ನಲವತ್ತು ಕಲಾವಿದರ ಮನೋಜ್ಞ ರಂಗಪ್ರಯೋಗದಲ್ಲಿ ಕರ್ನಾಟಕದ ಸಾಂಸ್ಕೃತಿಕ ಪರಂಪರೆಯ ಅನಾವರಣ
.png)
ಮೈಸೂರು: ಕರ್ನಾಟಕದ ಶ್ರೀಮಂತ ಸಾಂಸ್ಕೃತಿಕ ಪರಂಪರೆ, ರಾಜವೈಭವ ಹಾಗೂ ಕಲಾಸಿರಿಯನ್ನು ಅನಾವರಣಗೊಳಿಸುವ ಉದ್ದೇಶದಿಂದ ಬೆಂಗಳೂರಿನ ಶ್ರೀ ವಿವೇಕಾನಂದ ಕಲಾಕೇಂದ್ರದ ವತಿಯಿಂದ, ಡಾ. ವಿ. ನಾಗರಾಜ್ ಅವರ ಪರಿಕಲ್ಪನೆ ಮತ್ತು ನಿರ್ದೇಶನದಲ್ಲಿ ರೂಪುಗೊಂಡ ‘ಭವ್ಯ ಪರಂಪರೆ’ ರಂಗರೂಪಕವು ಮೈಸೂರಿನ ಕರ್ನಾಟಕ ಕಲಾಮಂದಿರದಲ್ಲಿ ಪ್ರದರ್ಶನಗೊಂಡಿತು. ವಿಶ್ವವಿಖ್ಯಾತ ಮೈಸೂರು ದಸರೆಯ ಸಾಂಸ್ಕೃತಿಕ ಉಪಸಮಿತಿಯ ಆಶ್ರಯದಲ್ಲಿ ಆಯೋಜಿಸಲಾದ ಈ ರಂಗಪ್ರಯೋಗವು ವಿಜಯನಗರ ಸಾಮ್ರಾಜ್ಯದ ದಸರಾ ವೈಭವದಿಂದ ಮೈಸೂರು ಒಡೆಯರ ಕಾಲದ ದಸರೆಯವರೆಗಿನ ಐತಿಹಾಸಿಕ ಪಯಣವನ್ನು ಕಲಾತ್ಮಕವಾಗಿ ಕಟ್ಟಿಕೊಟ್ಟಿತು.
ಮಹಾನ್ ಸಾಮ್ರಾಟ ಶ್ರೀಕೃಷ್ಣದೇವರಾಯರ ಆಳ್ವಿಕೆಯಲ್ಲಿ ವಿಜಯನಗರ ಸಾಮ್ರಾಜ್ಯದಲ್ಲಿ ವಿಜೃಂಭಿಸುತ್ತಿದ್ದ ದಸರಾ ಮಹೋತ್ಸವದ ಭವ್ಯತೆ, ರಾಜಪರಂಪರೆ ಹಾಗೂ ಸಾಂಸ್ಕೃತಿಕ ಮಹತ್ವವನ್ನು ರಂಗರೂಪಕವು ಪರಿಣಾಮಕಾರಿಯಾಗಿ ಬಿಂಬಿಸಿತು. ವಿಜಯನಗರ ಸಾಮ್ರಾಜ್ಯದ ಪತನದ ನಂತರವೂ ಅದರ ಅನೇಕ ಸಾಂಸ್ಕೃತಿಕ ಪರಂಪರೆಗಳು ಮೈಸೂರು ಒಡೆಯರ ಆಳ್ವಿಕೆಯಲ್ಲಿ ಮುಂದುವರಿದು ಹೊಸ ವೈಭವವನ್ನು ಪಡೆದುಕೊಂಡ ಬಗೆಯನ್ನು ದೃಶ್ಯಗಳ ಮೂಲಕ ಅನಾವರಣಗೊಳಿಸಲಾಯಿತು.
ವಿಜಯನಗರದ ಅರಸರ ಕಾಲದ ದಸರೆಯ ವೈಭವ, ರಾಜಸತ್ತೆಯ ಪ್ರತಿಷ್ಠೆ, ಕಲೆಗಳಿಗೆ ದೊರೆತ ಪ್ರೋತ್ಸಾಹ ಹಾಗೂ ಮೈಸೂರು ಸಂಸ್ಥಾನದ ಅರಸರ ಕಾಲದಲ್ಲಿ ದಸರಾ ಉತ್ಸವವು ಕರ್ನಾಟಕದ ಹೆಮ್ಮೆಯ ಸಾಂಸ್ಕೃತಿಕ ಗುರುತಾಗಿ ರೂಪುಗೊಂಡ ಇತಿಹಾಸವನ್ನು ಕಲಾವಿದರು ರಂಗದ ಮೇಲೆ ಜೀವಂತಗೊಳಿಸಿದರು. ಇಂದಿಗೂ ಮೈಸೂರು ದಸರಾ ತನ್ನ ರಾಜವೈಭವ, ಸಾಂಪ್ರದಾಯಿಕ ಆಚರಣೆಗಳು ಮತ್ತು ಸಾಂಸ್ಕೃತಿಕ ಶ್ರೀಮಂತಿಕೆಯಿಂದ ವಿಶ್ವದ ಗಮನ ಸೆಳೆಯುತ್ತಿರುವುದು ಈ ಪರಂಪರೆಯ ನಿರಂತರತೆಗೆ ಸಾಕ್ಷಿಯಾಗಿದೆ.
ನಲವತ್ತು ಕಲಾವಿದರ ಸಮನ್ವಯದಲ್ಲಿ ಮೂಡಿಬಂದ ಈ ರಂಗಪ್ರಯೋಗಕ್ಕೆ ಡಾ. ಶ್ವೇತಾ ಅವರ ನೃತ್ಯ ಸಂಯೋಜನೆ ವಿಶೇಷ ಮೆರುಗು ನೀಡಿತು. ಸಂಗೀತ, ನೃತ್ಯ, ಅಭಿನಯ, ಆಕರ್ಷಕ ವೇಷಭೂಷಣ ಹಾಗೂ ಪರಿಣಾಮಕಾರಿ ರಂಗಸಜ್ಜನೆಯ ಸಮ್ಮಿಲನವು ಪ್ರೇಕ್ಷಕರ ಮನಸೂರೆಗೊಂಡಿತು. ಶ್ರೀಕೃಷ್ಣದೇವರಾಯರ ಪಾತ್ರದಲ್ಲಿ ದೈವಿಕ್ ಹಾಗೂ ನಾಲ್ವಡಿ ಕೃಷ್ಣರಾಜ ಒಡೆಯರ್ ಪಾತ್ರದಲ್ಲಿ ಧೀರಜ್ ಗಮನ ಸೆಳೆದರು. ಇತರ ಕಲಾವಿದರ ಮನೋಜ್ಞ ಅಭಿನಯ, ಭಾವಪೂರ್ಣ ಅಭಿವ್ಯಕ್ತಿ ಮತ್ತು ಲಯಬದ್ಧ ನೃತ್ಯಗಳು ರಾಜಕಾಲದ ವೈಭವವನ್ನು ಕಣ್ಣಮುಂದೆ ತಂದವು. ಸಂದರ್ಭೋಚಿತ ಸಂಗೀತವು ಪ್ರತಿ ದೃಶ್ಯದ ಭಾವತೀವ್ರತೆಯನ್ನು ಹೆಚ್ಚಿಸಿ, ಪ್ರೇಕ್ಷಕರನ್ನು ಇತಿಹಾಸದ ಪುಟಗಳೊಳಗೆ ಕರೆದೊಯ್ದ ಅನುಭವ ನೀಡಿತು.
ಮೈಸೂರು ಅರಸರು ಸಂಸ್ಥಾನದ ಸರ್ವತೋಮುಖ ಅಭಿವೃದ್ಧಿಗಾಗಿ ಕೈಗೊಂಡ ಮಹತ್ವದ ಕಾರ್ಯಗಳು, ಆಡಳಿತದ ದೂರದೃಷ್ಟಿ ಹಾಗೂ ಪ್ರಗತಿಪರ ಚಿಂತನೆಗಳನ್ನೂ ಈ ರಂಗರೂಪಕ ಪರಿಚಯಿಸಿತು. ಮನರಂಜನೆಯ ಜೊತೆಗೆ ಇತಿಹಾಸದ ಅರಿವು ಮತ್ತು ಪರಂಪರೆಯ ಬಗ್ಗೆ ಅಭಿಮಾನ ಮೂಡಿಸಿದ ‘ಭವ್ಯ ಪರಂಪರೆ’ ಕರ್ನಾಟಕದ ಸಾಂಸ್ಕೃತಿಕ ಹೆಮ್ಮೆಯನ್ನು ಮುಂದಿನ ಪೀಳಿಗೆಗೆ ಪರಿಚಯಿಸುವ ಅರ್ಥಪೂರ್ಣ ಪ್ರಯತ್ನವಾಗಿ ಮೂಡಿಬಂದಿತು.
.png)
