ಉಡುಪಿ:
ಬಡಗುತಿಟ್ಟಿನ ಅತ್ಯಂತ ಪುರಾತನ ಹಾಗೂ ಇತಿಹಾಸ ಪ್ರಸಿದ್ಧ
ಮೇಳಗಳಲ್ಲಿ ಒಂದಾದ 'ಹುಕ್ಲಮಕ್ಕಿ ಯಕ್ಷಗಾನ ಮೇಳ'ವು ಇದೀಗ
ನೂರು ವರ್ಷಗಳ ಯಶಸ್ವಿ ಪಯಣವನ್ನು ಪೂರೈಸಿದ್ದು, ಇದರ ಶತಮಾನೋತ್ಸವ ಸಂಭ್ರಮಾಚರಣೆಯು
ಇದೇ ಬರುವ ಭಾನುವಾರ, ಮೇ
17ರಂದು ಉಡುಪಿಯಲ್ಲಿ ಅದ್ಧೂರಿಯಾಗಿ ಜರುಗಲಿದೆ.
ನಗರದ
ಯಕ್ಷಗಾನ ಕಲಾರಂಗದ ಐವೈಸಿ (IYC) ಸಭಾಂಗಣದಲ್ಲಿ ಮಧ್ಯಾಹ್ನ 3 ಗಂಟೆಗೆ ಹಮ್ಮಿಕೊಳ್ಳಲಾಗಿರುವ ಈ ವಿಶೇಷ ಕಾರ್ಯಕ್ರಮದಲ್ಲಿ
ಪುಸ್ತಕ ಲೋಕಾರ್ಪಣೆ, ಹಿರಿಯ ವಿದ್ವಾಂಸರಿಗೆ ಸನ್ಮಾನ ಹಾಗೂ ಯಕ್ಷಗಾನ ಪ್ರದರ್ಶನ
ಏರ್ಪಡಿಸಲಾಗಿದೆ.
ಕಾರ್ಯಕ್ರಮದ
ಮುಖ್ಯಾಂಶಗಳು:
ಪುಸ್ತಕ
ಲೋಕಾರ್ಪಣೆ: ಯಕ್ಷಬ್ರಹ್ಮ ಮಲ್ಪೆ ಶಂಕರನಾರಾಯಣ ಸಾಮಗರು ರಚಿಸಿರುವ, ಅರ್ಥಸಹಿತ ಯಕ್ಷಗಾನ ಪ್ರಸಂಗ ‘ಅಂಗದ ಸಂಧಾನ’ ಕೃತಿಯ
ಮರು ಮುದ್ರಣವನ್ನು ಈ ಸಂದರ್ಭದಲ್ಲಿ ಲೋಕಾರ್ಪಣೆಗೊಳಿಸಲಾಗುವುದು.
ಶತಮಾನೋತ್ಸವ
ಪ್ರಶಸ್ತಿ ಪ್ರದಾನ: ಯಕ್ಷಗಾನ ರಂಗದ ದಿಗ್ಗಜರಾದ ಪ್ರೊ.
ಎಂ.ಎಲ್. ಸಾಮಗ, ಡಾ.
ಎಂ. ಪ್ರಭಾಕರ ಜೋಶಿ, ಡಾ. ಜಿ.ಎಲ್.
ಹೆಗಡೆ, ಮತ್ತು ಹಿರಿಯ ಪ್ರಸಂಗಕರ್ತ ಡಿ.ಎಸ್. ಶ್ರೀಧರ
ಅವರಿಗೆ ಗೌರವ ಸಮರ್ಪಣೆ ಮಾಡಲಾಗುವುದು.
ಅಲ್ಲದೆ, ಸುವರ್ಣ ಸಂಭ್ರಮದಲ್ಲಿರುವ 'ಯಕ್ಷಗಾನ ಕಲಾರಂಗ' ಸಂಸ್ಥೆಯನ್ನು ವಿಶೇಷವಾಗಿ ಸನ್ಮಾನಿಸಲಾಗುವುದು.
ಯಕ್ಷಗಾನ
ಪ್ರದರ್ಶನ: ಕಾರ್ಯಕ್ರಮದ ನಂತರ ಡಾ. ಶ್ರೀಪಾದ
ಹೆಗಡೆ ಹುಕ್ಲಮಕ್ಕಿ ಅವರ ನೇತೃತ್ವದಲ್ಲಿ 'ಕರಂಡಕಾಸುರ
ಕಾಳಗ' ಯಕ್ಷಗಾನ ಬಯಲಾಟ ಜರುಗಲಿದೆ.
