ಜಗತ್ತಿನ ಪ್ರತಿಯೊಂದು ಜೀವವೂ ಒಬ್ಬಂಟಿಯೇನಾ? ಅಥವಾ ನಾನೇ ಒಬ್ಬಂಟಿಯೇನಾ? ಈ ಪ್ರಶ್ನೆ ನನ್ನ ಮನಸ್ಸನ್ನು ಪದೇಪದೇ ಕಾಡುತ್ತದೆ. ನಾನು ನನ್ನನ್ನೇ ಪ್ರಶ್ನಿಸಿದಾಗ ಸಿಕ್ಕ ಉತ್ತರ — ನಾನು ಒಬ್ಬಂಟಿಯಾಗಿರುವೆ.
ಎಲ್ಲರೂ ಇದ್ದರೂ ಯಾರೂ ಇಲ್ಲದಂತಾಗಿರುವ ಈ ಅನುಭವ, ಜೀವನದ ವಿಚಿತ್ರ ಸತ್ಯವನ್ನು ನೆನಪಿಸುತ್ತದೆ. ನಮ್ಮವರು ಎಂದು ನಂಬಿದವರೇ ಮನಸ್ಸನ್ನು ನೋಯಿಸಿದಾಗ, ಆ ನೋವು ಮಾತಿನಲ್ಲಿ ವಿವರಿಸಲಾಗದಷ್ಟು ಗಾಢವಾಗಿರುತ್ತದೆ.
ಒಮ್ಮೆ ಆಕಾಶದತ್ತ ನೋಡಿದಾಗ, ಮಿನುಗುವ ನಕ್ಷತ್ರವೊಂದು ನಗುತ್ತಾ ಹೇಳಿದಂತಾಯಿತು — “ನಿನ್ನ ನೋವಿಗೆ ನಾನೇ ಕಾರಣ. ನಾನು ಇಂದು ನಿನ್ನ ಜೊತೆಯಲ್ಲಿದ್ದರೆ, ನೀನು ಇಷ್ಟು ಒಬ್ಬಂಟಿಯಾಗಿರುತ್ತಿರಲಿಲ್ಲ.” ಈ ಕಲ್ಪನೆ ನನಗೆ ಒಂದು ಕಠಿಣ ಸತ್ಯವನ್ನು ತಿಳಿಸಿತು — ಜಗತ್ತಿನ ಮೋಸ, ಸುಳ್ಳು ಮತ್ತು ವಂಚನೆಯ ಅರಿವು.
ಇಂದಿನ ಕಾಲದಲ್ಲಿ ಹಲವರು ನಮ್ಮ ಜೊತೆಗಿರುವಂತೆ ಕಾಣುತ್ತಾರೆ. ಆದರೆ ಅವರಲ್ಲಿ ಅನೇಕರ ಸಂಬಂಧಗಳು ಸ್ವಾರ್ಥದ ಮೇಲೆ ನಿಂತಿರುತ್ತವೆ. ನಮ್ಮನ್ನು ನಿಜವಾಗಿ ಅರ್ಥಮಾಡಿಕೊಳ್ಳುವವರು ಬಹಳ ವಿರಳ. ಆದ್ದರಿಂದ, ಅಂತಹ ಸಂಬಂಧಗಳಲ್ಲಿ ಬದುಕುವುದಕ್ಕಿಂತ, ಕೆಲವೊಮ್ಮೆ ಒಬ್ಬಂಟಿಯಾಗಿರುವುದೇ ಒಳಿತು.
ಏಕಾಂತವು ಕೇವಲ ಒಂಟಿತನವಲ್ಲ; ಅದು ನಮ್ಮ ಆತ್ಮದೊಂದಿಗೆ ನಾವು ನಡೆಸುವ ಸಂಭಾಷಣೆ. ಈ ಸಮಯದಲ್ಲಿ ನಾವು ನಮ್ಮ ಆಸಕ್ತಿಗಳು, ಕನಸುಗಳು ಮತ್ತು ನಮ್ಮೊಳಗಿನ ಸಾಮರ್ಥ್ಯವನ್ನು ಆಳವಾಗಿ ಅರಿಯಲು ಸಾಧ್ಯವಾಗುತ್ತದೆ. ಏಕಾಂಗಿಯಾಗಿ ಕಳೆದ ಕ್ಷಣಗಳು ಮನಸ್ಸಿಗೆ ಮತ್ತು ಮೆದುಳಿಗೆ ವಿಶ್ರಾಂತಿ ನೀಡುತ್ತವೆ.
ಆದರೆ, ಏಕಾಂತವು ಯಾವಾಗಲೂ ಸುಖಕರವಾಗಿರದು. ನಾವು ನಮ್ಮವರು ಎಂದು ಭಾವಿಸಿದವರಿಂದ ದೂರವಾದಾಗ, ಅದೇ ಏಕಾಂತ ಒಂಟಿತನವಾಗಿ ಪರಿಣಮಿಸಿ ಮನಸ್ಸಿನ ಮೇಲೆ ನಕಾರಾತ್ಮಕ ಪರಿಣಾಮ ಬೀರುತ್ತದೆ. ಇದು ಮಾನವೀಯ ಸಂಬಂಧಗಳ ಅಗತ್ಯತೆಯನ್ನು ನಮಗೆ ನೆನಪಿಸುತ್ತದೆ.
ಆದರೂ, ಈ ಏಕಾಂತದಲ್ಲಿಯೇ ಕೆಲವೊಮ್ಮೆ ಅನನ್ಯವಾದ ಸಂತೋಷ ಮತ್ತು ಆತ್ಮಶಾಂತಿ ಸಿಗುತ್ತದೆ. ಒಟ್ಟಿನಲ್ಲಿ, ಏಕಾಂತ ಜೀವನವು ವ್ಯಕ್ತಿಗೆ ಆತ್ಮಪರಿಚಯ ನೀಡುವ ಶಕ್ತಿಯಾಗಿದೆ.
ಕಾಲಕ್ರಮೇಣ ನಿಜವಾದ ಮಾನವ ಸಂಬಂಧಗಳು ಕಡಿಮೆಯಾಗುತ್ತಿರುವುದನ್ನು ನಾವು ಗಮನಿಸುತ್ತೇವೆ. ಜನರ ಮಧ್ಯೆ ಇದ್ದರೂ, ಅನೇಕರು ಮನಸ್ಸಿನಲ್ಲಿ ಒಂಟಿತನವನ್ನು ಅನುಭವಿಸುತ್ತಾರೆ. ಇದು ಇಂದಿನ ಸಮಾಜದ ಮೌನ ಸತ್ಯ.
ಕೊನೆಯಲ್ಲಿ, ಸಮಯ ಬಂದಾಗ ಪ್ರತಿಯೊಂದು ಜೀವಿಯೂ ಒಬ್ಬಂಟಿಯೇ ಎಂಬ ಅರಿವು ನಮಗೆ ಬರುತ್ತದೆ. ಆದರೆ ಆ ಏಕಾಂತವನ್ನು ನಾವು ಹೇಗೆ ಸ್ವೀಕರಿಸುತ್ತೇವೆ ಎಂಬುದೇ ನಮ್ಮ ಜೀವನದ ದಾರಿಯನ್ನು ನಿರ್ಧರಿಸುತ್ತದೆ.
- ಚೈತನ್ಯ ವೇದಿಕಾ
ದ್ವಿತೀಯ ಪತ್ರಿಕೋದ್ಯಮ
ವಿವೇಕಾನಂದ ಕಾಲೇಜು ಪುತ್ತೂರು
ಉಪಯುಕ್ತ ನ್ಯೂಸ್ ಈಗ ಸ್ವದೇಶಿ ಸಾಮಾಜಿಕ ಜಾಲತಾಣ Arattai ನಲ್ಲಿ... ನಮ್ಮ ಚಾನೆಲ್ಗೆ ನೀವೂ ಜಾಯಿನ್ ಆಗಿ.
ನಿರಂತರ ಅಪ್ಡೇಟ್ಗಳಿಗಾಗಿ ಉಪಯುಕ್ತ ನ್ಯೂಸ್ ಟೆಲಿಗ್ರಾಂ ಚಾನೆಲ್ಗೆ ಜಾಯಿನ್ ಆಗಿ
ಉಪಯುಕ್ತ ನ್ಯೂಸ್’ ಫೇಸ್ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್ ವಾಟ್ಸಪ್ ಗ್ರೂಪ್ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ
