“ಶ್ರೀ ವಿಮಾನ”: ವಾಯು ಸಂಚಾರದಲ್ಲಿ ಹೊಸ ಹೆಜ್ಜೆ
ಮಂಗಳೂರು: ಶ್ರೇಷ್ಠ ಅಂತರಶಾಖಾ ಆವಿಷ್ಕಾರದ ಪ್ರದರ್ಶನವಾಗಿ, ಶ್ರೀನಿವಾಸ ವಿಶ್ವವಿದ್ಯಾಲಯದ ಇಂಜಿನಿಯರಿಂಗ್ ಮತ್ತು ತಂತ್ರಜ್ಞಾನ ಸಂಸ್ಥೆಯ ವಿದ್ಯಾರ್ಥಿಗಳು ಮತ್ತು ಅಧ್ಯಾಪಕರ ತಂಡವು ಒಬ್ಬ ವ್ಯಕ್ತಿಯನ್ನು 15 ಕಿಲೋಮೀಟರ್ ದೂರವರೆಗೆ ಸಾಗಿಸಲು ಸಾಮರ್ಥ್ಯ ಹೊಂದಿರುವ ವಿಶಿಷ್ಟ ಮಾನವ ಸಾಗಣೆ ಡ್ರೋನ್ "ಶ್ರೀ ವಿಮಾನ" ವನ್ನು ಅಭಿವೃದ್ಧಿಪಡಿಸಿದ್ದು, ಅದರ ಯಶಸ್ವಿ ಉಡಾವಣೆ ಇಂದು (ಆ.25) ಶ್ರೀನಿವಾಸ ಕಾಲೇಜಿನ ಮುಕ್ಕ ಕ್ಯಾಂಪಸ್‌ನಲ್ಲಿ ನಡೆಯಿತು.
ಮೆಕ್ಯಾನಿಕಲ್ ಇಂಜಿನಿಯರಿಂಗ್, ಎಲೆಕ್ಟ್ರಾನಿಕ್ಸ್ ಮತ್ತು ಎಐ, ರೋಬೋಟಿಕ್ಸ್ ಮತ್ತು ವಿಮಾನ ನಿರ್ವಹಣಾ ಇಂಜಿನಿಯರಿಂಗ್ ವಿಭಾಗಗಳ ಸಹಯೋಗದೊಂದಿಗೆ ಈ ಯೋಜನೆ ರೂಪುಗೊಂಡಿದ್ದು, ವಿಪತ್ತು ನಿರ್ವಹಣೆ, ಆರೋಗ್ಯ ಸೇವೆ ಮತ್ತು ರಕ್ಷಣಾ ಕ್ಷೇತ್ರಗಳಲ್ಲಿ ಮಹತ್ವದ ಬದಲಾವಣೆ ತರುವ ಸಾಮರ್ಥ್ಯವನ್ನು ಹೊಂದಿದೆ.
ಶ್ರೀನಿವಾಸ ವಿಶ್ವವಿದ್ಯಾಲಯದ ಮಾನ್ಯ ಕುಲಾಧಿಪತಿ ಡಾ. ಸಿಎ ಎ. ರಾಘವೇಂದ್ರರಾವ್‌ ಮಾತನಾಡಿ, ಶ್ರೀನಿವಾಸ ವಿಶ್ವವಿದ್ಯಾಲಯದ ಸಾಧನೆಗಳಲ್ಲಿ ಈ ಶ್ರೀ ವಿಮಾನ ಒಂದು ಮೈಲಿಗಲ್ಲು. ವಿದ್ಯಾರ್ಥಿಗಳು ಮೆಕ್ಯಾನಿಕಲ್ ಇಂಜಿನಿಯರಿಂಗ್ ವಿಭಾಗದ ಮುಖ್ಯಸ್ಥ ಪ್ರೊ. ವಿಶ್ವಾಸ್ ಶೆಟ್ಟಿ ನೇತೃತ್ವದಲ್ಲಿ ಈ ಡ್ರೋನ್ ಅನ್ನು ಅಭಿವೃದ್ಧಿಪಡಿಸಿದ್ದಾರೆ. ಮುಂದಿನ ದಿನಗಳಲ್ಲಿ ಇನ್ನಷ್ಟು ಆವಿಷ್ಕಾರಗಳು ನಮ್ಮಲ್ಲಿ ನಡೆಯಲಿದೆ ಎಂದರು.
ಶ್ರೀನಿವಾಸ ವಿಶ್ವವಿದ್ಯಾಲಯದ ಮಾನ್ಯ ಸಹ ಕುಲಾಧಿಪತಿ ಡಾ. ಎ. ಶ್ರೀನಿವಾಸ ರಾವ್, ಶ್ರೀನಿವಾಸ ವಿಶ್ವ ವಿದ್ಯಾಲಯದ ಬೋರ್ಡ್‌ ಆಫ್‌ ಗವರ್ನರ್ಸ್‌ ಸದಸ್ಯರಾದ ಶ್ರೀಮತಿ ಎ. ವಿಜಯಲಕ್ಷ್ಮೀ ಆರ್‌ ರಾವ್, ಪ್ರೊ. ಶ್ರೀಮತಿ ಇಆರ್‌. ಮಿತ್ರಾ ಎಸ್‌. ರಾವ್, ಶ್ರೀನಿವಾಸ ವಿಶ್ವವಿದ್ಯಾಲಯದ ರಿಜಿಸ್ಟ್ರಾರ್‌ ಡಾ. ಅನಿಲ್‌ ಕುಮಾರ್‌, ಅಭಿವೃದ್ಧಿ ರಿಜಿಸ್ಟ್ರಾರ್‌ ಡಾ. ಅಜಯ್‌ಕುಮಾರ್‌ ಮತ್ತಿತರರು ಉಪಸ್ಥಿತರಿದ್ದರು.
ಅತ್ಯವಶ್ಯಕತೆಗೆ ಹೊಸ ವಿನ್ಯಾಸ
ಸಾಮಾನ್ಯವಾಗಿ ಸರಕು ಅಥವಾ ನಿಗಾವೀಕ್ಷಣೆಗೆ ಬಳಸುವ ಡ್ರೋನ್‌ಗಳಿಗಿಂತ ವಿಭಿನ್ನವಾಗಿ, ಈ ಹೊಸ ಡ್ರೋನ್ ಮಾನವನನ್ನು ಸುರಕ್ಷಿತವಾಗಿ ಹಾಗೂ ಪರಿಣಾಮಕಾರಿಯಾಗಿ ಸಾಗಿಸಲು ವಿನ್ಯಾಸಗೊಳಿಸಲಾಗಿದೆ. ಜೀವಂತ ಪ್ರಯಾಣಿಕನನ್ನು ಸಾಗಿಸುವಲ್ಲಿ ಎದುರಾಗುವ ವಿಶೇಷ ಸವಾಲುಗಳನ್ನು ಎದುರಿಸಲು ಅಭಿವೃದ್ಧಿ ತಂಡವು ಸ್ಥಿರತೆ, ಸುರಕ್ಷತೆ ಮತ್ತು ಒಟ್ಟಾರೆ ಕಾರ್ಯಕ್ಷಮತೆಯನ್ನು ದೃಢೀಕರಿಸಲು ವ್ಯಾಪಕ ಪರೀಕ್ಷೆಗಳನ್ನು ನಡೆಸಿದೆ. ಈ ಸೂಕ್ಷ್ಮವಾದ ವಿಧಾನವು ವಿಶ್ವವಿದ್ಯಾಲಯವು ಮಾನವ ಸುರಕ್ಷತೆಯನ್ನು ಪ್ರಥಮ ಆದ್ಯತೆಯಾಗಿ ಪರಿಗಣಿಸಿರುವುದನ್ನು ತೋರಿಸುತ್ತದೆ. ಯಶಸ್ವೀ ಪರೀಕ್ಷೆಗಳು, ವಿವಿಧ ಪರಿಸ್ಥಿತಿಗಳಲ್ಲಿಯೂ ಡ್ರೋನ್ ಸಮತೋಲನ ಹಾರಾಟ ಹಾಗೂ ವಿಶ್ವಾಸಾರ್ಹವಾಗಿ ಕಾರ್ಯನಿರ್ವಹಿಸಲು ಸಾಮರ್ಥ್ಯ ಹೊಂದಿದೆ ಎಂದು ಶ್ರೀನಿವಾಸ ವಿಶ್ವವಿದ್ಯಾಲಯದ ಮಾನ್ಯ ಸಹ ಕುಲಾಧಿಪತಿ ಡಾ. ಎ. ಶ್ರೀನಿವಾಸ ರಾವ್ ಹೇಳಿದರು.
ಸಮಾಜ ಹಿತಕ್ಕಾಗಿ ಬಹುಮುಖ ಅನ್ವಯಿಕೆಗಳು
ಈ ಡ್ರೋನ್‌ನ ಸಾಧ್ಯ ಅನ್ವಯಿಕೆಗಳು ವ್ಯಾಪಕವಾಗಿದ್ದು, ಸಮಾಜದ ಮೇಲೆ ಪರಿವರ್ತನಾ ಪರಿಣಾಮ ಬೀರಬಲ್ಲವು. ಪ್ರವಾಹಗಳು ಅಥವಾ ಭೂಕಂಪಗಳಂತಹ ಪ್ರಕೃತಿ ವಿಕೋಪಗಳ ಸಂದರ್ಭದಲ್ಲಿ, ಇದು ತಲುಪಲು ಅಸಾಧ್ಯವಾದ ಪ್ರದೇಶಗಳಲ್ಲಿ ಸಿಲುಕಿದವರನ್ನು ರಕ್ಷಿಸಲು ಬಳಸಬಹುದಾಗಿದೆ. ತುರ್ತು ಪರಿಸ್ಥಿತಿಗಳಲ್ಲಿ ಅಥವಾ ಅಪಘಾತಗಳಲ್ಲಿ, ವೈದ್ಯಕೀಯ ಸಿಬ್ಬಂದಿ, ಔಷಧಿ ಮತ್ತು ಅಗತ್ಯ ವಸ್ತುಗಳನ್ನು ದೂರದ ಅಥವಾ ತಲುಪಲು ಕಷ್ಟವಾದ ಪ್ರದೇಶಗಳಿಗೆ ಶೀಘ್ರ ಸಾಗಿಸಲು ಇದನ್ನು ಉಪಯೋಗಿಸ ಬಹುದು. ಮಾನವೀಯ ಕಾರ್ಯಾಚರಣೆಗಳ ಹೊರತಾಗಿ, ಡ್ರೋನ್‌ನ ಅತ್ಯಾಧುನಿಕ ಸಾಮರ್ಥ್ಯಗಳು ರಕ್ಷಣಾ ತಂತ್ರಜ್ಞಾನದಲ್ಲೂ ಮಹತ್ವದ ಅಭಿವೃದ್ಧಿಗೆ ದಾರಿ ತೆರೆದಿವೆ.
ನಿಯಮಾತ್ಮಕ ಚೌಕಟ್ಟಿನಲ್ಲಿನ ದಿಕ್ಕು
ಮಾನವ ಸಾಗಿಸುವ ಮಾನವರಹಿತ ವಾಯುಯಾನ ವಾಹನಗಳ (UAVs) ನಿಯಂತ್ರಣ ಚೌಕಟ್ಟಿನ ಸಂಕೀರ್ಣತೆಯನ್ನು ಗುರುತಿಸಿ, ಶ್ರೀನಿವಾಸ ವಿಶ್ವವಿದ್ಯಾಲಯವು ನಾಗರಿಕ ವಿಮಾನಯಾನ ಮಹಾನಿರ್ದೇಶನಾಲಯ (DGCA) ಹಾಗೂ ಇತರ ನಿಯಂತ್ರಣ ಸಂಸ್ಥೆಗಳ ಮಾರ್ಗಸೂಚಿಗಳನ್ನು ಅನುಸರಿಸಲು ವಿಶೇಷ ಗಮನ ಹರಿಸಿದೆ. ಡ್ರೋನ್‌ಗಳ ತೂಕದ ಆಧಾರದ ಮೇಲೆ DGCA ವರ್ಗೀಕರಣ ಹೊಂದಿದ್ದು, ನೋಂದಣಿ, ಪೈಲಟ್ ಪ್ರಮಾಣಪತ್ರ ಮತ್ತು ಕಾರ್ಯಾಚರಣೆ ವಲಯಗಳ ಕುರಿತು ಕಟ್ಟುನಿಟ್ಟಿನ ನಿಯಮಗಳನ್ನು ಹೊಂದಿದೆ. ಈ ನಿಯಮಗಳಿಗೆ ತಕ್ಕಂತೆ ಕಾರ್ಯನಿರ್ವಹಿಸುವ ವಿಶ್ವವಿದ್ಯಾಲಯದ ದೃಷ್ಟಿಕೋನವು ಯೋಜನೆಯ ಯಶಸ್ವಿ ಅನುಮೋದನೆ ಮತ್ತು ಜವಾಬ್ದಾರಿಯುತ ಬಳಕೆಗೆ ದಾರಿಯಾಗುತ್ತದೆ ಎಂದು ಮೆಕ್ಯಾನಿಕಲ್ ಇಂಜಿನಿಯರಿಂಗ್ ವಿಭಾಗದ ಮುಖ್ಯಸ್ಥ ಪ್ರೊ. ವಿಶ್ವಾಸ್ ಶೆಟ್ಟಿ ತಿಳಿಸಿದರು.
ಭವಿಷ್ಯದ ಆವಿಷ್ಕಾರಗಳಿಗೆ ಅಂತರಶಾಖಾ ಮಾದರಿ
ಈ ಡ್ರೋನ್ ಅಭಿವೃದ್ಧಿ ಅಂತರಶಾಖಾ ಸಹಕಾರದ ಶಕ್ತಿಯ ಅದ್ಭುತ ಉದಾಹರಣೆ. ಮೆಕ್ಯಾನಿಕಲ್ ಇಂಜಿನಿಯರಿಂಗ್‌ನ ಸಂರಚನಾ ದೃಢತೆ, ಕೃತಕ ಬುದ್ಧಿಮತ್ತೆ ಮತ್ತು ರೋಬೋಟಿಕ್ಸ್‌ನ ಸ್ವಯಂ ನಿಯಂತ್ರಣ ವ್ಯವಸ್ಥೆ, ಮತ್ತು ವಿಮಾನ ನಿರ್ವಹಣೆಯ ಕಾರ್ಯಾತ್ಮಕ ತಂತ್ರಗಳನ್ನು ಒಗ್ಗೂಡಿಸುವ ಮೂಲಕ ಮಹತ್ವದ ಪರಿಹಾರ ಕಂಡುಕೊಳ್ಳಲಾಗಿದೆ. ಈ ಯೋಜನೆ ಭವಿಷ್ಯದ ಸಂಶೋಧನೆ ಹಾಗೂ ಅಭಿವೃದ್ಧಿಗೆ ಮಾದರಿಯಾಗಿದ್ದು, ನೈಜ ಜಗತ್ತಿನ ಸವಾಲುಗಳಿಗೆ ಪರಿಹಾರ ಕಂಡುಕೊಳ್ಳುವಲ್ಲಿ ಶೈಕ್ಷಣಿಕ ಸಂಸ್ಥೆಗಳ ಪಾತ್ರವನ್ನು ತೋರಿಸುತ್ತದೆ. ಇದು ಶ್ರೀನಿವಾಸ ವಿಶ್ವವಿದ್ಯಾಲಯವನ್ನು ವಾಯು ಸಂಚಾರ ಕ್ಷೇತ್ರದಲ್ಲಿ ಮುಂಚೂಣಿಯಲ್ಲಿರಿಸುತ್ತದೆ.
ಈ ತಂಡವನ್ನು ಮೆಕ್ಯಾನಿಕಲ್ ಇಂಜಿನಿಯರಿಂಗ್ ವಿಭಾಗದ ಮುಖ್ಯಸ್ಥ ಪ್ರೊ. ವಿಶ್ವಾಸ್ ಶೆಟ್ಟಿ ಅವರ ನೇತೃತ್ವದಲ್ಲಿ ವಿದ್ಯಾರ್ಥಿಗಳಾದ ವಿಶಾಖ್‌ ಮೆಂಡನ್‌ (ಮೆಕ್ಯಾನಿಕಲ್ ಇಂಜಿನಿಯರಿಂಗ್), ಅರವಿಂದ್‌ ವಿಲ್ಸನ್‌ (ರೋಬೋಟಿಕ್ಸ್ ಇಂಜಿನಿಯರಿಂಗ್) ಈ ಯೋಜನೆಯನ್ನು ಮುನ್ನಡೆಸಿದ್ದಾರೆ. ಶ್ರೀನಿವಾಸ ವಿದ್ಯಾಲಯದ ಮಾನ್ಯ ಕುಲಾಧಿಪತಿ ಡಾ. ಸಿ.ಎ. ಎ. ರಾಘವೇಂದ್ರ ರಾವ್ ಮತ್ತು ಮಾನ್ಯ ಸಹ ಕುಲಾಧಿಪತಿ ಡಾ. ಎ. ಶ್ರೀನಿವಾಸ ರಾವ್ ಅವರ ಸಕ್ರಿಯ ಪ್ರೋತ್ಸಾಹ ಈ ಯೋಜನೆಯ ಯಶಸ್ಸಿಗೆ ಮುಖ್ಯ ಕಾರಣವಾಗಿದೆ. ಈ ಉಡಾವಣೆಯಲ್ಲಿ ಪ್ರೊ. ಸ್ವಾತಿ ಶ್ರೀ ವಿಮಾನದಲ್ಲಿ ಮೊದಲ ಬಾರಿ ಹಾರಾಟ ನಡೆಸಿದ ಮಹಿಳೆಯಾಗಿದ್ದಾರೆ. ಶ್ರೀನಿವಾಸ ವಿಶ್ವವಿದ್ಯಾಲಯದ ಇಂಜಿನಿಯರಿಂಗ್ ಮತ್ತು ತಂತ್ರಜ್ಞಾನ ಸಂಸ್ಥೆಯ ಡೀನ್‌ ಡಾ. ರಾಮಕೃಷ್ಣ ಎನ್‌. ಹೆಗ್ಡೆ, ಸಂಶೋಧನಾ ನಿರ್ದೇಶಕ ಡಾ. ಪ್ರವೀಣ್‌ ಬಿ. ಎಂ., ಶ್ರೀ ಗಜಾನನ ಮೆಶಿನ್‌ ವರ್ಕ್ಸ್‌ ನ ಬಾಲಕೃಷ್ಣ ಗಟ್ಟಿ ಡ್ರೋನ್ ವೆಲ್ಡಿಂಗ್‌ ಕಾರ್ಯದಲ್ಲಿ ನೆರವು ನೀಡಿದ್ದಾರೆ.
ನಿರಂತರ ಅಪ್‌ಡೇಟ್‌ಗಳಿಗಾಗಿ ಉಪಯುಕ್ತ ನ್ಯೂಸ್‌ ಟೆಲಿಗ್ರಾಂ ಚಾನೆಲ್‌ಗೆ ಜಾಯಿನ್ ಆಗಿ
ಉಪಯುಕ್ತ ನ್ಯೂಸ್‌’ ಫೇಸ್‌ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್‌ ವಾಟ್ಸಪ್‌ ಗ್ರೂಪ್‌ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ
