ಕೇರಳದಲ್ಲಿ ಪಂಚಾಯತ್ ಮತ್ತು ನಿಯಮಸಭಾ ಚುನಾವಣೆಗಳು ಸಮೀಪಿಸುತ್ತಿರುವ ಈ ಸಂದರ್ಭದಲ್ಲಿ, ಸರ್ಕಾರ ಹಾಗೂ ರಾಜ್ಯ ಚುನಾವಣಾ ಆಯೋಗ ಮತದಾರರ ಪಟ್ಟಿಯನ್ನು ತಿದ್ದುವ ಕಾರ್ಯದಲ್ಲಿ ತೊಡಗಿವೆ. ಬೂತ್ ಮಟ್ಟದ ಅಧಿಕಾರಿಗಳು (BLOಗಳು) ಪ್ರತಿಯೊಂದು ಮತದಾರರ ಮನೆಗೆ ಭೇಟಿ ನೀಡಿ, ಮತದಾರರ ವಿವರ ಪತ್ರಿಕೆಗಳನ್ನು ಹಂಚಿ, ಜನರಿಗೆ ತಮ್ಮ ವಿವರಗಳನ್ನು ನವೀಕರಿಸಲು ಮನವಿ ಮಾಡುತ್ತಿದ್ದಾರೆ.
ಆದರೆ, ಕಾಸರಗೋಡು ಜಿಲ್ಲೆಯ ಗಡಿನಾಡು ಪ್ರದೇಶದ ಕನ್ನಡಿಗರಿಗೆ ಈ ಪ್ರಜಾತಾಂತ್ರಿಕ ವ್ಯಾಯಾಮವೇ ಒಂದು ಹೊಸ ಸಂಕಷ್ಟವಾಗಿದೆ. ಕನ್ನಡಿಗರ ಸಂಖ್ಯೆ ಹೆಚ್ಚಿನ ಈ ಪ್ರದೇಶದಲ್ಲಿ ಹಂಚಲಾಗುತ್ತಿರುವ ಮತದಾರರ ವಿವರ ಫಾರ್ಮುಗಳು ಸಂಪೂರ್ಣವಾಗಿ ಮಲಯಾಳಂ ಭಾಷೆಯಲ್ಲೇ ಮುದ್ರಿಸಲ್ಪಟ್ಟಿವೆ. 30ಕ್ಕೂ ಹೆಚ್ಚು ಅಂಶಗಳನ್ನೊಳಗೊಂಡ ಈ ಫಾರ್ಮುಗಳಲ್ಲಿ ನೀಡಿರುವ ಸೂಚನೆಗಳು ಕೂಡ ಮಲಯಾಳಂನಲ್ಲಿ ಮಾತ್ರವಿದೆ. ಮಲಯಾಳಂ ಓದಲು ಅಥವಾ ಬರೆಯಲು ಅಸಮರ್ಥರಾದ ಸಾವಿರಾರು ಕನ್ನಡಿಗರು ತಮ್ಮ ಮೂಲಭೂತ ಚುನಾವಣಾ ಹಕ್ಕನ್ನು ಉಪಯೋಗಿಸಲು ಅಸಹಾಯಕರಾಗಿದ್ದಾರೆ.
ಇತ್ತೀಚೆಗಷ್ಟೇ ಮುಖ್ಯಮಂತ್ರಿ ಅವರು ಕೇರಳವನ್ನು “ಬಡತನ ಮುಕ್ತ ರಾಜ್ಯ” ಎಂದು ಘೋಷಿಸಿದರೂ, ಕನ್ನಡಿಗರ ಮೇಲೆ ಮಲಯಾಳಂ ಲಿಪಿಯ ಬಲವಂತದ ಆಕ್ರಮಣದ ಬಡತನ ಇನ್ನೂ ನಿವಾರಣೆ ಯಾಗಿಲ್ಲ. ಬಡತನ ಕಳೆದುಹೋಗಿದೆ ಎಂಬ ಘೋಷಣೆಯ ಹಿಂದೆ “ಭಾಷಾ ಬಡತನ” ಎಂಬ ನಿಜವಾದ ವಾಸ್ತವ್ಯ ಅಡಗಿದೆ. ಕನ್ನಡಿಗರು ಮತದಾರರಾಗಲು ತಮ್ಮ ಹಕ್ಕನ್ನು ಉಪಯೋಗಿಸಬೇಕಾದರೆ ಮೊದಲು ಮಲಯಾಳಂ ಕಲಿಯಬೇಕಾದ ಸ್ಥಿತಿ ಉಂಟಾಗಿದೆ- ಇದು ಕೇರಳದ ಬಹುಭಾಷಾ ಸಂಸ್ಕೃತಿಗೆ ನಾಚಿಕೆಯ ವಿಷಯ.
ಭಾಷೆ ಎಂಬ ಅಂತರವನ್ನು ನಿವಾರಿಸದೆ ಪ್ರಜಾಪ್ರಭುತ್ವವನ್ನು ಪೂರ್ಣಗೊಳಿಸಲು ಸಾಧ್ಯವಿಲ್ಲ. ಆದ್ದರಿಂದ, ಸರ್ಕಾರ ಮತ್ತು ಚುನಾವಣಾ ಆಯೋಗ ಮತದಾರರ ಫಾರ್ಮುಗಳನ್ನು ಕನ್ನಡ-ಮಲಯಾಳಂ ದ್ವಿಭಾಷಾ ರೂಪದಲ್ಲಿ ತಕ್ಷಣ ಪ್ರಕಟಿಸಬೇಕು.
ಕಾಸರಗೋಡು ಕನ್ನಡಿಗರ ಹಕ್ಕು, ಗೌರವ ಮತ್ತು ಪ್ರಜಾತಾಂತ್ರಿಕ ಭಾಗವಹಿಸುವಿಕೆಯನ್ನು ಕಾಪಾಡುವುದು ಸರ್ಕಾರದ ಕಾನೂನುಬದ್ಧ ಮತ್ತು ನೈತಿಕ ಜವಾಬ್ದಾರಿ.
- ಎಸ್. ಎನ್. ಭಟ್, ಸೈಪಂಗಲ್ಲು
ಉಪಯುಕ್ತ ನ್ಯೂಸ್ ಈಗ ಸ್ವದೇಶಿ ಸಾಮಾಜಿಕ ಜಾಲತಾಣ Arattai ನಲ್ಲಿ... ನಮ್ಮ ಚಾನೆಲ್ಗೆ ನೀವೂ ಜಾಯಿನ್ ಆಗಿ.
ನಿರಂತರ ಅಪ್ಡೇಟ್ಗಳಿಗಾಗಿ ಉಪಯುಕ್ತ ನ್ಯೂಸ್ ಟೆಲಿಗ್ರಾಂ ಚಾನೆಲ್ಗೆ ಜಾಯಿನ್ ಆಗಿ
ಉಪಯುಕ್ತ ನ್ಯೂಸ್’ ಫೇಸ್ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್ ವಾಟ್ಸಪ್ ಗ್ರೂಪ್ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ
