ಸುರತ್ಕಲ್: ಮಣಿ ಕೃಷ್ಣಸ್ವಾಮಿ ಅಕಾಡೆಮಿ (ರಿ.) ಹಾಗೂ ನಾಗರಿಕ ಸಲಹಾ ಸಮಿತಿ (ರಿ.) ಸುರತ್ಕಲ್ ಇವುಗಳ ಜಂಟಿ ಆಶ್ರಯದಲ್ಲಿ, ಕರ್ನಾಟಕ ಸರ್ಕಾರದ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಸಹಕಾರದೊಂದಿಗೆ ಶ್ರೀ ಕೃಷ್ಣ ಜನ್ಮಾಷ್ಟಮಿಯ ಅಂಗವಾಗಿ 'ಶ್ರೀ ಕೃಷ್ಣಾಮೃತ ಸಾರಂ' ವಿಶೇಷ ಕಾರ್ಯಕ್ರಮವು ನಗರದ ಅನುಪಲ್ಲವಿಯ ಶ್ರೀ ವಿಶ್ವೇಶ ತೀರ್ಥ ಸಭಾಂಗಣದಲ್ಲಿ ಇತ್ತೀಚೆಗೆ ಯಶಸ್ವಿಯಾಗಿ ಜರುಗಿತು. ಕಾರ್ಯಕ್ರಮದಲ್ಲಿ ನಾಮ ಸಂಕೀರ್ತನ, ದೇವರ ನಾಮ ಹಾಗೂ ಯಕ್ಷಗಾನ ಹಾಡುಗಳ ಪ್ರಸ್ತುತಿ ಪ್ರೇಕ್ಷಕರ ಮನಸೆಳೆಯಿತು.
ಕಾರ್ಯಕ್ರಮವನ್ನುದ್ದೇಶಿಸಿ ಮಾತನಾಡಿದ ಹಿರಿಯ ಕಲಾವಿದ ಪಿ. ನಿತ್ಯಾನಂದ ರಾವ್, "ಶ್ರೀ ಕೃಷ್ಣನ ಕಥೆಯು ಅತ್ಯಂತ ಅನನ್ಯವಾದದ್ದು. ಮುದ್ದು ಮಕ್ಕಳಿಂದ ಹಿಡಿದು ಹಿರಿಯ ಆಧ್ಯಾತ್ಮಿಕ ಚಿಂತಕರವರೆಗೆ ಶ್ರೀ ಕೃಷ್ಣನು ಸರ್ವರಿಗೂ ಪ್ರಿಯನಾಗಿದ್ದಾನೆ" ಎಂದು ಅಭಿಪ್ರಾಯಪಟ್ಟರು.
ಮತ್ತೋರ್ವ ಅತಿಥಿ ಕೃಷ್ಣ ಮೂರ್ತಿ ಮಾತನಾಡಿ, "ಕನ್ನಡ ಸಾಹಿತ್ಯದಲ್ಲಿ ಶ್ರೀ ಕೃಷ್ಣನನ್ನು ವಿಭಿನ್ನ ನೆಲೆಗಳಲ್ಲಿ ಚಿತ್ರಿಸಲಾಗಿದೆ. 'ಕೃಷ್ಣ ಶಕ್ತಿ' ಎಂಬುದು ಅಂಧಕಾರವನ್ನು ಹಿಮ್ಮೆಟ್ಟಿಸಿ, ಜ್ಞಾನ ಮತ್ತು ಭಕ್ತಿಯ ಬೆಳಕನ್ನು ಚೆಲ್ಲುವ ದಿವ್ಯ ಪ್ರತೀಕವಾಗಿದೆ" ಎಂದರು.
ಮನಸೆಳೆದ ಪ್ರಸ್ತುತಿ:
ಶ್ರೀ ಕೃಷ್ಣನ ಬಾಲ್ಯ ಲೀಲೆಯಿಂದ ಹಿಡಿದು ಅವತಾರ ಸಮಾಪ್ತಿಯವರೆಗಿನ ವೈವಿಧ್ಯಮಯ ಕಥಾನಕವನ್ನು ಕೀರ್ತನೆ, ಯಕ್ಷಗಾನ ಹಾಡುಗಳು ಮತ್ತು ನಾಮ ಸಂಕೀರ್ತನದ ಮೂಲಕ ಪಿ. ನಿತ್ಯಾನಂದ ರಾವ್ ಅವರು ಪ್ರಸ್ತುತಪಡಿಸಿದರು. ಇವರಿಗೆ ಸಹಗಾಯನದಲ್ಲಿ ಶರಣ್ಯ ಕೆ. ಎಸ್., ಚೈತ್ರಾ ಶ್ರೇಯಸ್ ರಾವ್, ಅಕ್ಷಯ ಪಡುಬಿದ್ರೆ ಹಾಗೂ ಕೃಷ್ಣ ಕುಮಾರಿ ದನಿಯಾದರು.
ವಾದ್ಯವೃಂದದಲ್ಲಿ ಹಾರ್ಮೋನಿಯಂನಲ್ಲಿ ಅಭಿಲಾಷ್, ಮೃದಂಗದಲ್ಲಿ ಸಂದೀಪ್ ರಾಮಮೂರ್ತಿ ಹಾಗೂ ಮದ್ದಳೆಯಲ್ಲಿ ಅಚಿಂತ್ಯ ಕೃಷ್ಣ ಸಹಕರಿಸಿದರು.
ಕಾರ್ಯಕ್ರಮದಲ್ಲಿ ಕಲಾವಿದ ಗಿರೀಶ್ ನಾವಡ ಹಾಗೂ ಮಣಿ ಕೃಷ್ಣಸ್ವಾಮಿ ಅಕಾಡೆಮಿಯ ವಿಭು ರಾವ್ ಉಪಸ್ಥಿತರಿದ್ದು, ಕಾರ್ಯಕ್ರಮದ ಶೋಭೆಯನ್ನು ಹೆಚ್ಚಿಸಿದರು. ನೂರಾರು ಸಂಗೀತ ಮತ್ತು ಯಕ್ಷಗಾನ ಪ್ರೇಮಿಗಳು ಈ ಕಾರ್ಯಕ್ರಮದ ರಸದೌತಣವನ್ನು ಸವಿದರು.
ನಿರಂತರ ಅಪ್ಡೇಟ್ಗಳಿಗಾಗಿ ಉಪಯುಕ್ತ ನ್ಯೂಸ್ ಟೆಲಿಗ್ರಾಂ ಚಾನೆಲ್ಗೆ ಜಾಯಿನ್ ಆಗಿ
ಉಪಯುಕ್ತ ನ್ಯೂಸ್’ ಫೇಸ್ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್ ವಾಟ್ಸಪ್ ಗ್ರೂಪ್ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ
