ಸುರತ್ಕಲ್: ಇಲ್ಲಿನ ರಾಷ್ಟ್ರೀಯ ತಾಂತ್ರಿಕ ಸಂಸ್ಥೆ ಕರ್ನಾಟಕ (ಎನ್ಐಟಿಕೆ), ತನ್ನ 2026ನೇ ಬ್ಯಾಚ್ ಬಿ.ಟೆಕ್ ವಿದ್ಯಾರ್ಥಿಗಳಿಗಾಗಿ ‘ಬೋಲ್ಡ್ ಅಂಡ್ ಬ್ಯಾಲೆನ್ಸ್ಡ್’ ಹೆಸರಿನ ಹೊಸ ಇಂಜಿನಿಯರಿಂಗ್ ಪಠ್ಯಕ್ರಮವನ್ನು ಜಾರಿಗೆ ತಂದಿದೆ.
ಹೊಸ ಪಠ್ಯಕ್ರಮದಲ್ಲಿ ಒಟ್ಟು ಶೈಕ್ಷಣಿಕ ಕ್ರೆಡಿಟ್ಗಳನ್ನು ಕಡಿಮೆ ಮಾಡಲಾಗಿದ್ದು, ಆಸಕ್ತ ವಿದ್ಯಾರ್ಥಿಗಳಿಗೆ ತಮ್ಮ ಮುಖ್ಯ ವಿಭಾಗದಲ್ಲಿ ಗೌರವ ಪದವಿ (Honours) ಅಥವಾ ಬೇರೆ ವಿಭಾಗಗಳಲ್ಲಿ ಉಪ ಪದವಿ (Minor) ಪಡೆಯುವ ಅವಕಾಶ ನೀಡಲಾಗಿದೆ. ತರಗತಿಯ ಸಿದ್ಧಾಂತ ಪಾಠಗಳಿಗೆ ನೀಡುವ ಕ್ರೆಡಿಟ್ಗಳಿಗೆ ಸಮಾನವಾಗಿ ತರಗತಿಯ ಹೊರಗಿನ ಪ್ರಾಯೋಗಿಕ ಚಟುವಟಿಕೆಗಳಿಗೂ ಕ್ರೆಡಿಟ್ ನಿಗದಿಪಡಿಸಲಾಗಿದೆ. ಇದರಿಂದಾಗಿ ವಿದ್ಯಾರ್ಥಿಗಳು ತಮ್ಮ ಒಟ್ಟು ಸಮಯದ ಮೂರನೇ ಎರಡರಷ್ಟು (2/3) ಭಾಗವನ್ನು ಲ್ಯಾಬ್, ಲೈಫ್-ಸ್ಕಿಲ್ಸ್, ಉದ್ಯಮ ಇಂಟರ್ನ್ಶಿಪ್, ಸಂಶೋಧನೆ ಹಾಗೂ ನವೋದ್ಯಮ (Startup) ಯೋಜನೆಗಳಲ್ಲಿ ಕಳೆಯಲಿದ್ದಾರೆ.
ಕಳೆದ ಮೂರು ವರ್ಷಗಳಲ್ಲಿ ಉದ್ಯಮ ತಜ್ಞರು ಮತ್ತು ಹಳೆಯ ವಿದ್ಯಾರ್ಥಿಗಳ ಸಲಹೆಯಂತೆ ಈ ಪಠ್ಯಕ್ರಮ ರೂಪಿಸಲಾಗಿದ್ದು, ವಿದ್ಯಾರ್ಥಿಗಳಲ್ಲಿ ಸಿದ್ಧಾಂತ ಜ್ಞಾನ, ಪ್ರಾಯೋಗಿಕ ಕೌಶಲ್ಯ ಹಾಗೂ ಸಾಫ್ಟ್-ಸ್ಕಿಲ್ಸ್ಗಳ ಸಮತೋಲನ ಕಾಯ್ದುಕೊಳ್ಳಲು ನೆರವಾಗಲಿದೆ ಎಂದು ಅಕಾಡೆಮಿಕ್ ಡೀನ್ ಪ್ರೊ. ಅನ್ನಪ್ಪ ತಿಳಿಸಿದ್ದಾರೆ.
ದೈಹಿಕ, ಸಾಂಸ್ಕೃತಿಕ, ತಾಂತ್ರಿಕ ಮತ್ತು ವೃತ್ತಿಪರ ಎಂಬ ನಾಲ್ಕು ವಿಭಾಗಗಳಲ್ಲಿ ಲೈಫ್-ಸ್ಕಿಲ್ಸ್ ಚಟುವಟಿಕೆಗಳನ್ನು ವಿಂಗಡಿಸಲಾಗಿದ್ದು, ಪ್ರತಿಯೊಬ್ಬ ವಿದ್ಯಾರ್ಥಿಯೂ ವಾರಕ್ಕೆ ಕನಿಷ್ಠ ಎರಡು ಗಂಟೆಗಳ ಕಾಲ ಭಾಗವಹಿಸುವುದು ಕಡ್ಡಾಯವಾಗಿದೆ ಎಂದು ವಿದ್ಯಾರ್ಥಿ ಕ್ಷೇಮಪಾಲನಾ ಡೀನ್ ಪ್ರೊ. ಗೋವಿಂದ ರಾಜ ಮಂಡೇಲ ವಿವರಿಸಿದ್ದಾರೆ. 1100ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಈ ಚಟುವಟಿಕೆಗಳಲ್ಲಿ ತೊಡಗಿಸಿಕೊಂಡಿದ್ದಾರೆ ಎಂದು ಅಸೋಸಿಯೇಟ್ ಡೀನ್ಗಳಾದ ಡಾ. ನಾಗೇಂದ್ರಪ್ಪ ಎಚ್. ಮತ್ತು ಡಾ. ಗೀತಾ ವಿ. ಹೇಳಿದ್ದಾರೆ.
ವಿದ್ಯಾರ್ಥಿಗಳನ್ನು ಕೃತಕ ಬುದ್ಧಿಮತ್ತೆ (AI) ಯುಗಕ್ಕೆ ಸಿದ್ಧಗೊಳಿಸುವುದು ಹಾಗೂ ಮಾನವೀಯ ಮೌಲ್ಯಗಳೊಂದಿಗೆ ‘ವಿಕಸಿತ ಭಾರತ 2047’ರ ನಿರ್ಮಾಣಕ್ಕೆ ಅವರ ಕೊಡುಗೆ ಪಡೆಯುವುದು ಸಂಸ್ಥೆಯ ಮುಖ್ಯ ಗುರಿಯಾಗಿದೆ ಎಂದು ಸಂಸ್ಥೆಯ ನಿರ್ದೇಶಕ ಪ್ರೊ. ಬಿ. ರವಿ ತಿಳಿಸಿದ್ದಾರೆ.
