ಮಾರ್ಚ್ 6, ಸೋದೆ ಶ್ರೀ ವಾದಿರಾಜರ ಆರಾಧನೆ . ಉಡುಪಿಯ ಅಷ್ಟಮಠಗಳ ಪರಂಪರೆಯಲ್ಲಿ ದೀರ್ಘಕಾಲ ಪೀಠಾಧಿಪತ್ಯ ವಹಿಸಿ, ಐದು ಬಾರಿ ಪರ್ಯಾಯ ಪೀಠದಲ್ಲಿ ಶ್ರೀಕೃಷ್ಣ ಸೇವೆ ಸಲ್ಲಿಸಿದ ಅಪೂರ್ವ ಮಹನೀಯರು ಶ್ರೀ ವಾದಿರಾಜರು. ತಮ್ಮ ಜೀವನಾವಧಿಯ (ಕ್ರಿ.ಶ. 1480–1600) ಅಂತ್ಯದಲ್ಲಿ ಸೋದೆಕ್ಷೇತ್ರದಲ್ಲಿ ಸಶರೀರವಾಗಿ ವೃಂದಾವನ ಪ್ರವೇಶ ಮಾಡಿದ ಮಹಾಯೋಗಿ ಎಂಬ ವೈಶಿಷ್ಟ್ಯ ಅವರಿಗೆ ಸಲ್ಲುತ್ತದೆ.
ಉಡುಪಿ – ಸೋದೆಗಳ ಮಧ್ಯೆ ಸೇತುವೆ
ಉಡುಪಿ ಶ್ರೀಕೃಷ್ಣನ ಭಕ್ತಿಭಾವವನ್ನು ಜನಮಾನಸದಲ್ಲಿ ಗಾಢಗೊಳಿಸಿದವರಲ್ಲಿ ವಾದಿರಾಜರು ಪ್ರಮುಖರು. ಕನಕದಾಸರಿಗೆ ದೊರೆತ ‘ಕನಕನ ಕಿಂಡಿ’ ದರ್ಶನವನ್ನು ಸಂಪ್ರದಾಯದಲ್ಲಿ ಸ್ಥಿರಗೊಳಿಸಿ, ಮೊದಲಿಗೆ ಧೂಳಿದರ್ಶನವೇ ಆಗಬೇಕು ಎಂಬ ಪದ್ಧತಿಯನ್ನು ರೂಢಿಗೆ ತಂದರು. ‘ಗೆರಟೆ ಗಂಜಿ’ ಸಮರ್ಪಣೆಯ ಆಚರಣೆಯೂ ಅವರ ಸ್ಮರಣೆ.
ಸಾಹಿತ್ಯ–ಸಂಗೀತ–ಸಂಪ್ರದಾಯ
ವಾದಿರಾಜರು ಕನ್ನಡ ಹರಿದಾಸ ಸಾಹಿತ್ಯದ ಧೀಮಂತರಲ್ಲಿ ಶ್ರೇಷ್ಠರು. ಸಂಸ್ಕೃತ–ಕನ್ನಡ ಎರಡೂ ಭಾಷೆಗಳಲ್ಲಿ ಅಪಾರ ಕೃತಿಗಳನ್ನು ರಚಿಸಿದರು. ಅವರ ‘ರುಕ್ಮಿಣೀಶ ವಿಜಯ’ ಮತ್ತು ‘ತೀರ್ಥಪ್ರಬಂಧ’ ಕೃತಿಗಳು ಸಾಹಿತ್ಯಪಟುತ್ವದ ದ್ಯೋತಕಗಳು. ವಿಶೇಷವಾಗಿ ತೀರ್ಥಪ್ರಬಂಧ ಭಾರತೀಯ ಸಂಸ್ಕೃತ ಸಾಹಿತ್ಯದಲ್ಲೇ ಮೊದಲ ಪ್ರವಾಸಕಾವ್ಯವೆಂದು ಪರಿಗಣಿತವಾಗಿದೆ.
ಅವರ ಕೀರ್ತನೆಗಳಲ್ಲಿ ‘ಹಯವದನ’ ಅಂಕಿತ ಪ್ರಸಿದ್ಧ. ಸಾವಿರಾರು ಕೀರ್ತನೆಗಳ ಮೂಲಕ ಭಕ್ತಿಭಾವವನ್ನು ಜನರಿಗೆ ತಲುಪಿಸಿದರು. ವಾದಿರಾಜರ ಕಾವ್ಯ ಶೈಲಿ ಲಾಲಿತ್ಯ–ಗಂಭೀರತೆಯ ಸಮನ್ವಯ; ರಸ, ಛಂದಸ್ಸು, ಅಲಂಕಾರಗಳ ಸೊಬಗು ಅದರಲ್ಲಿ ಸ್ಪಷ್ಟ.
ಸಮಾಜಮುಖಿ ಸಂತ
ವಾದಿರಾಜರು ಕೇವಲ ತತ್ವಜ್ಞರಲ್ಲ; ಸಮಾಜಸುಧಾರಕರೂ ಹೌದು. ಕುಲ–ಮತ ಭೇದಗಳಿಗಿಂತ ಮಾನವಗುಣವೇ ಶ್ರೇಷ್ಠವೆಂದು ಸಾರಿದರು. ದಂಭ, ಆಢಂಬರ, ಧನಮದಗಳ ವಿರುದ್ಧ ತಮ್ಮ ಕೀರ್ತನೆಗಳಲ್ಲಿ ಸ್ಪಷ್ಟವಾದ ಸಂದೇಶ ನೀಡಿದರು.
ಜೈನ, ಶೈವ, ಸ್ಮಾರ್ಥ ಪರಂಪರೆಗಳೊಂದಿಗೆ ಸೌಹಾರ್ದ ಸಾಧಿಸಿ, ಧರ್ಮಸಾಮರಸ್ಯದ ನಿದರ್ಶನ ನೀಡಿದರು. ಧರ್ಮಸ್ಥಳ ಕ್ಷೇತ್ರಕ್ಕೆ ಭೇಟಿ ನೀಡಿ, ಅಲ್ಲಿ ವೈಷ್ಣವ ಅರ್ಚಕರನ್ನು ನಿಯೋಜಿಸಿದ ಘಟನೆ ಧಾರ್ಮಿಕ ಸೌಹಾರ್ದದ ಮೈಲುಗಲ್ಲು.
ಸೋದೆ ಕ್ಷೇತ್ರ ನಿರ್ಮಾಪಕ
ಸೋದೆ ಕ್ಷೇತ್ರವನ್ನು ಆಧ್ಯಾತ್ಮಿಕ ಕೇಂದ್ರವನ್ನಾಗಿ ರೂಪಿಸಿದವರು ವಾದಿರಾಜರು. ತ್ರಿವಿಕ್ರಮ ದೇವರ ಪ್ರತಿಷ್ಠೆ, ಧವಳಗಂಗಾ ಪುಷ್ಕರಣಿ ನಿರ್ಮಾಣ, ಭವ್ಯ ವೃಂದಾವನ ನಿರ್ಮಾಣ – ಇವೆಲ್ಲವೂ ಅವರ ದೃಢಸಂಕಲ್ಪದ ಫಲ. ಇಂದಿಗೂ ಸೋದೆ ವಾದಿರಾಜ ಮಠ ಭಕ್ತರ ಆಧ್ಯಾತ್ಮಿಕ ಆಧಾರಕೇಂದ್ರವಾಗಿದೆ.
ವಿನಯದ ಶಿಖರ
“ವಾದೀ ಮಧ್ವೋಯಸ್ಯ ರಾಜಾ…” ಎಂಬ ಶ್ಲೋಕದಲ್ಲಿ ತಾವು ಮಧ್ವಾಚಾರ್ಯರ ಕೃಪೆಯಿಂದಲೇ ವಾದಿರಾಜರೆಂದು ವಿನಯದಿಂದ ಹೇಳಿಕೊಂಡ ಮಹನೀಯರು. ದೈವಾನುಭವ, ಕಾವ್ಯಪ್ರತಿಭೆ, ತತ್ವಪ್ರಚಾರ, ಸಮಾಜಸೇವೆ – ಇವೆಲ್ಲದರ ಸಮನ್ವಯವೇ ಅವರ ಜೀವನ.
ಶ್ರೀ ವಾದಿರಾಜರ ಜೀವನ ಚತುರ್ಮುಖ ಬ್ರಹ್ಮನಂತೆ ವಿಶಾಲ. ತ್ಯಾಗ–ತಪಸ್ಸು–ಸಾಹಿತ್ಯ–ಸಂಗೀತ–ಸಾಮರಸ್ಯಗಳ ಸಂಗಮ. ಅವರ ಆರಾಧನಾ ದಿನದಲ್ಲಿ, ಭಕ್ತಿಯೊಡನೆ ಅವರ ಸಂದೇಶವನ್ನು ಸ್ಮರಿಸಿ, ಸಮಾಜಸೌಹಾರ್ದದ ದಾರಿಯಲ್ಲಿ ನಡೆಯುವುದು ನಮ್ಮ ಕರ್ತವ್ಯ.
– ಡಾ. ಗುರುರಾಜ ಪೊಶೆಟ್ಟಿಹಳ್ಳಿ, ಸಂಸ್ಕೃತಿ ಚಿಂತಕರು
ಉಪಯುಕ್ತ ನ್ಯೂಸ್ ಈಗ ಸ್ವದೇಶಿ ಸಾಮಾಜಿಕ ಜಾಲತಾಣ Arattai ನಲ್ಲಿ... ನಮ್ಮ ಚಾನೆಲ್ಗೆ ನೀವೂ ಜಾಯಿನ್ ಆಗಿ.
ನಿರಂತರ ಅಪ್ಡೇಟ್ಗಳಿಗಾಗಿ ಉಪಯುಕ್ತ ನ್ಯೂಸ್ ಟೆಲಿಗ್ರಾಂ ಚಾನೆಲ್ಗೆ ಜಾಯಿನ್ ಆಗಿ
ಉಪಯುಕ್ತ ನ್ಯೂಸ್’ ಫೇಸ್ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್ ವಾಟ್ಸಪ್ ಗ್ರೂಪ್ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ
