ಮಹಾ ಶಿವರಾತ್ರಿ ಹಿಂದುಗಳ ಮಹತ್ವದ ಧಾರ್ಮಿಕ ಹಬ್ಬಗಳಲ್ಲಿ ಒಂದಾಗಿದೆ. ಇದು ಪ್ರತಿ ವರ್ಷದ ಫಾಲ್ಗುಣ ಮಾಸದ ಕೃಷ್ಣ ಪಕ್ಷದ ಚತುರ್ಥಿ ತಿಥಿಯಲ್ಲಿ ಆಚರಿಸಲಾಗುತ್ತದೆ. ಮಹಾ ಶಿವರಾತ್ರಿ ದೇವಾದಿದೇವ ಮಹಾದೇವನಾದ ಶಿವನ ಪೂಜೆ, ಉಪವಾಸ, ಜಾಗರಣೆ ಮತ್ತು ಭಕ್ತಿಯೊಂದಿಗೆ ಆಚರಿಸುವ ಪವಿತ್ರ ದಿನವಾಗಿದೆ.
ಈ ದಿನ ಶಿವನು ಪಾರ್ವತಿಯೊಂದಿಗೆ ವಿವಾಹವಾದ ದಿನವೆಂದು ನಂಬಲಾಗಿದೆ.
ಆಧ್ಯಾತ್ಮಿಕ ಜಾಗೃತಿ: ಶಿವನ ಆರಾಧನೆಯ ಮೂಲಕ ಭಕ್ತರು ಮೋಕ್ಷವನ್ನು ಪಡೆಯುತ್ತಾರೆ ಎಂದು ಪುರಾಣಗಳಲ್ಲಿ ಹೇಳಲಾಗಿದೆ. ದಿವಸದ ಭಿನ್ನ ಕಾಲಗಳಲ್ಲೂ ಶಿವನಿಗೆ ಅನೇಕ ಅಭಿಷೇಕಗಳನ್ನು ಮೂಲಕ ಪೂಜೆಗಳನ್ನು ಮಾಡಲಾಗುತ್ತದೆ.
ಈ ದಿನವನ್ನು ಪೂರ್ಣ ಉಪವಾಸದಿಂದ ಆಚರಿಸಿ, ರಾತ್ರಿಯಿಡಿ ಭಜನೆ, ಧ್ಯಾನ, ಮತ್ತು ಶ್ರವಣ ಮಾಡುವ ಸಂಪ್ರದಾಯವಿದೆ. ಅಲ್ಲದೇ ಶಿವನ ಮಂತ್ರಗಳು, ಶ್ಲೋಕ ಪಠಣ, ಶಿವನ ಅಷ್ಟೋತ್ತರ, ಸಹಸ್ರನಾಮ ಪಾರಾಯಣ, ಪಂಚಾಮೃತ ಅಭಿಷೇಕ, ಭಕ್ತಿಯ ಗೀತೆಗಳ ಗಾಯನ, ಜಾಗರಣೆ ಹೀಗೆ ವಿವಿಧ ಪ್ರಕಾರಗಳಲ್ಲಿ ಶಿವನ ಆರಾಧನೆ ನಡೆಯುತ್ತದೆ.
ಈ ದಿನ ಶಿವನ ಭಕ್ತರು ಶಿವನ ಭಜನೆ, ಕಥೆಗಳ ಪಠಣ, ಧ್ಯಾನ-ತಪಸ್ಸುಗಳ ಮೂಲಕ ಪರಮಾತ್ಮನ ಅನುಗ್ರಹವನ್ನು ಪ್ರಾಪ್ತಿಗೊಳಿಸುತ್ತಾರೆ. ಕೆಲವು ನಂಬಿಕೆಗಳ ಪ್ರಕಾರ, ಶಿವನು ಈ ದಿನ ತಾಂಡವ ನೃತ್ಯ ಮಾಡಿದ್ದು, ಅದು ಸೃಷ್ಟಿ, ಸ್ಥಿತಿ ಮತ್ತು ಲಯಕ್ಕೆ ಸಂಕೇತವಾಗಿದೆ.
ಶಿವನು ಜ್ಞಾನದ ದೀವಿಗೆ ಎಂದು ಭಾವಿಸಲಾಗುತ್ತದೆ. ಮಹಾಶಿವರಾತ್ರಿ ದಿನ ಶಿವನ ಆರಾಧನೆ ಮಾಡಿದರೆ ಪಾಪಗಳಿಂದ ಮುಕ್ತಿಯು ಲಭಿಸುತ್ತದೆ ಮತ್ತು ಆತ್ಮಶುದ್ಧಿಯಾಗುತ್ತದೆ ಎಂದು ನಂಬಲಾಗಿದೆ.
ಬೆಳಗ್ಗೆ ಸ್ನಾನ ಮಾಡಿ ಪವಿತ್ರ ಮನಸ್ಸಿನಿಂದ ಶಿವನ ಆರಾಧನೆ ಮಾಡಬೇಕು. ಶಿವಲಿಂಗಕ್ಕೆ ಜಲ, ಹಾಲು, ಬಿಲ್ವಪತ್ರ, ಪುಷ್ಪ ಅರ್ಪಿಸಬೇಕು.ಓಂ ನಮಃ ಶಿವಾಯ ಮಂತ್ರವನ್ನು ಜಪಿಸಬೇಕು.
ಮಹಾಶಿವರಾತ್ರಿ ಭಕ್ತಿಗೆ, ಕರ್ಮ ಶುದ್ಧಿಗೆ ಮತ್ತು ಜೀವಾತ್ಮದ ಪರಮಾತ್ಮದಲ್ಲಿ ಲೀನಗೊಳ್ಳುವ ಯೋಗ ಕ್ಷಣವಾಗಿದೆ. ಮಹಾಶಿವರಾತ್ರಿ ಹಬ್ಬವನ್ನು ಭಕ್ತಿಭಾವದಿಂದ ಆಚರಿಸುವುದು ಶೈವ ಪರಂಪರೆಯ ಪ್ರಮುಖ ಅಂಗವಾಗಿದೆ. ಈ ಹಬ್ಬದಲ್ಲಿ ಶಿವನ ಆರಾಧನೆ, ಉಪವಾಸ, ಜಾಗರಣೆ, ಮತ್ತು ಅಭಿಷೇಕವು ಮಹತ್ವ ಪಡೆದುಕೊಂಡಿವೆ.
ಕೆಲವು ದೇವಾಲಯಗಳಲ್ಲಿ ಶಿವ-ಪಾರ್ವತಿ ವಿವಾಹೋತ್ಸವ ನಡೆಯುತ್ತದೆ. ಶಿವನ ರಥೋತ್ಸವ ಕೂಡ ಪ್ರಮುಖ ಆಕರ್ಷಣೆಯಾಗಿದೆ. ಈ ದಿನ ಅನ್ನದಾನ, ಬಡವರಿಗೆ ವಸ್ತ್ರ ದಾನ, ಮತ್ತು ಪುಣ್ಯ ಕಾರ್ಯಗಳು ಬಹಳ ಶುಭಕರವೆಂದು ನಂಬಲಾಗಿದೆ. ಕೆಲವರು ಗೋ ದಾನ ಮಾಡುತ್ತಾರೆ.
ಮಹಾಶಿವರಾತ್ರಿ ಪ್ರಾಂತ್ಯ ಭೇದವಿಲ್ಲದೆ ದೇಶಾದ್ಯಂತ ಆಚರಿಸುವ ಉಪವಾಸ, ಜಾಗರಣೆ ಪ್ರಧಾನವಾದ ಹಬ್ಬ. ಇಂದ್ರಿಯ ಖಂಡನೆ, ದೇಹ ದಂಡನೆಗೆ ಇಲ್ಲಿ ಪ್ರಾಶಸ್ತ್ಯ. ಜಗತ್ತಿನ ಕ್ಷಾಮ ದೂರವಾಗಿ ಕ್ಷೇಮ ನೆಲೆಸಲು, ನಮ್ಮ ಮುಖ ಶವ ಮುಖವಾಗದೆ ಶಿವ ಮುಖವಾಗಲು, ನಮ್ಮ ಬಾಳು ಬೀಳಾಗದೆ ಬಂಗಾರವಾಗಲು ನರ ಹರನಾಗಲು, ಜೀವ ಶಿವನಾಗಲು, ಪಶುತ್ವ ಕಳೆದುಕೊಂಡು ಪಶುಪತಿಯತ್ತ ಸಾಗಲು ಶಿವರಾತ್ರಿ ಪೂರಕವಾಗಬೇಕು; ಪ್ರೇರಕವಾಗಬೇಕು.
- ಡಾ.ಪ್ರಸನ್ನಕುಮಾರ ಐತಾಳ್, ಉಜಿರೆ
ನಿರಂತರ ಅಪ್‌ಡೇಟ್‌ಗಳಿಗಾಗಿ ಉಪಯುಕ್ತ ನ್ಯೂಸ್‌ ಟೆಲಿಗ್ರಾಂ ಚಾನೆಲ್‌ಗೆ ಜಾಯಿನ್ ಆಗಿ
ಉಪಯುಕ್ತ ನ್ಯೂಸ್‌’ ಫೇಸ್‌ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್‌ ವಾಟ್ಸಪ್‌ ಗ್ರೂಪ್‌ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ
