ಮಲೆನಾಡಿನ ರೈತರಿಗೆ ಉಪಬೆಳೆಗಳು, ಬದಲಿ ಆದಾಯ ಮತ್ತು ಮೌಲ್ಯವರ್ಧಿತ ಕೃಷಿಯ ಸಂಪೂರ್ಣ ದಾರಿ

ಮಲೆನಾಡು- ಕರಾವಳಿ ಭಾಗದ ಕೃಷಿ ವ್ಯವಸ್ಥೆಯಲ್ಲಿ ಅಡಿಕೆ ತೋಟಗಳು ದಶಕಗಳ ಕಾಲ ಸ್ಥಿರ ಆದಾಯದ ಆಧಾರವಾಗಿದ್ದವು. ಕ್ವಿಂಟಲ್ ಲೆಕ್ಕದಲ್ಲಿ ಅಡಿಕೆ ಬೆಳೆಯುತ್ತಿದ್ದ ತೋಟಗಳು ಮನೆಮಾಡಿ, ಮಕ್ಕಳ ಶಿಕ್ಷಣ, ಆರೋಗ್ಯ ಮತ್ತು ಸಾಮಾಜಿಕ ಭದ್ರತೆಯ ಬೆನ್ನೆಲುಬಾಗಿದ್ದವು. ಆದರೆ ಎಲೆ ಚುಕ್ಕಿ ರೋಗದ ತೀವ್ರತೆಯಿಂದಾಗಿ ಇವತ್ತು ಆ ಚಿತ್ರ ಸಂಪೂರ್ಣವಾಗಿ ಬದಲಾಗಿದೆ. ಅನೇಕ ತೋಟಗಳಲ್ಲಿ ಕ್ವಿಂಟಲ್ ಅಲ್ಲ, ಕೇಜಿ ಲೆಕ್ಕದಲ್ಲೇ ಬೆಳೆಯನ್ನು ಲೆಕ್ಕ ಹಾಕುವ ಪರಿಸ್ಥಿತಿ ಬಂದಿದೆ.

ಇದಕ್ಕಿಂತ ದೊಡ್ಡ ವಾಸ್ತವವೆಂದರೆ- ಸದ್ಯಕ್ಕೆ ಎಲೆ ಚುಕ್ಕಿ ರೋಗಕ್ಕೆ ಪೂರ್ಣವಾಗಿ ಪರಿಣಾಮಕಾರಿ, ನಂಬಬಹುದಾದ ಪರಿಹಾರ ಇನ್ನೂ ಲಭ್ಯವಿಲ್ಲ. ಆದ್ದರಿಂದ ಮುಂದಿನ ಕೆಲವು ವರ್ಷಗಳವರೆಗೆ ಅಡಿಕೆಯಿಂದ ಹಿಂದಿನಂತ ದೊಡ್ಡ ಆದಾಯದ ನಿರೀಕ್ಷೆ ಇಡುವುದು ವಾಸ್ತವಿಕವಲ್ಲ. ಈ ಸತ್ಯವನ್ನು ಒಪ್ಪಿಕೊಂಡು ಮುಂದಿನ ದಾರಿಯನ್ನು ಹುಡುಕುವುದೇ ಇಂದಿನ ಸವಾಲು.

ಮಲೆನಾಡಿನ ಕೃಷಿಯ ವಾಸ್ತವ: ಏಕೆ ಪರ್ಯಾಯ ಬೆಳೆ ಸುಲಭವಲ್ಲ?

ಮಲೆನಾಡಿನ ಭೂಭಾಗ, ಹವಾಮಾನ ಮತ್ತು ಪರಿಸರ ಇತರ ಪ್ರದೇಶಗಳಿಗಿಂತ ಭಿನ್ನ. ಇಲ್ಲಿ:

* ಅಧಿಕ ಮಳೆ ಮತ್ತು ತೇವಾಂಶ

* ದಟ್ಟ ನೆರಳು

* ಕಣಿವೆ ಹಾಗೂ ಇಳಿಜಾರು ಭೂಭಾಗ

* ಕಾಡುಹಂದಿ, ಜಿಂಕೆ, ಕೋಣ, ಆನೆಗಳ ಮಂಗ ಮೊದಲಾದ ಹಾವಳಿ

ಈ ಎಲ್ಲ ಕಾರಣಗಳಿಂದಾಗಿ ಸಮತಟ್ಟಾದ ಪ್ರದೇಶಗಳಲ್ಲಿ ಲಾಭದಾಯಕವಾಗಿರುವ ಹಲವಾರು ಬೆಳೆಗಳು ಇಲ್ಲಿ ಯಶಸ್ವಿಯಾಗುವುದಿಲ್ಲ. ಅಡಿಕೆ ಕೊಟ್ಟ ಆದಾಯಕ್ಕೆ ಸಮಾನವಾದ ಒಂದೇ ಒಂದು ಬೆಳೆ ಇಲ್ಲ ಎಂಬ ಅನುಭವ ಬಹುತೇಕ ರೈತರದ್ದಾಗಿದೆ. ಹೀಗಾಗಿ “ಅಡಿಕೆ ಬಿಟ್ಟು ಬೇರೆ ಬೆಳೆ” ಎಂಬ ಯೋಚನೆಗೆ ಮನಸ್ಸು ಸಹಜವಾಗಿಯೇ ಒಪ್ಪುವುದಿಲ್ಲ. ಆದರೆ ಪರಿಸ್ಥಿತಿಯ ಒತ್ತಡದಿಂದಾಗಿ ಅಡಿಕೆಯನ್ನು ಉಳಿಸಿಕೊಂಡೇ, ಅದರ ಜೊತೆಗೆ ಹೊಸ ಆದಾಯ ಮಾರ್ಗಗಳನ್ನು ಸೇರಿಸಿಕೊಳ್ಳುವ ಅಗತ್ಯ ಎದುರಾಗಿದೆ.

ಅಡಿಕೆ ತೋಟದಲ್ಲಿ ಅಥವಾ ಸುತ್ತಲಿನ ಪ್ರದೇಶದಲ್ಲಿ (ಬೆಟ್ಟ) ಸಾಧ್ಯವಿರುವ ಉಪಬೆಳೆಗಳು– ಸಂಪೂರ್ಣ ಚಿತ್ರ

1. ಬಾಳೆ– ತಕ್ಷಣದ ನಗದು ಹರಿವು

ಬಾಳೆ ಅಡಿಕೆ ತೋಟದಲ್ಲಿ ಮಧ್ಯಂತರ ಬೆಳೆಯಾಗಿ ಹೆಚ್ಚು ಬಳಸಲಾಗುವ ಆಯ್ಕೆ. 9–12 ತಿಂಗಳಲ್ಲಿ ಆದಾಯ ಕೊಡಬಲ್ಲದು. ಆದರೆ ಕಾಡುಹಂದಿ, ಮಂಗ, ಕ್ಯಾಸಾಳ ಗಾಳಿಯಿಂದ ಮುರಿಯುವಿಕೆ ಮತ್ತು ರೋಗಗಳ ಅಪಾಯ ಜಾಸ್ತಿ. ಹೀಗಾಗಿ ಬಾಳೆಯನ್ನು ದೀರ್ಘಾವಧಿಯ ಪರಿಹಾರವಾಗಿ ಅಲ್ಲ, ತಾತ್ಕಾಲಿಕ ಹಣದ ಹರಿವು ಉಳಿಸಿಕೊಳ್ಳುವ ಉಪಾಯವಾಗಿ ಮಾತ್ರ ನೋಡಬೇಕು.

2. ಕೋಕೋ– ನಿಧಾನ ಆದರೆ ಸ್ಥಿರ ಆದಾಯ

ಕೋಕೋ ಅಡಿಕೆ ತೋಟಕ್ಕೆ ಅತ್ಯಂತ ಹೊಂದಿಕೊಳ್ಳುವ ನೆರಳು ಪ್ರಿಯ ಬೆಳೆ. 3–4 ವರ್ಷಗಳಲ್ಲಿ ಫಸಲು ಸಿಗುತ್ತದೆ. ತಕ್ಷಣದ ಆದಾಯ ಇಲ್ಲದಿದ್ದರೂ, ಒಮ್ಮೆ ನೆಟ್ಟಲ್ಲಿ ವರ್ಷಂಪ್ರತಿ ಸ್ಥಿರ ಪೂರಕ ಆದಾಯ ಕೊಡಬಲ್ಲದು. ಮಧ್ಯಾವಧಿಯ ಆರ್ಥಿಕ ಭದ್ರತೆಗೆ ಕೋಕೋ ಉತ್ತಮ ಆಯ್ಕೆ.

