ಯುಎಇಯಲ್ಲಿ ಮೊದಲ ಬಾರಿಗೆ ದೀರ್ಘಾಯುಷ್ಯ ವೈದ್ಯಕೀಯ ಶಿಕ್ಷಣ ಆರಂಭ
ಅಜ್ಮಾನ್: ತುಂಬೆ ಗ್ರೂಪ್ನ ಅಂಗಸಂಸ್ಥೆಯಾದ ಗಲ್ಫ್ ಮೆಡಿಕಲ್ ಯುನಿವರ್ಸಿಟಿ (ಜಿಎಂಯು) ಸ್ವಿಟ್ಜರ್ಲ್ಯಾಂಡ್ನ ಜಿನೀವಾ ಕಾಲೇಜ್ ಆಫ್ ಲಾಂಗೆವಿಟಿ ಸೈನ್ಸ್ (ಜಿಸಿಎಲ್ಎಸ್) ಜೊತೆ ಮಹತ್ವದ ತಿಳಿವಳಿಕೆ ಒಪ್ಪಂದಕ್ಕೆ (ಎಂಒಯು) ಸಹಿ ಹಾಕಿದೆ. ಇದರೊಂದಿಗೆ ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ)ನಲ್ಲಿ ಖಾಸಗಿ ವೈದ್ಯಕೀಯ ವಿಶ್ವವಿದ್ಯಾಲಯವೊಂದು ಮೊದಲ ಬಾರಿಗೆ ದೀರ್ಘಾಯುಷ್ಯ ವೈದ್ಯಕೀಯ (Longevity Medicine), ಆರೋಗ್ಯಕರ ವೃದ್ಧಾಪ್ಯ, ತಡೆಗಟ್ಟುವ ಆರೋಗ್ಯ ಸೇವೆ ಹಾಗೂ ನಿಖರ ಆರೋಗ್ಯ ಕ್ಷೇತ್ರಗಳಲ್ಲಿ ವ್ಯವಸ್ಥಿತ ಶೈಕ್ಷಣಿಕ ಕಾರ್ಯಕ್ರಮಗಳನ್ನು ಆರಂಭಿಸುತ್ತಿದೆ.
ಹೊಸದಾಗಿ ಸ್ಥಾಪಿಸಲಾದ ತುಂಬೆ ದೀರ್ಘಾಯುಷ್ಯ ವೈದ್ಯಕೀಯ ಸಂಸ್ಥೆ ಮೂಲಕ ಈ ಶಿಕ್ಷಣ ಕಾರ್ಯಕ್ರಮಗಳು ನಡೆಸಲಾಗಲಿವೆ.
ವಿಶ್ವದಲ್ಲೇ ದೀರ್ಘಾಯುಷ್ಯ ವಿಜ್ಞಾನಕ್ಕೆ ಮೀಸಲಾದ ಮೊದಲ ಉನ್ನತ ಶಿಕ್ಷಣ ಸಂಸ್ಥೆಯಾಗಿರುವ ಜಿಸಿಎಲ್ಎಸ್ ಹಾಗೂ ಗಲ್ಫ್ ಮೆಡಿಕಲ್ ಯುನಿವರ್ಸಿಟಿಯ ಶೈಕ್ಷಣಿಕ ಪರಿಣತಿ ಮತ್ತು ತುಂಬೆ ಹೆಲ್ತ್ಕೇರ್ನ ವೈದ್ಯಕೀಯ ಸೇವಾ ಜಾಲ ಒಂದಾಗುವುದರಿಂದ ಮಧ್ಯಪ್ರಾಚ್ಯದಲ್ಲಿ ದೀರ್ಘಾಯುಷ್ಯ ಶಿಕ್ಷಣ, ಸಂಶೋಧನೆ, ನವೋದ್ಯಮ ಹಾಗೂ ವೃತ್ತಿಪರ ಅಭಿವೃದ್ಧಿಗೆ ಹೊಸ ವೇದಿಕೆ ಸೃಷ್ಟಿಯಾಗಿದೆ.
ಈ ಸಹಭಾಗಿತ್ವವು ಸುಧಾರಿತ ಆರೋಗ್ಯ ಸೇವೆ, ಪ್ರಿವೆಂಟಿವ್ ಮೆಡಿಸಿನ್ ಮತ್ತು ವೈದ್ಯಕೀಯ ನವೋದ್ಯಮ ಕ್ಷೇತ್ರಗಳಲ್ಲಿ ಯುಎಇಯನ್ನು ಜಾಗತಿಕ ಕೇಂದ್ರವನ್ನಾಗಿ ರೂಪಿಸುವ ರಾಷ್ಟ್ರದ ದೃಷ್ಟಿಕೋನಕ್ಕೆ ಬಲ ನೀಡುವುದರ ಜೊತೆಗೆ, ಯುಎಇ ಮತ್ತು ಗಲ್ಫ್ ರಾಷ್ಟ್ರಗಳನ್ನು ದೀರ್ಘಾಯುಷ್ಯ ವೈದ್ಯಕೀಯ ಕ್ಷೇತ್ರದಲ್ಲಿ ಮುಂಚೂಣಿಗೆ ತರುವ ಗುರಿ ಹೊಂದಿದೆ.
6 ಪ್ರೊಫೆಷನಲ್ ಸರ್ಟಿಫಿಕೇಟ್ ಕೋರ್ಸ್ಗಳು
ಜಿಸಿಎಲ್ಎಸ್ ಸಹಯೋಗದಲ್ಲಿ ಮೂರು ತಿಂಗಳ ಹೈಬ್ರಿಡ್ ಮಾದರಿಯಲ್ಲಿ ಕೆಳಗಿನ ಆರು ಅಂತರರಾಷ್ಟ್ರೀಯ ವೃತ್ತಿಪರ ಸರ್ಟಿಫಿಕೇಟ್ ಕೋರ್ಸ್ಗಳು ಆರಂಭವಾಗಲಿವೆ:
ಕ್ಲಿನಿಕಲ್ ದೀರ್ಘಾಯುಷ್ಯ ವೈದ್ಯಕೀಯ
ದೀರ್ಘಾಯುಷ್ಯ ಫಿಸಿಯೋಥೆರಪಿ
ದೀರ್ಘಾಯುಷ್ಯ ಪೌಷ್ಟಿಕಾಹಾರ
ದೀರ್ಘಾಯುಷ್ಯ ಫಿಟ್ನೆಸ್
ಪೆಪ್ಟೈಡ್ ವೈದ್ಯಕೀಯ
ಆರೋಗ್ಯ ಸೇವೆಯಲ್ಲಿ ಕೃತಕ ಬುದ್ಧಿಮತ್ತೆ
ಪ್ರತಿ ಕೋರ್ಸ್ಗೆ ಆರಂಭಿಕ ಹಂತದಲ್ಲಿ ಸುಮಾರು 100 ವಿದ್ಯಾರ್ಥಿಗಳನ್ನು ದಾಖಲಿಸಿಕೊಳ್ಳುವ ಉದ್ದೇಶವಿದ್ದು, ವೈದ್ಯರು, ಔಷಧ ತಜ್ಞರು, ನರ್ಸ್ಗಳು, ಫಿಸಿಯೋಥೆರಪಿಸ್ಟ್ಗಳು, ಪೌಷ್ಟಿಕ ತಜ್ಞರು, ಫಿಟ್ನೆಸ್ ವೃತ್ತಿಪರರು ಹಾಗೂ ಇತರ ಆರೋಗ್ಯ ಸೇವಾ ಸಿಬ್ಬಂದಿಗಾಗಿ ಈ ಕೋರ್ಸ್ಗಳನ್ನು ರೂಪಿಸಲಾಗಿದೆ.
ಸ್ವಿಸ್ ಶೈಕ್ಷಣಿಕ ಪರಿಣತಿ, ಜಿಎಂಯುಯ ಬೋಧನಾ ಗುಣಮಟ್ಟ, ಕ್ಲಿನಿಕಲ್ ಅಧ್ಯಾಪಕರು, ಸಿಮ್ಯುಲೇಷನ್ ಸೌಲಭ್ಯಗಳು ಹಾಗೂ ಸಮಗ್ರ ಆರೋಗ್ಯ ಶಿಕ್ಷಣ ವ್ಯವಸ್ಥೆಯೊಂದಿಗೆ ತರಬೇತಿ ನೀಡಲಾಗುತ್ತದೆ. ಅಂತರರಾಷ್ಟ್ರೀಯ ಮಟ್ಟದ ಪಠ್ಯಕ್ರಮ, ವಿದೇಶಿ ತಜ್ಞರ ಮಾರ್ಗದರ್ಶನ ಹಾಗೂ ಮುಂದಿನ ಉನ್ನತ ಅಧ್ಯಯನಕ್ಕೆ ಅವಕಾಶವೂ ಕಲ್ಪಿಸಲಾಗಿದೆ.
2026ರಲ್ಲಿ ಜಿಸಿಎಲ್ಎಸ್ ನಡೆಸಿದ ಜಾಗತಿಕ ಸಮೀಕ್ಷೆಯಲ್ಲಿ ಆರು ಖಂಡಗಳ ವೈದ್ಯರು ಭಾಗವಹಿಸಿದ್ದರು.
99% ವೈದ್ಯರು ದೀರ್ಘಾಯುಷ್ಯ ಚಿಕಿತ್ಸೆಗೆ ಬೇಡಿಕೆ ಹೆಚ್ಚುತ್ತಿದೆ ಎಂದಿದ್ದಾರೆ.
44% ವೈದ್ಯರು ಕಳೆದ ಮೂರು ವರ್ಷಗಳಲ್ಲಿ 50%ಕ್ಕಿಂತ ಹೆಚ್ಚಿನ ಬೇಡಿಕೆ ಏರಿಕೆಯಾಗಿದೆ ಎಂದು ತಿಳಿಸಿದ್ದಾರೆ.
83% ಆರೋಗ್ಯ ಸೇವೆ ಭವಿಷ್ಯದಲ್ಲಿ ತಡೆಗಟ್ಟುವ ವೈದ್ಯಕೀಯದತ್ತ ಹೆಚ್ಚು ಸಾಗಲಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.
76% ಮುಂದಿನ 20 ವರ್ಷಗಳಲ್ಲಿ ಮಾನವ ಜೀವನಾವಧಿಯನ್ನು ಗಮನಾರ್ಹವಾಗಿ ವಿಸ್ತರಿಸುವುದು ಸಾಧ್ಯವಾಗಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಪ್ರಮುಖರ ಅಭಿಪ್ರಾಯ
ತುಂಬೆ ಗ್ರೂಪ್ ಸಂಸ್ಥಾಪಕ ಅಧ್ಯಕ್ಷ ಡಾ. ತುಂಬೆ ಮೊಯ್ದೀನ್ ಮಾತನಾಡಿ, “ಜಿನೀವಾ ಕಾಲೇಜ್ ಆಫ್ ಲಾಂಗೆವಿಟಿ ಸೈನ್ಸ್ ಜೊತೆಗಿನ ಈ ಸಹಭಾಗಿತ್ವದ ಮೂಲಕ ವಿಶ್ವಮಟ್ಟದ ಸ್ವಿಸ್ ಶೈಕ್ಷಣಿಕ ಗುಣಮಟ್ಟವನ್ನು ಯುಎಇಗೆ ತರುತ್ತಿದ್ದೇವೆ. ಗಲ್ಫ್ ಪ್ರದೇಶದ ಆರೋಗ್ಯ ವೃತ್ತಿಪರರಿಗೆ ಭವಿಷ್ಯದ ಅಗತ್ಯಗಳಿಗೆ ತಕ್ಕ ತರಬೇತಿ ನೀಡುವುದು ನಮ್ಮ ಉದ್ದೇಶ. ಗಲ್ಫ್ ಮೆಡಿಕಲ್ ಯುನಿವರ್ಸಿಟಿಯನ್ನು ವಿಶ್ವದ ಮುಂಚೂಣಿ ವೈದ್ಯಕೀಯ ಶಿಕ್ಷಣ ಸಂಸ್ಥೆಯನ್ನಾಗಿ ರೂಪಿಸುವುದು ನಮ್ಮ ಗುರಿ,” ಎಂದರು.
ಜಿನೀವಾ ಕಾಲೇಜ್ ಆಫ್ ಲಾಂಗೆವಿಟಿ ಸೈನ್ಸ್ ಅಧ್ಯಕ್ಷ ಡಾ. ಡೊಮಿನಿಕ್ ಥೋರ್ ಮಾತನಾಡಿ, "ದೀರ್ಘಾಯುಷ್ಯ ವೈದ್ಯಕೀಯವು ಆಧುನಿಕ ಆರೋಗ್ಯ ಸೇವೆಯ ಅವಿಭಾಜ್ಯ ಅಂಗವಾಗಿ ಬೆಳೆಯುತ್ತಿದೆ. ಆದರೆ ಈ ಕ್ಷೇತ್ರಕ್ಕೆ ಗುಣಮಟ್ಟದ ಶಿಕ್ಷಣ, ವೈದ್ಯಕೀಯ ಮಾನದಂಡಗಳು ಹಾಗೂ ವಿಶ್ವಾಸಾರ್ಹ ತರಬೇತಿ ಮೂಲಸೌಕರ್ಯದ ತುರ್ತು ಅಗತ್ಯವಿದೆ. ವಿಶ್ವದ ಪ್ರಮುಖ ವಿಶ್ವವಿದ್ಯಾಲಯಗಳೊಂದಿಗೆ ಸಹಭಾಗಿತ್ವದ ಮೂಲಕ ಜಿಸಿಎಲ್ಎಸ್ ಜಾಗತಿಕ ಮಟ್ಟದಲ್ಲಿ ಈ ಕ್ಷೇತ್ರದ ಶೈಕ್ಷಣಿಕ ಅಡಿಪಾಯವನ್ನು ನಿರ್ಮಿಸಲು ನೆರವಾಗುತ್ತಿದೆ. ಮಧ್ಯಪ್ರಾಚ್ಯದಲ್ಲಿ ಈ ಮೂಲಸೌಕರ್ಯವನ್ನು ನಿರ್ಮಿಸಲು ಗಲ್ಫ್ ಮೆಡಿಕಲ್ ಯುನಿವರ್ಸಿಟಿಯು ಅತ್ಯುತ್ತಮ ಪಾಲುದಾರವಾಗಿದೆ." ಹೇಳಿದರು.
ಈ ತಿಳಿವಳಿಕೆ ಒಪ್ಪಂದದ (ಎಂಒಯು) ಮೂಲಕ ಮೊದಲ ಹಂತದಲ್ಲಿ ಶಿಕ್ಷಣ ಹಾಗೂ ವೃತ್ತಿಪರ ಅಭಿವೃದ್ಧಿಗೆ ಆದ್ಯತೆ ನೀಡಲಾಗಿದೆ. ಸಹಭಾಗಿತ್ವ ವಿಸ್ತರಿಸುತ್ತಿರುವಂತೆ ಜಂಟಿ ಬ್ರ್ಯಾಂಡ್ನಡಿ ಸಮ್ಮೇಳನಗಳು, ಕಾರ್ಯಾಗಾರಗಳು, ವೈಜ್ಞಾನಿಕ ವಿಚಾರ ಸಂಕಿರಣಗಳು ಹಾಗೂ ಇತರ ಜಂಟಿ ಚಟುವಟಿಕೆಗಳನ್ನು ಆಯೋಜಿಸುವ ಅವಕಾಶವೂ ಇದರಲ್ಲಿ ಒಳಗೊಂಡಿದೆ. ಪರಿಚಯಿಸಲಾಗುವ ಎಲ್ಲಾ ಕಾರ್ಯಕ್ರಮಗಳು ಸಂಬಂಧಿತ ಆರೋಗ್ಯ ಪ್ರಾಧಿಕಾರಗಳ ನಿಯಮಗಳು ಮತ್ತು ಅನುಮೋದನೆಗಳಿಗೆ ಸಂಪೂರ್ಣ ಅನುಸಾರವಾಗಿರಲಿವೆ.
2026–27ನೇ ಶೈಕ್ಷಣಿಕ ವರ್ಷದ 50ಕ್ಕೂ ಹೆಚ್ಚು ಕಾರ್ಯಕ್ರಮಗಳಿಗೆ ಪ್ರವೇಶ ಪ್ರಕ್ರಿಯೆ ಆರಂಭಗೊಂಡಿದೆ. ಮೊದಲ ಬ್ಯಾಚ್ಗೆ ಸೆಪ್ಟೆಂಬರ್/ಅಕ್ಟೋಬರ್ 2026ರ ಪ್ರವೇಶಕ್ಕೂ ಮುನ್ನ ಅರ್ಜಿಗಳನ್ನು ಆಹ್ವಾನಿಸಲಾಗಿದೆ. ಹೆಚ್ಚಿನ ಮಾಹಿತಿಗಾಗಿ www.gmu.ac.ae ವೆಬ್ಸೈಟ್ಗೆ ಭೇಟಿ ನೀಡಬಹುದು.
ಉಪಯುಕ್ತ ನ್ಯೂಸ್ ಈಗ ಸ್ವದೇಶಿ ಸಾಮಾಜಿಕ ಜಾಲತಾಣ Arattai ನಲ್ಲಿ... ನಮ್ಮ ಚಾನೆಲ್ಗೆ ನೀವೂ ಜಾಯಿನ್ ಆಗಿ.
ನಿರಂತರ ಅಪ್ಡೇಟ್ಗಳಿಗಾಗಿ ಉಪಯುಕ್ತ ನ್ಯೂಸ್ ಟೆಲಿಗ್ರಾಂ ಚಾನೆಲ್ಗೆ ಜಾಯಿನ್ ಆಗಿ
ಉಪಯುಕ್ತ ನ್ಯೂಸ್’ ಫೇಸ್ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್ ವಾಟ್ಸಪ್ ಗ್ರೂಪ್ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ
