ಅಜ್ಮಾನ್: QS ವರ್ಲ್ಡ್ ಯೂನಿವರ್ಸಿಟಿ ರ್ಯಾಂಕಿಂಗ್ಸ್: ಅರಬ್ ರೀಜನ್ 2027ರಲ್ಲಿ ಯುಎಇಯ ಗಲ್ಫ್ ಮೆಡಿಕಲ್ ಯೂನಿವರ್ಸಿಟಿ (GMU) ಒಟ್ಟಾರೆ 125ನೇ ಸ್ಥಾನ ಪಡೆದುಕೊಂಡಿದೆ. ಅಂತರರಾಷ್ಟ್ರೀಯ ವಿದ್ಯಾರ್ಥಿಗಳ ಪ್ರಮಾಣದಲ್ಲಿ ಅರಬ್ ರಾಷ್ಟ್ರಗಳಲ್ಲೇ ಮೊದಲ ಸ್ಥಾನ ಗಳಿಸಿದೆ. ಅಕ್ಟೋಬರ್ 19ರಂದು ಪ್ರಕಟವಾದ ಈ ರ‍್ಯಾಂಕಿಂಗ್ ವಿಶ್ವವಿದ್ಯಾಲಯದ ಜಾಗತಿಕ ಶೈಕ್ಷಣಿಕ ಸಾಧನೆಗೆ ಮತ್ತೊಂದು ಹೆಗ್ಗಳಿಕೆಯಾಗಿದೆ.
ಟೈಮ್ಸ್ ಹೈಯರ್ ಎಜುಕೇಶನ್ (THE) ವರ್ಲ್ಡ್ ಯೂನಿವರ್ಸಿಟಿ ರ್ಯಾಂಕಿಂಗ್ಸ್ 2027ರಲ್ಲಿಯೂ GMU 1,001–1,200ರ ವಿಭಾಗದಲ್ಲಿ ಸ್ಥಾನ ಪಡೆದಿದೆ. ಈ ಮೌಲ್ಯಮಾಪನದಲ್ಲಿ ಯುಎಇಯ ಏಕೈಕ ವಿಶೇಷ ವೈದ್ಯಕೀಯ ಮತ್ತು ಆರೋಗ್ಯ ವಿಜ್ಞಾನ ಸಂಸ್ಥೆಯಾಗಿ ಗುರುತಿಸಿಕೊಂಡಿದೆ. ಅಂತರರಾಷ್ಟ್ರೀಯ ದೃಷ್ಟಿಕೋನ ವಿಭಾಗದಲ್ಲಿ 100ಕ್ಕೆ 99.4 ಅಂಕ ಗಳಿಸಿದ್ದು, ಮೌಲ್ಯಮಾಪನಗೊಂಡ 2,297 ಸಂಸ್ಥೆಗಳ ಪೈಕಿ ಜಾಗತಿಕವಾಗಿ ಅತ್ಯಧಿಕ ಅಂಕ ಪಡೆದಿದೆ.
1998ರಲ್ಲಿ ಸ್ಥಾಪನೆಯಾದ ಗಲ್ಫ್ ಮೆಡಿಕಲ್ ಯೂನಿವರ್ಸಿಟಿ, ಥುಂಬೇ ಗ್ರೂಪ್‌ನ ಪ್ರಮುಖ ಶೈಕ್ಷಣಿಕ ಸಂಸ್ಥೆಯಾಗಿದೆ. ಇಲ್ಲಿ ವೈದ್ಯಕೀಯ, ದಂತ ವೈದ್ಯಕೀಯ, ಫಾರ್ಮಸಿ, ನರ್ಸಿಂಗ್, ಆರೋಗ್ಯ ವಿಜ್ಞಾನ, ಆರೋಗ್ಯ ಸೇವಾ ನಿರ್ವಹಣೆ ಮತ್ತು ಆರೋಗ್ಯ ಕ್ಷೇತ್ರದಲ್ಲಿ ಕೃತಕ ಬುದ್ಧಿಮತ್ತೆ ಸೇರಿದಂತೆ 50ಕ್ಕೂ ಹೆಚ್ಚು ಶೈಕ್ಷಣಿಕ ಹಾಗೂ ತರಬೇತಿ ಕಾರ್ಯಕ್ರಮಗಳನ್ನು ನೀಡಲಾಗುತ್ತಿದೆ. ಮೂಲಭೂತ ಶಿಕ್ಷಣದಿಂದ ಡಾಕ್ಟರೇಟ್ ಪದವಿವರೆಗಿನ ವಿವಿಧ ಕೋರ್ಸ್‌ಗಳು ಲಭ್ಯವಿವೆ.
ವಿಶ್ವವಿದ್ಯಾಲಯದಲ್ಲಿ 116ಕ್ಕೂ ಹೆಚ್ಚು ದೇಶಗಳ ವಿದ್ಯಾರ್ಥಿಗಳು ವ್ಯಾಸಂಗ ಮಾಡುತ್ತಿದ್ದು, 56 ದೇಶಗಳ ಬೋಧಕ ಸಿಬ್ಬಂದಿ ಕಾರ್ಯನಿರ್ವಹಿಸುತ್ತಿದ್ದಾರೆ. 5,000ಕ್ಕೂ ಹೆಚ್ಚು ಪದವೀಧರರನ್ನು ಒಳಗೊಂಡ ಅಂತರರಾಷ್ಟ್ರೀಯ ಹಳೆಯ ವಿದ್ಯಾರ್ಥಿಗಳ ಜಾಲವನ್ನೂ ಸಂಸ್ಥೆ ಹೊಂದಿದೆ. ಥುಂಬೇ ಹೆಲ್ತ್‌ಕೇರ್ ನೆಟ್‌ವರ್ಕ್ ಮತ್ತು ಥುಂಬೇ ಯೂನಿವರ್ಸಿಟಿ ಆಸ್ಪತ್ರೆಯ ಮೂಲಕ ವಿದ್ಯಾರ್ಥಿಗಳಿಗೆ ಪ್ರಾಯೋಗಿಕ ವೈದ್ಯಕೀಯ ತರಬೇತಿ ನೀಡಲಾಗುತ್ತದೆ. ಇದರಿಂದ ವಿದ್ಯಾರ್ಥಿಗಳು ನೈಜ ವೈದ್ಯಕೀಯ ಪರಿಸರದಲ್ಲಿ ಅನುಭವ ಪಡೆಯಲು ಹಾಗೂ ವಿವಿಧ ದೇಶಗಳ ಆರೋಗ್ಯ ವೃತ್ತಿಪರರೊಂದಿಗೆ ಕೆಲಸ ಮಾಡಲು ಅವಕಾಶ ದೊರೆಯುತ್ತದೆ.
THE ಅರಬ್ ಯೂನಿವರ್ಸಿಟಿ ರ್ಯಾಂಕಿಂಗ್ಸ್ 2026ರಲ್ಲಿ GMU 268 ವಿಶ್ವವಿದ್ಯಾಲಯಗಳ ಪೈಕಿ 101–125ನೇ ಸ್ಥಾನಗಳ ವಿಭಾಗದಲ್ಲಿ ಸ್ಥಾನ ಪಡೆದಿದೆ. THE ಇಂಪ್ಯಾಕ್ಟ್ ರ್ಯಾಂಕಿಂಗ್ಸ್ 2026ರಲ್ಲಿ ಜಾಗತಿಕವಾಗಿ 1,646 ಸಂಸ್ಥೆಗಳ ಪೈಕಿ 301–400ನೇ ಸ್ಥಾನಗಳ ವಿಭಾಗದಲ್ಲಿದೆ. ವಿಶ್ವಸಂಸ್ಥೆಯ ಸುಸ್ಥಿರ ಅಭಿವೃದ್ಧಿ ಗುರಿಗಳಿಗೆ ಸಂಬಂಧಿಸಿದ ಮೌಲ್ಯಮಾಪನದಲ್ಲಿ ಅಸಮಾನತೆ ಕಡಿತಗೊಳಿಸುವ ವಿಭಾಗದಲ್ಲಿ 23ನೇ ಸ್ಥಾನ, ಗುಣಮಟ್ಟದ ಶಿಕ್ಷಣದಲ್ಲಿ 60ನೇ ಸ್ಥಾನ ಮತ್ತು ಉತ್ತಮ ಆರೋಗ್ಯ ಹಾಗೂ ಕ್ಷೇಮ ವಿಭಾಗದಲ್ಲಿ 64ನೇ ಸ್ಥಾನ ಪಡೆದಿದೆ. QS ವಿಷಯವಾರು ರ್ಯಾಂಕಿಂಗ್ಸ್ 2026ರಲ್ಲಿ ಫಾರ್ಮಸಿ ಮತ್ತು ಫಾರ್ಮಕಾಲಜಿ ವಿಭಾಗದಲ್ಲಿ ವಿಶ್ವವಿದ್ಯಾಲಯದ ಕಾಲೇಜ್ ಆಫ್ ಫಾರ್ಮಸಿ 351–400ನೇ ಸ್ಥಾನಗಳ ಶ್ರೇಣಿಯಲ್ಲಿ ಗುರುತಿಸಿಕೊಂಡಿದೆ.
ಶೈಕ್ಷಣಿಕ ಗುಣಮಟ್ಟದ ದೃಷ್ಟಿಯಿಂದಲೂ ವಿಶ್ವವಿದ್ಯಾಲಯ ಹಲವು ಮಾನ್ಯತೆಗಳನ್ನು ಪಡೆದಿದೆ. 2026ರ ಜೂನ್‌ನಲ್ಲಿ ಬ್ರಿಟನ್‌ನ ಕ್ವಾಲಿಟಿ ಅಶ್ಯೂರನ್ಸ್ ಏಜೆನ್ಸಿ ಫಾರ್ ಹೈಯರ್ ಎಜುಕೇಶನ್‌ನಿಂದ ಸಾಂಸ್ಥಿಕ ಮಾನ್ಯತೆ ದೊರೆತಿದೆ. ಇದರೊಂದಿಗೆ ಯುಎಇಯ ಕಮಿಷನ್ ಫಾರ್ ಅಕಾಡೆಮಿಕ್ ಅಕ್ರೆಡಿಟೇಶನ್‌ನ ರಾಷ್ಟ್ರೀಯ ಮಾನ್ಯತೆಯನ್ನೂ ಹೊಂದಿದೆ. ವಿಶ್ವ ವೈದ್ಯಕೀಯ ಶಿಕ್ಷಣ ಒಕ್ಕೂಟ, ಅಮೆರಿಕದ ಅಕ್ರೆಡಿಟೇಶನ್ ಕೌನ್ಸಿಲ್ ಫಾರ್ ಫಾರ್ಮಸಿ ಎಜುಕೇಶನ್ ಸೇರಿದಂತೆ ಹಲವು ಅಂತರರಾಷ್ಟ್ರೀಯ ಸಂಸ್ಥೆಗಳ ಮಾನ್ಯತೆ ಅಥವಾ ಅನುಮೋದನೆಗಳನ್ನು ಪಡೆದಿದೆ. 2026ರಲ್ಲಿ ಇಂಟರ್‌ನ್ಯಾಷನಲ್ ಇನ್‌ಕ್ಲೂಷನ್ ಅವಾರ್ಡ್ ಮತ್ತು ಡೈವರ್ಸಿಟಿ ಚಾಂಪಿಯನ್ ಅವಾರ್ಡ್‌ಗಳನ್ನೂ ಗಳಿಸಿದೆ.
ಗಲ್ಫ್ ಮೆಡಿಕಲ್ ಯೂನಿವರ್ಸಿಟಿಯ 2027ರ ವಸಂತ ಋತುವಿನ ಶೈಕ್ಷಣಿಕ ಅವಧಿಗೆ ಪ್ರವೇಶಾತಿ ಆರಂಭವಾಗಿದೆ. ವಿವಿಧ ಕೋರ್ಸ್‌ಗಳು, ಪ್ರವೇಶ ಅರ್ಹತೆಗಳು ಮತ್ತು ವಿದ್ಯಾರ್ಥಿವೇತನಗಳ ಕುರಿತು ಹೆಚ್ಚಿನ ಮಾಹಿತಿಯನ್ನು ವಿಶ್ವವಿದ್ಯಾಲಯದ ಅಧಿಕೃತ ವೆಬ್‌ಸೈಟ್ www.gmu.ac.ae ಮೂಲಕ ಪಡೆಯಬಹುದು.
