ಉಜಿರೆ: ಲಕ್ಷದೀಪೋತ್ಸವದ ಪವಿತ್ರ ವಾತಾವರಣದಲ್ಲಿ ನಡೆದ ಲಲಿತಗೋಷ್ಠಿಯಲ್ಲಿ ಸನಾತನಿ ನೃತ್ಯರೂಪಕ ಪ್ರೇಕ್ಷಕರ ಮನಸ್ಸಿನಲ್ಲಿ ಆಳವಾದ ಧಾರ್ಮಿಕ, ಸಾಂಸ್ಕೃತಿಕ ಚಿಂತನೆಯನ್ನು ನೆಲೆಗೊಳಿಸಿತು. ಧರ್ಮಸ್ಥಳದ ಅಮೃತವರ್ಷಿಣಿ ಸಭಾಂಗಣದಲ್ಲಿ ಮೂಡಿಬಂದ ಈ ಕಲಾರೂಪ ಕೇವಲ ನೃತ್ಯವಾಗಿರಲಿಲ್ಲ. ಇದು ಸನಾತನ ಪರಂಪರೆಯ ಆತ್ಮತತ್ತ್ವವನ್ನು ಮನದಟ್ಟು ಮಾಡಿದ ಆಧ್ಯಾತ್ಮಿಕ ಅನುಭವವಾಗಿತ್ತು.
ರೂಪಕದ ಆರಂಭದಲ್ಲಿ ಸನಾತನ ಎಂಬ ನಿತ್ಯಶಕ್ತಿಯ ಪರಿಕಲ್ಪನೆ ಪರಿಚಯವಾಯಿತು. ಕಾಲಕ್ಕೆ, ಸ್ಥಿತಿಗೆ ಒಳಗಾಗದೆ ಶಾಶ್ವತವಾಗಿ ಹರಿಯುವ ಜ್ಞಾನಶಕ್ತಿ ಧರ್ಮಗಳ ಸಮನ್ವಯವೇ ಸನಾತನಎಂದು ನೃತ್ಯಗಾರರು ಯುಗಗಳ ರೂಪಾಂತರಗಳ ಮೂಲಕ ಬಿಂಬಿಸಿದರು.
ಕೃತಯುಗದಲ್ಲಿ ದೇವರು ಮತ್ತು ರಾಕ್ಷಸರು ಬೇರೆ ಬೇರೆ ಕಡೆ ವಾಸ ಮಾಡುತ್ತಿದ್ದರು. ತ್ರೇತಾಯುಗದಲ್ಲಿ ಒಂದೇ ಮನೆಯಲ್ಲಿ ವಾಸಿಸಲಾರಂಭಿಸಿದರು. ಕಲಿಯುಗದಲ್ಲಿ ದೇವ ಮತ್ತು ಅಸುರರು ಬೇರೆ ಲೋಕಗಳಲ್ಲಿ ಅಥವಾ ಬೇರೆ ಮನೆಗಳಲ್ಲಿ ಇರದೇ, ಒಂದೇ ಮನಸ್ಸಿನಲ್ಲಿ ನೆಲೆಯೂರಿದರು. ಈ ಕಥನವನ್ನು ರೂಪಕವು ಪ್ರಭಾವಿಯಾಗಿ ಧ್ವನಿಸಿತು.
ಮನಸ್ಸಿನೊಳಗಿನ ಅಜ್ಞಾನ, ಅಹಂಕಾರ, ಕ್ರೋಧ ಇಂತಹ ದಾನವ ಪ್ರವೃತ್ತಿಗಳನ್ನು ಸನಾತನಿಯ ಜ್ಞಾನ ಮತ್ತು ಧರ್ಮದ ಬೆಳಕಿನಲ್ಲಿ ಜಯಿಸಿ ದೇವಸನ್ನಿಹಿತ ಗುಣಗಳನ್ನು ಬೆಳಸಿಕೊಳ್ಳುವುದು ಮಾನವನ ಕರ್ತವ್ಯವೆಂದು ನೃತ್ಯ ಕಲಾವಿದರು ಮನವೊಲಿಸಿದರು.
ಭಾರತದ ಸಂಕಟ ಕ್ಷಣಗಳಲ್ಲಿ ಸನಾತನಿಯ ಶಕ್ತಿ ಹೇಗೆ ಪ್ರತಿಫಲಿಸಿದೆ ಎಂಬುದು ವೇದಿಕೆಯ ಮೇಲೆ ಮರುಕಳಿಸಿತು. ಪುಲಿಕೇಶಿಯ ಬನಶಂಕರಿಯ ಆರಾಧನೆ, ಅಮೋಘವರ್ಷನ ಲಕ್ಷ್ಮೀ ಆರಾಧನೆ, ವಿಜಯನಗರ ಸಾಮ್ರಾಜ್ಯಕ್ಕೆ ಲಭಿಸಿದ ಭುವನೇಶ್ವರಿಯ ಕರುಣೆ, ಶಿವಾಜಿ ಮಹಾರಾಜರಿಗೆ ಸಿಕ್ಕ ತುಳಜಾ ಭವಾನಿಯ ಅನುಗ್ರಹ ಇವೆಲ್ಲವೂ ರೂಪಕದ ಮೂಲಕ ಅನಾವರಣಗೊಂಡವು. ಸನಾತನ ಚೈತನ್ಯದ ಜೀವಂತಿಕೆ ಪರಿಚಯಿಸಿದವು.
ಆದಿ ಶಂಕರರು ಉತ್ತರದ ತುದಿ ಕಾಶ್ಮೀರದಿಂದ ಕನ್ಯಾಕುಮಾರಿಯವರೆಗೆ, ಪಶ್ಚಿಮದಿಂದ ಪೂರ್ವಕ್ಕೆ ಸನಾತನ ಧರ್ಮದ ಜ್ಞಾನ ದೀವಿಗೆಯನ್ನು ಪಸರಿಸಿದ ಬಗೆಯನ್ನು ಅಭಿವ್ಯಕ್ತಿಸಿದ ದೃಶ್ಯ ಪ್ರೇಕ್ಷಕರಲ್ಲಿ ರೋಮಾಂಚನ ಮೂಡಿಸಿತು. ಕಾಶ್ಮೀರದ ಶಾರದಾ ಪೀಠ ಕೇಂದ್ರಿತವಾದ ಪ್ರಸ್ತುತಿ ಭಾರತದ ಜ್ಞಾನ, ಕಲೆ, ತತ್ವ ಚಿಂತನೆಗಳನ್ನು ನೆನಪಿಸುವ ಸಾಧನವಾಗಿತ್ತು.
ಜ್ಞಾನದಾತೆ ಶಾರದೆಯನ್ನು ಗುಡಿಯೊಳಗಿರಿಸದೆ, ಆಕೆಯ ಸಾನ್ನಿಧ್ಯ ನಮ್ಮೊಳಗೆ ಇರಬೇಕು. ಅದು ಸುಜ್ಞಾನದ ಮುಖೇನ ಜಾಗೃತಗೊಂಡು, ನಮ್ಮಲ್ಲಿ ಅಭಿವ್ಯಕ್ತಗೊಳ್ಳಬೇಕು. ನಮ್ಮ ನಡೆ ಧರ್ಮ, ನೀತಿ, ವೈಚಾರಿಕತೆಯ ಪರುಧಿಯೊಳಗೆ ಬಂದಾಗ ಮಾತ್ರ ನಮ್ಮೊಳಗೊಂದು ಹೊಸ ಬೆಳಕು ಮೂಡಲು ಸಾಧ್ಯ ಎನ್ನುವ ತಾತ್ಪರ್ಯ ಇಡೀ ನೃತ್ಯ ರೂಪಕದ ಒಡಲಾಗಿ ನೋಡುಗರ ಮೆಚ್ಚುಗೆಗೆ ಪಾತ್ರವಾಯಿತು.
- ಸೌಮ್ಯಾ ಕಾಗಲ್
ದ್ವಿತೀಯ ವರ್ಷ ಪತ್ರಿಕೋದ್ಯಮ ವಿಭಾಗ
ಎಸ್,ಡಿಎಂ ಸ್ನಾತಕೋತ್ತರ ಕೇಂದ್ರ ಉಜಿರೆ
ಉಪಯುಕ್ತ ನ್ಯೂಸ್ ಈಗ ಸ್ವದೇಶಿ ಸಾಮಾಜಿಕ ಜಾಲತಾಣ Arattai ನಲ್ಲಿ... ನಮ್ಮ ಚಾನೆಲ್‌ಗೆ ನೀವೂ ಜಾಯಿನ್ ಆಗಿ.
ನಿರಂತರ ಅಪ್‌ಡೇಟ್‌ಗಳಿಗಾಗಿ ಉಪಯುಕ್ತ ನ್ಯೂಸ್ ಟೆಲಿಗ್ರಾಂ ಚಾನೆಲ್‌ಗೆ ಜಾಯಿನ್ ಆಗಿ
ಉಪಯುಕ್ತ ನ್ಯೂಸ್’ ಫೇಸ್‌ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್ ವಾಟ್ಸಪ್‌ ಗ್ರೂಪ್‌ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ
