ಬೆಂಗಳೂರು: ಬೆಂಗಳೂರು ಎಫ್ಸಿಯ ಯುವ ಮಿಡ್ಫೀಲ್ಡರ್ ಸೋಹಮ್ ವರ್ಷ್ರೇಷ್ ತಮ್ಮ ಒಪ್ಪಂದವನ್ನು 2028–29ರ ಸೀಸನ್ನ ಅಂತ್ಯದವರೆಗೆ ವಿಸ್ತರಿಸಿಕೊಂಡಿದ್ದಾರೆ. ಇದರೊಂದಿಗೆ ಅವರು 2029ರವರೆಗೆ ‘ಬ್ಲೂಸ್’ ತಂಡದೊಂದಿಗೆ ತಮ್ಮ ಪಯಣವನ್ನು ಮುಂದುವರಿಸಲಿದ್ದಾರೆ.
22 ವರ್ಷದ ಸೋಹಮ್ ಅವರು 2025–26ರ ಇಂಡಿಯನ್ ಸೂಪರ್ ಲೀಗ್ (ISL) ಸೀಸನ್ನಲ್ಲಿ 8 ಪಂದ್ಯಗಳಲ್ಲಿ ಕಣಕ್ಕಿಳಿದು ಒಂದು ಅಸಿಸ್ಟ್ ದಾಖಲಿಸಿದ್ದಾರೆ. ಇದಕ್ಕೂ ಮುನ್ನ, 2024–25ರ ಸಾಲಿನಲ್ಲಿ ಬೆಂಗಳೂರು ಎಫ್ಸಿಯ ರಿಸರ್ವ್ ತಂಡಕ್ಕೆ ಬಡ್ತಿ ಪಡೆದ ಅವರು, ಎಲ್ಲಾ ಸ್ಪರ್ಧೆಗಳಲ್ಲಿ 24 ಪಂದ್ಯಗಳಲ್ಲಿ 14 ಗೋಲು ಮತ್ತು 12 ಅಸಿಸ್ಟ್ಗಳೊಂದಿಗೆ ಗಮನಾರ್ಹ ಪ್ರದರ್ಶನ ನೀಡಿದ್ದರು. ಅವರ ಈ ಉತ್ತಮ ಪ್ರದರ್ಶನಕ್ಕಾಗಿ ‘ಬಿಎಫ್ಸಿ ಬಿ ತಂಡದ ವರ್ಷದ ಶ್ರೇಷ್ಠ ಆಟಗಾರ’ ಪ್ರಶಸ್ತಿಯೂ ಲಭಿಸಿತ್ತು.
2025ರ ಲೀಗ್ ಹಂತದ ಕೊನೆಯ ಪಂದ್ಯದಲ್ಲಿ ಮುಂಬೈ ಸಿಟಿ ಎಫ್ಸಿ ವಿರುದ್ಧ ಕಣಕ್ಕಿಳಿಯುವ ಮೂಲಕ ಸೋಹಮ್ ಐಎಸ್ಎಲ್ಗೆ ಪದಾರ್ಪಣೆ ಮಾಡಿದರು. ಬಳಿಕ, ಸೆಪ್ಟೆಂಬರ್ 2025ರಲ್ಲಿ ಕತಾರ್ನಲ್ಲಿ ನಡೆದ ಎಎಫ್ಸಿ ಯು23 ಏಷ್ಯನ್ ಕಪ್ ಕ್ವಾಲಿಫೈಯರ್ಸ್ನಲ್ಲಿ ಭಾರತ ಯು23 ತಂಡವನ್ನು ಪ್ರತಿನಿಧಿಸಿದರು.
ಒಪ್ಪಂದ ವಿಸ್ತರಣೆಯ ಕುರಿತು ಮಾತನಾಡಿದ ಸೋಹಮ್ ವರ್ಷ್ರೇಷ್, “ಬಿಎಫ್ಸಿ ಯಾವಾಗಲೂ ನನ್ನ ಮೇಲೆ ನಂಬಿಕೆ ಇಟ್ಟಿದೆ. ಕ್ಲಬ್ನೊಂದಿಗೆ ನಾವು ನಿರ್ಮಿಸುತ್ತಿರುವ ಭವಿಷ್ಯದ ಬಗ್ಗೆ ನನಗೆ ತುಂಬಾ ವಿಶ್ವಾಸವಿದೆ. ಈ ಒಪ್ಪಂದ ವಿಸ್ತರಣೆಯಿಂದ ನನಗೆ ಸಂತೋಷವಾಗಿದೆ. ಮುಂದಿನ ದಿನಗಳಲ್ಲಿ ಇನ್ನಷ್ಟು ಏಕಾಗ್ರತೆಯಿಂದ ಆಡಲು ಹಾಗೂ ಬೆಂಗಳೂರು ಎಫ್ಸಿಯ ಯಶಸ್ಸಿಗೆ ನನ್ನಿಂದಾದಷ್ಟು ಕೊಡುಗೆ ನೀಡಲು ಎದುರು ನೋಡುತ್ತಿದ್ದೇನೆ,” ಎಂದಿದ್ದಾರೆ.
ಬಿಎಫ್ಸಿ ಮುಖ್ಯ ಕೋಚ್ ಪೆಪ್ ಮುನೋಜ್ ಮಾತನಾಡಿ, “ಸೋಹಮ್ ಆಟವನ್ನು ಗ್ರಹಿಸುವ ರೀತಿ, ಮೈದಾನದಲ್ಲಿನ ಅವರ ಚಲನವಲನ ಮತ್ತು ಚೆಂಡಿನ ಮೇಲಿನ ನಿಯಂತ್ರಣ ಅದ್ಭುತವಾಗಿದೆ. ಇಂತಹ ಸಹಜ ಗುಣಗಳನ್ನು ಸುಲಭವಾಗಿ ಕಲಿಸಲು ಸಾಧ್ಯವಿಲ್ಲ. ಅವರು ಅಭ್ಯಾಸದಲ್ಲೂ ಸಾಕಷ್ಟು ಪರಿಶ್ರಮ ಪಡುತ್ತಾರೆ. ಸೋಹಮ್ ತಮ್ಮ ಒಪ್ಪಂದವನ್ನು ವಿಸ್ತರಿಸಿಕೊಂಡಿರುವುದು ನನಗೆ ತುಂಬಾ ಸಂತೋಷ ತಂದಿದೆ” ಎಂದಿದ್ದಾರೆ.
ನಿರಂತರ ಅಪ್ಡೇಟ್ಗಳಿಗಾಗಿ ಉಪಯುಕ್ತ ನ್ಯೂಸ್ ಟೆಲಿಗ್ರಾಂ ಚಾನೆಲ್ಗೆ ಜಾಯಿನ್ ಆಗಿ
ಉಪಯುಕ್ತ ನ್ಯೂಸ್’ ಫೇಸ್ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್ ವಾಟ್ಸಪ್ ಗ್ರೂಪ್ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ
