ಎಐ ಚಿತ್ರ
ಬೆಂಗಳೂರು: ಭಾರತ ಸರ್ಕಾರದ 'ಸ್ವಚ್ಛತಾ ಹೀ ಸೇವಾ-2026' ಅಭಿಯಾನದ ಭಾಗವಾಗಿ, ಕರ್ನಾಟಕ ಅಂಚೆ ವೃತ್ತವು ಲಾಭರಹಿತ ಸಂಸ್ಥೆ 'ಗೂಂಜ್' (GOONJ) ಜೊತೆಗೂಡಿ ನಗರದಲ್ಲಿ ಬಟ್ಟೆ ಹಾಗೂ ಉಪಯುಕ್ತ ವಸ್ತುಗಳ ಸಂಗ್ರಹಣಾ ಅಭಿಯಾನವನ್ನು ಕೈಗೆತ್ತಿಕೊಂಡಿದೆ. ಪರಿಸರ ಸ್ವಚ್ಛತೆ, ಸುಸ್ಥಿರತೆ, ಸಂಪನ್ಮೂಲಗಳ ಮರುಬಳಕೆ ಮತ್ತು ಸಾಮಾಜಿಕ ಜವಾಬ್ದಾರಿಯನ್ನು ಉತ್ತೇಜಿಸುವುದು ಈ ಯೋಜನೆಯ ಮುಖ್ಯ ಉದ್ದೇಶವಾಗಿದೆ.
ತಮ್ಮಲ್ಲಿ ಬಳಕೆಯಾಗದೆ ಉಳಿದಿರುವ ಅಥವಾ ಕಡಿಮೆ ಬಳಕೆಯಾದ ಸ್ವಚ್ಛ ಹಾಗೂ ಉತ್ತಮ ಸ್ಥಿತಿಯಲ್ಲಿರುವ ವಸ್ತುಗಳನ್ನು ಅಗತ್ಯವಿರುವ ಜನರಿಗೆ ತಲುಪಿಸುವ ಮೂಲಕ, ಅವರ ಗೌರವ ಮತ್ತು ಘನತೆಗೆ ಭಂಗ ಬಾರದಂತೆ ನೆರವಾಗಲು ಈ ಅಭಿಯಾನವು ಸೇತುವೆಯಾಗಿ ಕೆಲಸ ಮಾಡಲಿದೆ.
ಬೆಂಗಳೂರಿನ 10 ಅಂಚೆ ಕಚೇರಿಗಳಲ್ಲಿ ಸಂಗ್ರಹಣಾ ಕೇಂದ್ರಗಳು:
ಅಂಚೆ ಇಲಾಖೆಯ ನೌಕರರು ಸ್ವಯಂಪ್ರೇರಿತರಾಗಿ ವಸ್ತುಗಳನ್ನು ನೀಡಲು ಅನುಕೂಲವಾಗುವಂತೆ ಬೆಂಗಳೂರಿನ ಪ್ರಮುಖ 10 ಅಂಚೆ ಕಚೇರಿಗಳಲ್ಲಿ ವಿಶೇಷ ಸಂಗ್ರಹಣಾ ಪೆಟ್ಟಿಗೆಗಳನ್ನು (Collection Bins) ಇರಿಸಲಾಗಿದೆ:
ಬೆಂಗಳೂರು ಜಿ.ಪಿ.ಒ. (Bengaluru GPO), ಮ್ಯೂಸಿಯಂ ರಸ್ತೆ ಅಂಚೆ ಕಚೇರಿ, ಬಸವೇಶ್ವರನಗರ ಅಂಚೆ ಕಚೇರಿ, ವಿಜಯನಗರ ಅಂಚೆ ಕಚೇರಿ, ಕುಮಾರಸ್ವಾಮಿ ಲೇಔಟ್‌ ಅಂಚೆ ಕಚೇರಿ, ಯಲಹಂಕ ಅಂಚೆ ಕಚೇರಿ, ಡಿ.ಆರ್. ಕಾಲೇಜು ಅಂಚೆ ಕಚೇರಿ, ಇಂದಿರಾನಗರ ಅಂಚೆ ಕಚೇರಿ, ಕೋರಮಂಗಲ 6ನೇ ಬ್ಲಾಕ್ ಅಂಚೆ ಕಚೇರಿ, ಸದಾಶಿವನಗರ ಅಂಚೆ ಕಚೇರಿ.
ಅಕ್ಟೋಬರ್ 31 ರವರೆಗೆ ಅವಕಾಶ:
ಈ ಅಭಿಯಾನವು ಅಕ್ಟೋಬರ್ 08, 2026 ರಂದು ಪ್ರಾರಂಭವಾಗಿದ್ದು, ಅಕ್ಟೋಬರ್ 31, 2026 ರವರೆಗೆ ವಸ್ತುಗಳನ್ನು ಸಂಗ್ರಹಿಸಲಾಗುತ್ತದೆ. ಸಂಗ್ರಹವಾದ ಎಲ್ಲಾ ಸಾಮಗ್ರಿಗಳನ್ನು 'ಗೂಂಜ್' ಸಂಸ್ಥೆಗೆ ಹಸ್ತಾಂತರಿಸಲಾಗುವುದು. ಸಂಸ್ಥೆಯು ತನ್ನ ಸುಸಜ್ಜಿತ ವಿತರಣಾ ಜಾಲದ ಮೂಲಕ ಅರ್ಹ ಫಲಾನುಭವಿಗಳಿಗೆ ಇವುಗಳನ್ನು ತಲುಪಿಸಲಿದೆ.
"ಸ್ವಚ್ಛತೆ ಎಂದರೆ ಕೇವಲ ಸುತ್ತಮುತ್ತಲಿನ ಪರಿಸರವನ್ನು ಶುಚಿಯಾಗಿಡುವುದಲ್ಲ, ಸಂಪನ್ಮೂಲಗಳನ್ನು ಜವಾಬ್ದಾರಿಯುತವಾಗಿ ಬಳಸುವುದು ಮತ್ತು ಮರುಬಳಕೆ ಮಾಡುವುದೂ ಆಗಿದೆ" ಎಂದು ಅಭಿಪ್ರಾಯಪಟ್ಟಿರುವ ಕರ್ನಾಟಕ ಅಂಚೆ ವೃತ್ತದ ಮುಖ್ಯ ಪೋಸ್ಟ್ ಮಾಸ್ಟರ್ ಜನರಲ್ ಅವರು, ಬೆಂಗಳೂರಿನಲ್ಲಿ ಕಾರ್ಯನಿರ್ವಹಿಸುತ್ತಿರುವ ಅಂಚೆ ಇಲಾಖೆಯ ಎಲ್ಲಾ ಸಿಬ್ಬಂದಿ ಈ ಅಭಿಯಾನದಲ್ಲಿ ಸಕ್ರಿಯವಾಗಿ ಪಾಲ್ಗೊಂಡು ಕಾರ್ಯಕ್ರಮವನ್ನು ಯಶಸ್ವಿಗೊಳಿಸಬೇಕಾಗಿ ವಿನಂತಿಸಿದ್ದಾರೆ.
