ಶಾಲೆಗೆ ಹೋಗುವ
ಬಾಲೆಯ ನೋಡಿರಿ
ಕಾಲಲಿ ಚಿಮ್ಮುವ ನೀರಹನಿ |
ಚೀಲವ ತಾರದೆ
ಬೀಳುವ ತೆರದಲಿ
ಮಾಲಿಸಿ ಪುಸ್ತಕ ಹಿಡಿದಿಹಳು ||
ಕೈಯಲಿ ಬಳೆಯನು
ಮೈಯಲಿ ಹೊಳಪನು
ಧೈರ್ಯವ ಮೊಗದಲಿ ತೋರುವಳು |
ಸೊಯ್ಯನೆ ಓಡುತ
ಒಯ್ಯನೆ ನೆಗೆಯುತ
ವಯ್ಯಾರದ ನಗೆ ಬೀರುವಳು ||
ಒಸರನು ಚಿಮ್ಮಿಸಿ
ಕೆಸರಿನ ಕಾಲಲಿ
ಹಸುರಿನ ಲಂಗವ ತೋಯಿಸುತ |
ಮುಸಿಮುಸಿ ನಗೆಯನು
ಖುಷಿಯಲಿ ಬೀರುತ
ಹಸಿಹಸಿ ಹುಲ್ಲನು ನೋಡುವಳು ||
ಚೆಲುವಿನ ಬಾಲೆಯು
ನಲಿಯುತ ಬರುವಳು
ಜುಳುಜುಳು ನೀರನು ಹರಿಸುವಳು |
ಫಳಫಳ ಹೊಳೆಯುವ
ಕೊಳದಲಿ ಕುಣಿಯುತ
ಮಳೆಯನು ನಾಚಿಸಿ ನಗುತಿಹಳು ||
ಬಿಳಿಬಿಳಿ ರವಿಕೆಯ
ಹೊಳೆಯುವ ರದನದ
ಕಿಲಕಿಲ ನಗುವಿನ ಕಿರುಬಾಲೆ |
ಜಲದಲಿ ಕುಣಿಯುವ
ಛಲವನು ತೋರುವ
ಬಲುಹಿನ ಮುಗುದೆಗೆ ಶುಭವೆನ್ನಿ ||
(ಮೇಲಿನ ಚಿತ್ರವನ್ನುದ್ದೇಶಿಸಿ ರಚಿಸಿದ ಶರಷಟ್ಪದಿಯ ಆಶು ಶಿಶುಗೀತೆ)
ವಿ.ಬಿ.ಕುಳಮರ್ವ ✍️
