"ತ್ರಿಜಟ ಗಾಥಾ"
ತ್ರಿಜಟನೆಂಬ ವೃದ್ಧವಿಪ್ರ ಬಡವನಿದ್ದನು|
ತರುಣಿ ಪತ್ನಿ ಒಡಲು ತುಂಬ ಮಕ್ಕಳಿದ್ದರು||
ಉಂಛವೃತ್ತಿಯಲ್ಲಿ ಕಾಡು ಮೇಡು ತಿರುಗುವಾತನಿಗೆ|
ಕೊಡಲಿ ಕೊಕ್ಕೆ ಗುದ್ದಲಿಗಳೇ
ನಿಜದ ಐಸಿರಿ||
ರಾಮ ಗೈವ ದಾನ ವಿಷಯ ಕೇಳಿ ಸತಿಯು ತನ್ನ ಪತಿಗೆ|
ನೀವು ಹೋಗಿ ಬೇಡಿಕೊಳ್ಳಿ ಕೊಡುವನವನು ನಿಶ್ಚಿತ||
ಮಹರ್ಷಿಗಳ ತೇಜದಲ್ಲಿ ಬೆಳಗುತಿರುವ ಬಡವ ತ್ರಿಜಟ|
ಚಿಂದಿ ಬಟ್ಟೆ ತೊಟ್ಟು- ಹೊದೆದುಕೊಂಡು ಬಂದನು||
ರಾಮನರಮನೆಯನು ತಲುಪಿ ರಾಮನಲ್ಲಿ ಪ್ರಾರ್ಥಿಸಿದನು|
ಬಡವನೆನ್ನ ಬಡತನವನು ನೀಗು ಎಂದನು||
ಹಾಸ್ಯಕಾಗಿ ರಾಮನೆಂದ ಅಲ್ಲಿ ಇಹವು ದನಗಳೆನಿತೋ|
ನಿನ್ನ ಕೈಯ ದಂಡವನ್ನು ಎಲ್ಲಿ ತನಕ ಎಸೆವೆ ನೀನು|
ಅಲ್ಲಿ ತನಕವಿರುವ ಗೋವ ನಿನಗೆ ನೀಡುವೆ||
ಎನಲು ವೃದ್ಧ ಬಟ್ಟೆಯನ್ನು ಸೊಂಟಕಾಗ ಗಟ್ಟಿ ಬಿಗಿದು|
ದಂಡವನ್ನು ಗರಗರನೆ ತಿರುಗಿಸೆಸೆದನು||
ಶಕ್ತಿ ಮೀರಿ ಎಸೆದ ದಂಡ ಸರಯೂ ನದಿಯ ದಾಟಿ ಆಚೆ|
ಸಾವಿರಾರು ಗೋವುಗಳ ಮಾಳ ತಲುಪಿತು||
ಅಲ್ಲೆ ಇದ್ದ ಎತ್ತಿನ ಬಳಿ ಬಿದ್ದ ದಂಡ ಮಾನವಾಗೆ|
ಸಾವಿರಾರು ಗೋವುಗಳನು ರಾಮನಿತ್ತನು||
ಗೋವುಗಳನು ಸಾಕಲೆಂದು ಗೋವಳಿಗರ ನೇಮಿಸುತ|
ಬಡವ ವಿಪ್ರನಾಶ್ರಮಕೆ ಕಳುಹಿಕೊಟ್ಟನು||
ನಿನ್ನ ಶಕ್ತಿ ಪರೀಕ್ಷೆಯನ್ನು ಗೈದೆನೆಂದು ಮುನಿಯದಿರು|
ನನ್ನಲಿರುವ ಸಂಪದವ ನೀನು ಪಡೆದುಕೋ||
ನನ್ನ ಹರಸಿ ಬೀಳುಕೊಡು ವನಕೆ ನಾನು ಹೋಗಿ ಬರುವೆ|
ಸುಖವು ಇರಲಿ ನಿನಗೆ ನಿನ್ನ ಸತಿಗೆ ಸುತರಿಗೆ ||
ನಿರಂತರ ಅಪ್‌ಡೇಟ್‌ಗಳಿಗಾಗಿ ಉಪಯುಕ್ತ ನ್ಯೂಸ್‌ ಟೆಲಿಗ್ರಾಂ ಚಾನೆಲ್‌ಗೆ ಜಾಯಿನ್‌ ಆಗಿ
ಉಪಯುಕ್ತ ನ್ಯೂಸ್‌’ ಫೇಸ್‌ಬುಕ್ ಪುಟ ಲೈಕ್ ಮಾಡಿ
ಉಪಯುಕ್ತ ನ್ಯೂಸ್‌ ವಾಟ್ಸಪ್‌ ಗ್ರೂಪಿಗೆ ಸೇರಲು ಈ ಲಿಂಕ್ ಕ್ಲಿಕ್ ಮಾಡಿ
