ಅಲೋಶಿಯನ್ ಫೆಸ್ಟ್ 2026: ಆಗಸ್ಟ್ 31ರಂದು ಸಂತ ಅಲೋಶಿಯಸ್‌ ವಿವಿಯಲ್ಲಿ ರಾಷ್ಟ್ರೀಯ ಮಟ್ಟದ ಪಿಯು ಉತ್ಸವ

ಮಂಗಳೂರು: ಸಂತ ಅಲೋಶಿಯಸ್‌ ಪರಿಗಣಿತ ವಿಶ್ವವಿದ್ಯಾನಿಲಯದ ವತಿಯಿಂದ ಪದವಿ ಪೂರ್ವ ವಿದ್ಯಾರ್ಥಿಗಳಿಗಾಗಿ ಆಯೋಜಿಸಲಾಗಿರುವ ರಾಷ್ಟ್ರೀಯ ಮಟ್ಟದ ಪ್ರತಿಭಾ ಉತ್ಸವ ‘ಅಲೋಶಿಯನ್ ಫೆಸ್ಟ್ 2026’ ಇದೇ ಸೋಮವಾರ, ಆಗಸ್ಟ್ 31 ರಂದು ಬೆಳಗ್ಗೆ 9 ಗಂಟೆಗೆ ವಿವಿಯ ಎಲ್.ಎಫ್. ರಸ್ಕಿನ್ಹಾ ಸಭಾಂಗಣದಲ್ಲಿ ನಡೆಯಲಿದೆ. ಪೂರ್ವನಿಗದಿತ ಆಗಸ್ಟ್ 8ರ ಕಾರ್ಯಕ್ರಮವು ಮುಂಬೆಳಗಿನ ಈ ದಿನಾಂಕಕ್ಕೆ ಮುಂದೂಡಲ್ಪಟ್ಟಿದೆ.

ಡಿಜಿಟಲ್ ಕಂಟೆಂಟ್ ಕ್ರಿಯೇಟರ್ ಶರಣ್ ಚಿಲಿಂಬಿ ಈ ಉತ್ಸವವನ್ನು ಉದ್ಘಾಟಿಸಲಿದ್ದು, ಗೌರವ ಅತಿಥಿಯಾಗಿ ರಾಷ್ಟ್ರ ಪ್ರಶಸ್ತಿ ವಿಜೇತ ಬಾಲ ಕಲಾವಿದ ಅತೀಶ್ ಎಸ್. ಶೆಟ್ಟಿ ಭಾಗವಹಿಸಲಿದ್ದಾರೆ. ವಿಶ್ವವಿದ್ಯಾನಿಲಯದ ಕುಲಪತಿ ವಂ. ಡಾ. ಪ್ರವೀಣ್‌ ಮಾರ್ಟೀಸ್‌ ಎಸ್.ಜೆ. ಅವರು ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಲಿದ್ದಾರೆ.

ಈ ಉತ್ಸವವನ್ನು ‘ಹಬ್ಬಗಳ ಹಬ್ಬ’ ಹಾಗೂ ‘ಸಾಂಸ್ಕೃತಿಕ ಹಬ್ಬ’ ಎಂಬ ಎರಡು ಪ್ರಮುಖ ವಿಭಾಗಗಳಲ್ಲಿ ಆಯೋಜಿಸಲಾಗಿದೆ. ‘ಹಬ್ಬಗಳ ಹಬ್ಬ’ ವಿಭಾಗದಲ್ಲಿ ಸಾಮಾನ್ಯ, ವಾಣಿಜ್ಯ, ವಿಜ್ಞಾನ ಹಾಗೂ ತಂತ್ರಜ್ಞಾನಕ್ಕೆ ಸಂಬಂಧಿಸಿದ 23 ಶೈಕ್ಷಣಿಕ ಮತ್ತು ಸೃಜನಶೀಲ ಸ್ಪರ್ಧೆಗಳು ನಡೆಯಲಿವೆ. ಇದರಲ್ಲಿ ಕ್ವಿಜ್, ಚರ್ಚಾಸ್ಪರ್ಧೆ, ಮಾಕ್ ಪ್ರೆಸ್, ಪ್ರಾಡಕ್ಟ್ ಲಾಂಚ್, ಫ್ಯಾಷನ್ ಶೋ, ರೋಡೀಸ್, ಶಾರ್ಕ್ ಟ್ಯಾಂಕ್, ಕೋಡಿಂಗ್ ಹಾಗೂ ಗೇಮಿಂಗ್‌ನಂತಹ ವಿವಿಧ ಸ್ಪರ್ಧೆಗಳು ಸೇರಿವೆ. ಇನ್ನು ‘ಸಾಂಸ್ಕೃತಿಕ ಹಬ್ಬ’ ವಿಭಾಗದಲ್ಲಿ ಭರತನಾಟ್ಯ, ಜಾನಪದ ಗೀತೆ, ಮೆಹೆಂದಿ, ಟ್ರಾಶನ್, ಕಸದಿಂದ ರಸ, ಥೀಮ್ ಆಧಾರಿತ ಪ್ರದರ್ಶನ ಮತ್ತು ವಿಜ್ಞಾನ ಪ್ರದರ್ಶನ ಸೇರಿದಂತೆ 7 ಸ್ಪರ್ಧೆಗಳು ನಡೆಯಲಿವೆ.

ಅಪರಾಹ್ನ 3:30ಕ್ಕೆ ನಡೆಯಲಿರುವ ಸಮಾರೋಪ ಸಮಾರಂಭದಲ್ಲಿ ರೋಹನ್ ಕಾರ್ಪೊರೇಷನ್ ನಿರ್ದೇಶಕರಾದ ಡಿಯೋನ್ ಮೊಂಟೇರೊ ಮುಖ್ಯ ಅತಿಥಿಯಾಗಿ ಭಾಗವಹಿಸಲಿದ್ದಾರೆ. ವೈಯಕ್ತಿಕ ವಿಭಾಗದ ವಿಜೇತರಿಗೆ ಪ್ರಶಸ್ತಿ ಪತ್ರ ಹಾಗೂ ಫಲಕಗಳನ್ನು ನೀಡಲಾಗುತ್ತದೆ. ಅತ್ಯುತ್ತಮ ಪ್ರದರ್ಶನ ನೀಡಿದ ಕಾಲೇಜು ತಂಡಕ್ಕೆ ‘ಸಮಗ್ರ ವಿಜೇತ (Overall Championship)’ ಫಲಕ ಹಾಗೂ ದ್ವಿತೀಯ ಸ್ಥಾನ ಪಡೆದ ತಂಡಕ್ಕೆ ‘ರನ್ನರ್ಸ್-ಅಪ್’ ಫಲಕ ನೀಡಿ ಗೌರವಿಸಲಾಗುವುದು.

ಹೆಚ್ಚಿನ ಮಾಹಿತಿ ಹಾಗೂ ನೋಂದಣಿಗಾಗಿ ಸ್ಟಾಫ್ ಸಂಚಾಲಕರಾದ ಡಾ. ದಿನೇಶ್ ನಾಯಕ್ ಮತ್ತು ಡಾ. ಡೆಶೆಲ್ ಫೆರ್ನಾಂಡಿಸ್ ಅವರನ್ನು ಅಥವಾ ವಿದ್ಯಾರ್ಥಿ ಸಂಚಾಲಕರಾದ ಆಯುಷ್ ಜಿ (8618069400), ಕ್ಯಾರೋಲ್ ಶೇರಿಲ್ (9113296997) ಮತ್ತು ಅರ್ಚನಾ (7259632207) ಅವರನ್ನು ಸಂಪರ್ಕಿಸಬಹುದು. ಆಸಕ್ತರು aloysianfest2026ug@staloysius.edu.in ಇಮೇಲ್ ಮೂಲಕವೂ ಮಾಹಿತಿ ಪಡೆಯಬಹುದು.

 ನಿರಂತರ ಅಪ್‌ಡೇಟ್‌ಗಳಿಗಾಗಿ ಉಪಯುಕ್ತ ನ್ಯೂಸ್‌ ಟೆಲಿಗ್ರಾಂ ಚಾನೆಲ್‌ಗೆ ಜಾಯಿನ್‌ ಆಗಿ

ಉಪಯುಕ್ತ ನ್ಯೂಸ್‌’ ಫೇಸ್‌ಬುಕ್ ಪುಟ ಲೈಕ್ ಮಾಡಿ

ಉಪಯುಕ್ತ ನ್ಯೂಸ್‌ ವಾಟ್ಸಪ್‌  ಗ್ರೂಪ್‌ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