3. ಏಲಕ್ಕಿ– ಲಾಭದಾಯಕ ಆದರೆ ಹೆಚ್ಚು ಜವಾಬ್ದಾರಿ

ಏಲಕ್ಕಿ ಮಲೆನಾಡಿನ ಸಾಂಪ್ರದಾಯಿಕ ವಾಣಿಜ್ಯ ಬೆಳೆ. ಬೆಲೆ ಉತ್ತಮವಾಗುವ ಸಾಧ್ಯತೆ ಇದೆ. ಆದರೆ ಕಾರ್ಮಿಕ ಅವಲಂಬನೆ ಜಾಸ್ತಿ, ಕಾಡುಪ್ರಾಣಿಗಳ ಹಾನಿ ಹೆಚ್ಚು, ಮತ್ತು ರೋಗ–ಹವಾಮಾನಕ್ಕೆ ಅತಿಸೂಕ್ಷ್ಮ. ಹೀಗಾಗಿ ಸುರಕ್ಷಿತ ಪ್ರದೇಶ ಮತ್ತು ನಿರಂತರ ನಿರ್ವಹಣೆ ಸಾಧ್ಯವಿರುವ ರೈತರಿಗೆ ಮಾತ್ರ ಇದು ಸೂಕ್ತ.

4. ಕಾಫಿ– ದೀರ್ಘಾವಧಿಯ ಆರ್ಥಿಕ ಬಲ

ಮಲೆನಾಡಿನ ಕೆಲವು ಭಾಗಗಳಲ್ಲಿ ಅಡಿಕೆ ತೋಟದ ಒಳಭಾಗ ಅಥವಾ ಅಂಚು ಪ್ರದೇಶಗಳಲ್ಲಿ ಕಾಫಿ ಬೆಳೆ ಉತ್ತಮವಾಗಿ ಹೊಂದಿಕೊಳ್ಳುತ್ತದೆ.

ನೆರಳು ಪ್ರಿಯ ಬೆಳೆ

ಮಳೆಗಾಲಕ್ಕೆ ಹೊಂದಿಕೊಳ್ಳುವಿಕೆ

3–5 ವರ್ಷಗಳಲ್ಲಿ ಉತ್ಪಾದನೆ ಆರಂಭ

ಕಾಫಿ ತಕ್ಷಣದ ಆದಾಯ ನೀಡುವುದಿಲ್ಲ. ಆದರೆ ದೀರ್ಘಾವಧಿಯಲ್ಲಿ ಒಂದು ಬಲವಾದ ಆರ್ಥಿಕ ಆಧಾರವಾಗಿ ರೂಪುಗೊಳ್ಳುವ ಸಾಧ್ಯತೆ ಇದೆ. ಮಾರುಕಟ್ಟೆ ಏರುಪೇರಿನ ಅಪಾಯ ಇದ್ದರೂ, ಅಡಿಕೆಯೊಂದಿಗಿನ ಸಂಯೋಜನೆಗೆ ಇದು ಉಪಯುಕ್ತ.

5. ಜಾಯಿಕಾಯಿ– ನಿಧಾನ ಆದರೆ ಸ್ಥಿರ ಹೂಡಿಕೆ

ಜಾಯಿಕಾಯಿ ನೆರಳು ಮತ್ತು ತೇವಾಂಶಕ್ಕೆ ಹೊಂದಿಕೊಳ್ಳುವ ಬಹುವರ್ಷೀಯ ಬೆಳೆ. ಫಲಾರಂಭಕ್ಕೆ ಸಮಯ ಬೇಕಾದರೂ, ಒಮ್ಮೆ ಉತ್ಪಾದನೆ ಶುರುವಾದರೆ ವರ್ಷಂಪ್ರತಿ ನಿರಂತರ ಆದಾಯ ಕೊಡಬಲ್ಲದು. ಅಡಿಕೆ ತೋಟದ ದೀರ್ಘಾವಧಿ ಯೋಜನೆಗೆ ಜಾಯಿಕಾಯಿ ಒಳ್ಳೆಯ ಆಯ್ಕೆ.

6. ಗೋಡಂಬಿ (ಗೇರು)– ಆಯ್ದ ಪ್ರದೇಶಗಳಿಗೆ ಮಾತ್ರ

ಗೋಡಂಬಿ ಮಲೆನಾಡಿನ ಎಲ್ಲ ಭಾಗಗಳಿಗೆ ಹೊಂದುವುದಿಲ್ಲ. ಆದರೆ ಕಡಿಮೆ ನೆರಳು, ಸ್ವಲ್ಪ ಒಣ ಪ್ರದೇಶ (ಬೆಟ್ಟ )ಮತ್ತು ಅಂಚು ಭೂಭಾಗಗಳಲ್ಲಿ ಇದು ಉತ್ತಮವಾಗಿ ಬೆಳೆಯುತ್ತದೆ. ಅಡಿಕೆ ತೋಟದ ಅಂಚಿನಲ್ಲಿ ಅಥವಾ ಹಳೆಯ ತೋಟ ಬದಲಾವಣೆ ಸಂದರ್ಭಗಳಲ್ಲಿ ಒಂದು ಹೆಚ್ಚುವರಿ ಆದಾಯ ಮೂಲವಾಗಿ ಗೋಡಂಬಿಯನ್ನು ಪರಿಗಣಿಸಬಹುದು.

7. ಸಾಂಬಾರ ಬೆಳೆಗಳು– ಎಚ್ಚರಿಕೆಯಿಂದ ಪ್ರಯೋಗ

ಕಾಳು ಮೆಣಸು, ಶುಂಠಿ, ಅರಿಶಿನ ಮುಂತಾದ ಮಸಾಲಾ ಬೆಳೆಗಳು ಒಮ್ಮೆ ಲಾಭದಾಯಕವಾಗಿದ್ದವು. ಆದರೆ ಇತ್ತೀಚಿನ ವರ್ಷಗಳಲ್ಲಿ ರೋಗ ಮತ್ತು ಹವಾಮಾನ ಅಸ್ಥಿರತೆಯಿಂದಾಗಿ ಅಪಾಯ ಹೆಚ್ಚಿದೆ. ಹೀಗಾಗಿ ಇವುಗಳನ್ನು ಚಿಕ್ಕ ಪ್ರಮಾಣದಲ್ಲಿ, ಪ್ರಯೋಗಾತ್ಮಕವಾಗಿ ಮಾತ್ರ ಬಳಸುವುದು ಒಳಿತು.

8. ಔಷಧಿ ಸಸ್ಯಗಳು– ಮೌಲ್ಯವರ್ಧನೆ ಇದ್ದರೆ ಮಾತ್ರ

ಔಷಧಿ ಸಸ್ಯಗಳ ಬಗ್ಗೆ ಅನೇಕ ಭರವಸೆಗಳು ಕೇಳಿಬರುತ್ತಿವೆ. ಆದರೆ ಮಾರುಕಟ್ಟೆ ಖಚಿತತೆ ಇಲ್ಲದ ಪ್ರಯೋಗಗಳು ಅಪಾಯಕಾರಿಯಾಗಬಹುದು. ಅಮೃತಬಳ್ಳಿ, ವಾಸಾಕ, ಬ್ರಾಹ್ಮಿ ಹೀಗೆ ಮಲೆನಾಡಿಗೆ ಹೊಂದಿಕೊಳ್ಳುವ ಸಸ್ಯಗಳನ್ನು ಮೌಲ್ಯವರ್ಧಿತ ಉತ್ಪನ್ನಗಳೊಂದಿಗೆ ಮಾತ್ರ ಪರಿಗಣಿಸಬೇಕು.

ಮೌಲ್ಯವರ್ಧಿತ ಕೃಷಿ ಉತ್ಪನ್ನಗಳು: ನಿಜವಾದ ಬದಲಾವಣೆ ಇಲ್ಲಿದೆ

ಕಚ್ಚಾ ಉತ್ಪನ್ನ ಮಾರಾಟದಲ್ಲಿ ಲಾಭದ ಮಿತಿ ಇದೆ. ಆದರೆ ಮೌಲ್ಯವರ್ಧನೆ ಮಾಡಿದರೆ ಅದೇ ಬೆಳೆ ಆರ್ಥಿಕ ಬಲವಾಗಿ ರೂಪುಗೊಳ್ಳುತ್ತದೆ.

ಸಾಧ್ಯವಾದ ಮೌಲ್ಯವರ್ಧನೆಗಳು

ಬಾಳೆ → ಚಿಪ್ಸ್, ಹಿಟ್ಟು, ಒಣಗಿದ ಬಾಳೆ

ಹಲಸು → ಚಿಪ್ಸ್, ಪುಡಿ, ಬೀಜದ ಹಿಟ್ಟು

ಮಸಾಲೆಗಳು → ಸಾಂಬಾರ್ ಪುಡಿ, ರಸಂ ಪುಡಿ

ಔಷಧಿ ಸಸ್ಯಗಳು → ಕಷಾಯ, ಎಣ್ಣೆ, ಒಣಗಿದ ದ್ರವ್ಯಗಳು

ಕಾಫಿ → ಪುಡಿ, ನೇರ ಮಾರಾಟ, ಸ್ಥಳೀಯ ಬ್ರ್ಯಾಂಡ್

ಗೋಡಂಬಿ → ಸಂಸ್ಕರಣೆ, ಪ್ಯಾಕಿಂಗ್

ಈ ಕೆಲಸಗಳು ಒಬ್ಬ ರೈತನಿಗಿಂತ ಮಹಿಳಾ ಸಂಘಗಳು, ಯುವಕರ ಗುಂಪುಗಳು ಅಥವಾ FPO ಮೂಲಕ ಮಾಡಿದರೆ ಹೆಚ್ಚು ಯಶಸ್ವಿಯಾಗುತ್ತವೆ.

ಸಾರಾಂಶ: ಅಡಿಕೆ ಬದಲಾವಣೆ ಅಲ್ಲ, ಅಡಿಕೆ ಜೊತೆಗೆ ಸಂಯೋಜನೆ:

ಇಂದು ಅಡಿಕೆ ತೋಟದ ರೈತನ ಮುಂದೆ ಇರುವ ಪ್ರಶ್ನೆ “ಅಡಿಕೆ ಬಿಟ್ಟು ಏನು ಮಾಡುವುದು?” ಎಂಬುದಲ್ಲ. "ಅಡಿಕೆಯನ್ನು ಉಳಿಸಿಕೊಂಡೇ, ಅದರ ಜೊತೆಗೆ ಯಾವ ಯಾವ ಆದಾಯ ಮಾರ್ಗಗಳನ್ನು ಸೇರಿಸಬಹುದು?"

ತಕ್ಷಣಕ್ಕೆ: ಬಾಳೆಯಂತಹ ಮಧ್ಯಂತರ ಬೆಳೆಗಳು

ಮಧ್ಯಾವಧಿಗೆ: ಕೋಕೋ, ಕಾಫಿ

ದೀರ್ಘಾವಧಿಗೆ: ಜಾಯಿಕಾಯಿ, ಗೋಡಂಬಿ

ಸದಾ ಲಾಭಕ್ಕೆ: ಮೌಲ್ಯವರ್ಧಿತ ಕೃಷಿ ಉತ್ಪನ್ನಗಳು

ಈ ಸಂಯೋಜಿತ, ಮಿಶ್ರ ಮಾದರಿಯೇ ಮಲೆನಾಡಿನ ಕೃಷಿಯ ಮುಂದಿನ ದಾರಿ.

ಅಡಿಕೆ ಸಂಕಷ್ಟದಲ್ಲಿದೆ. ಆದರೆ ಜಾಣ್ಮೆಯ ಚಿಂತನೆ, ನಿಯಂತ್ರಿತ ನಿರೀಕ್ಷೆ ಮತ್ತು ಸಂಯೋಜಿತ ಪ್ರಯತ್ನಗಳಿಂದ ತೋಟ ಉಳಿಯಬಹುದು, ಬದುಕು ಸಾಗಬಹುದು.