ಚಿಕ್ಕಮಗಳೂರು: ಎಫ್‌ಎಂ ಮತ್ತು ಮೊಬೈಲ್ ನೆಟ್‌ವರ್ಕ್ ಸಿಗ್ನಲ್‌ಗಳು ಸರಿಯಾಗಿ ಸಿಗದೆ ಕಷ್ಟಪಡುತ್ತಿದ್ದ ಜಿಲ್ಲೆಯ ಗುಡ್ಡಗಾಡು ಪ್ರದೇಶಗಳ ರೇಡಿಯೋ ಶ್ರೋತೃಗಳಿಗೆ ಕೇಂದ್ರ ಸರ್ಕಾರ ಸಿಹಿಸುದ್ದಿ ನೀಡಿದೆ. ಜಿಲ್ಲೆಯ ಅತ್ಯಂತ ಎತ್ತರದ ಪ್ರದೇಶವಾದ ದತ್ತಪೀಠದಲ್ಲಿ ಸಂಪೂರ್ಣ ಪ್ರಮಾಣದ 10 ಕಿಲೋವ್ಯಾಟ್ (kW) ಸಾಮರ್ಥ್ಯದ ಎಫ್‌ಎಂ ಕೇಂದ್ರ ಸ್ಥಾಪನೆಗೆ ಅಧಿಕೃತ ಅನುಮೋದನೆ ದೊರೆತಿದೆ.
ಈ ಯೋಜನೆಯ ಅನುಮೋದನೆಯನ್ನು ಉಡುಪಿ-ಚಿಕ್ಕಮಗಳೂರು ಸಂಸತ್ ಸದಸ್ಯ ಕೋಟ ಶ್ರೀನಿವಾಸ ಪೂಜಾರಿ ಖಚಿತಪಡಿಸಿದ್ದು, ಶೀಘ್ರದಲ್ಲೇ ಸಿವಿಲ್ ಕಾಮಗಾರಿಗಳನ್ನು ಆರಂಭಿಸುವುದಾಗಿ ತಿಳಿಸಿದ್ದಾರೆ.
ಯೋಜನೆಯ ಹಿನ್ನೆಲೆ ಮತ್ತು ಪ್ರಯೋಜನಗಳು:
ದತ್ತಪೀಠದಂತಹ ಎತ್ತರದ ಪ್ರದೇಶದಲ್ಲಿ ಈ ಕೇಂದ್ರವನ್ನು ಸ್ಥಾಪಿಸುವುದರಿಂದ ದೂರದವರೆಗೆ ಸಿಗ್ನಲ್ ಪ್ರಸಾರ ಮಾಡಲು ಹೆಚ್ಚು ಅನುಕೂಲವಾಗಲಿದೆ ಎಂದು ಮನವರಿಕೆ ಮಾಡಿಕೊಟ್ಟು, ಕೇಂದ್ರ ಮಾಹಿತಿ ಮತ್ತು ಪ್ರಸಾರ ಸಚಿವ ಅಶ್ವಿನಿ ವೈಷ್ಣವ್ ಹಾಗೂ ಸಂಬಂಧಿತ ಸಚಿವಾಲಯಕ್ಕೆ ಪ್ರಸ್ತಾವನೆ ಸಲ್ಲಿಸಲಾಗಿತ್ತು.
ಈ ಹೈ-ಪವರ್ ಟ್ರಾನ್ಸ್‌ಮಿಟರ್‌ನಿಂದಾಗಿ, ನೆಟ್‌ವರ್ಕ್ ಸಮಸ್ಯೆ ಇರುವ ದುರ್ಗಮ ಬೆಟ್ಟ-ಗುಡ್ಡಗಳ ಪ್ರದೇಶಗಳಲ್ಲೂ ಯಾವುದೇ ಅಡಚಣೆಯಿಲ್ಲದೆ ನಿರಂತರವಾಗಿ ಎಫ್‌ಎಂ ಪ್ರಸಾರ ಲಭ್ಯವಾಗಲಿದೆ.
ಯಾವೆಲ್ಲ ಪ್ರದೇಶಗಳಿಗೆ ಅನುಕೂಲ?
ಈ ನೂತನ ಕೇಂದ್ರವು ಕಾರ್ಯಾರಂಭಗೊಂಡರೆ ಚಿಕ್ಕಮಗಳೂರು ನಗರದ ಜೊತೆಗೆ ಕೊಪ್ಪ, ಶೃಂಗೇರಿ, ಮೂಡಿಗೆರೆಯ ಗುಡ್ಡಗಾಡು ಪ್ರದೇಶಗಳು ಹಾಗೂ ತರೀಕೆರೆ, ಕಡೂರಿನ ಬಯಲು ಸೀಮೆ ಜನರಿಗೂ ಇದರ ಲಾಭ ಸಿಗಲಿದೆ. ಅಷ್ಟೇ ಅಲ್ಲದೆ, ನೆರೆಯ ಹಾಸನ, ಶಿವಮೊಗ್ಗ, ದಕ್ಷಿಣ ಕನ್ನಡ ಮತ್ತು ಉಡುಪಿ ಜಿಲ್ಲೆಗಳ ಕೆಲವು ಭಾಗಗಳಿಗೂ ಇದರ ಪ್ರಸಾರ ವಿಸ್ತರಿಸಲಿದೆ.
ಈ ನೂತನ ಎಫ್‌ಎಂ ಕೇಂದ್ರವು ಸ್ಥಳೀಯ ಶ್ರೋತೃಗಳಿಗೆ ಹತ್ತಿರವಾಗಲಿದ್ದು, ಇಲ್ಲಿ ಸ್ಥಳೀಯ ಸುದ್ದಿಗಳಿಗೆ ಮತ್ತು ಸಾಂಸ್ಕೃತಿಕ ಕಾರ್ಯಕ್ರಮಗಳಿಗೆ ಉತ್ತಮ ವೇದಿಕೆ ಲಭ್ಯವಾಗಲಿದೆ. ಅದರಲ್ಲೂ ವಿಶೇಷವಾಗಿ ಕಾಫಿ ಮತ್ತು ಅಡಿಕೆ ಬೆಳೆಗಾರರಿಗೆ ಅತ್ಯುಪಯುಕ್ತ ಕೃಷಿ ಮಾಹಿತಿಗಳು, ಶಿಕ್ಷಣಕ್ಕೆ ಸಂಬಂಧಿಸಿದ ವಿಷಯಗಳು ಹಾಗೂ ಸ್ಥಳೀಯ ಹವಾಮಾನ ವರದಿಗಳು ಬಿತ್ತರಗೊಳ್ಳಲಿವೆ. ಇದರೊಂದಿಗೆ, ಮಳೆಗಾಲದಲ್ಲಿ ಅತ್ಯಂತ ಅವಶ್ಯವಾಗಿರುವ ಮುನ್ನೆಚ್ಚರಿಕೆ ಸಂದೇಶಗಳು ಹಾಗೂ ವಿಪತ್ತು ನಿರ್ವಹಣಾ ನವೀಕರಣಗಳನ್ನು ಜನರಿಗೆ ತಲುಪಿಸಲು ಇದು ಸಹಕಾರಿಯಾಗಲಿದೆ. ಜೊತೆಗೆ, ಮಲೆನಾಡಿನ ವಿಶಿಷ್ಟ ಸಂಸ್ಕೃತಿ ಮತ್ತು ಪ್ರವಾಸೋದ್ಯಮವನ್ನು ಈ ಮಾಧ್ಯಮದ ಮೂಲಕ ವ್ಯಾಪಕವಾಗಿ ಪ್ರಚಾರ ಮಾಡಲು ಸಹ ಅವಕಾಶವಿರುತ್ತದೆ.
ದಶಕಗಳ ಬೇಡಿಕೆ ಈಡೇರಿಕೆ:
ಘಾಟಿ ಪ್ರದೇಶಗಳಲ್ಲಿ ಮಂಗಳೂರು ಹಾಗೂ ಹಾಸನ ಕೇಂದ್ರಗಳ ರೇಡಿಯೋ ಪ್ರಸಾರದ ವ್ಯಾಪ್ತಿ ಸೀಮಿತವಾಗಿದ್ದ ಕಾರಣ, ಶ್ರೋತೃಗಳು ತೊಂದರೆ ಅನುಭವಿಸುತ್ತಿದ್ದರು. ಈ ಹಿನ್ನೆಲೆಯಲ್ಲಿ ಸ್ಥಳೀಯ ನಿವಾಸಿಗಳು, ಮಾಧ್ಯಮ ಪ್ರತಿನಿಧಿಗಳು ಹಾಗೂ ವಿವಿಧ ಸಂಘಟನೆಗಳು ಕಳೆದ ಒಂದು ದಶಕದಿಂದ ಈ ಬೇಡಿಕೆಯನ್ನು ಮುಂದಿಟ್ಟಿದ್ದವು. ಸಂಸದ ಕೋಟ ಶ್ರೀನಿವಾಸ ಪೂಜಾರಿ ಅವರ ಪ್ರಯತ್ನಕ್ಕೆ ಸಂಬಂಧಪಟ್ಟ ಇಲಾಖೆಯೂ ಸಕಾರಾತ್ಮಕವಾಗಿ ಸ್ಪಂದಿಸಿದೆ.
ಪ್ರಸ್ತುತ ಶೃಂಗೇರಿಯಲ್ಲಿ ಕೇವಲ 100 ವ್ಯಾಟ್ ಸಾಮರ್ಥ್ಯದ ಸಣ್ಣ ಎಫ್‌ಎಂ ರಿಲೇ ಟ್ರಾನ್ಸ್‌ಮಿಟರ್ ಮಾತ್ರವಿದ್ದು, ಇದು ಕೇವಲ 10 ಕಿ.ಮೀ ಸುತ್ತಳತೆಯಲ್ಲಿ ಮಾತ್ರ ಕಾರ್ಯನಿರ್ವಹಿಸುತ್ತಿದೆ. ಆಕಾಶವಾಣಿ ಭದ್ರಾವತಿಯ 20-kW MW ಟ್ರಾನ್ಸ್‌ಮಿಟರ್ ಹಾಗೂ ಹಾಸನದ 10-kW ಎಫ್‌ಎಂ ಟ್ರಾನ್ಸ್‌ಮಿಟರ್‌ನಿಂದ ಜಿಲ್ಲೆಯ ಕೆಲವು ಭಾಗಗಳು ಮಾತ್ರ ಕವರೇಜ್ ಪಡೆಯುತ್ತಿವೆ. ಆದರೆ, ಇಡೀ ಚಿಕ್ಕಮಗಳೂರು ಜಿಲ್ಲೆಯನ್ನು ಸಮರ್ಪಕವಾಗಿ ತಲುಪಲು ಈ ನೂತನ ದತ್ತಪೀಠದ 10-kW ಹೈ-ಪವರ್ ಎಫ್‌ಎಂ ಕೇಂದ್ರ ಅತ್ಯಂತ ಅವಶ್ಯಕವಾಗಿದ್ದು, ಇದೀಗ ಇದಕ್ಕೆ ಹಸಿರು ನಿಶಾನೆ ಸಿಕ್ಕಿದೆ.
