ಇದು ತರತರದ ಆಟಿಕೆಗಳನ್ನು ತನ್ನ ಮುಂದೆ ಹರವಿಕೊಂಡು ಆಟವಾಡುವ ವಯಸ್ಸು. ಇಂದಿನ ದಿನಗಳಲ್ಲಿ ಪುಟ್ಟಪುಟ್ಟ ಮಕ್ಕಳ ಕೈಗಳಲ್ಲಿ ಮೊಬೈಲ್ ಗಳು, ಕಣ್ಣಮುಂದೆ ಕಂಪ್ಯೂಟರ್, ಟಿವಿ. ಆದರೆ, ಇಲ್ಲಿ ಈ ಬಾಲಕನ ಕೈಗಳು ಆಟವಾಡಿದ್ದು ಒಂದು ಬಾಚಣಿಗೆ ಹಾಗೂ ಒಂದು ಪ್ಲಾಸ್ಟಿಕ್ ತುಂಡು ಜತೆಯಲ್ಲಿ. ಇವುಗಳನ್ನು ತನ್ನ ಪುಟ್ಟ ಕೈಗಳಲ್ಲಿ ಗಟ್ಟಿಯಾಗಿ ಹಿಡಿದುಕೊಂಡು, ತುಟಿಗಳ ನಡುವೆ ಇಟ್ಟು ನುಡಿಸಿದಾಗ ಬಂದದ್ದು 'ಕಾಂತಾರ'ದ 'ವರಾಹ ರೂಪಂ..'!
ಇಲ್ಲಿ ಕೇಳಿ:
ದೇಶವಿದೇಶಗಳಲ್ಲಿ ಸುದ್ದಿ ಮಾಡಿದ ಕಾಂತಾರ ತೆರೆಕಂಡು 100 ದಿನಗಳ ದಾಖಲೆ ನಿರ್ಮಿಸಿದೆ. ಆದರೂ ಇದರ ಹಾಡುಗಳ ಹವಾ ಕಳೆಗುಂದಿಲ್ಲ. ಈ ಸಂದರ್ಭದಲ್ಲಿ ಬಾಲಕನೊಬ್ಬನ ಈ ಸಾಧನೆ ಮುದನೀಡುತ್ತದೆ. ನಾಟ್ಯ, ನಟನೆ, ಹಾಡು, ರೀಲ್ಸ್, ಮ್ಯೂಸಿಕ್, ಕುಂಚಗಳ ಮೂಲಕ ಹಲವರು 'ಕಾಂತಾರ' ಕ್ಕೆ ತಮ್ಮ ಪ್ರತಿಭೆಯನ್ನು ಅರ್ಪಿಸಿದ್ದಾರೆ. ಈ ಹುಡುಗ ಮಾತ್ರ ಬಾಚಣಿಗೆ, ಪ್ಲಾಸ್ಟಿಕ್ ತುಂಡು ಬಳಸಿ ವಿಶಿಷ್ಟ ರೀತಿಯಲ್ಲಿ ನುಡಿಸಿ ಎಲ್ಲರಿಗಿಂತ ವಿಭಿನ್ನ ಎನಿಸಿಕೊಂಡಿದ್ದಾನೆ. ಹಿನ್ನೆಲೆಯಲ್ಲಿ ಯುಕುಲೆಲೆ, ಗಿಟಾರ್ ಮತ್ತು ಮೆಲೊಡಿಕಾ ನುಡಿಸಿ ಮಗನಿಗೆ ಸಾಥ್ ನೀಡಿದ್ದಾರೆ ತಂದೆ ಪಾಣಿನಿ ದೇರಾಜೆ.
ವಯಸ್ಸು ಅನ್ನುವುದು ಕೇವಲ ಒಂದು ಸಂಖ್ಯೆ ಅನ್ನುವುದನ್ನು ನಿರೂಪಿಸುವುದು ಇಂತಹ ಪ್ರತಿಭಾವಂತ ಮಕ್ಕಳೇ. ಈತನ ವಯಸ್ಸು ಕೇವಲ ಐದುವರೆ ವರ್ಷ. ಹೆಸರು ಅಪ್ರಮೇಯ ದೇರಾಜೆ. ಮೈಸೂರಿನ 'ಅರಿವು' ಶಾಲೆಯಲ್ಲಿ ಯುಕೆಜಿ ವಿದ್ಯಾರ್ಥಿ.
ಬಾಲ ಪ್ರತಿಭೆ ಎಂಬುದು ದೈವದತ್ತವಾದದ್ದೇನೋ. ಚಿಕ್ಕಮಕ್ಕಳಲ್ಲಿ ಅಸಾಧಾರಣವಾದ ಅಮಿತ ಪ್ರತಿಭೆ, ಅಪಾರ ಸೃಜನಶೀಲತೆ ಕಂಡುಬರುವುದು ವಿಶೇಷವೇನಲ್ಲ. ಸಂಗೀತ, ನೃತ್ಯ, ಚಿತ್ರಕಲೆ, ಕ್ರೀಡೆ, ಓದು ಮುಂತಾದ ಹಲವು ಕ್ಷೇತ್ರಗಳಲ್ಲಿ ಇಂತಹ ಮಕ್ಕಳು ಕಾಣಸಿಗುತ್ತಾರೆ. ಈ ಮಕ್ಕಳ ಪ್ರತಿಭೆಯನ್ನು ಸೂಕ್ತ ಸಮಯದಲ್ಲಿ ಗುರುತಿಸಿ, ಉತ್ತಮ ಗುಣಮಟ್ಟದ ತರಬೇತಿ ನೀಡಿದರೆ ನಿರೀಕ್ಷೆ ಮೀರಿ ಬೆಳೆದುಬಿಡುತ್ತಾರೆ. ಸ್ವಲ್ಪಮಟ್ಟಿಗೆ ಅನುವಂಶಿಕತೆಯೂ ಕಾರಣವಾಗಬಹುದು. ಇದಲ್ಲದೆ, ಹುಟ್ಟಿ ಬೆಳೆವ ಮನೆಯ ಪರಿಸರವು ಕೇಳುತ್ತಾ, ನೋಡುತ್ತಾ ಆಡುತ್ತಾ ಬೆಳೆವ ಮಗುವಿನ ಮೇಲೆ ಅತೀವ ಪರಿಣಾಮಕಾರಿ. ಒಡನಾಡುವ ವ್ಯಕ್ತಿಗಳು ಕೂಡಾ ಮಕ್ಕಳ ಸೃಜನಶೀಲತೆ ವಿಕಾಸಕ್ಕೆ, ವ್ಯಕ್ತಿತ್ವ ನಿರ್ಮಾಣಕ್ಕೆ ಪೂರಕವಾದ ವಿಚಾರಗಳು. ಇಂತಹ ಪರಿಸರ ಮಕ್ಕಳ ಸಾಧನೆಗೆ ವಿಫುಲ ಅವಕಾಶವನ್ನು ಕೂಡ ಒದಗಿಸುತ್ತದೆ.
ಇಂತಹ ಪೂರಕ ವಾತಾವರಣದಲ್ಲಿ ಬೆಳೆಯುತ್ತಿದ್ದಾನೆ ಅಪ್ರಮೇಯ.
ತಂದೆ ಪಾಣಿನಿ ದೇರಾಜೆ. ಸಂಗೀತದ ವಿವಿಧ ಆಯಾಮಗಳಲ್ಲಿ ತಮ್ಮನ್ನು ತೊಡಗಿಸಿಕೊಂಡವರು. ಬಹುವಾದ್ಯ ಪರಿಣತ. ತಾಯಿ ಸುಮಾ. ಅಲ್ಪ ಸ್ವಲ್ಪ ಪಿಟೀಲು ನುಡಿಸುವುದನ್ನು, ಹಾಡುವುದನ್ನು ಕಲಿತುಕೊಂಡವರು. ಇವರ ಅಜ್ಜ ಅಡ್ಕ ಗೋಪಾಲಕೃಷ್ಣ ಭಟ್ ಯಕ್ಷಗಾನ ಕ್ಷೇತ್ರದಲ್ಲಿ ಹೆಸರು ಮಾಡಿದವರು.
ಯಕ್ಷಗಾನ, ತಾಳಮದ್ದಳೆ, ನಾಟಕ, ಸಂಗೀತ, ಸಾಹಿತ್ಯ ಕ್ಷೇತ್ರದಲ್ಲಿ ಛಾಪು ಮೂಡಿಸಿರುವ ದೇರಾಜೆ ಕುಟುಂಬದ ನಾಲ್ಕನೇ ತಲೆಮಾರಿನ ಕುಡಿ ಈ ಅಪ್ರಮೇಯ. ಈಗಾಗಲೇ, ಹಾಡುವುದು, ತಬ್ಲಾ, ರಿದಂ ಪ್ಯಾಡ್, ಗಿಟಾರ್ ನುಡಿಸುವ ಬಗ್ಗೆ ಅತೀವ ಆಸಕ್ತಿ ಇವನಿಗೆ.
ಅಪ್ರಮೇಯನ ಪ್ರತಿಭೆ ಅಪ್ರಮೇಯವಾಗಿ ಬೆಳೆಯಲಿ.
ಅಪ್ರಮೇಯನ ಇತರ ವಿಡಿಯೋಗಳು ಯೂಟ್ಯೂಬ್ ನ 'Panini Deraje' ಎಂಬ ಚಾನೆಲ್ನಲ್ಲಿ 'Aprameya' ಎಂಬ ಪ್ಲೇ ಲಿಸ್ಟ್ ನಲ್ಲಿ ಲಭ್ಯ.
https://youtube.com/playlist?list=PLNsrHhJq5G6AsUp5FCTcvpuZIOsJaSTcx
ನಿರಂತರ ಅಪ್‌ಡೇಟ್‌ಗಳಿಗಾಗಿ ಉಪಯುಕ್ತ ನ್ಯೂಸ್‌ ಟೆಲಿಗ್ರಾಂ ಚಾನೆಲ್‌ಗೆ ಜಾಯಿನ್‌ ಆಗಿ
ಉಪಯುಕ್ತ ನ್ಯೂಸ್‌’ ಫೇಸ್‌ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್‌ ವಾಟ್ಸಪ್‌ ಗ್ರೂಪಿಗೆ ಸೇರಲು ಈ ಲಿಂಕ್ ಕ್ಲಿಕ್ ಮಾಡಿ
