ದೇವರ ಪ್ರಾರ್ಥನೆ ಮತ್ತು ನಿಸರ್ಗ ಚಿತ್ರಣ
ಕವಿತಾ ಸಂಕಲನದ ಆರಂಭದ 'ದೇವರ ಪ್ರಾರ್ಥನೆ' ಕವಿತೆಯಲ್ಲಿ ಕವಿಯು ಭಗವಂತನ ಕೊಡುಗೆಗಳನ್ನು ಸ್ಮರಿಸುತ್ತಾ, 'ನಿನ್ನನೆಂದು ನೆನೆಯಲು, ನೀನು ನಮ್ಮಲ್ಲಿ ನೆಲೆಸಲು' ಎಂದು ವಿನಮ್ರವಾಗಿ ಪ್ರಾರ್ಥಿಸುತ್ತಾರೆ.
ಪುಟಾಣಿ ಮಕ್ಕಳಿಗೆ ಇಷ್ಟವಾಗುವ ಪಕ್ಷಿ-ಪ್ರಾಣಿಗಳ ಕುರಿತು ವಿವಿಧ ಬಗೆಯ ನಾದಮಯ ಹಾಡುಗಳು ಇಲ್ಲಿವೆ:
ಗುಬ್ಬಿ ಹಾಗೂ ಇಲಿ: 'ಗುಬ್ಬಿ' ಹಾಡು ಗುಬ್ಬಚ್ಚಿಯ ಚೇಷ್ಟೆ ಹಾಗೂ ಕ್ರಿಯೆಗಳನ್ನು ಮೂರು ಚರಣಗಳಲ್ಲಿ ಸುಂದರವಾಗಿ ಚಿತ್ರಿಸಿದರೆ, 'ಇಲಿ' ಗೀತೆಯು ಇಲಿಯ ಚಟುವಟಿಕೆಗಳನ್ನು ವರ್ಣಿಸುತ್ತದೆ. ಈ ಹಾಡುಗಳಲ್ಲಿ ಆದಿಪ್ರಾಸ ಮತ್ತು ಅಂತ್ಯಪ್ರಾಸಗಳ ವಿಶಿಷ್ಟ ಸೊಬಗಿದೆ.
ನಾಯಿ ಹಾಗೂ ಬೆಕ್ಕು: 'ನಾಯಿ'ಯ ಕುರಿತ ಕವಿತೆಯು "ನಾಯಿ ದುಓ ದುಓ" ಎಂಬ ವಿಶಿಷ್ಟ ಆಡುನುಡಿಯೊಂದಿಗೆ ಆರಂಭವಾಗಿ ನಾಯಿಯ ಕರ್ತವ್ಯಗಳನ್ನು ತಿಳಿಸಿಕೊಡುತ್ತದೆ. ಹಾಗೆಯೇ 'ಬೆಕ್ಕು' ಕವಿತೆಯು ಅದು ಮಾಡುವ ತಂಟೆ-ಕೆಲಸಗಳನ್ನು ನಿರೂಪಿಸುತ್ತದೆ.
ಅಳಿಲು ಮತ್ತು ಇಲಿ: ಈ ಕವಿತೆಯಲ್ಲಿ ಮರದಲ್ಲಿ ಓಡಾಡುವ ಅಳಿಲು ಹಾಗೂ ಬಿಲದಲ್ಲಿ ಅಡಗುವ ಇಲಿಯ ಮುದ್ದಾದ ಚಿತ್ರಣವಿದೆ.
ಇದಲ್ಲದೆ ಕೋಳಿ, ಕಾಗೆ, ಹಂದಿ, ತೆಂಗಿನ ಮರ, ಬಾಳೆ ಗಿಡ ಹಾಗೂ ಚಂದಿರ ಹೀಗೆ ಮಕ್ಕಳಿಗೆ ನಿತ್ಯ ಪರಿಚಿತ ಹಾಗೂ ಪ್ರಿಯವಾದ ವಿಷಯಗಳೇ ಕವನಗಳಾಗಿ ಜೀವ ತಳೆದಿವೆ.
ಪ್ರೀತಿ ಮತ್ತು ಪರಿಸರದ ಅನುಭವ
'ತಾಯಲ್ಲವೇ' ಹಾಡು ತಾಯಿಯ ವಾತ್ಸಲ್ಯವನ್ನು ಮಧುರವಾಗಿ ಚಿತ್ರಿಸಿದರೆ, 'ಅಪ್ಪನೊಡನೆ ನಾನೂ ಪೇಟೆಗೆ ಹೋದೆ' ಹಾಡು ಅಪ್ಪನ ಪ್ರೀತಿಯ ಜೊತೆಗೆ ಪೇಟೆಯ ಸಂಭ್ರಮ ಹಾಗೂ ಚಿತ್ರಣವನ್ನು ಕಟ್ಟಿಕೊಡುತ್ತದೆ. 'ನಮ್ಮೂರ ಹಳ್ಳಿ ರಸ್ತೆ'ಯಲ್ಲಿ ಹಳ್ಳಿಯ ಸಹಜ ಬದುಕು ಚಿತ್ರಣಗೊಂಡಿದ್ದರೆ, 'ಮಾರ್ಗದ ವಿದ್ಯುದ್ದೀಪದ ಸಾಲು' ಕವನವು ನಗರದ ವೈಭವವನ್ನು ಕಣ್ಣಿಗೆ ಕಟ್ಟುವಂತೆ ಸಾರುತ್ತದೆ.
ದೇಶಭಕ್ತಿ ಮತ್ತು ಸಾಮಾಜಿಕ ಪ್ರಜ್ಞೆ
ಸ್ವಾತಂತ್ರ್ಯ ಹಾಗೂ ದೇಶಭಕ್ತಿಯ ಗೀತೆಗಳಲ್ಲಿ ಕವಿಯು ಜಾಗೃತ ಒಳನೋಟಗಳನ್ನು ನೀಡಿದ್ದಾರೆ:
ಸ್ವಾತಂತ್ರ್ಯ ದಿನದ ಹಾಡು: ರಾಷ್ಟ್ರನಾಯಕರ ಹೋರಾಟವನ್ನು ನೆನಪಿಸುತ್ತಾ, "ನಮ್ಮ ಜಗಳವ ನಿಲ್ಲಿಸುವೆವು" ಎಂದು ಶಾಂತಿ ಮತ್ತು ಐಕ್ಯತೆಯನ್ನು ಬೇಡುವ ಧ್ವನಿ ಇಲ್ಲಿದೆ.
ಭಾರತ ಮಾತೆ: ಪ್ರಜೆಗಳೆಲ್ಲರೂ ದೇಶಕ್ಕಾಗಿ ಕ್ರಿಯಾಶೀಲರಾಗಬೇಕೆಂಬ ಆಶಯವನ್ನು ಈ ಕವಿತೆ ವ್ಯಕ್ತಪಡಿಸುತ್ತದೆ.
ದೇಶಪ್ರೇಮ: "ನಮ್ಮ ದೇಶ ನಮ್ಮ ಊರು ನಮ್ಮ ಮನೆ ಎಂಬುದು, ನಮ್ಮದೆಲ್ಲ ನಮಗೆ ಇದು ಪ್ರಾಣವಾಗಿ ಇರುವುದು, ಜೀವವಾಗಿ ಇರುವುದು" ಎಂಬ ಉದಾತ್ತ ಚಿಂತನೆ ಈ ಗೀತೆಯಲ್ಲಿದೆ.
ಜಾತಿ: 'ಜಾತಿ' ಎಂಬ ಕವಿತೆಯಲ್ಲಿ ಜಾತಿ ಎಂಬುದು ಕೇವಲ ಕೆಲಸದ ಹೆಸರಷ್ಟೇ, ನಾವೆಲ್ಲರೂ ಒಟ್ಟಾಗಿ ಜೀವಿಸಬೇಕು ಎಂಬ ಭ್ರಾತೃತ್ವದ ಸಂದೇಶವಿದೆ.
ಆಧುನಿಕ ಮನೋಭಾವದ ಹಾಗೂ ವರ್ತಮಾನದ ಸಂದರ್ಭಕ್ಕೆ ಅತಿ ಅಗತ್ಯವಾದ ಮೌಲ್ಯಗಳನ್ನು ಒಳಗೊಂಡಿರುವುದೇ ಈ ಕವನಗಳ ಹೆಗ್ಗಳಿಕೆ. ನಾಟಕೀಯತೆ, ಗೇಯತೆ ಹಾಗೂ ಅಭಿನಯಕ್ಕೆ ಸೂಕ್ತವಾದ ಇಂತಹ ಸುಂದರ ಹಾಡುಗಳನ್ನು ನೀಡಿದ ಕೆ. ಭಾಸ್ಕರ ರಾವ್ ಅವರನ್ನು ಗೌರವದಿಂದ ಸ್ಮರಿಸಬೇಕು. ಈ ಕವನ ಸಂಕಲನವನ್ನು ಮತ್ತೆ ಚಿಣ್ಣರ ಲೋಕಕ್ಕೆ ಕೊಡುಗೆಯಾಗಿ ನೀಡುತ್ತಿರುವ ಎಲ್ಲರಿಗೂ ಅಭಿನಂದನೆಗಳು.
'ಕೇದಿಗೆ ಹೂ' ಕವನ ಸಂಕಲನದ ಪರಿಮಳ ಎಲ್ಲೆಡೆ ಹರಡಲಿ; ಮಕ್ಕಳು ಈ ಗೀತೆಗಳನ್ನು ಹಾಡಿ, ಕುಣಿದು ಸಂಭ್ರಮಿಸಲಿ.
– ಕೃಷ್ಣಮೂರ್ತಿ ಕುಳಾಯಿ
ನಿರಂತರ ಅಪ್ಡೇಟ್ಗಳಿಗಾಗಿ ಉಪಯುಕ್ತ ನ್ಯೂಸ್ ಟೆಲಿಗ್ರಾಂ ಚಾನೆಲ್ಗೆ ಜಾಯಿನ್ ಆಗಿ
ಉಪಯುಕ್ತ ನ್ಯೂಸ್’ ಫೇಸ್ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್ ವಾಟ್ಸಪ್ ಗ್ರೂಪ್ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ
