ನಾನು ಪಿ.ಯು.ಸಿ ಮುಗಿಸಿದ ನಂತರ ಮುಂದೆ ಏನು ಮಾಡಬೇಕು ಎಂದು ಯೋಚಿಸುತ್ತಿದ್ದಾಗ, ನನ್ನ ಅಕ್ಕ ನನ್ನನ್ನು ವಿವೇಕಾನಂದ ಕಾಲೇಜಿನ ಪತ್ರಿಕೋದ್ಯಮ ವಿಭಾಗಕ್ಕೆ ಸೇರಲು ಪ್ರೋತ್ಸಾಹಿಸಿದರು. "ಇದು ನಿನಗೆ ಒಳ್ಳೆಯ ಭವಿಷ್ಯವನ್ನು ನೀಡುತ್ತದೆ" ಎಂದು ಅವರು ಹೇಳಿದಾಗ, ನನಗೆ ಹೊಸ ದಾರಿ ಕಾಣಿಸಿದಂತೆ ಆಯಿತು.
ಮೊದಲ ಬಾರಿಗೆ ಕಾಲೇಜಿಗೆ ಕಾಲಿಟ್ಟಾಗ ಮನಸ್ಸಿನಲ್ಲಿ ಸ್ವಲ್ಪ ಭಯವಿತ್ತು. ಏಕೆಂದರೆ ಎಲ್ಲವೂ ಹೊಸದಾಗಿತ್ತು - ಪರಿಚಯವಿಲ್ಲದ ಮುಖಗಳು, ಹೊಸ ವಾತಾವರಣ, ಹೊಸ ನಿಯಮಗಳು. ಆದರೆ ಕೆಲವೇ ದಿನಗಳಲ್ಲಿ ಈ ಭಯವೆಲ್ಲ ಮಾಯವಾಯಿತು. ಗೆಳೆಯ-ಗೆಳತಿಯರೊಂದಿಗೆ ಸ್ನೇಹ ಬೆಳೆಯಿತು. ಉಪನ್ಯಾಸಕರ ಪ್ರೀತಿ ಮತ್ತು ಮಾರ್ಗದರ್ಶನ ನನ್ನಲ್ಲಿ ಆತ್ಮವಿಶ್ವಾಸವನ್ನು ಮೂಡಿಸಿತು. ಅವರೊಂದಿಗೆ ನನಗೆ ಒಂದು ಅವಿನಾಭಾವ ಸಂಬಂಧ ಮೂಡಿತು.
ವಿವೇಕಾನಂದ ಕಾಲೇಜಿನ ಪತ್ರಿಕೋದ್ಯಮ ವಿಭಾಗಕ್ಕೆ ಸೇರಿದ್ದು ನನ್ನ ಜೀವನದ ಅತ್ಯುತ್ತಮ ನಿರ್ಧಾರಗಳಲ್ಲಿ ಒಂದಾಗಿದೆ. ಇದು ನನ್ನ ಜೀವನಕ್ಕೆ ಹೊಸ ಪ್ರೇರಣೆ ನೀಡಿತು. ಇಲ್ಲಿ ನಾನು ಅನೇಕ ವಿಷಯಗಳನ್ನು ಕಲಿತೆ. ಬರವಣಿಗೆಯ ಮೂಲಕ ನನ್ನ ಆಲೋಚನೆಗಳನ್ನು ಅಭಿವ್ಯಕ್ತಿಸಲು ಕಲಿತೆ. ಹೊಸ ಜ್ಞಾನವನ್ನು ಹುಡುಕುವ ಕುತೂಹಲ ಬೆಳೆಯಿತು. ಕ್ಯಾಮೆರಾದ ಮೂಲಕ ಸಮಾಜದ ವಿವಿಧ ಆಯಾಮಗಳನ್ನು ಸೆರೆಹಿಡಿಯುವ ಅವಕಾಶ ಸಿಕ್ಕಿತು.
ನಮ್ಮ ವಿಭಾಗದ ಹೆಮ್ಮೆಯಾದ "ಪಾಂಚಜನ್ಯ" ಎಂಬ ಸುಂದರ ಸ್ಟುಡಿಯೋದಲ್ಲಿ ನಾವು ಒಟ್ಟಾಗಿ ಕುಳಿತು ವಿವಿಧ ಚಟುವಟಿಕೆಗಳನ್ನು ಮಾಡುತ್ತಿದ್ದೆವು. ಅಲ್ಲಿನ ಪ್ರತಿಯೊಂದು ಕ್ಷಣವೂ ಕಲಿಕೆಯ ಪಾಠವಾಗಿತ್ತು. ಅದರಲ್ಲೂ "ಮಣಿಕರ್ಣಿಕ" ಎಂಬ ಅದ್ಭುತ ವಾಕ್ಚಾತುರ್ಯ ವೇದಿಕೆಯ ಕಾರ್ಯಕ್ರಮವು ನಮ್ಮಲ್ಲಿರುವ ಭಯವನ್ನು ಹೋಗಲಾಡಿಸಿ, ವೇದಿಕೆಯ ಮೇಲೆ ಧೈರ್ಯವಾಗಿ ಮಾತನಾಡುವ ಕೌಶಲವನ್ನು ನೀಡಿತು. ನಿರೂಪಣಾ ಕಲೆ, ವರದಿಗಾರಿಕೆಯ ತಂತ್ರಗಳು, ಸಂದರ್ಶನ ಮಾಡುವ ವಿಧಾನಗಳಂತಹ ಪ್ರಾಯೋಗಿಕ ಜ್ಞಾನವನ್ನು ಇಲ್ಲಿಯೇ ಪಡೆದೆವು.
ಪತ್ರಿಕೋದ್ಯಮವು ನಮ್ಮ ಮಾತಿನ ಶೈಲಿಯನ್ನು ಉತ್ತಮಗೊಳಿಸಿತು. ನಮ್ಮ ಬರವಣಿಗೆಯನ್ನು ವಿವಿಧ ಪತ್ರಿಕೆಗಳ ಮೂಲಕ ಪ್ರಕಟಿಸುವ ಅವಕಾಶವನ್ನು ಕಾಲೇಜು ಕಲ್ಪಿಸಿತು. ಇದು ನಮ್ಮಲ್ಲಿ ಬರಹಗಾರ್ತಿಯಾಗುವ ಕನಸನ್ನು ಮತ್ತಷ್ಟು ಗಟ್ಟಿಗೊಳಿಸಿತು.
ಕೇವಲ ಶೈಕ್ಷಣಿಕ ವಿಷಯಗಳಿಗೆ ಸೀಮಿತವಾಗದೆ, ವಿವೇಕಾನಂದ ಕಾಲೇಜು ರಾಷ್ಟ್ರೀಯ ಸೇವಾ ಯೋಜನೆಯ ಮೂಲಕ ಸಮಾಜ ಸೇವೆ ಮಾಡುವ ಅವಕಾಶವನ್ನೂ ನೀಡಿತು. NSS ಚಟುವಟಿಕೆಗಳ ಮೂಲಕ ಪರಿಚಯವಿಲ್ಲದ ಜನರೊಂದಿಗೆ ಬೆರೆಯುವ, ಅವರ ಕಷ್ಟ-ಸುಖಗಳನ್ನು ಅರ್ಥಮಾಡಿಕೊಳ್ಳುವ ಅನುಭವ ಸಿಕ್ಕಿತು. ವಿವಿಧ ಕಾರ್ಯಕ್ರಮಗಳ ಮೂಲಕ ನಮ್ಮ ಜ್ಞಾನವನ್ನು ವೃದ್ಧಿಸಿಕೊಳ್ಳಲು ಕಾಲೇಜು ಸದಾ ಪ್ರೋತ್ಸಾಹಿಸಿತು.
ಇಂದು ಹಿಂತಿರುಗಿ ನೋಡಿದಾಗ, ಈ ಕಾಲೇಜಿನಲ್ಲಿ ಕಳೆದ ಪ್ರತಿಯೊಂದು ದಿನವೂ ಒಂದು ಸುಂದರ ನೆನಪಾಗಿದೆ. ಗೆಳತಿಯರೊಂದಿಗೆ ಹಂಚಿಕೊಂಡ ನಗು, ಉಪನ್ಯಾಸಕರ ಅಮೂಲ್ಯ ಸಲಹೆಗಳು, ತರಗತಿಯ ಚರ್ಚೆಗಳು - ಇವೆಲ್ಲವೂ ಇಂದಿಗೂ ನನ್ನ ಮನಸ್ಸಿಗೆ ಮುದ ನೀಡುತ್ತವೆ. ನಿಜವಾಗಿಯೂ ಒಂದು ಕಾಲೇಜು ನಮ್ಮ ವ್ಯಕ್ತಿತ್ವವನ್ನು ರೂಪಿಸುತ್ತದೆ, ನಮಗೆ ಬದುಕುವ ದಾರಿಯನ್ನು ತೋರಿಸುತ್ತದೆ ಎಂಬುದಕ್ಕೆ ವಿವೇಕಾನಂದ ಕಾಲೇಜು ಮತ್ತು ಪತ್ರಿಕೋದ್ಯಮ ವಿಭಾಗವೇ ಸಾಕ್ಷಿ.
ಈ ಮರೆಯಲಾಗದ ನೆನಪುಗಳು ನನ್ನ ಜೀವನದುದ್ದಕ್ಕೂ ನನ್ನೊಂದಿಗೆ ಇರುತ್ತವೆ.
- ಶಿವಾನಿ ಕೊಡಂಗಾಯಿ
ದ್ವಿತೀಯ ಬಿ.ಎ (ಪತ್ರಿಕೋದ್ಯಮ ವಿಭಾಗ)
ವಿವೇಕಾನಂದ ಕಾಲೇಜು, ಪುತ್ತೂರು
ಉಪಯುಕ್ತ ನ್ಯೂಸ್ ಈಗ ಸ್ವದೇಶಿ ಸಾಮಾಜಿಕ ಜಾಲತಾಣ Arattai ನಲ್ಲಿ... ನಮ್ಮ ಚಾನೆಲ್ಗೆ ನೀವೂ ಜಾಯಿನ್ ಆಗಿ.
ನಿರಂತರ ಅಪ್ಡೇಟ್ಗಳಿಗಾಗಿ ಉಪಯುಕ್ತ ನ್ಯೂಸ್ ಟೆಲಿಗ್ರಾಂ ಚಾನೆಲ್ಗೆ ಜಾಯಿನ್ ಆಗಿ
ಉಪಯುಕ್ತ ನ್ಯೂಸ್’ ಫೇಸ್ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್ ವಾಟ್ಸಪ್ ಗ್ರೂಪ್ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ
