವುದನ್ನು ವಿರೋಧಿಸಬಾರದು; ಬದಲಾಗಿ ಕನ್ನಡದ ಜೊತೆಗೆ ಇತರ ಭಾಷೆಗಳನ್ನೂ ಕಲಿತು ಜಾಗತಿಕ ಸ್ಪರ್ಧೆಗೆ ಸಿದ್ಧರಾಗಬೇಕು. ಅದೇ ವೇಳೆ, ಕನ್ನಡ ಭಾಷೆಯ ಜ್ಞಾನವನ್ನು ಉದ್ಯೋಗದ ದೃಷ್ಟಿಯಿಂದಲೂ ಒಂದು ಸಂಪನ್ಮೂಲವಾಗಿ ಪರಿಗಣಿಸುವ ವಾತಾವರಣ ನಿರ್ಮಾಣವಾಗಬೇಕು. ಕನ್ನಡದಲ್ಲಿ ಗ್ರಾಹಕರೊಂದಿಗೆ ಸಂವಹನ ನಡೆಸುವ ಅಗತ್ಯವಿರುವ ಸಂಸ್ಥೆಗಳು ಕನ್ನಡ ಬಲ್ಲ ಅಭ್ಯರ್ಥಿಗಳಿಗೆ ಸೂಕ್ತ ಆದ್ಯತೆ ನೀಡುವುದನ್ನೂ ಪರಿಗಣಿಸಬಹುದು. ಸರ್ಕಾರವೂ ಕನ್ನಡದ ಬಳಕೆಯನ್ನು ಉತ್ತೇಜಿಸುವುದರ ಜೊತೆಗೆ ಉದ್ಯೋಗ ಕ್ಷೇತ್ರದಲ್ಲಿ ಭಾಷಾ ಆಧಾರಿತ ತಾರತಮ್ಯದ ದೂರುಗಳು ಬಂದಾಗ ಸೂಕ್ತ ಪರಿಶೀಲನೆಗೆ ವ್ಯವಸ್ಥೆ ಕಲ್ಪಿಸಬೇಕು.
ಯುವತಿಯೊಬ್ಬರು ವಿಡಿಯೊ ಮೂಲಕ ಹಂಚಿಕೊಂಡ ಅಳಲು ಕೇವಲ ಒಬ್ಬರ ವೈಯಕ್ತಿಕ ನೋವಿನ ಕಥೆಯಾಗಿ ಉಳಿಯಬಾರದು. ಅದು ಕನ್ನಡದ ಅಸ್ಮಿತೆ, ಯುವಜನರ ಉದ್ಯೋಗದ ಭವಿಷ್ಯ ಮತ್ತು ಸ್ಥಳೀಯ ಭಾಷೆಗಳ ಗೌರವದ ಕುರಿತು ಚರ್ಚೆಗೆ ದಾರಿಯಾಗಬೇಕು. ಆರೋಪಗಳನ್ನು ಪರಿಶೀಲಿಸದೆ ತೀರ್ಮಾನಕ್ಕೆ ಬರುವುದು ಎಷ್ಟು ತಪ್ಪೋ, ಇಂತಹ ಅಳಲುಗಳನ್ನು ನಿರ್ಲಕ್ಷಿಸುವುದೂ ಅಷ್ಟೇ ತಪ್ಪು.
ಕನ್ನಡ ರಾಜ್ಯೋತ್ಸವವೆಂದರೆ ಕೇವಲ ಒಂದು ದಿನದ ಸಂಭ್ರಮವಲ್ಲ; ಕನ್ನಡಿಗರ ಬದುಕಿನಲ್ಲಿ ಕನ್ನಡಕ್ಕೆ ಗೌರವ, ಕನ್ನಡಿಗರ ಪ್ರತಿಭೆಗೆ ಅವಕಾಶ ಮತ್ತು ಕನ್ನಡದ ನೆಲದಲ್ಲಿ ಕನ್ನಡಿಗರಿಗೆ ಸಮಾನ ಹಕ್ಕು ದೊರೆಯುವಂತೆ ಮಾಡುವ ಸಂಕಲ್ಪ. ಕನ್ನಡವನ್ನು ಪ್ರೀತಿಸುವುದು ಎಂದರೆ ಇತರ ಭಾಷೆಗಳನ್ನು ದ್ವೇಷಿಸುವುದಲ್ಲ; ಎಲ್ಲ ಭಾಷೆಗಳನ್ನು ಗೌರವಿಸುತ್ತಲೇ ತಾಯ್ನುಡಿಗೆ ಸಲ್ಲಬೇಕಾದ ಸ್ಥಾನಮಾನವನ್ನು ಉಳಿಸುವುದು. ನವೆಂಬರ್‌ 1ರ ಸಂಭ್ರಮದ ನಡುವೆ ಈ ಪ್ರಶ್ನೆಗೆ ಉತ್ತರ ಕಂಡುಕೊಳ್ಳೋಣ: ಕನ್ನಡದ ನೆಲದಲ್ಲಿ ಕನ್ನಡಕ್ಕೆ ಗೌರವ ದೊರೆಯದಿದ್ದರೆ, ಕನ್ನಡ ರಾಜ್ಯೋತ್ಸವದ ಆಚರಣೆಗೆ ಪೂರ್ಣ ಅರ್ಥ ಸಿಗುವುದಾದರೂ ಹೇಗೆ?
- ಡಾ. ಜಯವೀರ ಎ. ಕೆ.
ಖೇಮಲಾಪುರ