ನೂರು
ವರ್ಷದ ಗತವೈಭವ:
1925ರ
ವಿಜಯದಶಮಿಯಂದು ಹುಕ್ಲಮಕ್ಕಿ ಶಿವರಾಮ ಹೆಗಡೆಯವರಿಂದ ಸ್ಥಾಪಿಸಲ್ಪಟ್ಟ ಈ ಮೇಳವು, ಅಂದಿನ
ದೀವಟಿಗೆ ಬೆಳಕಿನ ಕಾಲದಿಂದ ಇಂದಿನ ಆಧುನಿಕ ಯುಗದವರೆಗೂ ಸಾಂಪ್ರದಾಯಿಕ ಕಲೆಯ ಸೊಗಡನ್ನು ಉಳಿಸಿಕೊಂಡು
ಬಂದಿದೆ. ಕಿರೀಟ ಪೂಜೆಯ ಮೂಲಕ ಧ್ರುವಚರಿತ್ರೆ ಆಟದಿಂದ
ಆರಂಭವಾದ ಈ ಮೇಳವು ಸ್ವಾತಂತ್ರ್ಯ
ಹೋರಾಟಕ್ಕೂ ಪ್ರೇರಣೆ ನೀಡಿದ ಇತಿಹಾಸ ಹೊಂದಿದೆ. ನರಸಿಂಹ, ಶ್ವೇತ ವರಾಹ, ತಟ್ಟಿ ವೀರಭದ್ರನಂತಹ ವಿಶಿಷ್ಟ ಪಾತ್ರಗಳ ಪ್ರಯೋಗಗಳಿಗೆ ಹೆಸರಾದ ಹುಕ್ಲಮಕ್ಕಿ ಮೇಳವು ಕೆರೆಮನೆ, ಕರ್ಕಿ ಹಾಗೂ ಚಿಟ್ಟಾಣಿಯಂತಹ ಮಹಾನ್
ಕಲಾವಿದರಿಗೆ ನೆಲೆ ಒದಗಿಸಿದ ಕೀರ್ತಿ
ಹೊಂದಿದೆ.
ಕಾರ್ಯಕ್ರಮದ
ಅಧ್ಯಕ್ಷತೆಯನ್ನು ಬೆಂಗಳೂರಿನ ಚಾರ್ಟರ್ಡ್ ಅಕೌಂಟೆಂಟ್ ಶ್ರೀ ಗೋಪಾಲಕೃಷ್ಣ ಹೆಗಡೆ
ವಹಿಸಲಿದ್ದಾರೆ. ಮುಖ್ಯ ಅತಿಥಿಗಳಾಗಿ ಕರ್ನಾಟಕ ಯಕ್ಷಗಾನ ಅಕಾಡೆಮಿ ಅಧ್ಯಕ್ಷರಾದ ಡಾ. ತಲ್ಲೂರು ಶಿವರಾಮ
ಶೆಟ್ಟಿ ಹಾಗೂ ಯಕ್ಷಗಾನ ಕಲಾರಂಗದ
ಅಧ್ಯಕ್ಷರಾದ ಎಂ. ಗಂಗಾಧರ ರಾವ್
ಪಾಲ್ಗೊಳ್ಳಲಿದ್ದಾರೆ ಎಂದು ಶತಮಾನೋತ್ಸವ ಸಮಿತಿಯ
ಕಾರ್ಯಾಧ್ಯಕ್ಷರಾದ ಡಾ. ಶ್ರೀಪಾದ ಹೆಗಡೆ
ತಿಳಿಸಿದ್ದಾರೆ.
ಯಕ್ಷಗಾನ
ಅಭಿಮಾನಿಗಳು ಹಾಗೂ ಕಲಾ ಆಸಕ್ತರು
ಈ ಐತಿಹಾಸಿಕ ಸಂಭ್ರಮದಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಳ್ಳುವಂತೆ ಸಮಿತಿ ವಿನಂತಿಸಿದೆ.
ಉಪಯುಕ್ತ ನ್ಯೂಸ್ ಈಗ ಸ್ವದೇಶಿ ಸಾಮಾಜಿಕ ಜಾಲತಾಣ Arattai ನಲ್ಲಿ... ನಮ್ಮ ಚಾನೆಲ್ಗೆ ನೀವೂ ಜಾಯಿನ್ ಆಗಿ.
ನಿರಂತರ ಅಪ್ಡೇಟ್ಗಳಿಗಾಗಿ ಉಪಯುಕ್ತ ನ್ಯೂಸ್ ಟೆಲಿಗ್ರಾಂ ಚಾನೆಲ್ಗೆ ಜಾಯಿನ್ ಆಗಿ
ಉಪಯುಕ್ತ ನ್ಯೂಸ್’ ಫೇಸ್ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್ ವಾಟ್ಸಪ್ ಗ್ರೂಪ್ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ
