ನಮ್ಮ ಮಲೆನಾಡ್ ಹುಡುಗ್ರು ಬೆಂಗಳೂರಿಗೆ ಹೋಗೋ ಹಪಾಹಪಿ ನೋಡಿದ್ರೆ, ಅದು ಮಳೆಗಾಲದಲ್ಲಿ ತುಂಬಿ ಹರಿಯೋ ತುಂಗಾ ನದಿಗಿಂತ ಸ್ಪೀಡಾಗಿರ್ತದೆ. ಆದ್ರೆ ಅಲ್ಲಿಗೆ ಹೋಗಿ ಆ ಟ್ರಾಫಿಕ್ ಸಿಗ್ನಲ್ನಲ್ಲಿ ಸಿಕ್ಕಿ ಹಾಕಿಕೊಂಡಾಗ ಮಾತ್ರ, ನಮ್ಮೂರಿನ ಗದ್ದೆ ಸಾಲಿನ ನೆನಪಾಗಿ ಕಣ್ಣೀರು ತುಂಗಾ-ಭದ್ರೆಯ ಹಂಗೆ ಹರಿಯೋಕೆ ಶುರು ಮಾಡ್ತದೆ. ಸಾಫ್ಟ್ವೇರ್ ಕಂಪನಿಯಲ್ಲಿ ಎಸಿ ಕೆಳಗೆ ಕೂತು ತಲೆ ಬಿಸಿಯಾದಾಗಲೆಲ್ಲಾ ನಮ್ಮ ಹುಡುಗ್ರಿಗೆ ಅನ್ಸೋದು ಒಂದೇ— "ಒಂದು ವಾರ ಊರಿಗೆ ಹೋಗಿ, ಅಮ್ಮ ಮಾಡೋ ಆ ಶುಂಠಿ ಕಷಾಯ ಕುಡಿದು ಬಂದ್ರೆ ಸಾಕಪ್ಪಾ" ಅಂತ!
ನನಗೊಂದು ಡೌಟು, ಈ ಕಷಾಯವನ್ನೇ ಯಾಕೆ ಒಂದು 'ಮಲೆನಾಡು ಎನರ್ಜಿ ಡ್ರಿಂಕ್' ಅಂತ ಮಾರ್ಕೆಟ್ ಮಾಡಬಾರದು? ಯೋಚನೆ ಮಾಡಿ, ಬೆಂಗಳೂರಿನ ಪಬ್ಗಳಲ್ಲಿ ಆ ಕೆಂಪು-ನೀಲಿ ಬಣ್ಣದ ಪಾನೀಯ ಕುಡಿಯೋ ಜನರಿಗೆ, ನಮ್ಮ ಮನೆ ಹಿತ್ತಲ ಹಸಿಶುಂಠಿ-ಬೆಲ್ಲದ ಕಷಾಯವನ್ನ 'ಆಯುರ್ವೇದಿಕ್ ಮಾಕ್ಟೇಲ್' ಅಂತ ಹೆಸರಿಟ್ಟು, ಗ್ಲಾಸಿಗೆ ಒಂದು ಪೀಸ್ ಅಡಿಕೆ ಸಿಪ್ಪೆ ಸಿಕ್ಕಿಸಿ ಕೊಟ್ಟು ನೋಡಿ... ಅದರ ಡಿಮ್ಯಾಂಡೇ ಬೇರೆ ಇರ್ತದೆ!
ಮುಖ್ಯವಾದ ವಿಷಯ ಅಂದ್ರೆ, ಬೆಂಗಳೂರಿನ ಆ ಗಲ್ಲಿ ಗಲ್ಲಿಗಳಲ್ಲಿ ಬೈಕ್ ಏರಿ 'ಪಿಜ್ಜಾ ಡೆಲಿವರಿ' ಮಾಡೋ ಬದಲು, ನಮ್ಮೂರಿನ ಅಪ್ಪಟ 'ಪತ್ರೊಡೆ ಎಕ್ಸ್ಪೋರ್ಟ್' ಮಾಡೋದು ಎಷ್ಟೋ ಮೇಲಲ್ವಾ? ಅಲ್ಲಿನವ್ರಿಗೆ ಮೈದಾ ಹಿಟ್ಟಿನ ಪಿಜ್ಜಾ ತಿಂದೇ ಅಭ್ಯಾಸ, ಅವ್ರಿಗೆ ನಮ್ಮ ಕೆಸುವಿನ ಎಲೆಯ ಪತ್ರೊಡೆಯ ರುಚಿ ತೋರಿಸಿದ್ರೆ, ಹೋಟೆಲ್ ಮುಂದೆ ಕ್ಯೂ ನಿಲ್ಲೋದು ಗ್ಯಾರಂಟಿ. ನಮ್ಮ ಸಂಪ್ರದಾಯದ ತಿನಿಸುಗಳಿಗೆ ಇರೋ ತಾಕತ್ತೇ ಹಂಗೆ!
ಇನ್ನು ನಮ್ಮ ಮಲೆನಾಡ್ ಹುಡುಗಿಯರ ಕಥೆ ಕೇಳಿ. ಬೆಂಗಳೂರಿನ ದೊಡ್ಡ ಮಾಲ್ಗಳಲ್ಲಿ ಇಷ್ಟಿಷ್ಟು ಪ್ಯಾಕೆಟ್ ಮೇಲೆ 'ಆರ್ಗ್ಯಾನಿಕ್ ಫುಡ್' ಅಂತ ಬರೆದಿರೋದನ್ನ ನೋಡಿ ಇವ್ರು ಬಿದ್ದು ಬಿದ್ದು ನಗ್ತಾರೆ. ನಮ್ ಮಲೆನಾಡಲ್ಲಿ ಕಾಡಲ್ಲಿ ಪುಕ್ಕಟೆಯಾಗಿ ಸಿಗೋ ಅಪ್ಪೆಮಿಡಿ ಉಪ್ಪಿನಕಾಯಿಗೆ ಬೆಂಗಳೂರಿನಲ್ಲಿ ಕೆಜಿಗಟ್ಟಲೆ ದುಡ್ಡು ಸುರಿತಾರೆ. ನಮ್ಮ ಹುಡುಗಿಯರು ಮನಸ್ಸು ಮಾಡಿದ್ರೆ ಪ್ರತಿ ಹಳ್ಳಿಯಲ್ಲೂ ಒಂದೊಂದು 'ಮಿಡಿ-ಟೆಕ್' ಕಂಪನಿ ತೆರೆಯಬಹುದು. ಅಲ್ಲಿ ಕೂತು 'ಡೇಟಾ ಮೈನಿಂಗ್' ಮಾಡೋ ಬದಲು, ಇಲ್ಲಿ 'ಅಪ್ಪೆಮಿಡಿ ಮೈನಿಂಗ್' ಮಾಡಿದ್ರೆ ಹೊಟ್ಟೆಗೂ ಸುಖ, ಜೇಬಿಗೂ ಲಾಭ!
ಬೆಂಗಳೂರು ಹುಡುಗಿಯರು ಜಿಮ್ನಲ್ಲಿ ಟ್ರೆಡ್ ಮಿಲ್ ಮೇಲೆ ಸುಮ್ಮನೆ ಓಡ್ತಿರ್ತಾರೆ. ಆದ್ರೆ ನಮ್ಮ ಮಲೆನಾಡ್ ಹೆಣ್ಣುಮಕ್ಕಳು ಅಡಿಕೆ ತೋಟದಲ್ಲಿ ಒಂದು ರೌಂಡ್ ಹಾಕಿ, ಕೊಟ್ಟಿಗೆ ಕೆಲಸ ಮಾಡಿದ್ರೆ ಅದಕ್ಕಿಂತ ದೊಡ್ಡ ವರ್ಕೌಟ್ ಇನ್ನೊಂದಿಲ್ಲ. ಈ 'ಮಲೆನಾಡು ಫಿಟ್ನೆಸ್' ಅನ್ನೇ ಒಂದು ಪ್ಯಾಕೇಜ್ ಮಾಡಿ ಬೆಂಗಳೂರಿನವ್ರಿಗೆ ಮಾರಾಟ ಮಾಡ್ಬೇಕು. ಅವ್ರು ಇಲ್ಲಿ ಬಂದು ಗುಡ್ಡ ಹತ್ತಿದ್ರೆ ನಮ್ಮೂರಿನ ಹುಡುಗರಿಗೂ ಒಂದಿಷ್ಟು ಕೆಲಸ ಸಿಗ್ತದೆ.
ಬೆಂಗಳೂರಿನಲ್ಲಿ ಆ ಕಾಂಕ್ರೀಟ್ ರೂಮಿನಲ್ಲಿ ಕೂತು 'ವರ್ಚುವಲ್ ರಿಯಾಲಿಟಿ' ಅಂತ ಮಾತಾಡ್ತಾರಲ್ಲ, ಅವ್ರಿಗೆ ನಮ್ಮ ಆಗುಂಬೆ ಮಳೆಯಲ್ಲಿ ನೆನೆಯೋ ರಿಯಾಲಿಟಿ ತೋರಿಸಬೇಕು! ಅಲ್ಲಿನ ಪ್ಲಾಸ್ಟಿಕ್ ಗಿಡಗಳ ಮುಂದೆ ಫೋಟೋ ತಗಿಸಿಕೊಳ್ಳೋ ಜನರಿಗೆ, ನಮ್ಮ ಗದ್ದೆಯ ನೈಜ ಸೌಂದರ್ಯ ತೋರಿಸೋ 'ಫೋಟೋಗ್ರಫಿ ಟೂರಿಸಂ' ಶುರು ಮಾಡಬಹುದು. ಅಂಗಡಿ ಕಟ್ಟೆಯ ಮೇಲೆ ಕೂತು ಪಂಚ್ ಡೈಲಾಗ್ ಹೊಡೆಯೋ ನಮ್ ಹುಡುಗರಿಗೆ ಜನ್ಮಜಾತವಾಗಿಯೇ 'ಕಮ್ಯುನಿಕೇಶನ್ ಸ್ಕಿಲ್ಸ್' ಬಂದಿರ್ತದೆ. ಅದನ್ನೇ ಇಟ್ಕೊಂಡು 'ಮಲೆನಾಡು ಸ್ಟೋರಿ ಟೆಲ್ಲಿಂಗ್' ಉದ್ಯಮ ಮಾಡಬಾರದು ಯಾಕೆ? ಬೆಂಗಳೂರಿನ ಮ್ಯಾನೇಜರ್ ಕಿರಿಕಿರಿಗಿಂತ, ನಮ್ಮ ಕಾಡಿನ ಕಾಡುಕೋಣಗಳ ಜೊತೆ ಗುದ್ದಾಡೋದೇ ಲೇಸು ಅಲ್ವಾ?
ನೋಡಿ, ಬೆಂಗಳೂರಲ್ಲಿ ಇವತ್ತು 'EMI' ಅಂತಾರಲ್ಲ, ಅದು ನಮ್ಮ ಮಲೆನಾಡಿನ ಹಳೇ ಪದ್ಧತಿ— 'ಬರೋ ಅಡಿಕೆ ಬೆಳೆಗೆ ಈಗಲೇ ಸಾಲ' ತಗೊಳ್ಳೋ ಮಾಡೆಲ್! ನಮ್ಮ ಯುವಕರು ಅಲ್ಲಿ ಕೂತು 'ಕೋಡಿಂಗ್' ಮಾಡೋ ಬದಲು, ಇಲ್ಲಿ ಅಡಿಕೆ ಮರಕ್ಕೆ 'ಕೋಟಿಂಗ್' (ಮದ್ದು ಹೊಡೆಯೋಕೆ) ಹೊಸ ತಂತ್ರಜ್ಞಾನ ಕಂಡುಹಿಡಿದ್ರೆ, ಅದು ಸಿಲಿಕಾನ್ ವ್ಯಾಲಿಗಿಂತ ದೊಡ್ಡ ಸುದ್ದಿಯಾದೀತು.
ಆ ಕಾಂಕ್ರೀಟ್ ಕಾಡಲ್ಲಿ ಉಸಿರುಗಟ್ಟೋ ಬದಲು, ನಮ್ಮೂರಿನ ಮಳೆಗಾಲದಲ್ಲಿ ಅಕ್ಕಿ ರೊಟ್ಟಿ-ಮಿಡಿ ಉಪ್ಪಿನಕಾಯಿ ತಿಂತಾ, ಜಗತ್ತಿಗೆ ಮಲೆನಾಡಿನ ರುಚಿ ತೋರಿಸೋದು ಬರೀ ಜೋಕಲ್ಲ, ಅದೊಂದು ದೊಡ್ಡ ಬಿಸಿನೆಸ್ ಚಾನ್ಸು. ಮಲೆನಾಡ್ ಹುಡುಗ್ರು ಮನೆಗೆ ವಾಪಸ್ ಬಂದ್ರೆ, ಇಲ್ಲಿ ಕಾಫಿ ಕುಡಿಯೋ ಪ್ರವಾಸಿಗರಿಗಿಂತ, ಉದ್ಯೋಗ ಹುಡುಕಿಕೊಂಡು ಬರೋರೇ ಹೆಚ್ಚಾಗ್ತಾರೆ ಅನ್ನೋದರಲ್ಲಿ ಸಂಶಯವೇ ಇಲ್ಲ.
ಡಿಗ್ರಿ ಮುಗಿಸಿ ಬೆಂಗಳೂರಿನ ಮೆಜೆಸ್ಟಿಕ್ನಲ್ಲಿ ಇಳಿದು ಬೆವರುತ್ತಾ ಕೆಲಸ ಹುಡುಕುವ ಬದಲು, ನಮ್ಮ ಮಲೆನಾಡಿನ ಪರ್ವತ ಶ್ರೇಣಿಗಳಲ್ಲೇ ಉದ್ಯೋಗದ ಪರ್ವತವನ್ನು ನಿರ್ಮಿಸಬಹುದು. ಬಿ.ಕಾಂ ನವರ ಲೆಕ್ಕಾಚಾರ, ಬಿ.ಎಸ್ಸಿ ಯವರ ತಂತ್ರಜ್ಞಾನ ಮತ್ತು ಬಿ.ಎ ನವರ ಸೃಜನಶೀಲತೆ ಒಂದಾದರೆ, ಮಲೆನಾಡು ಕೇವಲ ಪ್ರವಾಸಿ ತಾಣವಾಗಿ ಉಳಿಯದೆ, 'ಗ್ಲೋಬಲ್ ಸ್ಟಾರ್ಟ್ಅಪ್ ಹಬ್' ಆಗಿ ಬದಲಾಗುವುದರಲ್ಲಿ ಸಂಶಯವೇ ಇಲ್ಲ. ಬೆಂಗಳೂರಿನ ಟ್ರಾಫಿಕ್ ಸಿಗ್ನಲ್ನಲ್ಲಿ ಕೆಂಪು ಲೈಟ್ ನೋಡಿ ಬೇಸರವಾಗುವ ಬದಲು, ಮಲೆನಾಡಿನ ತೋಟದಲ್ಲಿ ಕೆಂಪು ಅಡಿಕೆ ನೋಡಿ ಖುಷಿ ಪಡುವ ದಿನಗಳು ಹತ್ತಿರದಲ್ಲೇ ಇವೆ!
- ಪ್ರಸನ್ನ ಹೊಳ್ಳ, ತೀರ್ಥಹಳ್ಳಿ
ಉಪಯುಕ್ತ ನ್ಯೂಸ್ ಈಗ ಸ್ವದೇಶಿ ಸಾಮಾಜಿಕ ಜಾಲತಾಣ Arattai ನಲ್ಲಿ... ನಮ್ಮ ಚಾನೆಲ್ಗೆ ನೀವೂ ಜಾಯಿನ್ ಆಗಿ.
ನಿರಂತರ ಅಪ್ಡೇಟ್ಗಳಿಗಾಗಿ ಉಪಯುಕ್ತ ನ್ಯೂಸ್ ಟೆಲಿಗ್ರಾಂ ಚಾನೆಲ್ಗೆ ಜಾಯಿನ್ ಆಗಿ
ಉಪಯುಕ್ತ ನ್ಯೂಸ್’ ಫೇಸ್ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್ ವಾಟ್ಸಪ್ ಗ್ರೂಪ್ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ
