ನವಮಿಯ ಶುಭ ದಿನ ಅವತರಿಸಲು ಭಾಗ್ಯ
ಸವಿ ನಿನ್ನ ನಾಮ ಶ್ರೀ ರಾಮ ..
ರಾಮನ ಪುಣ್ಯದ ನಾಮವ ಭಜಿಸುವ
ಕಾಮನೆ ಸಕಲ ನೆರವೇರೆ..
ದಶರಥ ಕುವರನೆ ಯಶಸನು ಕರುಣಿಸು
ದಶಕಂಠ ವೈರಿ ಭಗವಂತ ..
ಭರತನ ಸೋದರ ವರರಾಮ ರಕ್ಷಿಸೆ
ವರಗಳ ನೀಡು ಪರಮಾತ್ಮ..
ಸಲಿಸುವೆ ಪಾಯಸದೊಲುಮೆಯ ನೈವೇದ್ಯ
ಕಲಿಯುಗದಲ್ಲಿ ತಾರಕ..
ಸೀತೆಯ ಪತಿ ನೀನು ನೀತಿಯ ಪಾಲಕ
ಖ್ಯಾತನು ರಾಮ ಜಗದಲ್ಲಿ..
ರವಿ ಕುಲ ತಿಲಕನು ಕವಿದಿಹ ಮನದಲಿ
ಕವಿ ವಾಣಿಯಲ್ಲಿ ಹಿರಿಯಣ್ಣ..
ನಿನ್ನದೆ ಬದುಕನು ಹೊನ್ನಿನ ತೆರದಲಿ
ಮನ್ನಿಸಿ ಬರೆದ ವಾಲ್ಮೀಕಿ..
ರಾಮನ ಪಾವನ ನಾಮವ ನೆನೆಯಲು
ಕಾಮವು ತೊಲಗಿ ನಿಷ್ಕಾಮ ..
ನಿನಗಾಗಿ ನಿರ್ಮಿತ ಘನವಾದ ದೇಗುಲ
ಮನಸಲಿ ನಿಂತು ಸಾನಂದ..
ರಾಮನ ನೀತಿಯ ಧಾಮದಿ ಪಾಲಿಸೆ
ಶಾಮಕ ಗುಣವು ಮನದಲ್ಲಿ..
ರಾಮನ ಭರಣವು ಭೂಮಿಗೆ ದೊರಕಲಿ
ರಾಮನೆ ಗತಿಯು ನಮಗೆಲ್ಲ..
- ಗುಣಾಜೆ ರಾಮಚಂದ್ರ ಭಟ್
ಉಪಯುಕ್ತ ನ್ಯೂಸ್‌’ ಫೇಸ್‌ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್‌ ವಾಟ್ಸಪ್‌ ಗ್ರೂಪ್‌ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ
