- ಡಾ. ಕೆ.ಜಿ. ಲಕ್ಷ್ಮೀನಾರಾಯಣಪ್ಪ, ಸಾಹಿತಿ ಮತ್ತು ಸಂಶೋಧಕರು
ಸುಂದರೇ ಸುಂದರೀ ಲಂಕಾ ಸುಂದರೇ ಸುಂದರೀ ಕಥಾ|
ಸುಂದರೇ ಸುಂದರೀ ಸೀತಾ ಸುಂದರೇ ಕಿಂ ನ ಸುಂದರಮ್ ||
ಮಾನವನ ಜೀವನ ಸಾರ್ಥಕವಾಗಬೇಕು, ಸಮೃದ್ಧವಾಗ ಬೇಕು, ಸುಂದರವಾಗ ಬೇಕು ಎಂದರೆ ರಾಮಾಯಣದ ಸುಂದರಕಾಂಡವನ್ನು ಓದಬೇಕು. ಜಾತಿ-ಮತ, ಪಂಥಗಳ ಬೇಧವಿಲ್ಲದೇ, ವಿದ್ಯಾರ್ಥಿ, ಉದ್ಯೋಗಿ, ವ್ಯಾಪಾರಿ, ಸ್ತ್ರೀ-ಪುರುಷ ಯಾರೇ ಆಗಿರಲಿ ಸಾಧಕರಾಗಿ ಬದುಕಿನಲ್ಲಿ ಕೀರ್ತಿವಂತರಾಗಲು ಸುಂದರಕಾಂಡವನ್ನು ಓದಲೇಬೇಕು.
ಶ್ರೀರಾಮ, ಸೀತಾಮಾತೆ, ಸ್ವರ್ಣನಗರಿ ಲಂಕೆ ಎಲ್ಲವೂ ಸುಂದರವೇ. ಅದರಲ್ಲಿ ಹನುಮಂತ ತನ್ನ ನಡೆನುಡಿಗಳಿಂದ ಹೇಳಿಕೊಡುವ ಜೀವನ ಪಾಠ ನಮ್ಮ ಬದುಕನ್ನು ಸುಂದರಗೊಳಿಸುತ್ತದೆ ಆದ್ದರಿಂದ ಮಾರುತಿಗೆ ಸುಂದರ ಎಂಬ ಹೆಸರಿದೆ.
ಸುಂದರಕಾಂಡದಲ್ಲಿ ಹನುಮಂತನು ಶ್ರೀರಾಮದೂತನಾಗಿ ಸಮುದ್ರವನ್ನು ಹಾರಿದ, ಸೀತೆಯನ್ನು ಕಂಡ, ಸೀತಾಮಾತೆಗೆ ಶ್ರೀರಾಮನ ವಾರ್ತಯನ್ನು ತಿಳಿಸಿದ, ರಾವಣನ ಅಹಂಕಾರವನ್ನು ಮುರಿದ, ವಿಜಯಿಯಾಗಿ ಮರಳಿ ಬರುವ ಕಥೆ ಇದೆ. ಎಷ್ಟು ವರ್ಣಿಸಿದರೂ, ಎಷ್ಟು ಹೇಳಿದರೂ ಮುಗಿಯಲಾರದ ಅಗಾಧತೆ ಸುಂದರಕಾಂಡದಲ್ಲಿ ಇದೆ.
ರಾಮಾಯಣವು ನೂರಾರು ಭಾಷೆಗಳಲ್ಲಿ ತರ್ಜುಮೆಗೊಂಡಿದೆ. ಅನೇಕ ದಾರ್ಶನಿಕರು, ಜ್ಞಾನಿಗಳು, ಕವಿಗಳು ಹನುಮಂತನ ಗುಣಗಾನವನ್ನು ಮಾಡಿದ್ದಾರೆ, ತುಳಸಿದಾಸರ ತುಳಸಿ ರಾಮಾಯಣ, ಕನ್ನಡದಲ್ಲಿ ಕುವೆಂಪುರವರ ರಾಮಾಯಣ ದರ್ಶನಂ ಮೊದಲಾದ ಕೃತಿಗಳು ಆಸ್ತೀಕರ, ಸಜ್ಜನರ ಪ್ರೀತಿಗೆ ಪಾತ್ರವಾಗಿವೆ. ಸುಂದರಕಾಂಡ ಕಥಾಭಾಗದಲ್ಲಿ ಹೆಜ್ಜೆ-ಹೆಜ್ಜೆಗೂ ವ್ಯಕ್ತಿತ್ವ ನಿರ್ಮಾಣದ ಸಂದೇಶಗಳಿವೆ. ಸುಂದರಕಾಂಡ ಸಾಧಕರಿಗೆ ದಾರಿದೀಪವಾಗಿದೆ. ಹನುಮನ ಗುಣಗಳನ್ನು ಅರಿತು ನಡೆದರೆ ಕಷ್ಟಗಳು ತಾನಾಗಿಗೇ ಪರಿಹಾರವಾಗುತ್ತವೆ. ಗುರಿ ಕೈಗೆಟಕುತ್ತದೆ.
ಬಲಭೀಮನ ಆಯ್ದ ಹತ್ತು ಗುಣಗಳು ಹಾಗೂ ಅವುಗಳ ಸಂದೇಶಗಳು ಹೀಗಿವೆ.
1) ಧ್ಯಾನ- ಸೀತಾನ್ವೇಷಣೆಗಾಗಿ ಲಂಕೆಗೆ ಹಾರುvuದಕ್ಕೂ ಮೊದಲು ಹನುಮಂತ ಧ್ಯಾನಾಸಕ್ತನಾಗಿದ್ದ. ನಿರಂತರವಾಗಿ ಶ್ರೀರಾಮಮಂತ್ರ ಜಪ ಮಾಡುತ್ತಿದ್ದ, ತಂದೆಯಾದ ವಾಯುದೇವರು ಹಾಗೂ ತಾಯಿ ಅಂಜನಾದೇವಿಯನ್ನು ಮನದಲ್ಲಿಯೇ ಸ್ಮರಿಸುತ್ತಾ ಸಮುದ್ರವನ್ನು ಕಣ್ಣಲ್ಲಿಯೇ ಅಳೆದ. ಅಂಗದ, ಜಾಂಬುವಂತ ಮೊದಲಾದವರು ಸ್ತೋತ್ರ ಮಾಡಿ ”ಹನುಮಂತ ಅಗಾಧ ತೇಜೋಬಲದಿಂದ ಬಾಲ್ಯದಲ್ಲಿ ಸೂರ್ಯನನ್ನೇ ಮರೆಮಾಚಿದ ವೀರ ನೀನು! ನಿನಗೆ ಈ ಸಮುದ್ರ ದೊಡ್ಡದೇ?” ಎಂದು ನೆನಪಿಸಿಕೊಟ್ಟರು. ಹನುಮಂತ ತನ್ನ ಗುರಿಯನ್ನು ತಲುಪುವ ನಿರ್ಧಾರ ಮಾಡಿದ. ಶ್ರೀರಾಮಮಂತ್ರವ ಧ್ಯಾನ ಮಾಡುತ್ತಾ ನಿರಾಯಾಸವಾಗಿ ಸಾಗರವನ್ನೇ ಹಾರಿದ.
ಸಂದೇಶ- ಯಾರಿಗೆ ನಿಶ್ಚಲ ಮನಸ್ಸು, ಆತ್ಮವಿಶ್ವಾಸ, ಗುರಿಯ ಸ್ಪಷ್ಟಕಲ್ಪನೆ ಇರುವದೋ, ಯಾರು ಧ್ಯಾನಾಸಕ್ತರಾಗಿ ಫಲಾಫಲಗಳ ಚಿಂತೆಯಲ್ಲಿ ತೊಡಗದೇ ತಮ್ಮ ಕಾರ್ಯಪ್ರವೃತ್ತರಾಗುವರೋ ಅವರು ಖಂಡಿತವಾಗಿ ಸಾಧನೆ ಮಾಡುತ್ತಾರೆ.
2) ಶಕ್ತಿ- ಲಂಕೆಗೆ ಜಿಗಿಯಲು ಸನ್ನದ್ಧನಾದ ಆಂಜನೇಯ ತನ್ನ ಮೈಯನ್ನು ಹಿಗ್ಗಿಸಿ ಅತಿವೇಗವಾಗಿ ಸಮುದ್ರ ಲಂಘನೆಗಾಗಿ ಹಾರಿದ.
ಸಂದೇಶ- ಸಾಧಕರಿಗೆ ತಮ್ಮ ಗುರಿ ಸಾಧಿಸಲು ಸೂಕ್ತವಾದ ದೈಹಿಕಶಕ್ತಿ ಬೇಕು, ನಿಜ. ಶಕ್ತಿಗೆ ಮತ್ತೊಂದು ಹೆಸರೇ “ಬಲಭೀಮ” ಹನುಮಂತನ ಹೆಸರಿನಲ್ಲಿಯೇ ಭಾರತದಾದ್ಯಂತ ವ್ಯಾಯಾಮ ಶಾಲೆಗಳು, ಗರಡಿಮನೆಗಳು, ಯೋಗಸಂಸ್ಥೆಗಳು ಇವೆ. ಬಜರಂಗಿಯನ್ನು ನೆನೆದರೆ ಸಾಕು ಯುವಕರ ಹುಮ್ಮಸ್ಸು ಹೆಚ್ಚುತ್ತದೆ. "ಶಕ್ತಿ" ಒಮ್ಮಿಂದೊಮ್ಮಲೆ ಬರುವಂಥದಲ್ಲ ಅದನ್ನು ಸರಿಯಾದ ಸಂಸ್ಕಾರ, ನಿರಂತರ ಪರಿಶ್ರಮದಿಂದ ಗಳಿಸಬೇಕು, ಸಮಯ ಬಂದಾಗ ಮಾತ್ರ ಉಪಯೋಗಿಸಬೇಕು.
3) ಧೈರ್ಯ- ವಾಯುವೇಗದಲ್ಲಿ ಸಮುದ್ರವನ್ನು ಹಾರುತ್ತಿರುವಾಗ ದೇವತೆಗಳ ಅಣತಿಯಂತೆ "ಸುರಸಾ" ಹನುಮಂತನನ್ನು ತಡೆಯುವ ಪ್ರಯತ್ನ ಮಾಡುತ್ತಾಳೆ. ಹನುಮಂತನ ಸತ್ವಪರೀಕ್ಷೆಗೆ ಮುಂದಾಗುತ್ತಾಳೆ. ಅತಿಬಲವಂತನಾದ ವಾಯುಪುತ್ರನನ್ನು ನೋಡಿ ಪರೀಕ್ಷೆಮಾಡಲು ಬಂದವಳು ಅಪ್ರತಿಮ ಶಕ್ತಿವಂತನ ಎದುರು ಮೌನವಾಗಿ ಹಿಂದೆ ಸರಿಯುತ್ತಾಳೆ.
ಸಂದೇಶ- ಸಾಧಕರಿಗೆ ಅನೇಕ ರೀತಿಯ ಸತ್ವ ಪರೀಕ್ಷೆಗಳು ಬರುತ್ಲಲೇ ಇರುತ್ತವೆ ಆದರೆ ಆದರೆ ಬಲಗುಂದದೇ ಹನುಮಂತನಂತೆ ಮುಂದೆಸಾಗುವ "ಧೈರ್ಯ" ಇರಬೇಕು. ಶ್ರೀರಾಮ ಮಂತ್ರದ ಧ್ಯಾನದಲ್ಲಿ ಇರುವವರಿಗೆ ವಿಘ್ನಗಳು ಬಾಧಿಸುವುದಿಲ್ಲ.
4) ಸಾಹಸ- ಪರ್ವತರಾಜ ಹೈಮಗಿರಿ ಸಾಗರದಿಂದ ಮೇಲೆದ್ದು ಹನುಮಂತನಿಗೆ ವಿಶ್ರಾಂತಿಪಡೆಯಲು ಆಗ್ರಹಿಸಿದ. ಮಹಾಬಲಶಾಲಿಯಾದ ಹನುಮಂತನಿಗೆ ಎಲ್ಲಿಯ ಆಯಾಸ? ಎಲ್ಲಿಯ ಆಲಸ್ಯ? ಒಂದು ಕ್ಷಣವೂ ನಿಲ್ಲದೇ ಮುಂದೆ ಸಾಗಿದ.
ಸಂದೇಶ- ಸಾಧನೆಯ ಮಾರ್ಗದಲ್ಲಿ ಆಯಾಸ, ಆಲಸ್ಯಕ್ಕೆ ಒಳಗಾಗದೇ ಇರುವದೇ ಸಾಹಸ.
5) ಪರಾಕ್ರಮ- "ಸಿಂಹಿಕಾ" ಎಂಬ ರಾಕ್ಷಸಿಗೆ ಸಮುದ್ರದ ಮೇಲೆ ಹಾರುವ ಯಾವದೇ ಪ್ರಾಣಿಪಕ್ಷಿಯನ್ನು ಅದರ ನೆರಳಿನ ಮೂಲಕವೇ ತನ್ನ ಬಾಯಿಯೊಳಗೆ ಎಳೆದುಕೊಳ್ಳುವ ಅದ್ಭುತವಾದ ಶಕ್ತಿ ಇತ್ತು. ವೀರಹನುಮಂತನು ಚಾಣಾಕ್ಷತೆಯಿಂದ ಅತಿ ಚಿಕ್ಕರೂಪತಾಳಿ ಅವಳ ಬಾಯಿ ಹೊಕ್ಕು ಮತ್ತೆ ಹೊರಬಂದು ಆ ರಾಕ್ಷಸಿಯನ್ನು ಸಂಹರಿಸಿ ಮುಂದೆ ಸಾಗಿದನು.
ಸಂದೇಶ- ಸಾಧಕರು ಎದುರಾಗುವ ಸಮಸ್ಯೆಗಳನ್ನು ಅತ್ಯಂತ ಚತುರತೆಯಿಂದ ಪರಿಹರಿಸಿಕೊಳ್ಳುತ್ತಾರೆ.
6) ಸ್ಪಷ್ಟತೆ- ಹನುಮಂತನು ಮಹಾಕಡಲನ್ನು ದಾಟಿ ಸ್ವರ್ಣಮಯವಾದ ಲಂಕೆಯನ್ನು ನೋಡುತ್ತಾನೆ. ನಗರದ ರಕ್ಷಕಿಯಾದ ಲಂಕಿಣಿಯನ್ನು ಪರಿಹರಿಸಿತ್ತಾನೆ. ಚಿಕ್ಕರೂಪ ತಾಳಿ ಲಂಕಾನಗರಿಯಲ್ಲಿ ಅಲೆದಾಡುತ್ತಾನೆ. ಅಲ್ಲಿ ಅನೇಕ ಸ್ಪುರದ್ರೂಪಿಯಾದ ಸ್ತ್ರೀಯರನ್ನು ಕಾಣುತ್ತಾನೆ. ಹನುಮಂತ ಹಿಂದೆ ಎಂದೂ ಸೀತೆಯನ್ನು ನೋಡಿರಲಿಲ್ಲ, ಆದರೆ ಮಾತೆಯ ಗುಣಗಳನ್ನು ಕೇಳಿ ಅರಿತಿದ್ದ, ಆ ಸ್ಥಳದಲ್ಲಿ ಮಾರುತಿಗೆ ಜಾನಕಿ ಕಾಣಿಸಲಿಲ್ಲ, ಅಲ್ಲಿದ್ದವರಾರೂ ಸೀತಾಮಾತೆ ಅಲ್ಲ ಎಂದು ಮತ್ತೆ ಹುಡುಕುತ್ತಾ ಸಾಗುತ್ತಾನೆ. ಅಶೋಕವನದಲ್ಲಿ ಇರುವ ಸ್ವತಃ ದೇವಿಸ್ವರೂಪಿಣಿಯಾದ, ತಾನು ಧ್ಯಾನದಲ್ಲಿ ಕಂಡ ಮಾತೃರೂಪವನ್ನು ನೋಡಿ ಸಂತೋಷ ಪಡುತ್ತಾನೆ. ಅವಳೇ ಸೀತೆ ಎಂದು ಸ್ಪಷ್ಟವಾಗಿ ಗುರುತಿಸುತ್ತಾನೆ.
ಸಂದೇಶ- ಸಾಧಕರಿಗೆ ಗುರಿಯ ಸ್ಪಷ್ಟತೆ ಇರಬೇಕು. ಸಂಶಯಗಳಿಂದ ಮುಕ್ತರಾಗಿ ಇರಬೇಕು. ಸರಿಯಾದದ್ದನೇ ಹುಡುಕುವ ಕಲೆ ಇರಬೇಕು.
7) ಸಚ್ಚಾರಿತ್ರ- ಬಹಳ ಹುಡುಕಾಟ ಮಾಡಿದ ಮೇಲೆ ಸೀತೆಯನ್ನು ಕಂಡ ರಾಮದೂತ ಹನುಮಂತ ಅವಳ ಬಳಿಬಂದು “ಮಾತೆ” ಎಂದು ಸಂಬೋಧಿಸಿ ಮಾತನಾಡುತ್ತಾನೆ. ಶ್ರೀರಾಮನ ವಾರ್ತೆಯನ್ನು ಹೇಳುತ್ತಾನೆ. ಶ್ರೀರಾಮಮುದ್ರಿಕೆಯನ್ನು ತನ್ನ ಬೊಗಸೆಯಲ್ಲಿ ಹಿಡಿದು ತಲುಪಿಸುತ್ತಾನೆ. ಚೂಡಾಮಣಿಯನ್ನು ಪಡೆದು ಹೊರಡುತ್ತಾನೆ.
ಸಂದೇಶ- ಸಾಧಕರು ಸ್ತ್ರೀಯರಲ್ಲಿ ಮಾತೃಸ್ವರೂಪವನ್ನು ಕಾಣುತ್ತಾರೆ. ಒಪ್ಪಿಸಿದ ಕಾರ್ಯವನ್ನು ವಿಳಂಬಮಾಡದೇ ಪೂರೈಸುತ್ತಾರೆ. ಅನಾವಶ್ಯಕ ಮಾತನಾಡುವದಿಲ್ಲ. ಸ್ಥಾನಗೌರವಕ್ಕೆ ತಕ್ಕಂತೆ ವರ್ತಿಸುತ್ತಾರೆ.
8) ಆತ್ಮಗೌರವ- ಶ್ರೀರಾಮದೂತನಾಗಿ ಬಂದ ಹನುಮಂತನನ್ನು ರಕ್ಕಸಭಟರು ಹಿಡಿದು ತಮ್ಮ ರಾಜನಾದ ರಾವಣನಲ್ಲಿಗೆ ತರುತ್ತಾರೆ. ರಾವಣ ಸಿಂಹಾಸನದ ಮೇಲೆ ಕುಳಿತು ಪ್ರಶ್ನಿಸಲು ಮುಂದಾದಾಗ ವಾಯುಪುತ್ರ ತನ್ನ ಬಾಲವನ್ನೇ ಎತ್ತರದ ಆಸನವನ್ನಾಗಿ ಮಾಡಿ ರಾವಣನಿಗಿಂತ ಮೇಲೆ ಕುಳಿತು ತನ್ನ ಹಾಗೂ ಶ್ರೀರಾಮನ ಗೌರವಕ್ಕೆ ತಕ್ಕಂತೆ ರಾಜದೂತನಾಗಿ ಮಾತನಾಡುತ್ತಾನೆ. ಬಂಧನದಲ್ಲಿ ಇರುವೆ ಎಂಬ ಭಾವನೆ ಹನುಮಂತನಿಗೆ ಸುಳಿಯಲೇ ಇಲ್ಲ, ರಾವಣನೆದುರು ಸಣ್ಣವನಾಗಲಿಲ್ಲ.
ಸಂದೇಶ- ಸಾಧಕರು ಎಂದಿಗೂ ಆತ್ಮಗೌರವಕ್ಕೆ ವಂಚನೆ ಆಗದಂತೆ ನಡೆದುಕೊಳ್ಳುತ್ತಾರೆ. ತಮ್ಮ ಸ್ಥಾನದ ಗರಿಮೆಗೆ ಕುಂದುಬರದಂತೆ ವರ್ತಿಸುತ್ತಾರೆ.
9) ಶತ್ರುವಿನಾಶ- ಹನುಮಂತನು ತನ್ನನ್ನು ಬಂಧಿಸಲು ಪ್ರಯತ್ನಿಸಿದ ರಾಕ್ಷಸರಿಗೆ ತಕ್ಕಪಾಠ ಕಲಿಸುತ್ತಾನೆ. ರಾಜದೂತನಾದ ವಾನರಶ್ರೇಷ್ಟನಿಗೇ ಬಂಧಿಸುವದು ಎಂದರೇನು? ಇದು ರಾಜವ್ಯವಹಾರ ಅಲ್ಲವೇ ಅಲ್ಲ, ಆದರೆ ಅವರು ರಾಕ್ಷಸರು, ಬಂಧಿಸುವ ಪ್ರಯತ್ನ ಅಷ್ಟೇ ಅಲ್ಲ ಬಾಲಕ್ಕೆ ಬೆಂಕಿಹಚ್ಚಿಲು ಮುಂದಾಗುತ್ತಾರೆ !! ಮಾರುತಿ ಲಂಕೆಯನ್ನೇ ದಹನ ಮಾಡುತ್ತಾನೆ. ವೈರಿಯ ಪ್ರಯತ್ನವನ್ನು ಅರಿತು ಅದರಂತೆ ಯುದ್ಧದಲ್ಲಿ ರಾವಣನ ಮಗ ಅಕ್ಷಕುಮಾರನ ಸಂಹಾರ ಮಾಡುತ್ತಾನೆ. ರಾವಣನ ಅಹಂಕಾರ ಮುರಿಯುತ್ತಾನೆ.
ಸಂದೇಶ- ಸಾಧಕರು ತಾವಾಗಿಯೇ ಎಂದಿಗೂ ಶತ್ರುಪೀಡನೆ ಮಾಡುವದಿಲ್ಲ. ಆದರೆ ಶತ್ರುಗಳ ಕುತಂತ್ರಕ್ಕೆ ತಕ್ಕಂತೆ ಶಿಕ್ಷೆಯನ್ನು ಕೊಡುತ್ತಾರೆ ಮತ್ತು ವಿಜಯಿಯಾಗುತ್ತಾರೆ.
10) ಸಮರ್ಪಣೆ- ಹನುಮಂತನು ಶ್ರೀರಾಮನ ಸೇವೆಗಾಗಿ ಮಾಡಿದ ಪ್ರತಿಯೊಂದು ಕಾರ್ಯವೂ ಪೂಜೆಯಂತೆ ನಿರ್ವಹಿಸುತ್ತಾನೆ. ಚೂಡಾಮಣಿಯನ್ನು ಶ್ರೀರಾಮನಿಗೆ ತಂದು ಒಪ್ಪಿಸುತ್ತಾನೆ. ತನ್ನ ಸೇವೆಗೆ ಪ್ರತಿಯಾಗಿ ಏನನ್ನೂ ಅಪೇಕ್ಷಿಸದೇ ಸರ್ವಸಮರ್ಪಣಾ ಭಾವದಿಂದ ಶ್ರೀರಾಮನಿಗೆ ನಮಿಸುತ್ತಾನೆ. ಭಕ್ತಿ ಪರಾಕಾಷ್ಟೆಯನ್ನು ಮೆರೆಯುತ್ತಾನೆ.
ಸಂದೇಶ- ಸಾಧಕರು ಫಲಾಪೇಕ್ಷೆ ಇಲ್ಲದೇ ನಿರಂತರ ಶ್ರಮವಹಿಸುತ್ತಾರೆ. ಭಕ್ತಿ-ಶ್ರದ್ಧೆಯಿಂದ ತಮ್ಮ ಕಾರ್ಯವನ್ನು ದೇವರಿಗೆ ಸಮರ್ಪಿಸುತ್ತಾರೆ. ಆನಂದವನ್ನು ಹೊಂದುತ್ತಾರೆ. ಅಪಾರ ಕೀರ್ತಿಗೆ ಪಾತ್ರರಾಗುತ್ತಾರೆ.
ಹನುಮಂತ ದೇವರ ಇಂಥ ಎಲ್ಲ ಗುಣಗಳು ಭಕ್ತರಿಗೆ ಶ್ರೇಯಸ್ಸನ್ನು ತಂದುಕೊಡುತ್ತವೆ. ಜೀವನದಲ್ಲಿ ಯಶಸ್ಸು, ಕೀರ್ತಿ, ವಿಜಯವನ್ನು ಕೊಟ್ಟು ಬದುಕನ್ನು ಸುಂದರಗೊಳಿಸುತ್ತವೆ. ಬದುಕಿನಲ್ಲಿ ಯಾವ ವಿಷಯವನ್ನು ಎಲ್ಲಿಯೂ ಕಲಿಯಲು ಸಾಧ್ಯವಿಲ್ಲವೋ, ಓದು, ಬರಹ ಅಥವಾ ಉಪದೇಶಗಳಿಂದಲೂ ಅರ್ಥವಾಗುವುದಿಲ್ಲವೋ ಅಂಥ ಗುಣಗಳನ್ನು ಹನುಮಂತನು ತನ್ನ ನಡೆನುಡಿಗಳಿಂದ ಕಲಿಸಿದ ಪಾಠವೇ ಸುಂದರಕಾಂಡ.
“ಬುದ್ಧಿರ್ಬಲಂ ಯಶೋಧೈರ್ಯಂ ನಿರ್ಭಯತ್ವಂ ಅರೋಗತಾಮ್ | ಅಜಾಡ್ಯಂ ವಾಕ್ಪಟುತ್ವಂ ಚ ಹನೂಮತ್ ಸ್ಮರಣಾದ್ಭವೇತ್“
ಈ ಒಂದು ಮಂತ್ರ ಪಠಿಸಿದರೆ ಸಾಕು ಹನುಮಂತ ದೇವರ ಎಲ್ಲ ಗುಣಗಳ ಸ್ಮರಣೆಯಾಗುತ್ತದೆ. ಸುಂದರಕಾಂಡ ಪಾರಾಯಣ ಮಾಡಿದಷ್ಟೇ ಫಲಬರುತ್ತದೆ. ಬದುಕಿನ ಎಲ್ಲ ಕಾರ್ಯದಲ್ಲಿಯೂ ವಿಜಯ ಪ್ರಾಪ್ತವಾಗುತ್ತದೆ. ಜೀವನ ಸುಂದರವಾಗುತ್ತದೆ.
-ಡಾ.ಕೆ.ಜಿ. ಲಕ್ಷ್ಮೀನಾರಾಯಣಪ್ಪ
ಲೇಖಕರ ಕಿರುಪರಿಚಯ :
ಪದ್ಮಶಾಲಿ ಜನಾಂಗದ ನೇರ-ನುಡಿ, ನೇರ-ನಡತೆಯ, ಮಾದರಿ ಹಾಗೂ ಆದರ್ಶ ವ್ಯಕ್ತಿ ಡಾ|| ಕೆ.ಜಿ.ಲಕ್ಷ್ಮೀನಾರಾಯಣಪ್ಪ. ಕೇಂದ್ರೀಯ ಅಬಕಾರಿ ಇಲಾಖೆಯಲ್ಲಿ ಪೂರ್ಣಪ್ರಮಾಣದ ಕಾರ್ಯ ನಿರ್ವಹಿಸಿ, ನಿವೃತ್ತರಾದ ನಂತರ ಸಮಾಜ-ಸಾಹಿತ್ಯದತ್ತ ಮನವಾಲಿರುವ ಇವರು ಹೆಚ್ಚು ಗುರುತಿಸಿಕೊಂಡಿದ್ದು, ಪತ್ರಿಕೆಗಳ ಅಂಕಣಕಾರರಾಗಿಯೇ. “ಕೆ.ಗು.ಲ.” ಕಾವ್ಯನಾಮದಿಂದ ಪರಿಚಿತರಾದ ಇವರ ಹಲವಾರು ಕವನಗಳು ಆಕಾಶವಾಣಿ ಹಾಗೂ ದೂರದರ್ಶನಗಳಲ್ಲಿ ಬಿತ್ತರಗೊಂಡಿದೆ. ಪ್ರಸ್ತುತ ಬೆಂಗಳೂರಿನ ಬಳೆಪೇಟೆಯಲ್ಲಿರುವ ಮುಜರಾಯಿ ಇಲಾಖೆಯ ಪುರಾಣ ಪ್ರಸಿದ್ಧ ಶ್ರೀ ಲಕ್ಷ್ಮೀನರಸಿಂಹಸ್ವಾಮಿ ದೇವಾಲಯದ ಧರ್ಮದರ್ಶಿಯಾಗಿ ಮೂವತ್ತು ವರ್ಷದಿಂದಲೂ, ಪ್ರಸ್ತುತ ಅದರ ಅಧ್ಯಕ್ಷರಾಗಿಯೂ, ದೇವರಾಯನದುರ್ಗ ಶ್ರೀಲಕ್ಷ್ಮೀನರಸಿಂಹಸ್ವಾಮಿ ಕಲ್ಯಾಣೋತ್ಸವ ಸಮಿತಿಯ ಪ್ರಧಾನ ಕಾರ್ಯದರ್ಶಿಗಳಾಗಿ, ಈ ಎಲ್ಲ ಸಾಹಿತ್ಯ ಸೇವೆಯ ಜೊತೆಗೆ “ಎ.ಎಸ್.ಆರ್.ಇನ್‍ಫಿನಿಟಿ ಲಾ-ಚೇಂಬರ್ಸ್” ಆಫೀಸ್‍ನ್ನು ತೆರೆದು, ಅವರ ಚಿರಂಜೀವಿಯೊಂದಿಗೆ ಆರ್ಥಿಕವಾಗಿ ಹಿಂದುಳಿದವರಿಗೆ, ಕಷ್ಟದಲ್ಲಿರುವವರಿಗೆ ಉಚಿತ ಕಾನೂನು ನೆರವು ನೀಡುವ ಜೊತೆಗೆ ಸಮಾಜಸೇವೆ ಹಾಗೂ ಧಾರ್ಮಿಕಕ್ಷೇತ್ರದಲ್ಲೂ ಸೇವೆ ಸಲ್ಲಿಸುತ್ತಿದ್ದಾರೆ.ಪ್ರತಿಷ್ಠಿತ “ನೇಕಾರರತ್ನ” ಪ್ರಶಸ್ತಿಯ ಜೊತೆಗೆ ನಾಡಿನ ಹಲವಾರು ಸಂಘ-ಸಂಸ್ಥೆಗಳಿಂದಲೂ ಪ್ರಶಸ್ತಿ-ಗೌರವಗಳನ್ನು ಪಡೆದಿದ್ದಾರೆ.
ತುಮಕೂರು ಜಿಲ್ಲೆಯ ಪ್ರಮುಖ ದೇವಾಲಯಗಳು ಒಂದು ಅಧ್ಯಯನ ಎಂಬ ಅಪೂರ್ವವಾದಂತಹ ಗ್ರಂಥ ರಚನೆ ಮಾಡಿ, ತುಮಕೂರು ವಿಶ್ವವಿದ್ಯಾನಿಲಯದಿಂದ ಡಿ.ಲಿಟ್.ಗಾಗಿ ಪ್ರಬಂಧವನ್ನು ಮಂಡಿಸಿ, ಡಾಕ್ಟರೇಟ್ ಪದವಿಯನ್ನು ಗಳಿಸಿರುತ್ತಾರೆ. ಕರ್ನಾಟಕ ರಾಜ್ಯದ ಹನ್ನೆರಡು ಲಕ್ಷ ಪದ್ಮಶಾಲಿ ಜನಾಂಗದವರಲ್ಲಿ ಮೊಟ್ಟ ಮೊದಲನೆಯ ಸಂಶೋಧಕರಾಗಿ ಹಾಗೂ ಅರವತ್ತು ಲಕ್ಷ ನೇಕಾರ ಸಮುದಾಯಗಳಲ್ಲಿ ನಾಲ್ಕನೆಯ ಸಂಶೋಧಕರಾಗಿ, ‘ಡಿ.ಲಿಟ್ ಪದವಿ’ ಯಂತಹ ಗೌರವ ಪಡೆದಿರುವುದು ಜನಾಂಗದವರ ಹೆಮ್ಮೆಯೇ ಆಗಿದೆ.
ನಿರಂತರ ಅಪ್‌ಡೇಟ್‌ಗಳಿಗಾಗಿ ಉಪಯುಕ್ತ ನ್ಯೂಸ್‌ ಟೆಲಿಗ್ರಾಂ ಚಾನೆಲ್‌ಗೆ ಜಾಯಿನ್ ಆಗಿ
ಉಪಯುಕ್ತ ನ್ಯೂಸ್‌’ ಫೇಸ್‌ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್‌ ವಾಟ್ಸಪ್‌ ಗ್ರೂಪ್‌ಗೆ ಜಾಯಿನ್ ಆಗಲು ಈ ಲಿಂಕ್ ಕ್ಲಿಕ್ ಮಾಡಿ
